ၸၢႆးသူႉလႄႈၼၢင်းၶမ်းဢိင်ႇ ႁႅင်းၵၢၼ်ယၢၼ်မိူင်း ယူႇၼႂ်းၸႄႈတွၼ်ႈၵဵင်းမႂ်ႇ ၼင်ႇၵၼ် ၵိၼ်လဝ်ႈပီႊယႃႊသေ လၢတ်ႈလွင်ႈၼွၼ်းလူၺ်ႈၵၼ် သမ်ႉဢမ်ႇတူၵ်းလူင်းလႆႈၸႂ်လီလီလႄႈ ထိုင်တီႈၽိတ်းမေႃးၵၼ် ဢဝ်ၵၼ်တၢႆ- လွင်ႈၼႆႉ လိုဝ်းယူႇၼႂ်းသိုဝ်ႇတူင်ႇၵူၼ်းၼႂ်းမိူင်းထႆးမိူင်းတႆး  ။

ၶဝ် ၶိၼ်းၵၼ်ၵိၼ်လဝ်ႈ မိူဝ်ႈဝၼ်းတီႈ 16/05/2026 တီႈႁွင်ႈၸၢႆးသူႉ ဢၼ်ၶၢတ်ႈယူႇ တီႈၼႂ်းဝဵင်းသၼ်ၽီသိူဝ်ႈ မိူင်းၵဵင်းမႂ်ႇ ။ ၽွင်းၵိၼ်ၵုမ်းၵၼ်ယူႇၼၼ်ႉ ၼၢင်းၶမ်းဢိင်ႇ ယွၼ်းၼွၼ်းၸွမ်းၸၢႆးသူႉ ။ ၸၢႆးသူႉဢမ်ႇၽွမ်ႉၸွမ်းလႄႈ ၸင်ႇပဵၼ်လွင်ႈၶႃႈႁႅမ်ၵၼ်ၼႆ ၸၢႆးသူႉလၢတ်ႈတီႈပလိၵ်ႈထႆးၼင်ႇၼႆ။

ၶၢပ်ႈတူဝ် ၼၢင်းၶမ်းဢိင်ႇတႄႉ ၸဝ်ႈၼႃႈတီႈမႃးထူပ်းႁၼ်ၼႂ်းႁွင်ႈၸၢႆးသူႉ မိူဝ်ႈဝၼ်းတီႈ 18/05/2026 ။ ဝၢႆးၼၼ်ႉ ၽူႈမီးပုၼ်ႈၽွၼ်းလႆႈပိုၼ်ၽၢဝ်ႇႁႃ ပီႈၼွင်ႉၵေႃႉလူႉသဵင်ႈၼၼ်ႉသေ ၸတ်းပၢင်မႃႇသႃႇ ပူၼ်ႉၶၢပ်ႈတူဝ်ၵႂႃႇ မိူဝ်ႈဝၼ်းတီႈ 23/05/2026 ။

ဢိင်ၼိူဝ်ပိူင်ပဵၼ် လွင်ႈၼႆႉသေ  ၼၢင်းမူဝ်ၶၢဝ်ၼူၼ်း  ၽူႈၸတ်းလၢႆးၵၢၼ်ၽႃသႃတႆး တီႈႁူင်းပွႆႇသဵင်သေႃဝေႃႊထေႃႊ ၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ – ” ၽိူဝ်ႇၸၢႆးသူႉ မိပ်ႇၶေႃးၼၢင်းၼၼ်ႉယဝ်ႉ သမ်ႉလူႉတၢႆၵႂႃႇႁေ မၼ်းသမ်ႉၵူဝ် မၼ်းလၢၵ်ႈဢဝ်ၵႂႃႇဝႆႉၼႂ်းႁွင်ႈၼမ်ႉ ။ ၵဵပ်းသိူဝ်ႈၶူဝ်း သွင်သၢမ်ၸုမ်ႇသေဢွၵ်ႇမိူဝ်း။ မိူဝ်ႈလဵဝ် ၸဝ်ႈၼႃႈတီႈၶဝ် ၵႂႃႇၸူးတီႈႁိူၼ်းဢၼ်ဢွၼ်ႇဢဝ် ၸၢႆးသူႉပၢႆႈ တီႈမႄႈသၢႆၼၼ်ႉၵေႃႈ ဢမ်ႇယူႇႁိူၼ်း ။ မီးလုၵ်ႈသၢဝ်မၼ်းၵူၺ်း ။ ၸဝ်ႈၼႃႈတီႈၶဝ် တိုၵ်ႉၸွမ်းႁႃယူႇ ၼႆဢေႃႈ ” – ဝႃႈၼႆ။

