ပလိၵ်ႈထႆး တီႉၺွပ်းၸုမ်းၵူၼ်းၼုမ်ႇႁႅင်းၵၢၼ် ၼႂ်းပွႆးၶၢဝ်းၵတ်း တီႈဝဵင်းၵဵင်းမႂ်ႇ လႆႈဝႆႉ 20 ပၢႆ သိုပ်ႇၸွပ်ႇႁႃၸွမ်းတီႉႁူဝ်ၼႃႈၸုမ်း တီႉလႆႈတီႈႁူင်းၵၢၼ်ၵေႃႇသၢင်ႈတီႈၼိုင်ႈ တီႈၼႂ်းၸႄႈတွၼ်ႈလမ်းပၢင်း။
ဝၼ်းတီႈ 23/01/2026 ပလိၵ်ႈထႆး ၶဝ်ႈၵူတ်ႇထတ်း ၼႂ်းပွႆးၶၢဝ်းၵတ်း(ငၢၼ်းရုၻူႊၼၢဝ်) ဝဵင်းၵဵင်းမႂ်ႇ – တီႉလႆႈၸုမ်းၵူၼ်းၼုမ်ႇႁႅင်းၵၢၼ်ၸုမ်းၼိုင်ႈ ဢၼ်မီးၸိုဝ်ႈဝႃႈ “ ၵႅင်း(ၸုမ်း)လဝ်ႈၶၢဝ်” ။ ပလိၵ်ႈထႆးလၢတ်ႈဝႃႈ တႃႇၵေႃႉၼိုင်ႈမီးမၢၵ်ႇ(ရပိူတ်ႇ) ပိင်းပွင်း (ဢၼ်ႁဵတ်းဢဝ်ႁင်းၵူၺ်း) လုၵ်ႈၼိုင်ႈ၊ တႃႇ 4 ၵေႃႉသမ်ႉ မီးၶူင်းတႃမိုဝ်းလဵၵ်း၊တႃႇ 3 ၵေႃႉမီးမိတ်ႈလႅမ်၊တႃႇၵေႃႉၼိုင်ႈပႃးမႃး ၵူင်ႇၵွၼ်၊ တႃႇ 7 ၵေႃႉသမ်ႉၶီႇရူတ်ႉၶိူင်ႈဢၼ်ယႃႉသေၶိုၼ်းတႅင်ႇဝႆႉၼင်ႇၵၢင်ၸႂ်ၶဝ်(ရူတ်ႉၶိူင်ႈတတ်းပႅင်)၊ တႃႇ 2 ၵေႃႉဢမ်ႇမီးဝတ်းဝႂ်သင်၊ တႃႇ 13 ၵေႃႉတႄႉ ၼႂ်းမိုဝ်းဢမ်ႇမီးၶူဝ်းၶွင်ဢၼ်တေပဵၼ်ၽေး ၵူၺ်းၵႃႈ ပဵၼ်လုၵ်ႈၸုမ်း “ၵႅင်းလဝ်ႈၶၢဝ်” လႄႈတီႉဝႆႉပႃးတႃႇၵူတ်ႇထတ်း- တေဢဝ်လိူင်ႈၸုမ်းၶဝ် လူၺ်ႈတၢင်းၽိတ်း “ဢဝ်ၶိူင်ႈမႆႉၶိူင်ႈမိုဝ်းဢၼ်ၸၢင်ႈပဵၼ်ၽေးတေႃႇၵူၼ်းၼၼ်ႉ ၶဝ်ႈၵႂႃႇၼႂ်းပိုၼ်ႉတီႈ ပၢင်ပွႆးၵူၼ်းၼမ်” ဝႃႈၼႆ။
ထိုင်မႃးဝၼ်းတီႈ 26/01/2026 မိူဝ်ႈဝႃး ဢိင်ၼိူဝ်ၸုမ်းလဝ်ႈၶၢဝ် ဢၼ်ၺႃးတီႉၼၼ်ႉတွပ်ႇလၢတ်ႈတီႈပလိၵ်ႈသေ ပလိၵ်ႈလမ်းသွၵ်ႈႁႃ ႁူဝ်ၼႃႈၸုမ်းၶဝ် ၸိုဝ်ႈ ၸၢႆးၽူး ဢႃယု 24 ပီ။ ၵႂႃႇထူပ်းႁၼ်တီႈၵၢၼ်ၵေႃႇသၢင်ႈတီႈၼိုင်ႈဢၼ်မီးၼႂ်း ဢိူင်ႇၼွင်လူမ်ႇ ဝဵင်းႁၢင်ႈၶျတ်ႇ ၸႄႈတွၼ်ႈလမ်းပၢင်း။ ပလိၵ်ႈလမ်းပၢင်းၵုမ်းႁွင်ႉမၼ်းၸၢႆးမႃးၵူတ်ႇထတ်းတူၺ်း ဝတ်းဝႂ်ၵေႃႈမီးၸေးယူႇ၊ ၼႂ်းယဵဝ်ႈၵေႃႈဢမ်ႇမီးထၢတ်ႈယႃႈမဝ်းၵမ် ႁဵတ်းၵၢၼ်ၵေႃႈမႅၼ်ႈတီႈမႅၼ်ႈတၢင်း။ ၵူၺ်းၵႃႈဢိင်ၼိူဝ်ၸုမ်းလဝ်ႈၶၢဝ်ဝႃႈမၼ်းၸၢႆးပဵၼ်ႁူဝ်ၼႃႈၸုမ်းၼႆလႄႈ ယၢမ်းလဵဝ်ပလိၵ်ႈတိုၵ်ႉၵုမ်းတူဝ်မၼ်းၸၢႆးဝႆႉ ပႆႇပွႆႇပၼ်ၶိုၼ်း – ၼႆ သိုဝ်ႇၶၢဝ်ႇထႆး ၵဵင်းမႂ်ႇၼိဝ်းသ် ႁၢႆးငၢၼ်းဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