ယိင်းဢွၼ်ႇသီႇပေႃႉ ဢႃယု 12 ပီ ၸိုဝ်ႈၼွင်ႉၽူၺ်းလိုၼ်း ဢၼ်ၸပ်းတၢင်းပဵၼ်ပုမ်ယႂ်ႇ ဢၼ်ၵူၼ်းပိုၼ်ႉတီႈဝႃႈ ပၢင်ႈၵီႈၼႆၼၼ်ႉ မိူဝ်ႈၼႂ်းလိူၼ်မေႊၼၼ်ႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ တိုၵ်ႉပိုၼ်ၽၢဝ်ႇႁႃပၼ် တၢင်းၸွႆႈထႅမ်ၵူၺ်း ။ ၽူႈမီးၸေႇတၼႃႇလၢႆတီႈၵေႃႈ ၵမ်ႉၸွႆႈၽွင်ႈယဝ်ႉသေတႃႉ တၼ်းလႆႈလၢႆႈလိူတ်ႈ ၊ ၵိၼ်ယႃ သမ်းယႃ ၸိူဝ်းၼႆႉၵူၺ်း ပႆႇလႆႈၽႃႇတတ်း ။ ထိုင်မႃး လိူၼ်ၵျုၼ်ႊၼႆႉ ပဵၼ်ၵိၼ်းႁႅင်းသေ လူႉသဵင်ႈယဝ်ႉဝႃႈၼႆ ။

ၼွင်ႉၽူၺ်းလိုၼ်းၼႆႉ ဢႃယုတိုၵ်ႉလဵၵ်ႉ သေတႃႉ မေႃလၢတ်ႈၸႃ သဵင်ဝၢၼ် မီးပၢႆးဝူၼ်ႉလီ မေႃမီးၸႂ်ဢေးလူပိူၼ်ႈ ။ ၵူၺ်းၵႃႈ လွင်ႈလီမီးၼမ်သေတႃႉ ဢမ်ႇပေႉလႆႈ ရေႃးၵႃႇတၢင်းပဵၼ် ဢမ်ႇပူၼ်ႉလႆႈလွင်ႈၵိူတ်ႇထဝ်ႈပဵၼ်တၢႆလႄႈ မၼ်းၼၢင်းလႆႈလူႉသဵင်ႈၵႂႃႇယဝ်ႉဝႃႈၼႆ ။

ၼွင်ႉၽူၺ်းလိုၼ်း ပဵၼ်လုၵ်ႈယိင်း လုင်းပႃႉ ပႃႈၶိၼ်ႇဢေး ယူႇဝၢၼ်ႈၵွၵ်ႇတႅင် ဢိူင်ႇၼွင်ၵေႃႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်ႁွင်ႇ ။
မၼ်းၼၢင်း ၸပ်းတၢင်းပဵၼ် ပုမ်ယႂ်ႇ ႁိုဝ် ပၢင်ႈၵီႈ ၼႆႉမႃး ၶၢဝ်း 5-6 ပီသေတႃႉ ဢိင်ၼိူဝ်မုင်ႉႁေႃႁိူၼ်း ဢမ်ႇပွင်ပဵၼ်လႆႈသေ တေႃႉတႄႉ ၵိၼယႃႈယႃပၼ်ၸူဝ်ႈၵႅပ်ႉၸူဝ်ႈၵမ်းၵူၺ်း ။

