“လွင်ႈဢွင်ႇမၢၼ်ၼႂ်းၸၢတ်ႈပၢၼ်ၶႃႈႁဝ်းၼႆႉ ဢဝ်ႁႅင်းဢၼ်ဝႃႈ လွင်ႈတၢင်းမုင်ႈမွင်းၼႆၼၼ်ႉသေ ၶိုၼ်ႈမႃးၶႃႈဢေႃႈ။ လွင်ႈမုင်ႈမွင်းၼႆႉ ႁဵတ်းႁႂ်ႈၶႃႈႁဝ်းမုင်ႈႁၼ် ယိူင်းဢၢၼ်းဢၼ်ၶႃႈၶႂ်ႈပဵၼ် ၊ ဢၼ်ပဵၼ်လႆႈ လႄႈ တိုဝ်ႉတၢင်းလၢႆလၢႆဢၼ်တႃႇၵႂႃႇႁွတ်ႈသူႇၸူးထိုင်။ လွင်ႈမုင်ႈမွင်းၼႆႉ ႁဵတ်းႁႂ်ႈၸၢတ်ႈပၢၼ်ၶႃႈႁဝ်းလုၵ်ႉတီႈ ၵူၼ်းဢမ်ႇမီးမိူင်း သေထိုင်တီႈပဵၼ်မႃးလႆႈလုၵ်ႈႁဵၼ်းၸၼ်ႉၸွမ် ဢၼ်ႁဵၼ်း ၵဵဝ်ႇၵပ်းၾၢႆႇပၢႆးယူတ်းယႃ။

ၼႂ်းလုမ်ႈၾႃႉၼႆႉ – ၵူၼ်းဢမ်ႇမီးမိူင်း (ၵူၼ်းၶၢႆႉယၢႆႉဢွၵ်ႇပိုၼ်ႉတီႈသေ ယဵၼ်းပဵၼ်ၵူၼ်းတူၵ်းႁၢႆ ၵူၼ်းဢမ်ႇမီးသုၼ်ႇလႆႈပဵၼ်ၵူၼ်းမိူင်းလႂ်မိူင်းၼိုင်ႈ) ၼၼ်ႉ တိုၵ်ႉမီးယူႇတင်းၼမ် တေဢမ်ႇယွမ်း 10 လၢၼ်ႉၵေႃႉ။ ၸိူဝ်းၶဝ် ဢမ်ႇၸၢင်ႈမီးတၢင်းမုင်ႈမွင်းတႃႇမိူဝ်းၼႃႈၸဝ်ႈၵဝ်ႇ။ ယွၼ်ႉပိူဝ်ႈၸၢတ်ႈပၢၼ်ၶဝ်ထုၵ်ႇၶၢတ်ႈၶွပ်ႇတတ်းသုၼ်ႇလႆႈသုၼ်ႇပဵၼ်ဝႆႉ။

ၶႃႈႁဝ်းၸင်ႇမႃးလူင်းမိုဝ်းႁဵတ်းၶူင်းၵၢၼ် ‘Dare Your Dream’ႁတ်းၾၼ် – ၼႆသေ ႁူမ်ႈမိုဝ်းၵၼ်တင်း ၸၢတ်ႈၸိုင်ႈလုမ်ႈၾႃႉ UN ဢိၵ်ႇပႃးတင်းႁွင်ႈၵၢၼ်ၾၢႆႇပူၵ်းပွင်တူင်ႇဝူင်းၵူၼ်း လႄႈ လွင်ႈမၼ်ႈၵိုမ်းၸၢတ်ႈပၢၼ်ၵူၼ်း- တႃႇၸွႆႈၵၼ်ၵႄႈလိတ်ႈပၼ်ႁႃၵူၼ်းႁၢမ်းမိူင်း ။ ယွၼ်ႉဝႃႈ ပၼ်ႁႃၵူၼ်းႁၢမ်းမိူင်းၼႆႉ မၼ်းပဵၼ်ပၼ်ႁႃယႂ်ႇဢၼ်ၼိုင်ႈၼႂ်းလုမ်ႈၾႃႉ – ပဵၼ်ပၼ်ႁႃဢၼ်လုမ်ႈၾႃႉတေလႆႈၵႄႈလိတ်ႈဢၼ်ၼိုင်ႈ။

