သၢႆလူမ်းမႆႈ လတ်း၊ ႁႅင်းလူမ်းမႆႈ ပုင်ႈၶိုၼ်ႈသုင် တီႈၵုၼ် ယူႊရူပ်ႊ ပတ်းပိုၼ်ႉလႄႈ မီးၵူၼ်းလူႉတၢႆ 4000 ပၢႆ၊ တီႈမိူင်း ၾရင်ႇသဵတ်ႈ၊ သပဵၼ်ႊ၊ ပႄႊၵျီႊယမ်ႊ၊ ၼႄႇထိူဝ်ႊလႅၼ်ႊ လႄႈ ဢိၵ်ႇထႅင်ႈ လၢႆၸိုင်ႈမိူင်းၸိူဝ်းၼႆႉ လႆႈၶၢမ်ႇတၢမ်ႇ ႁႅင်းမႆႈပုင်ႈၶိုၼ်ႈသုင်ဝႆႉႁၢဝ်ႈႁႅင်း။

မိူဝ်ႈဝူင်ႈပူၼ်ႉမႃးၼႆႉ ႁႅင်းလူမ်းမႆႈ တီႈမိူင်းၾရင်ႇသဵတ်ႈ ပုင်ႈၶိုၼ်ႈသုင်ႁႅင်း၊ ၼႂ်းၶၢဝ်းတၢင်း မွၵ်ႈ 80 ပီၼႆ ပဵၼ်ဢၼ်သုင်သုတ်း၊ တူဝ်ႈမိူင်းပတ်းပိုၼ်ႉ ႁႅင်းလူမ်းမႆႈပုင်ႈၶိုၼ်ႈသုင် 2 ဝၼ်းထပ်းၵၼ်၊ ၼႂ်းဝဵင်း ပႄႊရိတ်ႊသ် လႄႈ ဢိၵ်ႇထႅင်ႈလၢႆလၢႆဝဵင်းၼၼ်ႉ ႁႅင်းလူမ်းမႆႈ မီးၾၢႆႇၼိူဝ် 40 တီႊၵရီႊ သိၼ်ႊတီႊၵရဵၵ်ႉ။

ၼႂ်းဝၼ်းတီႈ 3 လိူၼ်ၵျူႊလၢႆႊၼႆႉ ၽွင်းလူင်ၾၢႆႇပၢႆးယူႇလီ မိူင်းၾရင်ႇသဵတ်ႈ ပိုၼ်ၽၢဝ်ႇဝႃႈ ၼႂ်းၶၢဝ်းတၢင်း သၢႆလူမ်းမႆႈလတ်းၽၢၼ်ႇၼႆႉ မီးၵူၼ်းလူႉတၢႆ 2025 ၵေႃႉယဝ်ႉ ဝႃႈၼႆ။

မိူၼ်ၼႆ ႁွင်ႈၵၢၼ်ၾၢႆႇၾိင်ႈၾႃႉၾူၼ်လူမ်း မိူင်းသပဵၼ်ႊၵေႃႈ ၶၢတ်ႈလၢမ်းဝႆႉဝႃႈ တေႃႇထိုင်ဝူင်ႈၼႆႉသဵင်ႈ တီႈမိူင်းသပဵၼ်ႊ ႁႅင်းလူမ်းမႆႈ တေသိုပ်ႇပုင်ႈၶိုၼ်ႈသုင်ဝႆႉ။

ၼႂ်းလိူၼ်ၵျုၼ်ႊပူၼ်ႉမႃးၼႆႉ ၵူၼ်းၸိူဝ်းလူႉတၢႆယွၼ်ႉလႆႈၶၢမ်ႇတၢမ်ႇ ၽေးၾိင်ႈၾႃႉလိူတ်ႇမႆႈ တီႈမိူင်း သပဵၼ်ႊၼႆႉ မီး 1000 ပၢႆ (1018 ၵေႃႉ)၊ ၼမ်လိူဝ် မိူဝ်ႈလိူၼ်ၵျုၼ်ႊ ပီၵၢႆၼၼ်ႉ သွင်ပုၼ်ႈ။

မိူၼ်ၼင်ႇ တီႈမိူင်းၼႄႊထိူဝ်ႊလႅၼ်ႊ တင်း မိူင်းပႄႊၵျီႊယမ်ႊၵေႃႈ မီးၶၢဝ်ႇဢွၵ်ႇမႃးဝႃႈ – ၵူၼ်းလူႉတၢႆ ယွၼ်ႉႁႅင်းလူမ်းမႆႈပုင်ႈၶိုၼ်ႈသုင်ၼႆ ၼမ်မႃးဝႆႉ ဝႃႈၼႆ။

တႄႇဢဝ်ဝၼ်းတီႈ 22 ထိုင် ဝၼ်းတီႈ 28 လိူၼ်ၵျူၼ်ႊပူၼ်ႉမႃးၼႆႉ တီႈမိူင်း ၼႄႊထိူဝ်ႊလႅၼ်ႊ ႁႅင်းလူမ်းမႆႈၶိုၼ်ႈသုင်ထိုင် 40 တီႊၵရီႊ သိၼ်ႊတီႊၵရိတ်ႉ၊ မီးၵူၼ်းလူႉတၢႆ 480 ၵေႃႉ၊ ၵမ်ႈၼမ်ပဵၼ် ၵူၼ်းၸိူဝ်းဢႃယု 80 ၶိုၼ်ႈၼိူဝ်။

မိူၼ်ၼႆ တီႈမိူင်းပႄႊၵျီႊယမ်ႊၵေႃႈ တႄႇဢဝ်ၼႂ်းဝၼ်းတီႈ 18 ထိုင် ဝၼ်းတီႈ 29 လိူၼ်ၵျူၼ်ႊၼၼ်ႉ မီးၵူၼ်းလူႉတၢႆၵႂႃႇ 1000 ပၢႆ (1222 ၵေႃႉ)၊ ႁူဝ်ၼပ်ႉၵူၼ်းလူႉတၢႆ ၼမ်လိူဝ်ဢၼ်ၶၢတ်ႈလၢမ်းဝႆႉ မွၵ်ႈ 30 %၊ ၼႂ်းၼၼ်ႉ ၵူၼ်းၸိူဝ်းလူႉတၢႆမွၵ်ႈ 530 ၵေႃႉၼႆႉ ပဵၼ်ၸိူဝ်းဢႃယု 85 ပီၶိုၼ်ႈၼိူဝ် ၼႆယဝ်ႉ။