မိူဝ်ႈၼႆႉဝၼ်းတီႈ 25/5/2026 ၸုမ်းၵူၼ်းၼုမ်ႇတႆး (Dai Youth Congress) ဢွၵ်ႇၽိုၼ်လိၵ်ႈႁၢႆးငၢၼ်း တုၵ်းယွၼ်း ႁႂ်ႈၸုမ်းသိုၵ်းၶႄႇၵဝ်ႈၵၢင်ႉ (MNDAA) မူၼ်ႉမႄးလၢႆးႁဵတ်းတၢင်းသၢင်ႈ လႄႈ ပိူင်ၵၢၼ်ၽွင်းငမ်း ဢၼ်ၸႂ်ႉ တိုဝ်းယူႇယၢမ်းလဵဝ် လႄႈ သၢၼ်ၶတ်းလွင်ႈၸုမ်းသိုၵ်းၶႄႇၵဝ်ႈၵၢင်ႉ ဢဝ်ၶေႃႈၵႂၢမ်းၵၢၼ်လုၵ်ႉ ၽိုၼ်ႉသေ ႁဵတ်းႁႂ်ႈၵူၼ်းမိူင်းလႆႈတုၵ်ႉယၢၵ်ႈ ၸူမ်ၶဝ်ႈၼႂ်းလုၵ်းလုမ်တၢင်းတုၵ်ႉၶ ၼႆယဝ်ႉ။
ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈ လႄႈ ပွၵ်ႈၵမ်းသွင်မႃးၼႆႉ ၸုမ်းသိုၵ်းၶႄႇၵဝ်ႈၵၢင်ႉ ၸတ်းၵၢၼ်ၽွင်းငမ်း ၼႂ်းမိူင်းတႆးပွတ်းႁွင်ႇ ၶႂၢၵ်ႈပိုၼ်ႉတီႈမႂ်ႇထႅင်ႈ ၵႂႃႇၸွမ်းသဵၼ်ႈတၢင်းၼင်ႇၽႅၼ်ၵၢၼ်ဝႆႉသေ ပႃးၵွင်ႈၵၢင်ႇႁႃလွၵ်ႇငိုတ်ႈ ၵူၼ်းမိူင်းသေ မၢင်တီႈပေႃးလႆႈပဵၼ်ပၼ်ႁႃ လွင်ႈတႅၵ်ႇယႅၵ်ႈ ၸၢဝ်းၶိူဝ်းၵၼ်မႃးၼႆ ၸုမ်းၵူၼ်းၼုမ်ႇတႆး (DYC) ၶူၼ်ႉႁၼ်ၵဵပ်းၶေႃႈမုၼ်းလႆႈဝႆႉၼင်ႇၼႆ။
ၽွင်းၸုမ်းသိုၵ်းၶႄႇၵဝ်ႈၵၢင်ႉၵုမ်းၵမ် ပၼ်ႇၵၢၼ်ၽွင်းငမ်း ၸွမ်းၸႄႈဝဵင်းၼႂ်းမိူင်းတႆးပွတ်းႁွင်ႇယူႇၼၼ်ႉ ၸုမ်းၵူၼ်းၼုမ်ႇတႆးႁၢႆးငၢၼ်းဝႃႈ “ၶူၼ်ႉႁၼ်ပၼ်ႁႃ လွင်ႈၵၢၼ်ၽွင်းငမ်း ၵၢၼ်သိမ်းတီႈလိၼ် ၊ ၵၢၼ်ပူၼ်ႉပႅၼ်သုၼ်ႇလႆႈၵူၼ်း လႄႈ ပၼ်ႁႃၵၢၼ်မၢၵ်ႈမီး ၼႂ်းပိုၼ်ႉတီႈ” ၸဵမ်ၸိူဝ်းၼႆႉ။
ၼႂ်းပၼ်ႁႃၵၢၼ်ၽွင်းငမ်း လႄႈ ၵၢၼ်သိမ်းတီႈလိၼ်ၼၼ်ႉ မီးယူႇ 5 ၶေႃႈ – 1) ၶတ်းၸႂ်ဢဝ်ပိူင်ၾၢင် ၶႄႇၵဝ်ႈၵၢင်ႉယဵတ်ႈသႂ်ႇပၼ် ၵူၼ်းမိူင်းၸိူဝ်းယူႇ ၼႂ်းပိုၼ်ႉတီႈသေ ႁဵတ်းႁႂ်ႈပိူင်ၾၢင်ငဝ်ႈတိုၼ်းၸၢဝ်းၶိူဝ်း ၵူၼ်းၼႂ်းပိုၼ်ႉတီႈ ႁၢႆၵႂႃႇၵမ်းလွႆးလွႆး လူၺ်ႈသဵၼ်ႈတၢင်းဢွမ်ႈ 2) လႅၵ်ႈလၢႆႈ ပိူင်ၾၢင်ငဝ်ႈတိုၼ်း မူႇဝၢၼ်ႈ ၊ ဝဵင်း လူၺ်ႈတီႈဢမ်ႇထၢမ်ၵၢင်ၸႂ်ၵူၼ်းပိုၼ်ႉတီႈ 3) လွၵ်ႇငိုတ်ႈ ၵူၼ်းမိူင်းပိုၼ်ႉတီႈသေ တဵၵ်းတဵင်သိုဝ်ႉ ယိုတ်းဢဝ်တီႈလိၼ် 4) ပၼ်သုၼ်ႇလႆႈၵူၼ်းၼွၵ်ႈမိူင်း ၼမ်လိူဝ်ၵူၼ်းၼႂ်းပိုၼ်ႉတီႈ 5) ၶုတ်းဢဝ်ၶူဝ်းၶွင် သၽႃႇဝ ၾိင်ႈတိုၼ်းၼႂ်းပိုၼ်ႉတီႈ – ဝႃႈၼႆ။