ၶႃႈၵေႃႈမီးယိူင်းဢၢၼ်းဢၼ်ၼိုင်ႈ ၶႂ်ႈလၢတ်ႈၼေၵူၼ်းဢမ်ႇမီးမိူင်း (คนไร้สัญชาติ )တၢင်းလုမ်ႈၾႃႉဝႃႈ -Beauty with a Purpose ႁၢင်ႈလီလူၺ်ႈမီးယိူင်းဢၢၼ်း- ၼႆၶႃႈဢေႃႈ။”

ၼွင်ႉၼမ်ႉၽိုင်ႈ ၵၢၼ်ႊထိရႃႊတေႊၶျ ၽတ်းထၼႃႊၵုလ်ႊ – လုၵ်ႈလၢၼ်ႁႅင်းၵၢၼ်တႆး ဢၼ်ပဵၼ်ၼၢင်းငၢမ်း Miss World Thailand 2026 လၢတ်ႈၵႂႃႇတီႈပၢင်ၶေႉၶဵင်ႇ ၼင်ႇၼႆ။

ပၢင်ၶေႉၶဵင်ႇ Miss World Thailand 2026 ၼႆႉၸတ်းႁဵတ်းၵႂႃႇမိူဝ်ႈၶမ်ႈဝႃး 10/05/2026 ယၢမ်းၵၢင်ၶမ်ႈ MCC Hall The Mall Lifestore ။ မီးၼၢင်းႁၢင်ႈလီ ၼႂ်းမိူင်းထႆး 21 ၵေႃႉၶဝ်ႈၶေႉၶဵင်ႇၵၼ်။ ၼႂ်းၼၼ်ႉလိုၼ်းသုတ်းလႆႈလိူၵ်ႈၼၢင်းႁၢင်ႈလီသုတ်း ၵေႃႉၼိုင်ႈ။ ပဵၼ်ၼွင်ႉၼမ်ႉၽိုင်ႈ ဢႃယု 25 ပီ ပဵၼ်လုၵ်ႈႁႅင်းၵၢၼ်တႆး ယူႇၵဵင်းႁၢႆး မိူင်းထႆး ။

မၼ်းၼၢင်းၼႆႉ ပီၵၢႆၵေႃႈထုၵ်ႇလိူၵ်ႈပဵၼ် ၼၢင်းသၢဝ်ၵဵင်းမႂ်ႇဝႆႉ။ ၵမ်းၼႆႉၵေႃႈမၼ်းၼၢင်းတၢင်တူဝ်ၸႄႈတွၼ်ႈၵဵင်းမႂ်ႇသေၵႂႃႇၶေႉၶဵင်ႇလႄႈထုၵ်ႇလိူၵ်ႈပဵၼ်ၼၢင်းငၢမ်းလုမ်ႈၾႃႉ Miss World Thailand မိူင်းထႆး။

Miss World Thailand ၼႆႉ ၼွၵ်ႈလိူဝ်ၼွင်ႉၼမ်ႉၽိုင်ႈ ယဝ်ႉ မီးလွင်ႈလိူၵ်ႈၵႅမ်ၼၢင်းႁၢင်ႈလီထႅင်ႈ 4 ၵေႃႉ။ ၼႂ်းၼၼ်ႉ ၵႅမ်ၼၢင်းႁၢင်ႈလီသုတ်းထိၼိုင်ႈပဵၼ်ၼွင်ႉ မႃႊလၢႆႊၵ ၶၢၼ်း ။ မၼ်းၼၢင်းပဵၼ်ၶိူဝ်းတႆးလိုဝ်ႉ ယူႇၵဵင်းႁၢႆး ။ မႄႈပဵၼ် တႆးလိုဝ်ႉလႄႈၶႄႇ – ပေႃႈသမ်ႉပဵၼ် ပႃႊၵိတ်ႊသထၢၼ်ႊ။

