ၸုမ်းပၢႆးယူႇလီလုမ်ႈၾႃႉ (WHO) ပိုၼ်ၽၢဝ်ႇဝႃႈ – ၵူၼ်းၸိူဝ်းတိတ်းၸပ်းၸိူဝ်ႉမႅင်းတၢင်းပဵၼ် ဢီႊပူဝ်ႊလႃႊ တီႈမိူင်း ၵုၼ်ႊၵူဝ်ႊ တင်း ယူႇၵၼ်ႊတႃႊ ၼႂ်းၵုၼ်ဢႃႊၾရိၵၼၼ်ႉ လူႉတၢႆၵႂႃႇ 61 ၵေႃႉယဝ်ႉ ဝႃႈၼႆ။
တီႈမိူင်းၵုၼ်ႊၵူဝ်ႊၼၼ်ႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ဢီႊပူဝ်ႊလႃႊ တင်းမူတ်းမီး 344 ၵေႃႉ၊ ၵူၼ်းလူႉတၢႆ မီး 60 ၵေႃႉ၊ တီႈမိူင်း ယူႊၵၼ်ႊတႃႊသမ်ႉ ၵူၼ်းတိတ်းၸပ်းတၢင်းပဵၼ် မီး 15 ၵေႃႉ လူႉတၢႆ 1 ၵေႃႉၼႆ ၸုမ်းပၢႆးယူႇလီလုမ်ႈၾႃႉ (WHO) ပိုၼ်ၽၢဝ်ႇဝႆႉ ၼႂ်းဝၼ်းတီႈ 3 လိူၼ်ၵျုၼ်ႊၼႆႉ ၼင်ႇၼႆ။
WHO ပၼ်ၾၢင်ႉဝႃႈ ၸိူဝ်ႉမႅင်းတၢင်းပဵၼ် ဢၼ်တိတ်းၸပ်းၵၼ်ၵမ်းၼႆႉ ပဵၼ်သႅၼ်းမူင်ႈမႅင်းဝၢႆႊရၢတ်ႉ ပၢၼ်ႊတီႊပူႊၵျူဝ်ႊ ဢၼ်လုၵ်ႉတီႈမူင်းမႅင်းဝၢႆႊရၢတ်ႉ ဢီႊပူဝ်ႊလႃႊသေ ပဵၼ်မႃး။ ၸိူဝ်ႉမူင်ႈမႅၼ်းသႅၼ်းၼႆႉ ပႆႇမီးယႃႈယႃ တႃႇယူတ်းယႃႁႂ်ႈၸိုၼ်ႈၶႅၼ်း လႄႈ လွၵ်းလၢႆးယူတ်းယႃဢၼ်တႅတ်ႈၼႅတ်ႈ ၼႆယဝ်ႉ။
ဢီႊပူဝ်ႊလႃႊ ၼႆႉပဵၼ်တၢင်းပဵၼ် ႁၢၵ်ႈလႄႈ တွင်ႉၵႂႃႇဢမ်ႇထၢတ်ႇ- ထိုင်တီႈဢမ်ႇမီးႁႅင်း ဢူၼ်ႈဢွၼ်ႇသေလူႉတၢႆ။
ၵဵဝ်ႇလူၺ်ႈ တၢင်းပဵၼ်ဢီႊပူဝ်ႊလႃႊၼႆႉသေ ၸိုင်ႈမိူင်း ၸိူဝ်းယူႇသဝ်းၸမ်ပိုၼ်ႉတီႈတၢင်းပဵၼ်ၽႄႈလၢမ်းၼၼ်ႉ ပဵၼ်ဝႆႉၸၼ်ႉ ဢၼ်လႆႈမႆႈၸႂ်ႁႅင်းဝႆႉ၊ တီႈၼႂ်း ၵုၼ်ဢႃႊၾရိၵၵေႃႈ ပဵၼ်ဝႆႉၸၼ်ႉ ဢၼ်လႆႈမႆႈၸႂ်၊ တွၼ်ႈတႃႇၸိုင်ႈမိူင်းတၢင်ႇတီႈၼႂ်းလုမ်ႈၾႃႉတႄႉ ယူႇဝႆႉတီႈၸၼ်ႉ ဢမ်ႇလႆႈမႆႈၸႂ်ႁႅင်း ဝႃႈၼႆ။
ၶၢတ်ႈလၢမ်းဝႃႈ ၸိူဝ်ႉမႅင်းတၢင်းပဵၼ်ၼႆႉ တႄႇၽႄႈလၢမ်းမႃးၼႂ်းႁူဝ်ပီ 2026 ၼႆႉ။ ယၢမ်းလဵဝ် ၽူႈမီးပုၼ်ႈၽွၼ်း ၾၢႆႇပၢႆးယူႇလီ လႄႈ ၸဝ်ႈၼႃႈတီႈၶဝ် တိုၵ်ႉဢွၼ်ၵၼ်ၶတ်းၸႂ်ၵုမ်းထိင်း ၼင်ႇႁိုဝ်တၢင်းပဵၼ်တေဢမ်ႇၽႄႈလၢမ်း ၵႂႃႇၼၼ်ႉယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