ၸွမ်းၼင်ႇ ၸၢႆးသူႉ ယွမ်းႁပ်ႉတီႈၸဝ်ႈၼႃႈတီႈထႆးတႄႉဝႃႈ – ပဵၼ်ၵူၼ်းၸၢႆးသေတႃႉ ဢမ်ႇၵျိူၵ်ႈယိင်း ၊ ဢမ်ႇၶႂ်ႈၼွၼ်းၸွမ်းၵၼ် သေၸင်ႇမီးလွင်ႈၶႃႈႁႅမ်ၵၼ် ၼႆယူႇ ။ လွင်ႈၼႆႉ ၸဝ်ႈၼႃႈတီႈ တိုၵ်ႉဢဝ်ၶၢဝ်းယၢမ်း ထဵတ်ႈထၢမ် ၸၢႆးသူႉဝႆႉထႅင်ႈ ယူႇ ။ ပႆႇတႅပ်းတတ်းဝႃႈ တေပၼ်တၢင်းၽိတ်းတူတ်ႈတၢမ်ႇသင် ။

ပဵၼ်ႁိုဝ်သေၵေႃႈယႃႇ သင်မီးလွင်ႈၶႃႈႁႅမ်သၢႆၸႂ်ၵၼ်မႃးတႄႉ ၽႂ်ၵေႃႈ တေဢမ်ႇလွတ်ႈလႆႈ တၢင်းၽိတ်းၸိူဝ်းၼႆႉ ။ ဢမ်ႇဝၼ်းၼိုင်ႈၵေႃႈ ဝၼ်းၼိုင်ႈ ၽူႈမီးပုၼ်ႈၽွၼ်း တိုၼ်းလမ်းသွၵ်ႈတီႉၺွပ်း ပၼ်တူတ်ႈတၢမ်ႇဢမ်ႇႁၢင်ႉ ။ ၸင်ႇၼၼ် ပီႈၼွင်ႉတႆးၼင်ႇၵၼ် ႁႂ်ႈမေႃၶဝ်ႈႁႃၵၼ် ဢုပ်ႇဢူဝ်းၵၼ်လီလီ ယႃႇၵေႃႇၵၢၼ်ႁၢႆႉၸိူင်ႉၼႆ ။

ၸၢႆးတႆးထိူၼ်ႇ ၽူႈၸွႆႈထႅမ် ႁႅင်းၵၢၼ်တႆး ဝဵင်းၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ _ “ ၵဵဝ်ႇၵပ်းလွင်ႈၸိူင်ႉၼႆမႃးၼႆႉ ၶႂ်ႈလၢတ်ႈပၼ်ဝႃႈ ပီႈၼွင်ႉႁဝ်းယႃႇပေႁဵတ်း ႁဝ်းတႆးၼင်ႇၵၼ် ႁႂ်ႈမေႃႁၵ်ႉၵၼ် ။ ထိုင်တီႈဝႃႈ ႁဵတ်းႁၢႆႉၵၼ်ၵႂႃႇၵေႃႈ မၼ်းဢမ်ႇပူၼ်ႉလႆႈ ။ပေႃးႁဝ်းလႆႈၵွင်ႉၵႂႃႇတၢင်းမိူင်းႁဝ်းသေ မိူင်းထႆးသေၼႆ ပၢႆႈဢမ်ႇပူၼ်ႉၶႃႈၼႃ  ။ ၶႂ်ႈလၢတ်ႈပၼ်ဝႃႈ ယႃႇႁႂ်ႈမီးလွင်ႈၶႃႈႁႅမ်ၵၼ် ။ သင်ဝႃႈ တႅပ်းတတ်းဢမ်ႇလႆႈၼႆၵေႃႈ ႁႂ်ႈၵႂႃႇႁွင်ႉပိူၼ်ႈမႃးတႅပ်းတတ်းပၼ်ႁဝ်း ဢၼ်ပိူၼ်ႈတေပၼ်တၢင်းႁူႉႁဝ်းၼၼ်ႉ ” – ဝႃႈၼႆ။

