မိူင်းၸိူဝ်းၼႂ်းၵုၼ်ယူႊရူပ်ႊ(Europe) ၼႆႉ မိူဝ်ႈၵေႃႇႁႅၵ်ႈ မၼ်း တႄႇႁူမ်ႈၵၼ်ၵဵဝ်ႇလူၺ်ႈပၢႆးမၢၵ်ႈမီးၼႆသေ ႁဵတ်းမႃးထိုင်တီႈပဵၼ်မႃးငိုၼ်းႁူမ်ႈၵၼ် ဢၼ် ႁွင်ႉဝႃႈငိုၼ်းယူးရူဝ်ႊ(Euro)ယၢမ်းလဵဝ်။ ဝၢႆးၼၼ်ႉမႃး -“ႁဝ်းလူဝ်ႇႁူမ်ႈပႃးလွင်ႈၵၢၼ်ၵပ်းသိုပ်ႇ ၼွၵ်ႈမိူင်း”ၼႆသေ ၸင်ႇလႆႈပူၵ်းတင်ႈပဵၼ်မႃး ၸိုင်ႈမိူင်းႁူမ်ႈတုမ်ယူးရွပ်ႉ(European Union) လႄႈ ပႃႇလီႇမၼ်ႇယူးရူပ်ႊ(European Parliament)။ ပိၵ်ႉသမ်ႉဝႃႈ တိုၵ်ႉပဵၼ်မိူင်းၽႂ်/မၼ်းသေၵွၼ်းၶေႃ ၽႂ်မၼ်းယူႇသေတႃႉ သမ်ႉထၢင်ႇႁၢင်ႈၶဝ်ႈဢွၵ်ႇၸူးၵၼ်လႆႈ။ မိူဝ်ႈၽူႈတႅမ်ႈလိၵ်ႈၵႂႃႇလႄႇ မိူင်း ၵျိူဝ်ႇမၼီႇ ၵမ်းပူၼ်ႉၼၼ်ႉ လုၵ်ႉတီႈၵျိူဝ်ႇမၼီႇၵႂႃႇလႄႇ မိူင်းၼႄႊထိူဝ်ႊလႅၼ်ႊ (Netherlands) လႄႈသင်၊ ပႄႇလ်ၵျီႇယမ် (Belgium) လႄႈသင်၊ ဢမ်ႇမီးၸဝ်ႈၼႃႈတီႈမိူင်းလႂ် ၸႂ်ႉၵိုတ်းၵႃးသေ ထဵတ်ႈထၢမ်ၵႃႈလႂ်။ မိူင်းယူးရွပ်ႉၸိူဝ်းၼႆႉ မိူဝ်းၼႃႈၸၢင်ႈပဵၼ်မႃးမိူင်းလဵဝ်ၵၼ်မူတ်းယူႇႁႃႉ ၼႆ ၼၼ်ႉ ၽႂ်ဢမ်ႇၸၢင်ႈဝႃႈလႆႈ။ ၵူၺ်းၵႃႈ ဢၼ်ၸၢင်ႈဝႃႈတႄႉ ၶဝ်ဢဵၼ်းဢၢၼ်းဝႆႉၼင်ႇၼၼ်၊ ၼင်ႇ ႁိုဝ်တေပဵၼ်မႃးၵေႃႈ တေႁဵတ်းၵႂႃႇပဵၼ်ၶၵ်ႉပဵၼ်တွၼ်ႈ၊ ၶၵ်ႉလႂ်တွၼ်ႈၼၼ်ႉၵေႃႈ တေဢွၼ်ၵၼ် တိုတ်ၸၼ်မၢႆမီႈ ဢၼ်ၵူႈမိူင်းယွမ်းႁပ်ႉလႆႈၼၼ်ႉသေ တေဢွၼ်ၵၼ်ယူႇၾၢႆႇတႂ်ႈမၢႆမီႈ ၼၼ်ႉၵႂႃႇ – ဝႃႈၼႆ။
