တႆးႁွတ်ႈမိူင်းထႆး (မႄႈႁိူၼ်းၼုမ်ႇ) ၵေႃႉၼိုင်ႈ ပဵၼ်မလဵင်း (ၵႅၼ်ႊသိူဝ်ႊ) တီႈလုပ်ႇႁူဝ်ၶဝ်ႇသေ ယၢမ်းလဵဝ် လူဝ်ႇၽႃႇတတ်း ယၢပ်ႇၽိုတ်ႇလိူဝ်ႁႅင်း လွင်ႈငိုၼ်းတွင်း တႃႇၵႃႇယူတ်းယႃ 230,000 ဝၢတ်ႇ ဝႃႈၼႆ။

ၼၢင်းၶမ်းယုမ်ႉ ဢႃယု 30 ပီ ပဵၼ်ဝႆႉမလဵင်း တီႈလုပ်ႇႁူဝ်ၶဝ်ႇ ၶႃၾၢႆႇသၢႆႉ မၼ်းၼၢင်းသေ လႆႈယူတ်းယႃတူဝ် ဝႆႉတီႈႁူင်းယႃ ၼၶွၼ်းၽိမ်း 2 (ႁူင်းယႃၵွၼ်တၼ်) ဝဵင်းမႄႈရိမ်း ၸႄႈတွၼ်ႈၵဵင်းမႂ်ႇ ၸိုင်ႈထႆး ယွၼ်ႉဢမ်ႇမီးငိုၼ်း တႃႇတေ ၽႃႇတတ်းလႄႈ ပဵၼ်ဢၼ်ယၢပ်ႇၽိုတ်ႇလိူဝ်ႁႅင်းဝႆႉ တႃႇၵႃႈယူတ်းယႃ ၼႆယဝ်ႉ။

ၼွင်ႉလၢဝ် ၵေႃႉပဵၼ်ၼွင်ႉယိင်း လၢတ်ႈတီႈၽူႈတွႆႇႁွၵ်ႈဝႃႈ – “ပီႈၼၢင်းၶႃႈၼႆႉ ပဵၼ်မလဵင်း တီႈလုပ်ႇႁူဝ်ၶဝ်ႇ ၾၢႆႇသၢႆႉသေ ယၢမ်းလဵဝ် မေႃယႃၶဝ်ဝႃႈ တေလႆႈၽႃႇတတ်း ဢဝ်လုပ်ႇဢွၵ်ႇ ယဝ်ႉၵေႃႈ တေဢဝ်လဵၵ်းသတီး မႃးသႂ်ႇတႅၼ်း တီႈလုပ်ႇၼၼ်ႉ။ ၵမ်းၼႆႉ လဵၵ်းသတီးၼၼ်ႉ တီႈမိူင်းထႆး ဢမ်ႇမီး တေလႆႈသင်ႇၼွၵ်ႈမိူင်းမႃးၼႆလႄႈ ႁူမ်ႈၵၼ်တင်းမူတ်းတေသဵင်ႈငိုၼ်း 330,000 ဝၢတ်ႇ။ ဝႂ်ပၢႆးယူႇလီ 30 ဝၢတ်ႇ ဢၼ်ပီႈၼၢင်းၶႃႈႁဵတ်းဝႆႉၼၼ်ႉ ပိူၼ်ႈၸွႆႈထိုင်လႆႈ 1 သႅၼ်ဝၢတ်ႇၵူၺ်းလႄႈ ယၢမ်းလဵဝ် ၶၢတ်ႇဝႆႉငိုၼ်း တႃႇ 230,000 ဝၢတ်ႇၶႃႈဢေႃႈ”- ဝႃႈၼႆ။