မၢင်ၸိူဝ်းၵေႃႈဝႃႈ တၢင်းပဵၼ်ၼႆႉ ပဵၼ်ယွၼ်ႉ ဢတၢတ်ႈ ဢၵျုၼ်း ဢၼ်ပိူၼ်ႈႁဵတ်းသႂ်ႇၼႆၵေႃႈမီး ၊ မၢင်ၸိူဝ်းၵေႃႈဝႃႈ ပဵၼ်တၢင်းပဵၼ်ပၢင်ႈၵီႈ ယွၼ်ႉဢမ်ႇယႃလႆႈၶိုတ်းတၼ်းလႄႈ ၸင်ႇလႆႈလူႉသဵင်ႈ ၼႆၵေႃႈမီး ။ ဢမ်ႇႁၼ်ၽႂ်လၢတ်ႈလႆႈတႅတ်ႈတေႃးဝႃႈ တၢင်းပဵၼ်သင် လၢႆးယႃမီးၸိူင်ႉႁိုဝ် ၼႆၸိူဝ်းၼႆႉ _ ၵူၼ်းဝၢၼ်ႈဢၼ်ႁူႉၸွမ်းလွင်ႈၼႆႉ လၢတ်ႈၼင်ႇၼႆ။

ၾၢႆႇၼိုင်ႈၵေႃႈ ပွတ်းတၢင်း ၸႄႈဝဵင်းသီႇပေႃႉၼႆႉ ၸဵမ်မိူဝ်ႈမီးမႃး ပၢင်ယၼ်ႇသိုၵ်း 1027 ၼၼ်ႉသေ ၵူၼ်းမိူင်းလႆႈၵူဝ်ႁႄ ဢမ်ႇၸၢင်ႈၵႂႃႇမႃးလႆႈထၢင်ႇႁၢင်ႈလွတ်ႈလႅဝ်း။ တေၵႃႉတေၶၢႆတေႃႇၵၼ်ယၢပ်ႇ ၊ ၵုၼ်ႇၵူႈသႅၼ်းသႅၼ်းႁွတ်ႈထိုင်ယၢပ်ႇ ။ ယႃႈယႃၸိူဝ်းၼႆႉ ယိင်ႈၶႅၼ်း ၶဝ်ႈထိုင်ယၢပ်ႇ။

ဝဵင်းသီႇပေႃႉၼႆႉ သိုၵ်းမၢၼ်ႈ ၶဝ်ႈယိုတ်းၵုမ်းဢဝ်ၶိုၼ်း ၼႂ်းမိုဝ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) မိူဝ်ႈလိူၼ်ဢွၵ်ႉထူဝ်ႊပိူဝ်ႊ ပီ 2025 ၼၼ်ႉသေတႃႉ ၸွမ်းသဵၼ်ႈတၢင်းလူင် သီႇပေႃႉ- လႃႈသဵဝ်ႈ ၾၢႆႇၼွၵ်ႈဝဵင်းသီႇပေႃႉၼၼ်ႉ ယင်းတိုၵ်ႉမီး ၸုမ်းသိုၵ်းၶႄႇၵဝ်ႈၵၢင်ႉၶဝ် တူင်ႉၼိုင်ၵႂႃႇမႃး ပၼ်ႇၵၢၼ်ၽွင်းငမ်းဝႆႉယူႇ။

လိူဝ်ၼၼ်ႉ ၶူဝ်လူင် ဝဵင်းသီႇပေႃႉ ဢၼ်ၵၢႆႇဝႆႉတႃႇၶၢမ်ႈ ၵေးၼမ်ႉတူႈၼၼ်ႉၵေႃႈ ၾၢႆႇသိုၵ်းမၢၼ်ႈ ဢိုတ်းဝႆႉ ႁိုင်ၶၢဝ်းတၢင်း 6 လိူၼ်ပၢႆ ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇႁႂ်ႈၵူၼ်းမိူင်းလတ်းၵႂႃႇမႃးငၢႆႈငၢႆႈ ၵူၼ်း ၼႂ်းပိုၼ်ႉတီႈ ႁူပ်ႉလွင်ႈယၢပ်ႇၽိုတ်ႇ ။
ၸင်ႇၼၼ်လႄႈ တႃႇ ၼွင်ႉၽူၺ်းလိုၼ်း တေလႆႈယူတ်းယႃတူဝ်ၼိုင်ႈၵမ်းၼၼ်ႉဢမ်ႇငၢႆႈ ။ ၵွၼ်ႇၼႃႈ ပၢင်ယၼ်ႇသိုၵ်း 1027 ၼၼ်ႉ ၵူၼ်းႁူမ်ႈႁိူၼ်းမၼ်းၼၢင်း သူင်ႇယူတ်းယႃတူဝ် ထိုင် လႃႈသဵဝ်ႈသေတႃႉ ၽိူဝ်ႇမီးပၢင်တိုၵ်းသိုၵ်းသိူဝ်ၼမ်ယဝ်ႉ ဢဝ်ၼွင်ႉၽူၺ်းလိုၼ်း ၶၢတ်ႇလွင်ႈယူတ်းယႃပႅတ်ႈ ။

