ၸၢႆးသႅၼ်ႁွမ် ဝူင်းတႆး လုၵ်ႈလၢၼ်ႁႅင်းၵၢၼ်တႆး တေလႆႈၶဝ်ႈၶႅင်ႇပိတ်ႉမၢၵ်ႇၼင် ၸၼ်ႉၸိုင်ႈမိူင်း ၼႂ်းမိူင်းထႆး ပတ်ႉပိုၼ်ႉ ဝႃႈၼႆ။

ပေႃးထိုင်မႃး ဝၼ်းတီႈ 22-23/03/2025 ၼႆႉ ယူႇတီႈ ၸုမ်းပိတ်ႉမၢၵ်ႇၼင် ဝၶျိရႃႊလႆႊ တေလႆႈတၢင်တူဝ် ၼႂ်းၸိုင်ႈထႆး ပွတ်းႁွင်ႇ (တွၼ်ႈၼိူဝ်) သေ ၶဝ်ႈၶႄႉၶႅင်ႇပိတ်ႉမၢၵ်ႇၼင် ၸၼ်ႉၸိုင်ႈမိူင်း တီႈဝဵင်းလူင် မိူင်းၵွၵ်ႇ ၸိုင်ႈထႆး ၼႆယဝ်ႉ။

ၸၢႆးသႅင်ဝၼ်း ၽူႈယၢမ်ႈၸွႆႈသွၼ်ပိတ်ႉမၢၵ်ႇၼင် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတိတ်ႉ ပူၼ်ႉမႃးၼႆႉ ၸုမ်းၶဝ် လႆႈပိတ်ႉမၢၵ်ႇၼင်ဢွင်ႇပေႉ ၵူႈၸႄႈတွၼ်ႈ ၼႂ်းမိူင်းထႆးပွတ်းႁွင်ႇ (တွၼ်ႈၼိူဝ်) တင်းမူတ်းၼႆႉသေ ယၢမ်းလဵဝ် ၸုမ်းၶဝ် တေလႆႈတၢင်တူဝ်မိူင်းထႆးပွတ်းႁွင်ႇၼႆႉ တေလႆႈၶဝ်ႈၶႄႉၶႅင်ႇ ၸၼ်ႉၸိုင်ႈမိူင်း ၼႂ်းမိူင်းထႆးပတ်းပိုၼ်ႉ တီႈၵုင်းထဵပ်ႈ ၼႂ်းဝၼ်းတီႈ 22-23 တေထိုင်ၼႆႉဢေႃႈ”- ဝႃႈၼႆ။

ၸုမ်းပိတ်ႉမၢၵ်ႇၼင် ဢၼ်တေလႆႈၶဝ်ႈၶႅင်ႇၵၼ် တီႈဝဵင်းလူင် မိူင်းၵွၵ်ႇၼၼ်ႉ တေပဵၼ်ဢွၼ်ႇၸၢႆးသႅၼ်း ဢႃယု 15 ပီ လူင်းတႂ်ႈ။ ၼႂ်းမိူင်းထႆး ၵူႈပွတ်းတွၼ်ႈ တေမႃးၶႅင်ႇၵၼ် ဝႃႈၼႆ။

“တွၼ်ႈတႃႇ ၸုမ်းၶဝ် တေလႆႈၵႂႃႇၶႅင်ႇ တီႈၵုင်းထဵပ်ႈၼၼ်ႉ ၶဝ်တေလႆႈလဵၼ်ႈပေႉ ၼႂ်းၸႄႈတွၼ်ႈၵဵင်းမႂ်ႇၼႆႉ လၢႆလၢႆၵမ်းၵွၼ်ႇ ၸင်ႇတေလႆႈၶၢတ်းလိူၵ်ႈၵႂႃႇ။ ၸၢႆးသႅၼ်ႁွမ် ႁဝ်း ၶႃႈၼႆႉ ပဵၼ်ဢွၼ်ႇၸၢႆး ၸိုဝ်ႈသဵင်ယႂ်ႇ ၼႂ်းၸုမ်းပိတ်ႉမၢၵ်ႇၼင် မိူင်းထႆးပွတ်းႁွင်ႇၼႆသေဢမ်ႇၵႃး ယဝ်ႉၵေႃႈ ပဵၼ်တူဝ်တႅၼ်းဝႆႉထႅင်ႈ ယွၼ်ႉမၼ်းၸၢႆး မီးၼမ်ႉၵတ်းဝႆႉလႄႈ တႃႇတေႁဵတ်းႁႂ်ႈၸိုဝ်ႈသဵင်လိုဝ်းလင်ၵႂႃႇထႅင်ႈၼႆ ပိူၼ်ႈသမ်ႉ ၶႂ်ႈဢဝ်မၼ်းၸၢႆး ၶဝ်ႈလဵၼ်ႈၸွမ်းၼႂ်းပၵ်းပိူင်မိူင်းထႆးၸိူင်ႉၼႆ မၼ်းၸၢႆးသမ်ႉ ဢမ်ႇမီးဝတ်းဝႂ်လႄႈ ယၢမ်းလဵဝ် မီးပၼ်ႁႃ လွင်ႈၼႆႉဝႆႉ။ ႁဝ်းၶႃႈတႄႉ မုင်ႈမွင်းႁႂ်ႈမၼ်းၸၢႆး လႆႈဝတ်းဝႂ်သေၵမ်း”- ၸၢႆးသႅင်ဝၼ်း သိုပ်ႇလၢတ်ႈၼႄၼင်ႇၼႆ။

