ယၢမ်းလဵဝ် တီႈ 38 ၸႄႈၸွၼ်ႈ ၼႂ်းမိူင်းထႆးၼႆႉ ၾုၼ်ႇၵႂၼ်းၼမ်ၼႃႁႅင်း၊ ၸၢင်ႈတုမ်ႉယွၼ်ႈတေႃႇပၢႆးယူႇလီလႄႈ ႁႂ်ႈပိၵ်ႉဢိုတ်းႁူင်းႁဵၼ်းသေ သွၼ်ၼိူဝ်ဢွၼ်ႊလၢႆႊၼႆ လုမ်းၶွမ်ႊမသျိၼ်ႊပၢႆးပၺ်ႇၺႃႇမိူင်းထႆး OBEC ပိုၼ်ၽၢဝ်ႇတိုၵ်းသူၼ်းဝႆႉ ၼင်ႇၼႆ။

ၵႅမ်ၽူႈၼမ်းၼႂ်း OBEC လၢတ်ႈဝႃႈ – ၾုၼ်ႇၵႂၼ်း ၸၢင်ႈၼမ်မႃးထႅင်ႈလႄႈ ၼင်ႇႁိုဝ်တေၵႅတ်ႇၶႄလႆႈ ၽေးၾုၼ်ႇၵႂၼ်း PM 2.5 ၼၼ်ႉ လႆႈဢွၵ်ႇၶေႃႈၸီႉသင်ႇဝႆႉတီႈ ႁူင်းႁဵၼ်းလႄႈ လုမ်းၵွၼ်းပၢႆးပၺ်ႇၺႃႇ ၼႂ်းပတ်ႉပိုၼ်ႉမိူင်းထႆး ဝႃႈၼႆ။

ၼင်ႇႁိုဝ်တေလူတ်းယွမ်းလႆႈ လွင်ႈၾုၼ်ႇၵႂၼ်းၼမ်မႃးႁႅင်းၼၼ်ႉ ထုၵ်ႇလီယုၵ်ႉယွင်ႈ ၵၢၼ်တေႃႉသူင်ႇၵူၼ်းတင်းၼမ်လႄႈ လုၵ်ႈႁဵၼ်းလုၵ်ႈဢွၼ်ႇ၊ ထုၵ်ႇလီတိူဝ်းၶႂၢၵ်ႈၽုၵ်ႇသွမ်ႈတူၼ်ႈမႆႉ ၼႂ်းဝၢင်းႁူင်းႁဵၼ်း၊ ၼႂ်းပပ်ႉၵၢၼ်ႁဵၼ်းသွၼ်ၼၼ်ႉ ထုၵ်ႇလီသႂ်ႇပႃးလွင်ႈပၼ်တၢင်းႁူႉ ၵဵဝ်ႇလူၺ်ႈ ၾိင်ႈၾႃႉရႃႇသီႇလႅၵ်ႈလၢႆႈ ၸဵမ်ၸိူဝ်းၼႆႉၼႆ တိုၵ်းသူၼ်းလၢတ်ႈဝႆႉ ၼင်ႇၼႆ။

ယၢမ်းလဵဝ် မိူၼ်ၼင်ႇတီႈ ဢယုထယႃး၊ ၼၶူၼ်ႊသဝမ်၊ ၵၼ်ၶျၼပူႊရီႊ ဢိၵ်ႇထႅင်ႈလၢႆလၢႆၸႄႈဝဵင်းၼႆႉ ၾုၼ်ႇၵႂၼ်းၼမ်ႁႅင်း ၸၼ်ႉသီမၢၵ်ႇၸွၵ်းသေ ၸၢင်ႈတုမ်ႉယွၼ်ႈပၢႆးယူႇလီ။ တီႈႁိမ်းႁွမ်း ဝဵင်းလူင်ၵုင်းထဵပ်ႈ 18 တီႈသမ်ႉ ၾုၼ်ႇၵႂၼ်းမီးဝႆႉၸၼ်ႉသီလိူင်၊ ၼႂ်းၸိုင်ႈထႆးပွတ်းၸၢၼ်းလႄႈ ပွတ်းႁွင်ႇတႄႉ ၾုၼ်ႇၵႂၼ်းတိုၵ်ႉဢႄႇဝႆႉသေ မီးဝႆႉၸၼ်ႉသီၶဵဝ်၊ ဢွင်ႈတီႈမီးလူမ်းၸိုၼ်ႈသႂ်သုတ်းၼႆႉ ပဵၼ်တီႈဝဵင်းလူင် ၵဵင်းမႂ်ႇ လႄႈ မႄႈႁွင်ႈသွၼ် ဝႃႈၼႆ။

ၽွင်ၾုၼ်ႇၵႂၼ်းၼႆႉ ယွၼ်ႉလဵၵ်ႉႁႅင်းၼႃႇလႄႈ ၸၢင်ႈၶဝ်ႈၵႂႃႇထိုင်ၼႂ်းပွတ်ႇၵမ်းသိုဝ်ႈသေ ၸၢင်ႈပဵၼ်ၽေးတေႃႇပၢႆးယူႇလီၵူၼ်းႁၢဝ်ႈႁႅင်း၊ ယွၼ်ႉၼၼ် ႁႂ်ႈၾၢင်ႉၽေးၾုၼ်ႇၵႂၼ်း ၼႆႉၼႆ ၸဝ်ႈၼႃႈတီႈထႆး ပိုၼ်ၽၢဝ်ႇပၼ်ၾၢင်ႉဝႆႉ ၼင်ႇၼႆ။