ႁႅင်းၵၢၼ်တႆး ၼႂ်းၸႄႈဝဵင်းၵဵင်းမႂ်ႇၵေႃႉၼိုင်ႈ ၵႂႃႇၵိၼ်လဝ်ႈၸွမ်းဢူၺ်းၵေႃႉယဝ်ႉမဝ်းလဝ်ႈသေ ပွၵ်ႈမႃးႁိူၼ်း ၽိတ်းမေႃးၵၼ်တင်း မႄႈၸဝ်ႈႁိူၼ်းသေ ဢဝ်ၽႃႉထိူဝ်ၶေႃး၊ ပၢတ်ႇမိၼ်ႇႁူ လႄႈ ဢဝ်မိတ်ႈဝိုတ်ႉသႂ်ႇ ၼႃႈၽၢၵ်ႇ ထိုင်တီႈပေႃးလႆႈသူင်ႇၵႂႃႇယူတ်းယႃတူဝ် တီႈႁူင်းယႃ ၼႆယဝ်ႉ။

ၵူၼ်းၵေႃႉႁဵတ်းၽိတ်း ပူၼ်ႉပႅၼ်တေႃႇမေးၼၢင်းၸဝ်ႈၵဝ်ႇၶိုၼ်းၼၼ်ႉ ၸိုဝ်ႈႁွင်ႉ ၸၢႆးမၢႆ ဢႃႇယု 40 ပၢႆ ပဵၼ်ၵူၼ်းၸႃႇတိ မိူင်းၼၢႆး တိုၵ်ႉတႄႇၼႃႈႁိူၼ်းၸွမ်း ၼၢင်းသႂ် ဢႃႇယု 40 ပၢႆ (ၵူၼ်းမိူင်းၼၢႆးၼင်ႇၵၼ်) ႁိုင် 1 လိူၼ်ၵူၺ်း ။

ၼွင်ႉယိင်း ၼၢင်းသႂ် လၢတ်ႈၼႄတီႈၽူႈတွႆႇႁွၵ်ႈဝႃႈ “ပၼ်ႁႃမၼ်းၼႆႉ တႄႇမႃးတီႈဝႃႈ ဢမ်ႇမီးၵၢၼ်ႁဵတ်းၵူႈဝၼ်းၼၼ်ႉဢေႃႈ။ ၵွၼ်ႇၼႃႈမၼ်း ပႆႇမႃးႁဵတ်းႁၢႆႉတေႃႇ ပီႈၼၢင်းႁဝ်း မွၵ်ႈ 2 ဝၼ်းၼႆႉ မၼ်းမႃးယွၼ်းငိုၼ်းၵႂႃႇ 100 ၿၢတ်ႇႁႄ ၵႂႃႇၵိၼ်လဝ်ႈၸွမ်းတႆးၵေႃႉမၼ်း။ ထႅင်ႈဝၼ်းၼိုင်ႈသမ်ႉ မီးၵၢၼ်ႁဵတ်းယူႇၵေႃႈ ဢမ်ႇၵႂႃႇႁဵတ်းၵၢၼ်ႁႄ ယွၼ်းငိုၼ်းၵႂႃႇထႅင်ႈ 200 ၿၢတ်ႇႁႄၵႂႃႇၵိၼ်လဝ်ႈထႅင်ႈ။ ယဝ်ႉၵေႃႈပွၵ်ႈမႃးႁိူၼ်း – ၶႃပီႈၼၢင်းႁဝ်းလႆႈထဵင်သူပ်း ထဵင်ၵႂၢမ်းၵၼ်ႁႄ ပီႈၼၢင်းႁဝ်းဝႃႈ ပေႃးႁဵတ်းၼႆတိၵ်းတိၵ်း ဢမ်ႇယူႇၸွမ်းၵၼ်ၵႂႃႇလႆႈၼႆ ႁင်းမၼ်း။ ၽွင်းၼၼ်ႉ မၼ်းသမ်ႉမဝ်းမႃးႁႅင်းၼႃႇ။ ၽိူဝ်ႇဝႃႈၼၼ်ၵေႃႈ မၼ်းထၢမ်ပီႈၼၢင်းႁဝ်းၶိုၼ်းဝႃႈ ဢမ်ႇဢဝ်ၵဝ်တေႉယဝ်ႉၼေႃႈၼႆႁႄ ၵႂႃႇလၢၵ်ႈဢဝ် ၽႃႉမႃးထိူဝ်မိၼ်ႇႁူပီႈ ၼၢင်းႁဝ်း ယဝ်ႉၵေႃႈ ထိူဝ်ပႃးၶေႃးပီႈၼၢင်းႁဝ်း။ ၶိုၼ်းဢဝ်ၽႃႉဝိုတ်ႉၵႂႃႇပၵ်းသႂ်ႇ ၼႃႈၽၢၵ်ႇပီႈၼၢင်းႁဝ်း ပေႃးပိၼ်ႈလူမ်ႉၵႂႃႇ။ ယဝ်ႉမၼ်းၵေႃႈ ဢဝ်ရူတ်ႉၶိူင်ႈသီလမ်ႁႄ ပၢႆႈဢွၵ်ႇ ႁိူၼ်းၵႂႃႇၶႃႈဢေႃႈ” ဝႃႈၼႆ။