ထိုင်ၼႂ်းလိူၼ်မေႊ 2026 ၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈပိုၼ်ၽၢဝ်ႇႁႃလွင်ႈၵမ်ႉၸွႆႈပၼ်သေ လႆႈလွင်ႈၵမ်ႉၸွႆႈယူႇသေတႃႉ ပႆႇထိုင်တီႈ ယူတ်းယႃယဝ်ႉတူဝ်ႈ သမ်ႉပေႃးလူႉသဵင်ႈၵႂႃႇ ယဝ်ႉ ၵူၼ်းႁူမ်ႈႁိူၼ်းၼွင်ႉၽူၺ်းလိုၼ်းလၢတ်ႈၼင်ႇၼႆ။

ၸၢႆးၵျေႃႇလူႇ ႁႅင်းၵၢၼ်ယၢၼ်မိူင်း ၵေႃႉပဵၼ် ပီႈဢၢႆႈၼွင်ႉၽူၺ်းလိုၼ်း လၢတ်ႈၼႄလူၺ်ႈၸႂ်ဢမ်ႇလီသေ ဝႃႈ – “ တႃႇယူတ်းယႃတူဝ်ၼွင်ႉယိင်းၼၼ်ႉ ဢဝ်ငိုၼ်းသူင်ႇမိူဝ်းပၼ်ယူႇ ၊ ၵူၼ်းၸွႆႈၵူၼ်းထႅမ်ၵေႃႈ ၵေႃႉဢိတ်းၵေႃႉဢွတ်းၸွႆႈၵၼ်မႃးသေတႃႉ ၵမ်းလိုၼ်းၼွင်ႉယိင်း ပဵၼ်ၵိၼ်းႁႅင်းသေ လူႉၵႂႃႇပႅတ်ႈယဝ် ” ဝႃႈၼႆ။

ၵွၼ်ႇၼႃႈၼၼ်ႉတႄႉ တႃႇၽႃႇတတ်းၼၼ်ႉ တေလူဝ်ႇၵူၼ်းလူႇလိူတ်ႈဢမ်ႇယွမ်း 5 ၵေႃႉ ၊ လိူတ်ႈၼွင်ႉၽူၺ်းလိုၼ်း ပဵၼ် Group B – ပႃႈၶိၼ်ႇဢေး မႄႈ ၼွင်ႉၽူၺ်းလိုၼ်း ယၢမ်ႈတုၵ်းယွၼ်းတၢင်းၸွႆႈထႅမ်ဝႆႉ။

ၼွင်ႉၽူၺ်းလိုၼ်းၼႆႉ တင်ႈတႄႇမိူဝ်ႈ ၸပ်းတၢင်းပဵၼ်ပုမ်ၵႂ်ႈပုမ်ယႂ်ႇၼႆႉမႃးသေ ႁႅင်းလိူတ်ႈဢေႇ ၼႃႈလိူင် ၊ လႆႈထႅင်ႈလိူတ်ႈၵူႈလိူၼ် လႆႈၵိၼ်ယႃႈယႃဢၼ်မေႃယႃပၼ်ၼၼ်ႉၵူႈဝၼ်း ၼႆ ပီၼွင်ႉၸမ်ၸႂ်ထႅင်ႈၵေႃႉၼိုင်ႈလၢတ်ႈၼင်ႇၼႆ။