ၼွင်ႉၼမ်ႉၽိုင်ႈၼႆႉ ပဵၼ်လုၵ်ႈဢွၼ်ႇတႆး ဢၼ်ၵိူတ်ႇမိူင်းထႆး။ ၵူၺ်းၵႃႈပေႃႈမႄႈပဵၼ်ႁႅင်းၵၢၼ်ယၢၼ်မိူင်းလႄႈ မၼ်းၼၢင်းဢမ်ႇမီးဝတ်းဝႂ်သုၼ်ႇလႆႈပဵၼ်ၵူၼ်းမိူင်းထႆး။ မၼ်းၼၢင်းႁဵၼ်းလိၵ်ႈတီႈၵဵင်းႁၢႆး။ ပဵၼ်လုၵ်ႈႁဵၼ်းၵတ်ႉၶႅၼ်ႇ ၺၢၼ်ႇၽၢႆ လႄႈထိုင်တီႈလႆႈသိုပ်ႇႁဵၼ်းၵဵဝ်ႇၵပ်းၾၢႆႇပၢႆးယူတ်းယႃ “ คณะเทคนิคการแพทย์ มหาวิทยาลัยเชียงใหม่” တီႈၸၼ်ႉၸွမ်ၵဵင်းမႂ်ႇ။

ၽွင်းမၼ်းၼၢင်းႁဵၼ်းလိၵ်ႈတီႈၸၼ်ႉၸွမ်ယူႇၼၼ်ႉၵေႃႈ မၼ်းၼၢင်းပဵၼ်ႁူဝ်ပဝ်ႈ သမႃးၶူမ်းၸုမ်းလုၵ်ႈႁဵၼ်းၵဵဝ်ႇၵပ်းၾၢႆႇပၢႆးယူတ်းယႃ ၼႆႉၵူၺ်းဢမ်ႇၵႃး ဢိင်ၼိူဝ်ၵၢၼ်တူင်ႉၼိုင်လွင်ႈသုၼ်ႇလႆႈၵူၼ်းႁၢမ်းမိူင်းသေမၼ်းၼၢင်းလႆႈႁူမ်ႈမိုဝ်းတင်းၸၢတ်ႈၸိုင်ႈလုမ်ႈၾႃႉသေႁဵတ်းၵၢၼ်တူင်ႉၼိုင်ထႅင်ႈလူးၵွၼ်ႇ။

မၼ်းၼၢင်းၼႆႉပဵၼ်ၵူၼ်းဢၼ်မီးတၢင်းႁူႉ ၽႃႇသႃႇ ၵႂၢမ်းလၢတ်ႈလႄႈ တၢင်းႁူႉႁွပ်ႈတူဝ်လၢႆလၢႆယၢင်ႇ။ ပဵၼ်ၵူၼ်းၼုမ်ႇတႆးဢၼ်ၵတ်ႉၶႅၼ်ႇလႅတ်းၽၢႆၵေႃႉၼိုင်ႈ။

ၼႂ်းလိူၼ်ထူၼ်ႈ 9 ပီ 2026 ၼႆႉ ၼွင်ႉၼမ်ႉၽိုင်ႈ တေလႆႈတၢင်တူဝ်မိူင်းၸိုင်ႈထႆးသေ ၵႂႃႇၶေႉၶဵင်ႇၼၢင်းငၢမ်း Miss World တီႈမိူင်းဝႅတ်ႉၼၢမ်း ဢၼ်တေၸတ်းႁဵတ်းၵမ်းထူၼ်ႈ 73။