ၸၢႆးသႅၼ်ႁွမ် ဝူင်းတႆးၼႆႉ လႆႈႁပ်ႉသူးရၢင်းဝလ်းၽူႈလဵၼ်ႈမၢၵ်ႇၼင်ၵတ်ႉၶႅၼ်ႇ (သွၵ်းတိၼ်ၶမ်း) မႃး 3 ပွၵ်ႈယဝ်ႉ။ မိူဝ်ႈဢႃယု 10 ၶူပ်ႇလႆႈပွၵ်ႈၼိုင်ႈ၊ ဢႃယု 11 ၶူပ်ႇလႆႈပွၵ်ႈၼိုင်ႈ၊ ဢႃယု 12 ၶူပ်ႇသမ်ႉ လႆႈထႅင်ႈပွၵ်ႈၼိုင်ႈ။  

ၸၢႆးသႅၼ်ႁွမ် ဝူင်းတႆးၼႆႉ ပဵၼ်လုၵ်ႈၸၢႆး – ၸၢႆးပၢၼ်းၵျႃႇ ၵူၼ်းဝၢၼ်ႈမွင်းႁွင်း ဝဵင်းမိူင်းပၼ်ႇလႄႈ မႄႈသမ်ႉ ၼၢင်းၶမ်းဢူင်း ၵူၼ်းဝၢၼ်ႈၵုၼ်ၶၢၼ် ဝဵင်းလၢင်းၶိူဝ်း။ ၸၢႆးသႅၼ်ႁွမ် ဝူင်းတႆးၼႆႉ ၵိူတ်ႇမိူဝ်ႈပီ 2010 မီးပီႈၼွင်ႉႁူမ်ႈတွင်ႉၵၼ် 2 ၵေႃႉ၊ မၼ်းၸၢႆး ပဵၼ်ၵေႃႉထူၼ်ႈသွင်။ ပေႃႈမႄႈမၼ်းၸၢႆးတႄႉ ယၢမ်းလဵဝ် ႁဵတ်းၵၢၼ်ဝႆႉတီႈ ဝဵင်းလမ်းပုၼ်း။ မၼ်းၸၢႆးသမ်ႉ ႁဵၼ်းဝႆႉတီႈႁူင်းႁဵၼ်း ဝၶျိရႃႊလႆး ၸႄႈဝဵင်းသႃရၽီး ၸႄႈတွၼ်ႈၵဵင်းမႂ်ႇ ၼႆယဝ်ႉ။

မၼ်းၸၢႆးၼႆႉ မိူဝ်ႈၼႂ်းလိူၼ်ၼူဝ်ႊဝႅမ်ႊပိူဝ်ႊ (2020) ပူၼ်ႉမႃးၼၼ်ႉၵေႃႈ လႆႈႁပ်ႉသူးရၢင်းဝလ်း ၽူႈပိတ်ႉမၢၵ်ႇၼင်ၵတ်ႉၶႅၼ်ႇ ၊ ဢွၼ်ႇၸၢႆးသႅၼ်း ဢႃယု 10 ၶူပ်ႇ ၼႂ်းဝဵင်းလမ်းပုၼ်း။ ဢၼ်လႆႈႁပ်ႉသူးၼႆႉ ၼႂ်းတႆး မၼ်းၸၢႆးပဵၼ်ၵေႃႉႁႅၵ်ႈ။ မၼ်းၸၢႆး ဢွၼ်ဢဝ်ၸုမ်းလႆႈမႃးထီႉ 1 သေ လႆႈႁပ်ႉသူး ၼႆယဝ်ႉ။

ၵၢၼ်လဵၼ်ႈမၢၵ်ႇၼင်ၼႆႉ ဢွၼ်ႇၸၢႆးသႅၼ်ႁွမ် မီးတူဝ်ထူပ်းမႃးၼမ်၊ လဵၼ်ႈမႃးယဝ်ႉလၢႆလၢႆပၢင်၊ မၢင်ပွၵ်ႈ ဢႃယု 10 ၶူပ်ႇ လႆႈလဵၼ်ႈၸွမ်း 13 ပီၵေႃႈ မီးမႃး ၼႆယဝ်ႉ။