ၼႂ်းႁၢင်လိူၼ်မေႊ ဝၼ်းတီႈ 25 ထိုင် ဝၼ်းတီႈ 31 ၼႆႉ ၶႃႈႁၢပ်ႇၵၢၼ်ၶုၼ် ၸုမ်းပွင်ၵၢၼ် ပၢႆးပၺ်ၺႃ တႂ်ႈသိုၵ်းမၢၼ်ႈ ပိုတ်ႇႁပ်ႉသဵၼ်ႈမၢႆလုၵ်ႈႁဵၼ်းတႃႇပီ 2026-2027 ။

လုၵ်ႈႁဵၼ်းၵူၼ်းမိူင်းဝဵင်းၾၢႆၶုၼ်  ၸိူဝ်းပၢႆႈၽေးသိုၵ်းသေ ၵႂႃႇ ႁဵၼ်းလိၵ်ႈဝႆႉတီႈ  ဝဵင်းပၢင်လွင်း ၊ ယွင်ႁူၺ်ႈ ၊ တူၼ်ႈတီး ၸိူဝ်းၼႆႉၵေႃႈ ဢွၼ်ၵၼ်ပွၵ်ႈမိူဝ်းႁဵၼ်းလိၵ်ႈၶိုၼ်း ၼႂ်းၸႄႈဝဵင်းၾၢႆၶုၼ် ။ ၸိူဝ်းၶဝ်  မီးတၢင်းယၢပ်ႇၽိုတ်ႇဝႆႉလၢႆလွင်ႈ ။  ပိူင်လူင် ၾၢႆႇတၢင်းႁူင်းႁဵၼ်း ဢမ်ႇဢွၵ်ႇပၼ် ဝႂ်ၶၢႆႉႁူင်းႁဵၼ်း ၊ ၶိူဝ်းၶွင်ၸႂ်ႉတိုဝ်း ဢၼ်တၢင်းႁွင်ႈၵၢၼ်ပၢႆးပၺ်ၺႃၸိုင်ႈမိူင်းၸႅၵ်ႇပၼ်ၵေႃႈ ဢမ်ႇလႆႈႁပ်ႉ။

ဢၼ်လုၵ်ႈႁဵၼ်းလႆႈမႆႈၸႂ်သုတ်းပဵၼ် မၢၵ်ႇမႅင်းၾင်လိၼ်လႄႈ မၢၵ်ႇၸိူဝ်းပႆႇတႅၵ်ႇသေၵိုတ်းၶၢင်ႉဝႆႉၽွင်းပၢင်တိုၵ်း။ ၽူႈမီးပုၼ်ႈၽွၼ်း ဢမ်ႇၽဵဝ်ႈပၼ်ႁႂ်ႈထိုင်တီႈ။  

ၵူၼ်းမိူင်းဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ – “ လုၵ်ႈႁဵၼ်းၸိူဝ်းဢၼ်ပေႃႈမႄႈပွင်ပဵၼ်လႆႈသေ ၶႂ်ႈသူင်ႇၵႂႃႇႁဵၼ်းလိၵ်ႈတၢင်ႇတီႈတၢင်ႇဝဵင်းၼၼ်ႉ ၾၢႆႇပၢႆးပၺ်ၺႃ ဢမ်ႇဢွၵ်ႇပၼ်ဝႂ်ၶၢႆႉႁူင်းႁဵၼ်း(ကျောင်းပြောင်းလက်မှတ်) လူင်။ ၵွပ်ႈၼႆ လုၵ်ႈႁဵၼ်းၸိူဝ်းမႃးယူႇတၢင်းဝဵင်းပၢင်လွင်းၸိူဝ်းၼႆႉ လႆႈဢွၼ်ၵၼ်ၶၢႆႉမိူဝ်းႁဵၼ်းလိၵ်ႈၶိုၼ်းတီႈဝဵင်းၾၢႆၶုၼ်မူတ်းယဝ်ႉ။  လိူဝ်ၼၼ်ႉ ၶိူင်ႈၸႂ်ႉၶူဝ်းတိုဝ်းလုၵ်ႈႁဵၼ်း ၼႂ်းၾၢႆႇပၢႆးပၺ်ၺႃၸႅၵ်ႇပၼ်ၼၼ်ႉၵေႃႈ ဢမ်ႇလႆႈၸေးၵၼ်ၵူႈၵေႃႉ။ ၵူၼ်းမႂ်ႇၸိူဝ်းတိုၵ်ႉႁႃၶၢႆႉမႃးပီၼႆႉ ဢမ်ႇလႆႈၶႃႈလူင်   ”- ဝႃႈၼႆ။