ယွၼ်ႉဢမ်ႇလႆႈယူတ်းယႃ တဵမ်ထူၼ်ႈ ထိုင်တီႈ လႆႈလႄႈ ၼႂ်းၵႄႈၼႆႉ ၼွင်ႉၽူၺ်းလိုၼ်း ယင်းလၢတ်ႈဝႃႈ – တေလပ်းတေၼွၼ်းယၢပ်ႇၽိုတ်ႇ ၊ တွင်ႉၸဵပ်းၸဵပ်းၵႅၼ်းၵႅၼ်းႁႅင်းၼႃႇ ႁူဝ်ၸဵပ်းႁူဝ်ငၢၼ်ႈ ၊ ၶႂ်ႈၵႂႃႇယူတ်းယႃၽႃႇတတ်း ၶႂ်ႈၸဵဝ်းယူႇလီၼႃႇယဝ်ႉ- ဝႃႈၼႆသေတႃႉၵေႃႈ ဢမ်ႇတၼ်းလႆႈယူတ်းယႃ ။

ဝၼ်းတီႈ 17/06/2026 ၵၢင်ၶမ်ႈၼႆႉ ၼွင်ႉၽူၺ်းလိုၼ်း ၶၢင်းႁူဝ်ၸီးႁူဝ်ၶႆႈၼႆ ၽိူဝ်ႇထိုင်မိူင်းလႅင်းၵၢင်ၼႂ် ဝၼ်းတီႈ 18/06/2026 ၼႆႉ ထိုင်တီႈဢမ်ႇလၢတ်ႈၵႂၢမ်းလႆႈသေ လူႉသဵင်ႈၵႂႃႇၼႆ ၵူၼ်းႁိူၼ်းၼွင်ႉၽူၺ်းလိုၼ်းလၢတ်ႈၼင်ႇၼႆ။

မိူဝ်ႈ ၼွင်ႉၽူၺ်းလိုၼ်း ၸမ်လူႉသဵင်ႈၼႆႉ ၵေႃႉပဵၼ်ပီႈဢၢႆႈ ဢၢၼ်းလုၵ်ႉမိူင်းထႆး မိူဝ်းသီႇပေႃႉ ၵမ်းလဵဝ် ဝႃႈၼႆသေတႃႉၵေႃႈ – ၶၢဝ်းတၢင်းၵႆ – ငဝ်းလၢႆး ၸွမ်းသဵၼ်ႈတႃႈသၢႆတၢင်းၵေႃႈဢမ်ႇၶႅမ်ႉ ၊ ၵၢၼ်သိုၵ်းၵၢၼ်မိူင်းၵေႃႈ ဢမ်ႇလီလႄႈ ဢမ်ႇၸၢင်ႈမိူဝ်း ။ လႆႈမႆႈၸႂ်လၢႆလွင်ႈလႄႈ ၵူၼ်းၼႂ်းမုင်ႉႁေႃႁိူၼ်းၼင်ႇၵၼ် တိုၵ်းသူၼ်းႁၢမ်ႈဢမ်ႇႁႂ်ႈပီႈဢၢႆႈပွၵ်ႈႁိူၼ်းၶိုၼ်း။

ၶၢဝ်းတၢင်းမၼ်းၵေႃႈၵႆ ဢၢႆႈပီႈ ႁဵတ်းၵၢၼ်သေ သူင်ႇငိုၼ်းမႃးပၼ်ဢဝ်ၵူၺ်းလႃႈ ။ ယူႇတီႈပုၼ်ႉသေ ၶႂၢင်းပၼ်မၼ်းမႃးလႄႈ ယႃႇပေ ၼွင်ႇတႃႉမႆႈၸႂ်သင်ၼႆသေ သူင်ႇသဵင်မႃးဢဝ်လႃႈ ။ မိူဝ်ႈမႃးၵေႃႈႁဝ်းဢမ်ႇမႃးၸွမ်းၵၼ် မိူဝ်ႈမိူဝ်းၵေႃႈ ႁဝ်းဢမ်ႇမိူဝ်းၸွမ်းၵၼ်ၼႆလႄႈ ။ ဝႆႉၸႂ်လီလီဢဝ်လႃႈ ဢဝ်ၵႂႃႇႁူင်းယႃၼႆၵေႃႈ မၼ်းပေႃးဢမ်ႇလၢတ်ႈတေႃႇႁဝ်းယဝ်ႉ