လိူဝ်ၼၼ်ႉဢမ်ႇၵႃး ပေႃးတူၺ်းပိုၼ်းၵဝ်ႇဝၼ်းလင် ႁၢၼ်ႉတေႃႇယၢမ်းလဵဝ်ၼႆႉၵေႃႈ ၼႂ်းၸေႊမိူင်း (State) ၽႂ်မၼ်းလႄႈသင်၊ ဢွၼ်ၵၼ်ၶိုင်ပွင်ႁႃတၢင်း လၢႆးမၢႆမီႈဢၼ်ၵူၼ်းမိူင်းၵူႈၸေႊမိူင်း ယွမ်း ႁပ်ႉ ယွမ်းယိပ်းတိုဝ်းၵမ်လႆႈၼၼ်ႉမႃးတိၵ်းတိၵ်းယူႇ။
ယွၼ်ႉၼၼ်လႄႈ ၸိူဝ်းၸဝ်ႈပၢႆးႁူႉၶဝ်ၵေႃႈ ၸိၸမ်ႈၼႄႉၼမ်းဝႃႈ- ၸိူဝ်းႁဝ်းၵူႈၸၢဝ်းၶိူဝ်းၼႆႉ
- လီလႆႈၸုၵ်းႁူမ်ႈၵၼ် တီႈဢဵၼ်းဢၢၼ်းဢၼ်ဝႃႈ – “ႁဝ်းလူဝ်ႇတိုတ်ႉၸၼ်မၢႆမီႈ ဢၼ်ၵူၼ်းမိူင်း ႁဝ်း ၵူႈၸေႊမိူင်းယွမ်းႁပ်ႉ ယွမ်းတိုဝ်းၵမ်ၸွမ်း”
- တိုဝ်းၵမ်ၸွမ်း ပိူင်ဢဵၼ်းဢၢၼ်းလဵဝ်လႄႈ ၸႅၵ်ႇၽႄၵၢၼ်ႁဵတ်းသၢင်ႈ (Common Goal, Diverse Actions)။
- ၽွမ်ႉႁူမ်ႈၵၼ်ၸွမ်းလွင်ႈပိူင်လၢၵ်ႇၽႂ်မၼ်း (Unity in Diversity) ။
လွၵ်းလၢႆးဢၼ်ၶဝ်ၸဝ်ႈတၢင်ႇထိုင်ၸိူင်ႉၼႆ တေဢွၼ်ၵၼ်ႁပ်ႉ ဢမ်ႁပ်ႉ(ဢမ်ႇၼၼ်) ၸွင်ႇတေ ၸၢင်ႈမီးလၢႆးဢၼ်လီလိူဝ်ၼႆႉႁိုဝ်? ဢၼ်ဝႃႈၼၼ်ႉ မီးတီႈမိူင်းၽႂ်မၼ်း ဢွၼ်ၵၼ်ထတ်းသၢင် တႅပ်းတတ်းႁင်းၽႂ်မၼ်းၵူၺ်းယဝ်ႉ။ လုင်းၵွၼ်းၶေႃမုင်ႈမွင်းဝႃႈ တေဢွၼ်ၵၼ်တူၺ်းတေႃႇၼႃႈ ၵူၼ်းမိူင်းတႆးႁဝ်း ဢၼ်လႆႈၸဵတ်ႉၼမ်ႉတႃယူႇၵူႈဝၼ်းၼၼ်ႉသေ ထတ်းသၢင်တႅပ်းတတ်းလႆႈ ၶိုတ်းမိုဝ်ႉၶိုတ်းယၢမ်းၵၼ်ယူႇ။
ဢဝ်မႃးၼႂ်းပပ်ႉၵွၼ်းၶေႃ
မၢႆ 183 လိူၼ်မၢတ်ႉၶျ် ပီ 2001
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