သိုပ်ႇလၢတ်ႈဝႃႈ – “ငိုၼ်းဢၼ်ပီႈၼၢင်းၶႃႈ ၵဵပ်းဝႆႉၼၼ်ႉ မီးဢမ်ႇထိုင်ၶႃႈ ၵွပ်ႈၼႆလႄႈ ယွၼ်းတၢင်းၸွႆႈထႅမ်ထိုင် တီႈ ၽူႈမီးၼမ်ႉၸႂ်ၸေႇတႃႇၼ ႁဝ်းၶႃႈ ၶႅၼ်းတေႃႈၵမ်ႉၸွႆႈထႅမ်ပၼ်ၽွင်ႈၶႃႈ။ တေဝႃႈ ဢမ်ႇယႃ ဢမ်ႇသိုဝ်ႉလဵၵ်းသတီးသႂ်ႇၸိုင် ၶႃပီႈၼၢင်းၶႃႈၼႆႉ တေလႆႈတႅပ်းႁူဝ်ၶဝ်ႇပႅတ်ႈၶႃႈဢေႃႈ။ မၼ်းၼၢင်းသမ်ႉ မီးဝႆႉ လုၵ်ႈလဵၵ်ႉ 2 ၵေႃႉ သမ်ႉလူဝ်ႇၶိုၼ်ႈႁဵၼ်း ၸိူင်ႉၼၼ်ဢေႃႈ”- ဝႃႈၼႆ။

ၼၢင်းၶမ်းယုမ်ႉ ဢႃယု 30 ပီၼႆႉ ပဵၼ်ၵူၼ်းၸႃတိ ဝၢၼ်ႈၸၢၼ်း ဢိူင်ႇမိူင်းတၢင်ႈ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇသေ မၼ်းၼၢင်းၶဝ်ႈၵႂႃႇႁဵတ်းၵၢၼ် ၼႂ်းမိူင်းထႆး တိုၵ်ႉမီးၶၢဝ်းတၢင်းမွၵ်ႈ 3 ပီ ။ မၼ်းၼၢင်း ႁဵတ်းၵၢၼ်မႄႈဝၢၼ်ႈ ၵေႃႉပဵၼ်ၸဝ်ႈၽူဝ်သမ်ႉ ႁဵတ်းၵၢၼ် (ပဵၼ်လုၵ်ႈလဵင်ႉ) မႄးရူတ်ႉၵႃး ယဝ်ႉၵေႃႈ မီးဝႆႉလုၵ်ႈဢွၼ်ႇသွင်ၵေႃႉ ဢၼ်ဢဝ် ၵႂႃႇၸွမ်းၶဝ် ၼႂ်းမိူင်းထႆးၼၼ်ႉ ၵေႃႉယႂ်ႇသုတ်း ပဵၼ်ဢွၼ်ႇယိင်း ဢႃယု 9 ၶူပ်ႇလႄႈ ၵေႃႉလဵၵ်ႉသမ်ႉ ပဵၼ်ၵူၼ်းၸၢႆး ဢႃယု 4 ၶူပ်ႇ ၼႆယဝ်ႉ။

ယၢမ်းလဵဝ် ၼၢင်းၶမ်းယုမ်ႉတင်း မုင်ႉႁေႃႁိူၼ်း မၼ်းၼၢင်းၼႆႉ ယူႇသဝ်းဝႆႉတီႈဝဵင်းမႄႈရိမ်း ၼႆယဝ်ႉ။

သင်ဝႃႈ ၽူႈမီးၼမ်ႉၸႂ်ၸေႇတႃႇၼ ၶႂ်ႈႁူမ်ႈၸွႆႈထႅမ် ၵႃႈယူတ်းယႃ ၼၢင်းၶမ်းယုမ်ႉၸိုင် ၵပ်းၸူး မၢႆၾူၼ်း ၵေႃႉပဵၼ်ၼွင်ႉလၢဝ် မၢႆၾူၼ်း 0959784716 (ထႆး) ဢမ်ႇၼၼ် မၢႆယေးငိုၼ်း (ၵႃႈသီၵွၼ်း) 1322750192 (นาง นางโมคำ) ဝႃႈၼႆ။