ၵွၼ်ႇၼႃႈ ၼႆႉၵေႃႈ ၼွင်ႉၽူၺ်းလိုၼ်း ယင်းသူင်ႇသဵင်ၸူး ပီႈဢၢႆႈမၼ်းဝႆႉဝႃႈ ပေႃးထိုင် လိူၼ် 9 တေၶဝ်ႈမိူင်းထႆး ယူႇၸွမ်းပီႈဢၢႆႈမၼ်းၸၢႆး။ လိူဝ်ၼၼ်ႉ ယင်းယိၼ်းၸူမ်းပႃး ၵူၼ်းဢၼ်ယၢမ်ႈၸွႆႈထႅမ်မၼ်းၼၢင်းၸိူဝ်းၼႆႉလူးၵွၼ်ႇ ။ မၼ်းၼၢင်းလၢတ်ႈဝႆႉၼင်ႇၼႆ –

ပီႈသၢင်ႇႁဝ်း ယႃႇမႆႈၸႂ် ၊ ၵမ်းၼႆႉ ၼွင်ႉၵေႃႈ ၵိၼ်ၶဝ်ႈဝၢၼ်မႃးယဝ်ႉ ။ၼွင်ႉမီးႁႅင်းမႃးယဝ်ႉ ပီႈသၢင်ႇဢူၺ်။ ၸႂ်ထိုင်ပီႈသၢင်ႇႁဝ်းၵူၺ်းယဝ်ႉ။ယဝ်ႉၵေႃႈ ယိၼ်းၸူမ်းဢၼ်လႆႈလွင်ႈၵမ်ႉၸွႆႈမႃးၸိူဝ်းၼၼ်ႉၼႃႈ ။ သင်ဝႃႈ ၼွင်ႉၶႅၼ်းမႃးၼႆ တေမႃးၸူးပီႈသၢင်ႇၼႃႈ

ၼွင်ႉၽူၺ်းလိုၼ်း လၢတ်ႈၸိူင်ႉၼႆ ယင်းပႆႇတဵမ်ဝူင်ႈ သမ်ႉပေႃး ၽၢတ်ႇယၢၼ်ၵူႈၵေႃႉၵႂႃႇယဝ်ႉၼႆ – ပီႈဢၢႆႈမၼ်းၼၢင်းလၢတ်ႈၼင်ႇၼႆ။

မႄႈၼွင်ႉၽူၺ်းလိုၼ်းသိုပ်ႇလၢတ်ႈဝႃႈ – “ၵူၼ်းၵေႃႉဢၼ်ပဵၼ်ၵေႃႈ ႁိုဝ်တေၶႂ်ႈပဵၼ် ၊ ၵူၼ်းၵေႃႉဢၼ်ၸွႆႈၵႃႈယူတ်းယႃၵူႈလိူၼ်ၵေႃႈ လိူဝ်ၸႂ်ယူႇႁင်းၽႂ်မၼ်း။ ဢမ်ႇႁၼ်သဵၼ်ႈတၢင်းတႃႇယူတ်းယႃလုၵ်ႈယိင်းၸဝ်ႈၵဝ်ႇႁႂ်ႈၶႅၼ်းလီ ၊ မိူဝ်ႈလဵဝ် မၼ်းလူႉၵႂႃႇၵေႃႈ ဝႆႉဝႃႈ မၼ်းပူၼ်ႉတၢင်းတုၵ်ႉယဝ်ႉ” – ဝႃႈၼႆ။

ယွၼ်းသူးႁႂ်ႈၼွင်ႉၽူၺ်းလိုၼ်း ႁွတ်ႈထိုင် သုၵတိ တီႈၵတ်းယဵၼ်သေၵမ်းၶႃႈ ။