မိူဝ်ႈႁူဝ်လိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈ တင်း ၸုမ်းသိုၵ်းလုၵ်ႉၽိုၼ်ႉ ယိုဝ်းၵၼ် ၼႂ်းၸႄႈဝဵင်းမိူင်းၵုတ်ႈ၊ ၸႄႈဝဵင်းမိူင်းမိတ်ႈသေ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၵူၼ်းမိူင်းၼႂ်းပိုၼ်ႉတီႈ မၢတ်ႇၸဵပ်းလူႉတၢႆ ၼပ်ႉႁူဝ်သိပ်းၵေႃႉ ။

တႄႇဝၼ်းတီႈ 6 တေႃႇထိုင် ဝၼ်းတီႈ 9 ယၢမ်းၵၢင်ၶမ်ႈ 8 မူင်းၶိုင်ႈ သဵင်ၵွင်ႈယင်းတိုၵ်ႉတႅၵ်ႇပၼ်း လင်ယွၼ်ႈထိုင် ၸွမ်းၼႂ်းပွၵ်ႉဝၼ်းဢွၵ်ႇ ၸႄႈဝဵင်းမိူင်းၵုတ်ႈ ။

ပၢင်တိုၵ်းပဵၼ်ႁၢဝ်ႈႁႅင်းၸွမ်းၾၢႆႇၼွၵ်ႈဝဵင်းမိူင်းၵုတ်ႈ ႁိမ်းႁွမ်းဝၢၼ်ႈ တိတ်ႉသဵင်ႉၵူင်း (သစ်ဆိမ့်ကုန်း ရွာ)၊ ဝၢၼ်ႈပေႃႇမႃး (ဘော်မားရွာ) ၼႆ ၵူၼ်းမိူင်းၵုတ်ႈ လၢတ်ႈၼႄၼင်ႇၼႆ။

“တေႃႇထိုင်မိူဝ်ႈၶမ်ႈဝႃးၶမ်ႈသိုၼ်းၼႆႉ ႁဝ်းတင်းတိုၵ်ႉလႆႈငိၼ်းသဵင်ၵွင်ႈယူႇ။ ငိၼ်းၶၢဝ်ႇဝႃႈ သိုၵ်းမၢၼ်ႈလုၵ်ႉတၢင်းၾၢႆႇ တူၵ်းဝဵင်းမိူင်းၵုတ်ႈၼၼ်ႉႁႄ ႁႅၼ်းၵူၼ်းၶိုၼ်ႈသိုၵ်းမႃး တေႃႇပေႃးထိုင်ၸွမ်းဝၢၼ်ႈသၶၢၼ်းၵျီး (စခန်းကြီး) လေႃႇၺႃးၵၼ်တင်း ၸုမ်းသိုၵ်းလုၵ်ႉၽိုၼ်ႉၶဝ်ၼႆ။”

ၵဵဝ်ႇလူၺ်ႈသိုၵ်းမၢၼ်ႈ ႁႅၼ်းၵူၼ်းၶိုၼ်ႈသိုၵ်းၵႂႃႇၼႂ်းၸႄႈဝဵင်းမိူင်းၵုတ်ႈ၊ ၸႄႈဝဵင်းမိူင်းမိတ်ႈၼၼ်ႉသေ ႁွင်ႈၵၢၼ်ၽွင်းလူင်ၾၢႆႇၵႅတ်ႇၶႄ လူင်ပွင်ၸိုင်ႈၸိူဝ်ႉၸၢတ်ႈၸူဝ်ႈၶၢဝ်း (NUG) ၵေႃႈပိုၼ်ၽၢဝ်ႇဢွၵ်ႇဝႆႉဝႃႈ “ၶွတ်ႇၽွတ်ႈဝႆႉၸုမ်းသိုၵ်းတႃႇပႂ်ႉၵႅတ်ႇၶႄ မိူင်းၵုတ်ႈ- မိူင်းမိတ်ႈၼႆႉယဝ်ႉလီငၢမ်းသေ ယိုတ်းလႆႈဝႆႉပႃး တပ်ႉပၢင်သဝ်းၶွင်သိုၵ်းမၢၼ်ႈ ဢၼ်လမ်ႇလွင်ႈမၼ်းၼၼ်ႉဝႆႉၵမ်ႈၽွင်ႈ” ဝႃႈၼႆ။

မိူဝ်ႈဝၼ်းတီႈ 6 လိူၼ်တီႊသႅမ်ႊပိူဝ်ႊ သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင်သႂ်ႇ တီႈဝၢၼ်ႈမိတ်ႉသူင်ႇ ဢၼ်မီးၵႄႈၵၢင် ဝဵင်းမိူင်းမိတ်ႈ လႄႈ မၢၼ်ႈပဵင်း ၵူၼ်းမိူင်း လူႉတၢႆၵႂႃႇ 11 ၵေႃႉ ပႃးလုၵ်ႈဢွၼ်ႇ လႄႈ မႄႈမၢၼ်း ။