 လုၵ်ႈႁဵၼ်းပီၼႆႉ ၾၢႆႇပၢႆးပၺ်ၺႃ ၸႅၵ်ႇပၼ်  ပပ်ႉတႅမ်ႈ  ၊ ပပ်ႉဢၢၼ်ႇ  ၊ ၵမ်ႁႅင်ႈ 5 လႅမ်ႈ သေဢမ်ႇၵႃး လုၵ်ႈႁဵၼ်း ၸၼ်ႉ 5 လူင်းတႂ်ႈတႄႉပၼ်ပႃး ၶူဝ်းလုၵ်ႈႁဵၼ်း ဢၼ်ၽိူၵ်ႇဢၼ်ၶဵဝ် – ၵူၺ်းၵႃႈ လႆႈငိၼ်းဝႃႈ ၽႅၼ်ႇၵေႃႈဢမ်ႇလီ ႁွႆးယဵပ်ႉဢမ်ႇၶႅမ်ႉ ဢမ်ႇတႅတ်ႈၼႅတ်ႈလႄႈ ၼုင်ႈဢမ်ႇလႆႈ – မၼ်းၸၢႆးသိုပ်ႇလၢတ်ႈထႅင်ႈၼင်ႇၼႆ ။

တီႈဝဵင်းၾၢႆၶုၼ်ၼႆႉ ႁူင်းႁဵၼ်းၼႂ်းဝဵင်းလႄႈသၢပ်ႇဝဵင်းၸိူဝ်းၼႆႉ ပိုတ်ႇၶိုၼ်းမိူၼ်ၵဝ်ႇယဝ်ႉဝႃႈၼႆသေတႃႉ ႁူင်းႁဵၼ်းတၢင်းဝၢၼ်ႈ ၸိူဝ်းမီးၾၢႆႇဢွၵ်ႇၼွင် ၸိူဝ်းၼၼ်ႉတႄႉ   လႆႈပိုင်ႇဢိင် ၵျွင်းမုၼ်ၸဝ်ႈသေ သွၼ်ႁဵၼ်းပၼ်လုၵ်ႈဢွၼ်ႇ။ ဢၼ်ပဵၼ် ႁူင်းႁဵၼ်းလူင်ပွင်ၸိုင်ႈတႄႉ ဢမ်ႇပႆႇၸၢင်ႈပိုတ်ႇ – လႆႈႁူႉၼင်ႇၼႆ ။

လိူဝ်ၼၼ်ႉ ယွၼ်ႉပဵၼ်ပိုၼ်ႉတီႈပၢင်တိုၵ်းဝႆႉလႄႈ ပေႃႈမႄႈပီႈၼွင်ႉမႆႈၸႂ်ပႃး လွင်ႈႁူမ်ႇလူမ်ႈ လုၵ်ႈဢွၼ်ႇႁဵၼ်း ယွၼ်ႉၼႂ်းဝၢၼ်ႈၼႂ်းသူၼ် တိုၵ်ႉမီးမၢၵ်ႇမႅင်းယူႇ ၼႆယဝ်ႉ။  

