လုၵ်ႈဢွၼ်ႇၸိူဝ်းလႆႈငိူင်ႉပၢႆႈၽေးသိုၵ်းယူႇဝႆႉၼႂ်းထိူၼ်ႇ ႁိမ်းဝၢၼ်ႈၼႃးႁီး ဢိူင်ႇၵိူၼ်ႇတူလူင် ၸႄႈဝဵင်းမွၵ်ႇမႆႇ ဢမ်ႇလႆႈၵိၼ်ၶဝ်ႈၼမ်ႉတၢင်းၵိၼ်လီ ၶၢတ်ႇဢႃႇႁႃႇရႃႉ လူဝ်ႇတၢင်း ၸွႆႈထႅမ်ဝႆႉႁၢဝ်ႈႁႅင်း ၼႆယဝ်ႉ ။

ယွၼ်ႉသိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း PNO လႄႈ တပ်ႉသိုၵ်း PNLA ပဵၼ်ပၢင်တိုၵ်းယိုဝ်းၵၼ်တၢင်းဝၢၼ်ႈပၢင်မၢၵ်ႇၼၼ်ႉသေ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ မွၵ်ႈ 5 ဝၢၼ်ႈ ႁူဝ်ၼပ်ႉၵူၼ်းၼိုင်ႈႁဵင်ၵေႃႉပၢႆ လႆႈငိူင်ႉပၢႆႈၽေးသိုၵ်းယူႇ ၼႆယဝ်ႉ ။

ၵူၼ်းမိူင်းပၢႆႈၽေးသိုၵ်း ၼိုင်ႈႁဵင်ၵေႃႉပၢႆၸိူဝ်းလႆႈငိူင်ႉယူႇဝႆႉတီႈ ၵျွင်းမုၼ်ၸဝ်ႈ ၊ ႁူင်းႁဵၼ်းသွၼ်လိၵ်ႈ ၊ ႁူင်းႁေႃ ဢိၵ်ႇတင်း ၸွမ်းႁိူၼ်းယေးပီႈၼွင်ႉၸမ်ၸႂ် ၊ ၼႂ်းထိူၼ်ႇၼႂ်းၶိူဝ်းယူႇၼၼ်ႉ ထိုင်ဝၼ်းမိူဝ်ႈၼႆႉ (6/3/2026) ၵေႃႈ ပႆႇၸၢင်ႈပွၵ်ႈမိူဝ်းႁိူၼ်းယေး – ဝႃႈၼႆ ။

ၼၢင်းယိင်းၵေႃႉၵႂႃႇၸွႆႈထႅမ် ၵူၼ်းပၢႆႈၽေးသိုၵ်း ၼႂ်းဢိူင်ႇၼႃးႁီး လၢတ်ႈတီႈၽူႈတွႆႇႁွၵ်ႈဝႃႈ -“ၼႂ်းထိူၼ်ႇဢၼ်ပၢႆႈၽေးသိုၵ်းယူႇဝႆႉယၢမ်းလဵဝ်ၼႆႉ ၼမ်ႉၵိၼ်ၼမ်ႉၸႂ်ႉၵေႃႈဢမ်ႇမီး ၊ တွၼ်ႈတႃႇတေလႆႈၼမ်ႉၼၼ်ႉ လႆႈဢဝ်ထေႃႈလႃႈၵျီႈ ၵႂႃႇတၢင်ႇမႃးဢဝ် ၊ ယွၼ်ႉၼမ်ႉၵိၼ်းၸႂ်ႁႅင်းၼႃႇလႄႈ လုၵ်ႈဢွၼ်ႇၸိူဝ်းၼႆႉၵေႃႈ ဢမ်ႇလႆႈဢၢပ်ႇၼမ်ႉႁိုင်ၼႃႇယဝ်ႉ ၊ ယွၼ်ႉ ၼၼ် ၵူၼ်းပၢႆႈၽေးသိုၵ်း ပဵၼ်တွင်ႉၵႂႃႇတွင်ႉႁႄႈၼမ်ၼႃႇ ၊ လုၵ်ႈဢွၼ်ၸိူဝ်ႉၼႆႉၵေႃႈ ယွမ် ၶၢတ်ႇဢႃႇႁႃႇရႃႉ ပေႃးၵႂႃႇႁၼ်ၼႆလီဢေးလူၼႃႇ ”- ဝႃႈၼႆ ။

