ဝၼ်းတီႈ 3 လိူၼ်မေႊ ပီ 2026 ယူႇတီႈၸုမ်းတူင်ႉၼိုင်တႃႇတူင်ႇဝူင်းၵူၼ်းတႆး လႆႈႁူမ်ႈၵၼ် ႁဵတ်း ပၢင်ၵုမ် တီႈဝတ်ႉၵူႇတဝ်ႈ၊ ဢိူင်ႇသီၽုမ်ႊ၊ ၸႄႈဝဵင်းမိူင်း၊ ၸႄႈတွၼ်ႈၵဵင်းမႂ်ႇ ၶၢဝ်းယၢမ်း ၵၢင်ၼႂ် 9 မူင်းၶိုင်ႈ ထိုင်ႈ 12 မူင်း။

ဢိင်ၼိူဝ်ႁူဝ်ပဝ်ႈ လုင်းၸၢႆးသႅင်ယ ႁိုဝ်ၸၢႆးမွၼ်းၶိူဝ်းလႆႈလူႉသဵင်ႈၵႂႃႇမိူဝ်ႈဝၼ်းတီႈ 26/04/2026 ၼၼ်ႉသေ လႆႈယုၵ်ႉၻွၵ်ႊတိူဝ်ႊၸၢႆးၶမ်းၽွၼ်း ၶိုၼ်ႈပဵၼ်ႁူဝ်ပဝ်ႈဝႆႉၸူဝ်ႈၶၢဝ်း။ ဝၼ်းတီႈ 3 ၼႆႉၸင်ႇ လႆႈမႃးလိူၵ်ႈႁူဝ်ပဝ်ႈတႃႇတႅၼ်းတၢင် ၼႂ်းဝၼ်းတီႈ 3 မေႊၼႆႉ။

ၼႂ်းပၢင် ၵုမ်ၼႆႉ မီးၽူႈတၢင်ႇတူဝ် ၸုမ်းတႆးလၢႆမူႇလၢႆၸုမ်းၶဝ်ႈႁူမ်ႈ ၸမ် 30 ၵေႃႉ။ ဢိင်ဢဝ် ၽူႈၶဝ်ႈၸုမ်းလႄႈ ၽူႈၵိူဝ်းၵုမ် လၢႆၸဝ်ႈ ဢုပ်ႇဢူဝ်းလႆႈၸႂ်ၵၼ်သေ ယုၵ်ႉဢဝ် ပေႃႈ ၸၢင်းၽူဝ်းဢွင်ႇ ၶိုၼ်ႈပဵၼ် ႁူဝ်ပဝ်ႈၵေႃႈလိၵ်ႈလၢႆးလႄႈၾိင်ႈငႄႈတႆးၵေႃႉမႂ်ႇ တႃႇ ၶၢဝ်းတၢင်း 2 ပီ (2026 – 2027 ) ။ၵႅမ်ႁူဝ်ပဝ်ႈ 1 – ၼၢင်းဢူၺ်းလီ ၊ ၵႅမ်ႁူဝ်ပဝ်ႈ 2 – ၸၢႆးယွတ်ႈၶမ်း ၽူႈၼမ်းၼႂ်း – ၸၢႆးသႅၼ်မွင်း ၵႅမ်ၽူႈၼမ်းၼႂ်း 1 – ၸၢႆးထုၼ်းမျၢတ်ႈ ၊ ၵႅမ်ၽူႈၼမ်းၼႂ်း 2 – ၸၢႆးၼေႃႇမိူင်း။

ၼႃႇယၵပဵၼ် ၸဝ်ႈၶူးဝႃးၸၼ်ႊတရင်ႊသီ ၸဝ်ႈၵွၼ်းဝတ်ႉၵူႈတဝ်ႈ ဢိူင်ႇသီၽုမ်ႊ ၸႄႈဝဵင်းၵဵင်းမႆႇ ၽူႈၵိူဝ်းၵုမ် – မီးဝႆႉ 5 ၵေႃႉ – 1) ၶူးပိုၼ်ၶမ်း ၽယၵ်ႉဝူင်း ၊ 2) မႄႈၶူးႁၢၼ် ၼူၼ်း ၊ 3) ၸၢႆးသႅင်မိူင်းမင်းၵွၼ်း( ႁူဝ်ပဝ်ႈႁူင်းပွႆႇသဵင်မႅပ်ႊ ( MAP) ၊ 4) ၼၢင်းၶမ်းဢိင်ႇ လႄႈ 5) ၻွၵ်ႊၻိူဝ်ႊ ၸၢႆးၶမ်းၽွၼ်း ။

လိူဝ်ၼၼ်ႉ ၶွတ်ႇၽွတ်ႈပႃး ၽူႈမီးပုၼ်ႈၽွၼ်း ၼႂ်းႁွင်ႈၵၢၼ်လႂ်ႁွင်ႈၵၢၼ်ၼၼ်ႉ ဢၼ်ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆး – ၵဵင်းမႆႇတူင်ႉၼိုင် ။