ၵွၼ်ႇၸၢႆးမၢႆ ပႆႇပၢႆႈတၢင်းၽိတ်းၵႂႃႇၼၼ်ႉ လႆႈလွၵ်ႇငိုတ်ႈဝႆႉတီႈ ပီႈၼွင်ႉၸိူဝ်ႉၶိူဝ်း လႄႈ မေးၼၢင်းမၼ်းဝႃႈ “ပေႃးမီးတိုဝ်ႉတၢင်း တေပွၵ်ႈမႃးႁဵတ်းႁၢႆႉတီႈ ၵူၼ်းၼႂ်းမုင်ႉႁေႃႁိူၼ်း ၶိုၼ်း” ၼႆလႄႈ ယၢမ်းလဵဝ်ပီႈၼွင်ႉၸိူဝ်ႉၶိူဝ်းၾၢႆႇၼၢင်းသႂ် လႆႈဢဝ်လိူင်ႈၼႆႉ တိူင်ႇလၢတ်ႈ ၸႅင်ႈဝႆႉတီႈ ႁူင်းပလိၵ်ႈ လွႆလေႃႇ ဝဵင်းၵဵင်းမႂ်ႇယဝ်ႉလီငၢမ်း – ဝႃႈၼႆ။

ပၼ်ႁႃၼႆႉ ပဵၼ်ၵႂႃႇမိူဝ်ႈဝၼ်းတီႈ 23/5/2026 ယၢမ်းဝၢႆးဝၼ်း 2 မူင်း ထိုင် 3 မူင်း (ၶၢဝ်းယၢမ်းမိူင်းထႆး) တီႈဝဵင်းလွႆလေႃႇ ဝဵင်းၵဵင်းမႂ်ႇၼၼ်ႉသေ ယၢမ်းလဵဝ် ၼၢင်းသႂ်ၵေႃႉၺႃးႁဵတ်း ႁၢႆႉၼၼ်ႉ ၵႂႃႇယူႇသဝ်းဝႆႉတီႈ ဢွင်ႈလွတ်ႈၽေးဝႆႉ ဝႃႈၼႆ။

လႆႈႁူႉဝႃႈ ပီႈၼွင်ႉၸိူဝ်ႉၶိူဝ်း လႄႈ ၵူၼ်းၸိူဝ်းမိုတ်ႈၵိုဝ်းႁူႉၸၵ်း ၸၢႆးမၢႆ ၵေႃႉႁဵတ်းပူၼ်ႉပႅၼ်တၢင်းၽိတ်းၼႆႉ မီးဝႆႉတၢင်း ႁၢင်တူင်ႊ လႄႈ သၼ်ပႃႇတွင်း။ သင်မီးၽူႈလႂ်ၽႂ်သေဢမ်ႇဝႃႈ ထူပ်းႁၼ် ၸၢႆးမၢႆၸိုင် ယွၼ်းတၢင်းၸွႆႈထႅမ် ပွင်ႇၶၢဝ်ႇပၼ်တီႈ ႁူင်းပလိၵ်ႈ ဝဵင်းလွႆလေႃႇ ၵဵင်းမႂ်ႇလႆႈၵမ်းသိုဝ်ႈ ဝႃႈၼႆ။

ဝဵင်းလွႆလေႃႇၼႆႉ မီးၸဵင်ႇၸၢၼ်းဝၼ်းတူၵ်းဝဵင်းၵဵင်းမႂ်ႇ ယၢၼ်ၵႆၵၼ်မွၵ်ႈ 70 ၵီႊလူဝ်ႊမီႊတိူဝ်ႊ။ ပဵၼ်ပိုၼ်ႉတီႈ ႁႅင်းၵၢၼ်တႆး ၵႂႃႇႁဵတ်းၵၢၼ်ၼႂ်းသူၼ်ၽုၵ်ႇသွမ်ႈလႄႈလဵင်ႉလူတူဝ် သတ်း။

ၼႂ်းလိူၼ်မေႊၼႆႉၵူၺ်း ႁႅင်းၵၢၼ်တႆး ၸိူဝ်းၺႃးၸဝ်ႈၼႃႈတီႈပလိၵ်ႈထႆး တီႉၺွပ်း ယွၼ်ႉလၵ်ႉၸူၼ် လႄႈ ၶႃႈႁႅမ်ပေႃႈလဵင်ႉၼၢႆးၸၢင်ႈ၊ ၽိတ်းမေႃးၵၼ်သေ ႁဵတ်းႁၢႆႉၵၼ် ၸွမ်းတႃႈၸွမ်းတၢင်းၸိူဝ်းၼႆႉ မီးၼမ်မႃးၶိုၼ်း ။

ယၢမ်းလဵဝ် ၾၢႆႇၸဝ်ႈၼႃႈတီႈပလိၵ်ႈထႆး တႄႇလူင်းပိုၼ်ႉတီႈ ၵူတ်ႇထတ်းဝတ်းဝႂ် ၵူၼ်းမိူင်းၼွၵ်ႈ ၸိူဝ်းၶဝ်ႈမႃးယူႇၼႂ်းမိူင်းထႆးတင်းသဵင်ႈ တေႁိုင်ၶၢဝ်းတၢင်း 3 လိူၼ်။ ႁႅင်းၵၢၼ် ၸိူဝ်းဢမ်ႇမီးဝတ်းဝႂ်တဵမ်ထူၼ်ႈ၊ မီးဝတ်းဝႂ်ယူႇသေတႃႉ ႁဵတ်းၵၢၼ်ဢမ်ႇမႅၼ်ႈၸွမ်းၼင်ႇ ၼႂ်းဝတ်းၼၼ်ႉၵေႃႈ သင်ၵူတ်ႇထတ်းၺႃးၸိုင် ၸၢင်ႈၺႃးတီႉၺွပ်း ဢဝ်လိူင်ႈပဵၼ်တၢင်း ၵၢၼ် ၼႆယဝ်ႉ။