ဝၢႆးလင်သိုၵ်းမၢၼ်ႈယိုတ်းဢဝ်ဝဵင်းမိူင်းၵုတ်ႇလႆႈၶိုၼ်းၼႂ်းမိုဝ်းသိုၵ်းတဢၢင်း TNLA ႁၢင်ပီ 2025 ၼၼ်ႉသေ ယၢမ်းလဵဝ်သိုၵ်းမၢၼ်ႈဢၢၼ်းၶွတ်ႇၽွတ်ႈၾၢႆႇၽွင်းငမ်းသေၶိုၼ်း ဢၢၼ်းတေပၼ်ႇၵၢၼ်ၶိုၼ်းယူႇယဝ်ႉဝႃႈၼႆ။

သိုၵ်းမၢၼ်ႈယိုတ်းဢဝ်လႆႈၼႂ်းဝဵင်းၵူၺ်း ၸွမ်းဝၢၼ်ႈၸွမ်းဢိူင်ႇတႄႉ တိုၵ်ႉၵိုတ်းယူႇထႅင်ႈလၢႆတီႈ လႄႈ တေႃႇထိုင်မိူဝ်ႈဝႃး ဝၼ်းတီႈ 8/2/2026 ၼႆႉတႄႉ တၢင်းဝၢၼ်ႈၵုင်းၸၢမ်လႄႈ ဝၢၼ်ႈၶျွင်းၵျီး တိုၵ်ႉမီးသဵင်ၵွင်ႈတႅၵ်ႇယူႇ ။ သိုၵ်းမၢၼ်ႈတၢင်းၼႂ်းဝဵင်းၼႆႉၵေႃႈ ယိုဝ်းၵွင်ႈလူင်ၸွႆႈ ၼႆၵူၼ်းပိုၼ်ႉတီႈလၢတ်ႈၼင်ႇၼႆ။

ၵူၼ်းပိုၼ်ႉတီႈလၢတ်ႈဝႃႈ – တေႃႇထိုင်လိူၼ်ၵျႅၼ်ႊၼိဝ်ႊရီႊ 2026 ၼႆႉ ၵူၼ်းၼႂ်းဝဵင်းၵေႃႈၵိုတ်း 3 ပုၼ်ႈ 1 ပုၼ်ႈၵူၺ်း။ ၵၢတ်ႇၵေႃႈဢမ်ႇပိုတ်ႇ။ ႁၢၼ်ႉၶၢႆယႃၵေႃႈမီးႁၢၼ်ႉလဵဝ် ။ ႁဵတ်းႁႂ်ႈၵူၼ်းၸိူဝ်းၵိုတ်းၼႂ်းဝဵင်း ထူပ်းတၢင်းယၢပ်ႇၽိုတ်ႇ ဝႃႈၼႆ။

သိုၵ်းမၢၼ်ယိုတ်းလႆႈၶိုၼ်းၼႂ်းဝဵင်းယဝ်ႉဝႃႈၼႆသေတႃႉ ၵႃႈရူတ်ႉၵႃးလႄႈ ၵႃႈၶူဝ်းၶွင်ၵိၼ်ယမ်ႉတႄႉပႆႇလူတ်းယွမ်းလူင်းၶိုၼ်း။ မိူၼ်ၼင်ႇၵႃႈရူတ်ႉၵႃးလုၵ်ႉဝဵင်းလိူဝ်ႇၵႂႃႇမိူင်းၵုတ်ႈတိုၵ်ႉလႆႈပၼ်ယူႇ 8 မိုၼ်ပျႃး။ တွၼ်ႈတႃႇၵူၼ်းၸိူဝ်းပၢႆႈၽေးသိုၵ်းၵႂႃႇမီးတၢင်ႇတီႈတၢင်ႇလႅၼ် ယၢပ်ႇၽိုတ်ႇတႃႇပွၵ်ႈႁိူၼ်းၶိုၼ်းလႄႈ ၸုမ်းၸွႆႈထႅမ်ပရႁိတ တိုၵ်ႉတေႃႉၸွႆႈယူႇ ၵူၼ်းပိုၼ်ႉတီႈလၢတ်ႈၼင်ႇၼႆ။

ဝဵင်းမိူင်းၵုတ်ႈၼႆႉ သိုၵ်းတဢၢင်း TNLA လႄႈ သိုၵ်း PDF မိူင်းမၢၼ်ႈ ယိုတ်းဢဝ်ၼႂ်းမိုဝ်းသိုၵ်းမၢၼ်ႈမိူဝ်ႈၵၢင်ပီ 2024။ ဝၢႆးၼၼ်ႉသိုၵ်းမၢၼ်ႈဢဝ်ဢဵၼ်ႁႅင်းသေၶိုၼ်းၶဝ်ႈပိုတ်းယိုဝ်းတိုၵ်းတေႃးယူႇၵေႃႈဢမ်ႇဢွင်ႇမၢၼ် တေႃႇထိုင်ႁၢင်ပီ 2025 လူင်ပွင်ၸိုင်ႈမိူင်းၶႄႇ ၶဝ်ႈၵၢင်ၸွႆႈၵႄႈလိတ်ႈႁႂ်ႈသိုၵ်းတဢၢင်းထွႆထွၼ်ဢွၵ်ႇပၼ်ၶိုၼ်းသေ သိုၵ်းမၢၼ်ႈၸင်ႈၶဝ်ႈၵုမ်းၵမ်ၶိုၼ်း။