လိူဝ်ၼၼ်ႉၵူၺ်းဢမ်ႇၵႃး သိုၵ်းၶႄႇၵဝ်ႈၵၢင်ႉ (MNDAA) ၼႆႉ တဵၵ်းတဵင် ပူၼ်ႉပႅၼ်သုၼ်ႇလႆႈၵူၼ်းမိူင်း ၵူႈပၢႆးပၢႆးသေ ဢမ်ႇဝႆႉၼမ်ႉၼၵ်း ၶေႃႈသဵင်ၵၢင်ၸႂ်ၵူၼ်းမိူင်းပိုၼ်ႉတီႈ၊ ႁပ်ႉႁၼ်လီႁဵတ်းၸွမ်း ၶေႃႈပူင် ၵူၼ်းတၢင်ႇၶိူဝ်းတၢင်ႇမိူင်း ၊ ဢမ်ႇၵုမ်းထိင်းပၼ် ၵၢၼ်ပိုတ်ႇပၢင်တေႃႇလွင်း ႁူင်းပျေႃႇမူၼ်ႈ KTV ၸိူဝ်းၼႆႉသေ ႁဵတ်းႁႂ်ႈၵူၼ်းၾိင်ႈယၢမ်ႈလူႉ ပဵၼ်ၽူႈလၵ်ႉ ၵူၼ်းၸူၼ်ၵႂႃႇၼမ်ႁႅင်း၊ တဵၵ်းယွၼ်းၵူၼ်း ႁႂ်ႈၶဝ်ႈႁၢပ်ႇၵၢၼ်သိုၵ်း ဢမ်ႇထၢတ်ႇဢမ်ႇဝၢႆး ၸဵမ်ၸိူဝ်းၼႆႉ ဝႃႈၼႆ။
လွင်ႈၼႆႉၵူၼ်းမိူင်းသႅၼ်ဝီလၢတ်ႈဝႃႈ – “ တူဝ်ယၢင်ႇ မိူၼ်ၼင်ႇတၢင်းဝဵင်းသႅၼ်ဝီ ၼႆႉ သိုၵ်းၵဝ်ႈၵၢင်ႉတင်ႈၵဵတ်ႉ/လၢၼ်ႇ ဢမ်ႇပၼ်ၸဝ်ႈရူတ်ႉ လႄႈ ၵူၼ်းၵႃႉ ၵဵပ်းၶွၼ်ႇရူတ်ႉၵႃးၵႂႃႇမႃး ၼႂ်းဝဵင်းၼွၵ်ႈဝဵင်း၊ ၵဵပ်းငိုၼ်း ၵဵပ်းၵူၼ်းသိုၵ်း ႁဵတ်းႁႂ်ႈၵူၼ်းမိူင်းလႆႈယၢပ်ႇၸႂ်ၸွမ်း ၊ တဵၵ်းသိုဝ်ႉတီႈလိၼ်သူၼ်ႁႂ်ႈၼႃးၵူၼ်းမိူင်းၵႃႈထုၵ်ႇၵႃႈပေႃးၸိူဝ်းၼႆႉ ပဵၼ်မႃးဢမ်ႇထၢတ်ႇဢမ်ႇဝၢႆး”– ဝႃႈၼႆ။
ၵွပ်ႈၼၼ် ၾၢႆႇၸုမ်းၵူၼ်းၼုမ်ႇတႆး ၸင်ႇလႆႈႁဵတ်းၽိုၼ်လိၵ်ႈႁၢႆးငၢၼ်းတုၵ်းယွၼ်း ၶႂ်ႈႁႂ်ႈၸုမ်းသိုၵ်းၶႄႇ ၵဝ်ႈၵၢင်ႉ ထတ်းသၢင်ၶိုၼ်း ပိူင်ၵၢၼ်ၽွင်းငမ်းသေ မူၼ်ႉမႄး ႁႂ်ႈၵိုင်ႇငမ်ႇၸွမ်း သဵၼ်ႈတၢင်းတီမူဝ်ႊၶရေႊၸီႊ ၾႅတ်ႊတရႄႊ မီးလွင်ႈၽဵင်ႇပဵင်းၵူႈၾၢႆႇ – ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူးသိုၵ်းၵဝ်ႈၵၢင်ႉ တႃႇတွင်ႈထၢမ်ယူႇၵေႃႈၵပ်းသိုပ်ႇဢမ်ႇလႆႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