မိူဝ်ႈဝၼ်းတီႈ 28/5/2026 ၽူႈမီးပုၼ်ႈၽွၼ်း ၸၼ်ႉၸေႈတွၼ်ႈ ၸုမ်းသိုၵ်းဝႃႉ တင်း သိုၵ်းၶႄႇၵဝ်ႈၵၢင်ႉ ႁူပ်ႉဢုပ်ႇၵၼ် တီႈဝဵင်းႁူဝ်ပၢင်ႇ ပွၵ်ႈဢွၼ်တၢင်းသုတ်း လင်ပၢင်တိုၵ်းၽႅၼ် ၵၢၼ်ယၼ်ႇသိုၵ်း 1027 ယဝ်ႉတူဝ်ႈလီ ၼႆယဝ်ႉ။

ၼႂ်းပၢင်ႁူပ်ႉထူပ်းၵၼ်ၼၼ်ႉ တင်းသွင်ၾၢႆႇလႆႈဢုပ်ႇဢူဝ်းၵၼ်ၵႂႃႇ ၵဵဝ်ႇလူၺ်ႈ ၵၢၼ်ႁူမ်ႇလူမ်ႈၸွမ်းလႅၼ်လိၼ် ၼႂ်းၼႃႈတီႈသွင်ၸုမ်းတိတ်းၵၼ်၊ ၵၢၼ်ၵႃႉၶၢႆ၊ ၵၢၼ်ၵပ်းသိုပ်ႇတိတ်းတေႃႇ လႄႈ တႃႇႁႂ်ႈၵူၼ်းမိူင်းၵႂႃႇမႃးလႆႈ လွတ်ႈလႅဝ်းၼႂ်းပိုၼ်ႉတီႈ ၊ လွင်ႈၵူတ်ႇထတ်း တီႉၺွပ်း ယႃႈမဝ်းၵမ် လႄႈ ၵၢၼ်ၵႃႉၶၢႆၵူၼ်းၸဵမ်ၸိူဝ်းၼႆႉ ၼႆယဝ်ႉ။

လႆႈႁူႉဝႃႈ သိုၵ်းဝႃႉ တင်း သိုၵ်းၶႄႇၵဝ်ႈၵၢင်ႉ လႆႈၶေႃႈတူၵ်းလူင်းၵၼ်ၵႂႃႇ 4 ၶေႃႈ။ ၼႂ်းပၢင်ႁူပ်ႉထူပ်းၼၼ်ႉ ၾၢႆႇတပ်ႉသိုၵ်းဝႃႉ ၽူႈမီးပုၼ်ႈၽွၼ်း ၾၢႆႇၵၢၼ်ၽွင်းငမ်း ၼႂ်းၸႄႈတွၼ်ႈ ဝဵင်းႁူဝ်ပၢင်ႇ လႄႈ ၾၢႆႇတပ်ႉသိုၵ်ႉၶႄႇၵဝ်ႈၵၢင်ႉသမ်ႉ ၽူႈမီးပုၼ်ႈၽွၼ်း ၼႂ်းႁွင်ႈၵၢၼ်ၽွင်းငမ်း ၸႄႈဝဵင်းၵုၼ်လူင်၊ သႅၼ်ဝီ၊ လၢဝ်ႇၵၢႆး ၸဵမ်ၸိူဝ်းၼႆႉ ၶဝ်ႈႁူမ်ႈၸွမ်း ၼႆယဝ်ႉ။

မိူဝ်ႈပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၼၼ်ႉ သိုၵ်းဝႃႉ ယိုတ်းဢဝ်ဝဵင်းၵုၼ်လူင် တီႈၼႂ်းမိုဝ်း သိုၵ်းၶႄႇၵဝ်ႈၵၢင်ႉယဝ်ႉ သိုၵ်းဝႃႉဢဝ် ဝဵင်းႁူဝ်ပၢင်ႇ၊ ပၢင်ႇလူင်၊ ၼမ်ႉတိုၵ်း၊ ၼႃးဝီး ၸိူဝ်းၼႆႉ ၶဝ်ႈမႃးပဵၼ်ၼႂ်း ၸႄႈတွၼ်ႈႁူဝ်ပၢင်ႇဝႆႉ တင်းသဵင်ႈ။