ၸၢတ်ႈၸိုင်ႈယူႊရူပ်ႊ (EU) သိုပ်ႇယိုတ်ႈၶၢဝ်းယၢမ်း လွင်ႈပိၵ်ႉဢိုတ်းႁႅတ်ႉႁၢမ်ႈၼိူဝ် ၸွမ်ၸိုင်ႈ သိုၵ်းမၢၼ်ႈ ယိုတ်းမိူင်း မိၼ်းဢွင်ႇလၢႆႇ ၸိူဝ်းၵဵဝ်ႇၶွင်ႈၸွမ်းသိုၵ်းမၢၼ်ႈ တေႃႇထိုင် ဝၼ်းတီႈ 10 လိူၼ်ဢေႊပရိူဝ်ႊ ပီ 2027 ဝႃႈၼႆ။

ၶၢဝ်ႇ The Brussels Times ႁၢႆးငၢၼ်းၵႂႃႇ ဝၼ်းတီႈ 14 လိူၼ်မေႊ ဝႃႈ – မိူင်းယူႊရူပ်ႊ ၸိူဝ်းဢမ်ႇၸႂ်ႈၽူႈၶဝ်ႈၸုမ်း (EU) ၼၼ်ႉၵေႃႈ တေႁဵတ်းသၢင်ႈၵႂႃႇၸွမ်းၶေႃႈတႅပ်းတတ်းၼႆႉ ၼႆယဝ်ႉ။

ယၢမ်းလဵဝ် တီႈၼႂ်းမိူင်းမၢၼ်ႈ တိုၵ်ႉမီးလွင်ႈပူၼ်ႉပႅၼ်သု ၼ်ႇလႆႈသုၼ်ႇပဵၼ်ၵူၼ်း ႁၢဝ်ႈႁႅင်း၊ ပဵၼ်ဝႆႉငဝ်းလၢႆး ဢၼ်လီလႆႈမႆႈၸႂ်ႁႅင်းလႄႈ ၸင်ႇလႆႈတိူဝ်းယိုတ်ႈၶၢဝ်းယၢမ်း လွင်ႈႁႅတ်ႉႁၢမ်ႈၼိူဝ် သိုၵ်းမၢၼ်ႈ ၵႂႃႇ ဝႃႈၼႆ။

တေႃႇထိုင်ယၢမ်းလဵဝ် သဵၼ်ႈမၢႆၵူၼ်းလႄႈ မုၵ်ႉၸုမ်း ဢၼ်ၺႃး EU ပိၵ်ႉဢိုတ်းႁႅတ်ႉႁၢမ်ႈဝႆႉၼၼ်ႉ မီး 128 ဢၼ်။ ၼႂ်ႊၼၼ်ႉ ပႃးၵူၼ်း 105 ၵေႃႉ၊ ၶွမ်ႊပၼီႊ 20 ဢၼ်လႄႈ မုၵ်ႉၸုမ်း 2 ၸုမ်း ၼႆယဝ်ႉ။

လွင်ႈႁႅတ်ႉႁၢမ်ႈၵမ်ႈၼမ်ၼႆႉ ပိူင်လူင်တေပႃး လွင်ႈၵုမ်းထိင်းဝႆႉ ၶူဝ်းၶွင်ငိုၼ်းၶမ်း လႄႈ ႁၢမ်ႈဢွၵ်ႇၶၢဝ်းတၢင်း ၵႂႃႇ တီႈမိူင်းယူႊရူပ်ႊၼႆသေတႃႉ တီႈၼႂ်းလိၵ်ႈပိုၼ်ၽၢဝ်ႇ ဢၼ်သိုပ်ႇယိုတ်ႈၶၢဝ်းယၢမ်း လွင်ႈႁႅတ်ႉႁၢမ်ႈ ၵမ်းၼႆႉ ဢမ်ႇလႆႈလၢတ်ႈဝႆႉပႃး ႁူဝ်ယွႆႈတႅတ်ႈတေႃး။

ၾၢႆႇၼိုင်ႈၵေႃႈ ၸၢတ်ႈၸိုင်ႈယူႊရူပ်ႊ (EU) တင်း ဢႃႊသီႊယၼ်ႊ လၢတ်ႈဝႃႈ ဢမ်ႇမၵ်းမၼ်ႈပၢင်လိူၵ်ႈတင်း လႄႈ ၸုမ်းလူင်ပွင်ၸိုင်ႈသိုၵ်းမၢၼ်ႈ၊ သိုပ်ႇႁဵတ်းသၢင်ႈ လွင်ႈပိၵ်ႉဢိုတ်း ႁႅတ်ႉႁၢမ်ႈၼိူဝ်သိုၵ်းမၢၼ်ႈယူႇ ၼႆသေတႃႉ ၸွမ်ၸိုင်ႈသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ တႄႉ လၢတ်ႈၵႂႃႇတီႈပၢင်ၵုမ် ၼေႇပျီႇတေႃႇ ဝၼ်းတီႈ 6 လိူၼ်မေႊၼႆႉဝႃႈ တေၶတ်းၸႂ်ႁဵတ်းႁႂ်ႈဝၢၼ်ႈမိူင်း မီးလွင်ႈႁုၼ်ႈမုၼ်းၶိုၼ်ႈယႂ်ႇ ဝႃႈၼႆ။