သင်ႇၶၸဝ်ႈ တင်း ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းမွၵ်ႇမႆႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ႁူမ်ႈၵၼ်ၸတ်းႁဵတ်းပၢင်သွၼ်လိၵ်ႈတႆးၶၢဝ်းမႆႈ ထူၼ်ႈၵမ်း 6၊ မီးလုၵ်ႈႁဵၼ်းၶဝ်ႈႁူမ်ႈ 600 ပၢႆ ၼမ်လိူဝ်ပီၵၢႆ သွင်ပုၼ်ႈ ဝႃႈၼႆ။

ပၢင်သွၼ်လိၵ်ႈတႆးၶၢဝ်းမႆႈတီႈမွၵ်ႇမႆႇၼႆႉ တႄႇပိုတ်ႇမႃး မိူဝ်ႈဝၼ်းတီႈ 18/4/2026 တေႃႇထိုင် ဝၼ်းတီႈ 24/5/2026 ႁိုင်ၶၢဝ်းတၢင်း 45 ဝၼ်း၊ ၼႂ်း 7 ပွၵ်ႉ ၼိူဝ်ဝဵင်းမွၵ်ႇမႆႇ လႄႈ ၼွၵ်ႈဝဵင်းထႅင်ႈ 5 ဝၢၼ်ႈ။ မီးဝႆႉ ပၢင်သွၼ်ၾိင်ႈငႄႈပုတ်ႉထ ၸၼ်ႉငဝ်ႈ၊ ၸၼ်ႉၼိုင်ႈ လႄႈ ပၢင်သွၼ်လိၵ်ႈလၢႆးတႆး။ ၼႂ်းဝၼ်းတီႈ 24/5/2026 မိူဝ်ႈဝႃးၼႆႉ ၸတ်းႁဵတ်ပၢင်တွပ်ႇလိၵ်ႈ။

ႁူဝ်ပဝ်ႈ ၵေႃလိၵ်ႈလၢႆးလႄႈ ၾိင်ႈငႄႈတႆး တူင်ႇဝဵင်းမွၵ်ႇမႆႇ ၸၢႆးသႅင်ႁၢၼ် လၢတ်ႈဝႃႈ – ယိူင်းဢၢၼ်း ၶႂ်ႈႁႂ်ႈလုၵ်ႈႁဵၼ်းလုၵ်ႈဢွၼ်ႇ ၼေႃႇတႅၼ်းၶိူဝ်း လုၵ်ႈလၢၼ်တႆးႁဝ်း မေႃလိၵ်ႈတႆး၊ ႁူႉလိၵ်ႈတႆး၊ ႁူႉၾိင်ႈငႄႈၾိင်ႈထုင်းတႆးလႄႈ ႁူႉပိုၼ်းတႆးၸိူဝ်းၼႆႉသေ ၸင်ႇလႆႈပိုတ်ႇပၢင်သွၼ်လိၵ်ႈတႆးၶၢဝ်းမႆႈၼႆႉ ဝႃႈၼႆ။

ပၢင်သွၼ်လိၵ်ႈတႆးၶၢဝ်းမႆႈတီႈဝဵင်းမွၵ်ႇမႆႇ မိူဝ်ႈပီၵၢႆၼၼ်ႉ လုၵ်ႈႁဵၼ်းမီး 200 ပၢႆ၊ ပီၼႆႉ ၼမ်ၶိုၼ်ႈမႃးထိုင် 609 ၵေႃႉ၊ မေႃသွၼ်မီး 63 ၵေႃႉ။ ပွႆးလူင်းပၢင်သွၼ်ၼႆႉ တေၸတ်းႁဵတ်း ၼႂ်းဝၼ်းတီႈ 29-30-31 လိူၼ်မေႊ ၶၢဝ်းတၢင်း 3ဝၼ်း။ တီႈပွႆးလူင်းပၢင်သွၼ်ၼႆႉ တေၸတ်းပႃး ပၢင်တၢၼ်ႈၶႆႈ လွင်ႈပိုၼ်းဝဵင်းမွၵ်ႇမႆႇ၊ ပၢင်တွၼ်ႈသူးယုၵ်ႉယွင်ႈ လုၵ်ႈႁဵၼ်းလႄႈမေႃသွၼ် ဢိၵ်ႇပႃး ပၢင်မူၼ်ႈသိူဝ်း ဝႃႈၼႆ။

ၵၢၼ်လူင်ထီႉၼိုင်ႈ တႃႇၵေႃလိၵ်ႈလၢႆးလႄႈၾိင်ႈငႄႈတႆးၼႆႉပဵၼ် တေလႆႈတူင်ႉၼိုင်ႁဵတ်းသၢင်ႈ တႃႇလိၵ်ႈလၢႆးတႆး တႃႇလုၵ်ႈလၢၼ်တႆး။ ယွၼ်ႉၼၼ် ၶႂ်ႈႁႂ်ႈ ၽူႈမီးတၢင်းႁူႉတၢင်း ႁၼ်၊ ၽူႈမီးပုၼ်ႈၽွၼ်းၵူႈတီႈ ၵူႈၸႄႈဝဵင်းလႄႈ ၽူႈႁၵ်ႉလိၵ်ႈလၢႆးတႆးႁဝ်းၶႃႈ ၵူႈၵေႃႉ သႂ်ႇၸႂ် ၸွႆႈထႅမ်ပၼ်ၵႂႃႇသေၵမ်းၼႆ ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး တူင်ႇဝဵင်းမွၵ်ႇမႆႇ တိုၵ်းသူၼ်းဝႆႉၼင်ႇၼႆ။