ၵူၼ်းၸၢႆးၸွႆႈထႅမ်ၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပွၵ်ႈမိူဝ်းတႄႉပွၵ်ႈမိူဝ်းယူႇၶိုၼ်း ၼမ် ယဝ်ႉ ၊ ယူႇတႄႉယူႇလႆႈယူႇ ၊ ၵူၺ်း လႆႈမႆႈၸႂ် လွင်ႈႁူမ်ႇလူမ်ႈ ၊ ယွၼ်ႉပဵၼ်ပၢင်တိုၵ်းဝႆႉလႄႈ လႆႈမႆႈၸႂ်မၢၵ်ႇမႅင်းတႃႇလုၵ်ႈဢွၼ်ႇဝႆႉဢေႃႈ ၊ ၶဝ် (သိုၵ်းမၢၼ်ႈ) ၶဝ်ၽဵဝ်ႈပၼ်သေတႃႉၵေႃႈ ၶဝ်ၽဵဝ်ႈပၼ်တီႈႁိူၼ်းၵူၺ်း ၸွမ်းသူၼ် ၊ ၸွမ်းႁႆႈၸိူဝ်းၼၼ်ႉ ၶဝ်ဢမ်ႇၽဵဝ်ႈပၼ် ၵူဝ်ယဵပ်ႇ ၺႃးမၢၵ်ႇ ၸိူဝ်းၼၼ်ႉၵူၺ်း  ”- ဝႃႈၼႆ ။

ႁူင်းႁဵၼ်းဢၼ်တေပိုတ်ႇၶိုၼ်း ၼႂ်းၸႄႈဝဵင်းၾၢႆၶုၼ် ၼႂ်းပီၼႆႉ ပဵၼ် ႁူင်းႁဵၼ်းၸၼ်ႉသုင် မိူင်းပၢႆး ၊ ၸၢင်ႉၽိူၵ်ႇ (ဆင်ဖြူ) ၊ လွႆပဝ်း (လွယ်ပေါ) 3 လင်လႄႈ ၊ ႁူင်းႁဵၼ်းၸၼ်ႉၵၢင် ဢုမ်ႇတိုင်း (အုံတိုင်း) ၊ လွႆထွႆး (လွယ်ထွယ်) ၊ ၼွင်လႅင် (နောင်လိုင်) ၊ၵုင်းမႆႉပႅၵ်ႇ (ထင်းရှူးကုန်း) 4 လင် လႄႈ ၊ ႁူင်းႁဵၼ်း ၸၼ်ႉငဝ်ႈ 16 လင် ၼႆယဝ်ႉ ။

တင်ႈတႄႇသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃး တေႃႇထိုင်ယၢမ်းလဵဝ် သိုၵ်းမၢၼ်ႈလႄႈ တပ်ႉ သိုၵ်း ၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF ပိုတ်းယိုဝ်းတိုၵ်းတေႃးၵၼ် ႁၢဝ်ႈႁႅင်း တီႈဝဵင်း ၾၢႆၶုၼ်  ၊ ၵူၼ်းမိူင်းလႆႈပၢႆႈၽေးသိုၵ်း ဢမ်ႇၸၢင်ႈပွၵ်ႈႁိူၼ်းၶိုၼ်းလႆႈမႃးၶၢဝ်းတၢင်း 4 ပီပၢႆ ။ ဝၢႆးလင် သိုၵ်းမၢၼ်ႈ ပိုၼ်ၽၢဝ်ႇယိုတ်းၵုမ်းလႆႈၶိုၼ်း ဝဵင်းမိူင်းပၢႆးတင်းသဵင်ႈ  ၼႂ်းဝၼ်းတီႈ 07/07/2025 ၼၼ်ႉယဝ်ႉ ၼႂ်းႁူဝ်လိူၼ် ဢေႃႊၵတ်ႊသ် ၸင်ႇပိုတ်ႇၶိုၼ်း ပႃးပီ 2026 ၼႆႉၸင်ႇ တိုၵ်ႉပိုတ်ႇလႆႈၶိုၼ်း 2 ပီၵူၺ်း ၼႆယဝ်ႉ ။