ယွၼ်ႉၼမ်ႉတႃႇၸႂ်ႉတိုဝ်းႁႃယၢပ်ႇ ဢမ်ႇၵုမ်ႇထူၼ်ႈလႄႈ ၵူၼ်းထဝ်ႈ တင်း လုၵ်ႈဢွၼ် ဢၼ်လႆႈပၢႆႈၽေးသိုၵ်းဝႆႉၼၼ်ႉ ၸၢင်ႈပဵၼ်တၢင်းပဵၼ် တွင်ႉၵႂႃႇ တွင်ႉႁေႈ၊ လႆႈမႆႈၸႂ် လွင်ႈပၢႆးယူႇလီၶဝ်ဝႆႉပႃး ၼႆၼၢင်းယိင်းၵေႃႉၵႂႃႇၸွႆႈထႅမ် ၵူၼ်းပၢႆႈ ၽေးသိုၵ်းလၢတ်ႈ ။

ၽွင်းပၢင်တိုၵ်း ၼႂ်းၵႄႈသိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း လႄႈ တပ်ႉသိုၵ်း PNLA တီႈဝၢၼ်ႈပၢင်မၢၵ်ႇၼၼ်ႉ ႁိူၼ်းယေးၵူၼ်းဝၢႈၼ်ႈၺႃးၾႆးမႆႈသေလူႉၵွႆၵႂႃႇမွၵ်ႈ 20 လင်ပၢႆ ၼႆယဝ်ႉ ။

ၼၢင်းယိင်းၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈတီႈၽူႈတွႆႇႁွၵ်ႈဝႃႈ-“ၵမ်ႈၼမ် ႁိူၼ်းယေးထုၵ်ႇဢဝ်ၾႆးၽဝ်လူႉၵွႆ ဢမ်ႇၸၢင်ႈပွၵ်ႈမိူဝ်းႁိူၼ်းၶိုၼ်း တိုၵ်ႉမီးယူႇၼႂ်းထိူၼ်ႇ ၊ ၽႂ်ၵေႃႈ ပႆႇပွၵ်ႈမိူဝ်းၶိုၼ်း ၊ ၾၢႆႇတင်း PNO ၶဝ်ၵေႃႈ ဢမ်ႇၵမ်ႉထႅမ်ၸွႆႈသင်ၶႃႈ ၊ ဢွင်ႈတီႈၶဝ်ပၢႆႈၵႂႃႇယူႇဝႆႉၼၼ်ႉၵေႃႈ ၵႆႇဝဵင်းၵႆႇဝၢၼ်ႈဝႆႉလႄႈ တွၼ်ႈတႃႇ ၶဝ်ႈၼမ်ႉတၢင်းၵိၼ်ၼႆႉ ႁႃယၢပ်ႇၼႃႇ ၊ တလဵဝ်ၼႆႉ လႆႈပႅင်းၵိၼ်ပႅင်းၸႂ်ႉၶဝ်ႈၼမ်ႉတၢင်းၵိၼ်ဢၼ်ပိူၼ်ႈလူႇဝႆႉၵူၺ်း ၊ ဢမ်ႇၸၢင်ႈၵႂႃႇႁႃသိုဝ်ႉၵိၼ် ၵိၼ်းၸႂ်ဝႆႉ ”– ဝႃႈၼႆ ။

တႄႇဝၼ်းတီႈ 1 လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း PNO ႁႅၼ်းသိုၵ်းလေႃႇတိုၵ်းၸူး ငဝ်ႈငုၼ်းတပ်ႉသိုၵ်း PNLA တၢင်းဝၢၼ်ႈပၢင်မၢၵ်ႇ ။ ဝၢႆးသွင် ၾၢႆႇပဵၼ်ပၢင်တိုၵ်းၵၼ် ႁၢဝ်ႈႁႅင်း ႁိုင်ၶၢဝ်းတၢင်းလိူၼ်ပၢႆယဝ်ႉ မိူဝ်ႈ ဝၼ်းတီႈ 17/ 2 / 2026 ပျီႇတူႉၸိတ်ႉ PNO ယိုတ်းၵုမ်းလႆႈၶိုၼ်း ဝၢၼ်ႈပၢင်မၢၵ်ႇၼႆ PNO ပိုၼ်ၽၢဝ်ႇဝႆႉ ၼင်ႇၼႆ ။

ယၢမ်းလဵဝ် ပၢင်တိုၵ်း ယဵၼ်ဝႆႉသေတႃႉ ၵူၼ်းပၢႆႈၽေးသိုၵ်း မႆႈၸႂ်လွင်ႈႁူမ်ႇလူမ်ႈ ပႆႇၸၢင်ႈပွၵ်ႈမိူဝ်းႁိူၼ်းၶိုၼ်း ၼႆယဝ်ႉ ။