သင်ဝႃႈ ပဵၼ်လွင်ႈၶႃႈႁႅမ်ၵၼ်လူႉတၢႆၸိုင် ဢမ်ႇၵွမ်ႉၵူၺ်း ၵူၼ်းၶႃႈမၼ်းၵူၺ်းမီးတၢင်းၽိတ်း ၵူၼ်းၸိူဝ်း ပၼ်ႁႅင်းၵမ်ႉထႅမ်ၵေႃႈ မီးတၢင်းၽိတ်း၊ ၵူၼ်းဢၼ် ၸွႆႈႁႂ်ႈၽူႈပူၼ်ႉပႅၼ် ပၢႆႈလွတ်ႈၵေႃႈ မီးတၢင်းၽိတ်းမိူၼ်ၵၼ် ။ ၵွပ်ႈၼၼ် မီးလွင်ႈသင် ဢၼ်ၽိတ်းမၢႆမီႈပၵ်းပိူင် ႁႂ်ႈတၢင်ႇလၢတ်ႈတီႈၽူႈမီးပုၼ်ႈၽွၼ်း ။ တေဢမ်ႇလႆႈ ၵိၼ်းၸႂ်ၼႂ်းၵႄႈမၼ်း ၼႆ – ၽူႈတူင်ႉၼိုင်ၼႂ်းတူင်ႇၵူၼ်းၵေႃႉၼိုင်ႈ လၢတ်ႈ။

သိုပ်ႇလၢတ်ႈဝႃႈ – “ သင်ပဵၼ် LGBT ပဵၼ်ၵူၼ်းၵေႃႉဢၼ် တူဝ်ပဵၼ်ၸၢႆးၸႂ်ပဵၼ်ယိင်း ၊ တူဝ်ပဵၼ်ယိင်းၸႂ်ပဵၼ်ၸၢႆးၸိူဝ်းၼႆႉ ႁႂ်ႈ လၢတ်ႈၵၼ်သိုဝ်ႈသိုဝ်ႈ။ ယႃႇႁႂ်ႈမီးပၼ်ႁႃၵၼ်ၽွင်းပဵၼ်ၵူပ်ႉပဵၼ်ၵူႈၵၼ်မႃး ။ မၼ်းၸၢင်ႈမီးပၼ်ႁႃၼင်ႇ ပိူင်ပဵၼ်ၸိူင်ႉၼင်ႇ ဢၼ်ပဵၼ်ၵႂႃႇၼႆႉ ” – ဝႃႈၼႆ။

ပလိၵ်ႈထႆးပိုၼ်ၽၢဝ်ႇဝႃႈ – လႆႈလိုပ်ႈလမ်းတူၺ်းၸၢႆးသူႉ ၵႂႃႇထၢမ်တီႈႁိူၼ်း ဢၼ်ၸၢႆးသူႉၵႂႃႇလိုဝ်ႈၵႂႃႇယင်ႉၼွၼ်း ၽွင်းပႂ်ႉၶၢမ်ႈလႅၼ်လိၼ် တီႈမႄႈသၢႆၼၼ်ႉၵေႃႈ ဢမ်ႇထူပ်းတူဝ်ၸဝ်ႈႁိူၼ်း ။ ၵူၺ်းၵႃႈလႆႈႁူႉဝႃႈ ရူတ်ႉၶိူင်ႈၸၢႆးသူႉ ဢၼ်ၶီႇတီႈၵဵင်းမႂ်ႇမိူဝ်းမႄႈသၢႆၼၼ်ႉ ဢဝ်မိူဝ်းပႅတ်ႈဝႆႉတီႈႁိမ်း သုမ်ႉယၢမ်း မိူင်ၵႅဝ်ႈ ၼၼ်ႉလႄႈ ၸင်ႇသိုပ်ႇလိုပ်ႈလမ်းၶၢဝ်ႇၸွမ်း ။လႆႈႁူမ်ႈမိုဝ်းၵၼ်တင်း ၾၢႆႇႁူမ်ႇလူမ်ႈမိူင်းတႆးလႄႈ မိူင်းမၢၼ်ႈသေ တီႉလႆႈၸၢႆးသူႉ တီႈမိူင်းတႆး။

