မိူဝ်ႈလိူၼ်မၢတ်ႉၶျ် 5 ဝၼ်း ၶၢဝ်းယၢမ်းၵၢင်ၼႂ်ၸဝ်ႉ 6 မူင်းၶိုင်ႈ ၽူႈမီးၸၼ်ႉ လႄႈ ၵူၼ်းသိုၵ်းမၢၼ်ႈ ၼႂ်းတပ်ႉသိုၵ်းလွႆသူးတွင်း ဝဵင်းမူႇၸေႊ ႁေႃႈၵႃးၽႃႇသႂ်ႇၵူၼ်းမိူင်း ဝၢၼ်ႈ ၼွင်ယၢင်း တၢႆထင်တီႈ ၼိူဝ်သဵၼ်ႈ တၢင်းလူင်ႁၢႆႊဝေႊ ၸႄႈဝဵင်းမူႇၸေႊ မိူင်းတႆးပွတ်းႁွင်ႇ ။
ၵူၼ်းမိူင်း ဢၼ်ၺႃးသိုၵ်းမၢၼ်ႈႁေႃႈၵႃးမႃးၽႃႇၺႃးၼၼ်ႉ ႁဵတ်းၵၢၼ်ႁေႃႈရူတ်ႉၶိူင်ႈ ၵိၼ်ၸၢင်ႈႁပ်ႉသူင်ႇၵူၼ်း လႄႈ ၶူဝ်းၵုၼ်ႇ၊ ယၢမ်းလဵဝ်တူဝ်တၢႆမၼ်းၸၢႆး ဢဝ်ၵႂႃႇသူင်ႇဝႆႉတီႈ ႁူင်းယႃလူင် ဝဵင်းမူႇၸေႊ ယဝ်ႉဝႃႈၼႆ။
ၵူၼ်းမိူင်း ဝဵင်းမူႇၸေႊ လၢတ်ႈၽူႈတွႆႇႁွၵ်ႈဝႃႈ “ၵေႃႉၶီႇရူတ်ႉၶိူင်ႈၺႃးၵႃးၽႃႇၼၼ်ႉ တၢႆ ထင်တီႈယဝ်ႉ။ မၼ်းပဵၼ်ၸၢဝ်းမၢၼ်ႈ မႃးၶၢတ်ႈယူႇဝၢၼ်ႈၼွင်ယၢင်း။ ပဵၼ်ၵူၼ်းၵိၼ်ၸၢင်ႈ ႁပ်ႉသူင်ႇၶူဝ်း သူင်ႇၵူၼ်း (ပဵၼ်ၵႄႇရီႇ) ။ သွင်ၵေႃႉဢၼ်ႁေႃႈၵႃးၼၼ်ႉတႄႉ တႃႇၵေႃႉၼိုင်ႈ ပဵၼ်ၸၼ်ႉၵူၼ်းလူင် ၼႂ်းသိုၵ်းမၢၼ်ႈတပ်ႉလွႆသူးတွင်း၊ ၵေႃႉႁေႃႈရူတ်ႉၼၼ်ႉတႄႉ ပဵၼ်တပႄးမၼ်း။ ၶဝ်ၵႂႃႇလႄႇ KTV သေပွၵ်ႈမႃး တူၺ်းၶႃသွင်ၵေႃႉၵေႃႈ မိူၼ်မဝ်းဝႆႉႁႄမဵဝ်းမဵဝ်းၼေႈ။ ပဵၼ်လဝ်ႈႁႃႉ၊ ပဵၼ်ယႃႈတႄႉဢမ်ႇႁူႉ” ဝႃႈၼႆ။
လႆႈႁူႉဝႃႈ ၽူႈမီးၸၼ်ႉ လႄႈ ၵူၼ်းသိုၵ်းမၢၼ်ႈ သွင်ၵေႃႉၼၼ်ႉ လုၵ်ႉတၢင်းတိူင်းသိုၵ်းသၢမ်ၸဵင်ႇၶမ်း သေလႆႈၶၢႆႉၵႂႃႇႁၢပ်ႇၵၢၼ်ဝႆႉတီႈ တပ်ႉပိဝ်ႇႁႃႇ 49 ၸႄႈဝဵင်းမူႇၸေႊ ဝႃႈၼႆ။
ၼႂ်းၸႄႈဝဵင်းမူႇၸေႊၼႆႉ ပဵၼ်ဝဵင်းဢၼ်တိတ်းၸပ်းလႅၼ်လိၼ် မိူင်းတႆး- မိူင်းၶႄႇသေ ဝၢႆးလင်ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 မႃး မီးႁူင်းမိပ်ႇၼူတ်ႈ ႁူင်းပျေႃႇမူၼ်ႈ KTV လိူင်ႇၼမ်မႃးႁႅင်းတေႉတေႉ။ ၼႂ်းၶၢဝ်းတၢင်း သိုၵ်းမၢၼ်ႈယိုတ်းမိူင်းသေ ဝၢၼ်ႈမိူင်းသုၵ်ႉယုင်ႈၼႆႉ ၵူၼ်းသိုၵ်းမၢၼ်ႈ ၵႂႃႇဢႅဝ်ႇႁူင်းမိပ်ႇၼူတ်ႈ ႁူင်းပျေႃႇမူၼ်ႈ KTV ပွၵ်ႈမႃးသေ ဢဝ်ရူတ်ႉၵႃးၽႃႇၵူၼ်းမိူင်းတၢႆထင်တီႈ လႄႈ လၼ်ႇၵွင်ႈလွၵ်ႇငိုတ်ႈၸိူဝ်းၼႆႉလႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