မိူၼ်ၼင်ႇ ႁွင်ႈၵၢၼ်ၾၢႆႇလိၵ်ႈလၢႆးလႄႈၾိင်ႈငႄႈတႆးၼၼ်ႉ ၽူႈႁပ်ႉပုၼ်ႈၽွၼ်း ပဵၼ် မေႃသွၼ်ယိင်းႁွမ်လႃႈသဵဝ်ႈ ၊ ၼွင်ႉလၢဝ် ၊ ၼွင်ႉၾႃႉ ၊ ၸၢႆးဢွမ် (ႁိုဝ်) ၸၢႆးၶိူဝ်းလႅင်း ) ။ ၽူႈ ႁပ်ႉပုၼ်ႈၽွၼ်း ၾၢႆႇၵၢၼ်ငိုၼ်း ပဵၼ် ၸၢႆးလွမ်ႉဝူင်း (ႁိုဝ်) ၸၢႆးယဝူင်း ၊ ၽူႈႁူမ်ႈၸွႆႈၾၢႆႇၵၢၼ်ငိုၼ်း ပဵၼ် ၸၢႆးၸၼ် ။ ႁွင်ႈၵၢၼ်ၾၢႆႇၸတ်းၶိူင်ႈၶူဝ်းၸႂ်ႉသွႆႈၼႂ်းၵၢၼ်လုမ်း – ၼၢင်း သႅင်မူၼ်း၊ ၼၢင်းၶမ်းၼူၼ်း လႄႈ ၼၢင်းၸိင်ႇဢူႉ။ ႁွင်ႈၵၢၼ်ၾၢႆႇၽူႈၶဝ်ႈၸုမ်း Membership ပဵၼ် – ၸၢႆးသၢင်ႇပုၼ်ႉ ၊ ၽူႈၸွႆႈ ပဵၼ် ၼၢင်းၶမ်းယဵၼ်ႇ လႄႈ ၼွင်ႉႁွမ် ။ ၾၢႆႇဢၢႆႊထီႊ တႃႇၸတ်းပၢင်ၵုမ်ဢွၼ်ႊလၢႆႊလႄႈသင် ၊ တႃႇတႅမ်ႈတၢင်ႇ ပိုၼ်ၽၢဝ်ႇၵူႈလွင်ႈလွင်ႈၼိူဝ်ၼႅင်ႈသိုဝ်ႇလႄႈသင် ၼၼ်ႉ – ၸၢႆးသႅင်ယွတ်ႈ ။

ၵေႃလိၵ်ႈလၢႆးလႄႈ ၾိင်ႈငႄႈတႆး ၼႂ်းဝဵင်းၵဵင်းမႂ်ႇၼႆႉ ႁႅင်းၵၢၼ်တႆး လႆႈႁူမ်ႈၵၼ်သေ ၵေႃႇတင်ႈတူင်ႉၼိုင်မႃး ပၢၼ်သိုပ်ႇပၢၼ်။ ၼင်ႇႁိုဝ်တေတူင်ႉၼိုင်လႆႈငၢႆႈလူမ် ၼႂ်းမိူင်းထႆးလႄႈ ပဵၼ်ၸုမ်း ဢၼ်မႅၼ်ႈငမ်ၸွမ်းပၵ်းပိူင် ၼၼ်ႉ ၶိုၼ်းလႆႈႁူမ်ႈၵၼ်တင်ႈမႃး ၸုမ်းသမႃးၶူမ်းပၢႆးပၺ်ႇၺႃႇလႄႈ ၾိင်ႈငႄႈတႆး Tai Yai Education & Culture Association မိူဝ်ႈပီ 2012 ၼၼ်ႉဝႃႈၼႆ။

လိူဝ်ၼၼ်ႉ မီးမုၵ်ႉၸုမ်းတူင်ႉၼိုင်တူင်ႇဝူင်းၵူၼ်းလၢႆၸုမ်းတူင်ႉၼိုင်ၸွမ်းဝႆႉၼင်ႇ ၸုမ်းၽူႈတွႆႈႁွၵ်ႈ၊ ၸုမ်း MAP ၊ ၸုမ်းၵပ်းသၢၼ်ၼၢင်းယိင်းတႆး၊ ၸုမ်းသိုဝ်ႇႁႅင်းၼုမ်ႇ၊ ၸုမ်းၼုမ်ႇ ႁၢႆးၸၢႆးယိင်းတႆး ၸူဝ်ႈၶၢဝ်းၵဵင်းမႂ်ႇ၊ ၸုမ်းဢဵၼ်ႁႅင်းမႂ်ႇ၊ ႁိူၼ်းႁူမ်ႈႁၵ်ႉ၊ ၸုမ်းႁူမ်ႈတုမ် ပီႈၼွင်ႉၸၢဝ်းၶိူဝ်းတႆး ၵဵင်းမႂ်ႇ၊ ႁူမ်ႈႁႅင်းၽိင်ႈငႄႈတႆး၊ ႁူမ်ႈႁႅင်းႁၵ်ႉၶိူဝ်းလႄႈ တၢင်ႇၸိူဝ်း ။