ဝၼ်းတီႈ 31/05/2026 ၼႆႉ လႆႈဢဝ်တူဝ်ၸၢႆးသူႉ ၶၢမ်ႈလႅၼ်လိၼ်သေၶဝ်ႈထိုင်ၶိုၼ်းၼႂ်းလိၼ်ထႆး တၢင်းလၢၼ်ႇလႅၼ်လိၼ် မႄႈသၢႆသေ ထိုင်ၶိုၼ်းတီႈၵဵင်းမႂ်ႇ။ ၼႂ်းဝၼ်းတီႈ 1/6/2026 ယၢမ်းၵၢင်ဝၼ်း ပလိၵ်ႈထႆးဢဝ်ၸၢႆးသူႉမႃးသပ်းၸႅင်ႈလၢတ်ႈၼေလွင်ႈပိူင်ပဵၼ် တီႈလူင်းမိုဝ်းၶႃႈႁႅမ်ၼၢင်းၶမ်းဢိင်ႇတၢႆ။

ၸဝ်ႈၼႃႈတီႈ ပလိၵ်ႈထႆး ပိုၼ်ၽၢဝ်ႇဝႃႈ ယၢမ်းလဵဝ်တႄႉ လႆႈဢဝ်လိူင်ႈၸၢႆးသူႉဝႆႉၼႂ်းႁူဝ်ၶေႃႈ – တင်ႈၸႂ်ၶႃႈႁႅမ်ၵူၼ်းတၢႆ – ၼႆသေ တေသိုပ်ႇၵူတ်ႇထတ်းၸွပ်ႇထၢမ်ၶေႃႈမုလ်းထႅင်ႈယဝ်ႉ တေပၼ်တူတ်ႈတၢမ်ႇၵႂႃႇၸွမ်းၼင်ႇပၵ်းပိူင်ၸိုင်ႈမိူင်းမီးဝႆႉ ။

ၸၢႆးသူႉ ၼႆႉ ဢႃယု 46 ပီ ပဵၼ်ၵူၼ်းဝၢၼ်ႈႁူၺ်ႈႁေႉ ဢိူင်ႇႁမ်းငၢႆး ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း ။ မၼ်းၸၢႆးႁဵတ်းၵၢၼ် ႁႃငိုၼ်းၼႂ်းမိူင်းထႆး လႆႈ 10 ပီပၢႆ။

 မိူဝ်ႈၵွၼ်ႇယၢမ်ႈမီးလုၵ်ႈမီးမေးမႃး။ ၵူၺ်းၵႃႈၼႂ်းၶျွင်ႉထိၵ်ႉထွၵ်ႉမၼ်းၸၢႆးတႄႉ မၼ်းၸၢႆးႁဵတ်းႁၢင်ႈ ၼုင်ႈသိူဝ်ႈၶူဝ်းၼၢင်းယိင်းသေ ၵႃႈဝႅၼ်လၢတ်ႈၸႃၼင်ႇၽူႈယိင်းၵေႃႉၼိုင်ႈလႄႈ ယူႇၵိၼ်မိူၼ် LGBT ၵေႃႉၼိုင်ႈ။

ၼၢင်းၶမ်းဢိင်ႇ ၼၼ်ႉတႄႉ ပဵၼ်ၵူၼ်းဝၢၼ်ႈသေႃႉ မိူင်းသူႈ။ ႁဵတ်းၵၢၼ်ႁႃၵိၼ်လဵင်ႉတွင်ႉဝႆႉတီႈမိူင်းၵဵင်းမႂ်ႇ။ မၼ်းၼၢင်း ယူႇၸွမ်းလုၵ်ႈၸၢႆးလႄႈလၢၼ်ယိင်းဢွၼ်ႇမၼ်းၼၢင်း တီႈႁွင်ႈၶၢတ်ႈ ၼႂ်းဝဵင်းမႄႈၸူဝ်ႉ။