ပိုၼ်ႉတီႈဢၼ်သိုၵ်းတေဢမ်ႇလႆႈယိုဝ်းလႃးလႃး ႁိုဝ် တေဢမ်ႇလႆႈတိူဝ်ႉလႃးလႃးၼႆႉပဵၼ် -ႁိူၼ်းယေး ၵူၼ်းမိူင်း၊ ႁူင်းယႃ ႁွင်ႈယႃ၊ ႁူင်းႁဵၼ်း၊ ဝတ်ႉဝႃး ၽႃသိူဝ်ႇ ဢွင်ႈတီႈၵိူဝ်းယမ်၊ သိင်ႇဝႅတ်ႉလွမ်ႉဝၢၼ်ႈသူၼ်၊ ႁႆႈၼႃးမၢၵ်ႇၶဝ်ႈတဝ်ႈၼမ်ႉ၊ ႁူင်းၵၢၼ်ႁူင်းၸၢၵ်ႈဢၼ်ၸၢင်ႈတႅၵ်ႇပဵၼ်ၵွင်ႉငူၼ်ႉမီးၽေးတေႃႇၵူၼ်းမိူင်း ၸဵမ်ၸိူဝ်းၼႆႉ – ပႃးၼႂ်းလိၵ်ႈၵိၼ်ၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ ၼင်ႇၼႆ။

ယွၼ်ႉလူင်ပွင်ၸိုင်ႈမိူင်းၶႄႇ ၶဝ်ႈၵၢင်ႁဵတ်းၶဵဝ်ပၼ်သေ သိုၵ်းမၢၼ်ႈ တင်း သိုၵ်းတဢၢင်း (TNLA) တူၵ်းလူင်းၵိုတ်းတိုၵ်းၵၼ် လူၺ်ႈဢမ်ႇမၵ်းမၼ်ႈၶၢဝ်းႁိုင်ၵူၺ်းဢမ်ႇၵႃး သိုၵ်းတ ဢၢင်း တေထွႆသၢႆသိုၵ်း ဢွၵ်ႇပၼ်ၶိုၼ်း ၼႂ်းၸႄႈဝဵင်းမိူင်းၵုတ်ႈ – ၸႄႈဝဵင်းမိူင်းမိတ်ႈၼႆ – ၾၢႆႇသိုၵ်းတဢၢင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ မိူဝ်ႈဝၼ်းတီႈ 29 /10/ 2025 ဝႆႉ။

ဝၢႆးလင်သိုၵ်းတဢၢင်း ႁွင်ႉဢဝ်ႁႅင်းသိုၵ်းထွႆဢွၵ်ႇၵႂႃႇၼႂ်းႁၢင်လိူၼ်ၼူဝ်ႊဝႅမ်ႊပိူဝ်ႊၼႆႉယဝ်ႉဢမ်ႇႁိုင် ၼႂ်းဝူင်ႈႁႅၵ်ႈ- ႁူဝ်လိူၼ်တီႊသႅမ်ႊပိူဝ်ႊ ဝၼ်းတီႈ 6 ၼႆႉ လူင်ပွင်ၸိုင်ႈၸိူဝ်ႉ ၸၢတ်ႈၸူဝ်ႈၶၢဝ်း (NUG) ပိုၼ်ၽၢဝ်ႇဢွၵ်ႇၼႄ ငဝ်းလၢႆး လႄႈ ၵၢၼ်ႁၢင်ႈႁႅၼ်းသိုၵ်း ၼႂ်းပိုၼ်ႉတီႈၸႄႈဝဵင်းမိူင်းၵုတ်ႈ၊ ၸႄႈဝဵင်းမိူင်းမိတ်ႈ ပဵၼ်ပွၵ်ႈဢွၼ်တၢင်းသုတ်း။

သိုၵ်းမၢၼ်ႈဢဝ်ႁႅင်းသိုၵ်း ၶဝ်ႈမႃးထိုင်ၼႂ်းဝဵင်းမိူင်းၵုတ်ႈယဝ်ႉဢမ်ႇႁိုင် တႄႇဝၼ်းတီႈ 30 လိူၼ်ၼူဝ်ႊဝႅမ်ႊ ပိူဝ်ႊ ယၢမ်းတၢမ်းၶမ်ႈ 6 မူင်း သိုၵ်းမၢၼ်ႈတႄႇၸတ်းပၢင်တိုၵ်းတေႃႇ ၸုမ်းသိုၵ်းလုၵ်ႉၽိုၼ်ႉ ႁၢၼ်ႉတေႃႇထိုင် ဝၼ်းတီႈ 6 လိူၼ်တီႊသႅမ်ႊပိူဝ်ႊ ႁိုင်မွၵ်ႈ 1 ဝူင်ႈၵူၺ်း ပဵၼ်ပၢင်တိုၵ်းၵႂႃႇ ဢမ်ႇယွမ်း 9 ပွၵ်ႈယဝ်ႉ လႆႈႁူႉၼင်ႇၼႆ။