မိူဝ်ႈၼႆႉဝၼ်းတီႈ 25/5/2026 ၸုမ်းႁဵတ်းၵၢၼ်သုၼ်ႇလႆႈတႃႇမိူင်းႁူမ်ႈတုမ် Justice For Myanmar ႁဵတ်းၽိုၼ်လိၵ်ႈႁၢႆးငၢၼ်းဢွၵ်ႇဝႃႈ ၾဵတ်ႉပုၵ်ႉသ် (Facebook) ပူတ်းပႅတ်ႈ ၼႃႈလိၵ်ႈ (Page) ဢၵွင်ႉ (Account) ၵရုပ်ႉ (Group)ၵူၼ်းၸိူဝ်းႁဵတ်း တူဝ်တႅၼ်းၶၢႆပၼ် ၵၢတ်ႉၾူၼ်း Mytel / MECtel လႄႈ ၼႃႈလိၵ်ႈ ဢၵွင်ႉ ၵရုပ်ႉ ၸိူဝ်းပိုၼ်ၽႄႈ ၶၢဝ်ႇဢၼ်ဢွၵ်ႇ ၼႂ်း ႁွင်ႈၵၢၼ်သိုဝ်ႇ ၶွင်သိုၵ်းမၢၼ်ႈ MRTV တင်း MWD ၼၼ်ႉၵေႃႈ ၺႃးဢိုတ်းၵႂႃႇပႅတ်ႈ ၼႆယဝ်ႉ။

ၵၢတ်ႉၽူၼ်း Mytel / MECtel ၼႆႉ ပဵၼ်ပၢႆးမၢၵ်ႈမီးလူင် တွၼ်ႈတႃႇ ၸွမ်ၸိုင်ႈယိုတ်းမိူင်း မိၼ်းဢွင်ႇလၢႆႇ လႄႈ ၸုမ်းသိုၵ်းမၢၼ်ႈယိုတ်းမိူင်းသေ ၶဝ်ႈပႃးၼႂ်းၼႅင်ႈသၢၼ် ၵေႃႇပူဝ်ႇရေးသျိၼ်ႊပၢႆးမၢၵ်ႈမီးမိူင်းမၢၼ်ႈ (MEC) ဝႆႉသေ ယၢမ်းၼႆႉ လူင်ပွင်ၸိုင်ႈၼွၵ်ႈမိူင်း EU ၊ UK ၊ မိူင်းဢမႄႇရိၵၼ်ႊ ၊ မိူင်းၵၼေႊတိူဝ်ႊၸိူဝ်းၼႆႉ ပၼ်တၢမ်ႇဢိုတ်း ၵၢၼ် မၢၵ်ႈမီးၶဝ်ဝႆႉ။

ႁူင်းၵၢၼ် Mytel / MECtel လႄႈ MEC ၼႆႉ ႁႃငိုၼ်း တွၼ်ႈတႃႇၵမ်ႉထႅမ်ပၼ် ႁႂ်ႈတပ်ႉသိုၵ်းမၢၼ်ႈ မီးငိုၼ်းၶဝ်ႈၵူၺ်းဢမ်ႇၵႃး ၸႂ်ႉတိုဝ်းတႃႇၵဵပ်းၶေႃႈမုၼ်း ၵူၼ်းၸိူဝ်း ၸႂ်ႉတိုဝ်း မၼ်းလႄႈ ပၵ်းတႃပႂ်ႉတူၺ်း (ၸွပ်ႇဢဝ်ၶေႃႈမုၼ်း) ၸွမ်း လွင်ႈတူင်ႉၼိုင်ၵူၼ်းမိူင်းဝႆႉပႃး ၼႆယဝ်ႉ။

ၸုမ်းႁဵတ်းၵၢၼ်သုၼ်ႇလႆႈတႃႇမိူင်းႁူမ်ႈတုမ် ႁၢႆးငၢၼ်းဝႃႈ “ၾဵတ်ႉပုၵ်ႉ ၶတ်းၸႂ်ဢိုတ်းႁပ်းပၢၵ်ႈယႃႉပႅတ်ႈ ၼႃႈလိၵ်ႈသိုဝ်ႇတူင်ႇဝူင်းၵူၼ်းၶွင် Mytel လႄႈ ၵၢၼ်မၢၵ်ႈမီး ဢၼ်ပဵၼ်ၶွင်သိုၵ်းမၢၼ်ႈၼၼ်ႉမႃးလၢႆပွၵ်ႈ လၢႆၵမ်းသေတႃႉ ၾၢႆႇသိုၵ်းမၢၼ်ႈလၢႆၸိုဝ်ႈသေ ပိုၼ်ၽႄႈၶူဝ်းၵုၼ်ႇၶဝ်ယူႇတိၵ်းတိၵ်းလႄႈ တႃႇတေဢိုတ်းႁပ်းပႅတ်ႈ ယႃႇႁႂ်ႈဢွၵ်ႇမႂ်ႇမႃးၼၼ်ႉ ယၢပ်ႇ ၽိုတ်ႇႁႅင်း။ ၵွပ်ႈၼၼ် ဢၼ်ၼိုင်ႈၵွႆၵႂႃႇၵေႃႈ တေၸၢင်ႈလႆႈႁၼ်ဢၼ်မႂ်ႇဢွၵ်ႇမႃးထႅင်ႈယူႇ” ဝႃႈၼႆ။

လႆႈႁူႉဝႃႈ ၼႃႈလိၵ်ႈသိုဝ်ႇတူင်ႇဝူင်းၵူၼ်း ၶွင်ၸုမ်းသိုၵ်းမၢၼ်ႈ ဢၼ်ၸုမ်းႁဵတ်းၵၢၼ်သုၼ်ႇလႆႈတႃႇမိူင်းႁူမ်ႈ တုမ် ၶဝ်တိူင်ႇၸႅင်ႈၵႂႃႇတီႈ ၶွမ်ႊပၼီႊၾဵတ်ႉပုၵ်ႉသေ ယႃႉလႅဝ်ပႅတ်ႈလႆႈၼၼ်ႉ တင်းသဵင်ႈမီးယူႇ 109 ဢၼ် ဝႃႈၼႆ။

လိူဝ်ၼၼ်ႉ ၵွၼ်ႇၼႃႈပၢင်လိူၵ်ႈတင်ႈပွမ် ဢၼ်သိုၵ်းမၢၼ်ႈယိုတ်းမိူင်းၼမ်းၸတ်းႁဵတ်းၵႂႃႇ ႁႂ်ႈပေႃးယဝ်ႉတူဝ်ႈၵႂႃႇလႆႈၼၼ်ႉၵေႃႈ ၸုမ်းႁဵတ်းၵၢၼ်သုၼ်ႇလႆႈတႃႇမိူင်းႁူမ်ႈတုမ် ၶတ်း ၸႂ်တိူင်ႇၸႅင်ႈလႄႈ Twitch တင်း Kick လႆႈဢိုတ်းႁပ်းပႅတ်ႈၼႃႈလိၵ်ႈသိုဝ်ႇ MRTV ၵူၺ်းဢမ်ႇၵႃး TikTok ၵေႃႈ ဢိုတ်းႁပ်းပႅတ်ႈ ၼႃႈလိၵ်ႈၼႅင်ႈသၢၼ် MWD ဝႆႉ ဝႃႈၼႆ။