ၶၢဝ်ႇထႆး The Nation Thailand ႁၢႆးငၢၼ်းဝႆႉ ၼႂ်းဝၼ်းတီႈ 10 လိူၼ်မေႊၼႆႉဝႃႈ ထူပ်းႁၼ်ၶႆႇမူင်ႈမႅင်း လႄႈ တူဝ်မူင်ႈမႅင်းတၢင်းပဵၼ် တီႈၽၵ်းယွတ်ႈၼၢင်းၶဵဝ် ဢၼ်ၵူၼ်းမိူင်းထႆး ၵႆႉဢွၼ်ၵၼ်ၵိၼ်ယူႇၵူႈဝၼ်း။ ယွၼ်ႉၼၼ် ႁႂ်ႈဢွၼ်ၵၼ်ၾၢင်ႉသေ ၵိၼ်ၽၵ်းၶဵဝ် ဢၼ်လိပ်း ဝႃႈၼႆ။

လွင်ႈၼႆႉ ဢိင်ၼိူဝ်ၶေႃႈမုလ်း တီႈႁွင်ႈၵၢၼ်ၾၢႆႇပၢႆးသၢႆႊ ယႃႈယႃ၊ ႁွင်ႈၵၢၼ်ၾၢႆႇပၢႆးယူႇလီ လႄႈ ၸၼ်ႉၸွမ်ၼႂ်းမိူင်းထႆးလၢႆလၢႆဢၼ် လူင်းပိုၼ်ႉတီႈၶူၼ်ႉၶႂႃႉလဵပ်ႈႁဵၼ်းဝႆႉၼၼ်ႉသေ ႁွင်ႈၵၢၼ်ၾၢႆႇပၢႆးယူႇလီလႄႈ ၾၢႆႇၵုမ်းထိင်းတၢင်းပဵၼ် ၶိုၼ်းပိုၼ်ၽၢဝ်ႇပၼ်ၾၢင်ႉဝႆႉ။

ပိူင်လူင် ၼႂ်းၽၵ်းၵူဝ်ႈၽၵ်းသႃႈ၊ ၽၵ်းၵပ်းၼမ်ႉၽိတ်ႉ ၸိူဝ်းလႆႈၵိၼ်ဢၼ်လိပ်းၼၼ်ႉ ၸၢင်ႈတိတ်းၸပ်းမူင်ႈမႅင်းၼမ်။ မိူၼ်ၼင်ႇ ၽၵ်းမီႇၽၵ်းၵီး၊ ႁွမ်လူၼ်ႇ၊ ၽၵ်းၼွၵ်ႇ၊ ၽၵ်း ၵၢတ်ႇပီ၊ ၽၵ်းသလၢပ်ႈ(ၽၵ်းၵၢတ်ႇယေႃႈ)၊ ဢိမ်ၶိမ်း၊ ၽၵ်းၵမ်ႇၸွၼ်း၊ ၽၵ်းၶဵဝ် ဢၼ်မီးမႂ်မီးၵိူပ်ႇၼမ် ၸိူဝ်းၼႆႉ ယွၼ်ႉတိတ်းၸပ်းၸွမ်းလိၼ်ဝႆႉလႄႈ ၸၢင်ႈမီး မူင်ႈမႅင်းၼမ်။

ၵွပ်ႈၼၼ်လႄႈ သင်တေၵိၼ်ၽၵ်းယွတ်ႈၼၢင်းၶဵဝ်ၸိုင် ႁႂ်ႈလိူၵ်ႈလီလီ၊ သုၵ်ႉလၢင်ႉပၼ် တၢင်းႁိုင်မွၵ်ႈ 2 မိၼိတ်ႉ၊ ႁႂ်ႈၸေႈၼမ်ႉၵိူဝ်ဝႆႉ မွၵ်ႈ 10 – 15 မိၼိတ်ႉသေ ၶိုၼ်းသုၵ်ႈလၢင်ႉပၼ်ၶႅမ်ႉၶႅမ်ႉ။ တွၼ်ႈတႃႇ လုၵ်ႈဢွၼ်ႇ၊ ၵူၼ်းဢႃယုယႂ်ႇ၊ မႄႈပႃးတွင်ႉလႄႈ ၵူၼ်းၸိူဝ်း ႁႅင်းၵမ်ႉၶၢမ်ႇတူဝ်ဢေႇၼၼ်ႉ ႁႂ်ႈတူမ်ႈႁုင် သုၵ်းလီငၢမ်းယဝ်ႉၸင်ႇၵိၼ်ၼႆ တေတိူဝ်းလွတ်ႈ ၽေးလီ ဝႃႈၼႆ။

ၽၵ်းယွတ်ႈၼၢင်းၶဵဝ်ၼႆႉ ပဵၼ်ဢၼ်လမ်ႇလွင်ႈတႃႇပၢႆးယူႇလီ ဢမ်ႇမီးဢမ်ႇပဵၼ်။ ၵူၺ်းၵႃႈ သင်တေၵိၼ်ဢၼ်လိပ်းမၼ်းၸိုင် ထုၵ်ႇလီသုၵ်ႈလၢင်ႉ ႁႂ်ႈမူတ်းသႂ်လီငၢမ်းယဝ်ႉၸင်ႇ ၵိၼ် – ၽူႈမီးပုၼ်ႈၽွၼ်းၾၢႆႇပၢႆးယူႇလီမိူင်းထႆး တိုၵ်းသူၼ်းဝႆႉၼင်ႇၼႆ။