ပပ်ႉၶၢမ်ႈမိူင်းသီလႅင် မိူင်းႁူမ်ႈတုမ် ဢၼ်ၸႂ်ႉတိုဝ်းဝႆႉယူႇယၢမ်းလဵဝ်ၼၼ်ႉ ၾၢႆႇႁွင်ႈၵၢၼ်ၽွင်းလူင်ၼႂ်းမိူင်းၶဝ် ႁၢင်ႈႁႅၼ်းၸတ်းၽႅၼ်တေလၢႆႈပိူင်သေ ၶိုၼ်ႈၸၼ်ႉႁဵတ်းပဵၼ် Digital Passport/E-Passport ပိူဝ်ႈတႃႇႁႂ်ႈ မီး လွင်ႈႁူမ်ႇလူမ်ႈၼႅၼ်ႈၼႃမႃးလိူဝ်ၵဝ်ႇ ၼႆယဝ်ႉ။
ပပ်ႉၶၢမ်ႈမိူင်းသီလႅင် ဢၼ်ၵူၼ်းမိူင်းႁူမ်ႈတုမ်ဢၼ်ၵူႈၵေႃႉၸႂ်ႉတိုဝ်းယူႇယၢမ်းလဵဝ်ၼႆႉ ႁွင်ႈၵၢၼ်ၽွင်းလူင် ၵူတ်ႇထတ်းၵူၼ်းၶဝ်ႈ/ဢွၵ်ႇမိူင်းၶဝ် ဢမ်ႇၸၢင်ႈၵူတ်ႇထတ်း ၶေႃႈမုလ်း ၵူၼ်းၸႂ်ႉတိုဝ်းတႅတ်ႈတေႃးလႄႈ ၸင်ႇႁၢင်ႈႁႅၼ်းတႃႇလႅၵ်ႈလၢႆႈပိူင်ၵၢၼ်ၸႂ်ႉတိုဝ်း လႄႈ ႁဵတ်းဢွၵ်ႇပပ်ႉၶၢမ်ႈမိူင်းဢၼ်မႂ်ႇယူႇ ဝႃႈၼႆ။
ၽူႈမီးၸၼ်ႉ ၵေႃႉဢၼ်ၸမ်ၸႂ်ၵၼ်တင်း ၽူႈယႂ်ႇၵူၼ်းလူင်ၼႂ်းႁွင်ႈၵၢၼ်ၽွင်းလူင်ၼႂ်းမိူင်းၼၼ်ႉ လၢတ်ႈဝႃႈ – ၵၢၼ်ပိၼ်ႇ လႅၵ်ႈလၢႆးႁဵတ်းဢွၵ်ႇပပ်ႉၶၢမ်ႈမိူင်းဢၼ်မႂ်ႇၼႆႉ မိူၼ်ၵၼ်တင်းလၢႆးဢၼ်လုၵ်ႉတီႈမၢႆၾၢင် လႅၵ်ႈပဵၼ် သမၢတ်ႉၵၢတ်ႉ (Smartcard) ၼၼ်ႉၵူၺ်းၼင်ႇၵဝ်ႇ။ ပပ်ႉၶၢမ်ႈမိူင်းဢၼ်တေဢၢၼ်းၶႂ်ႈလႅၵ်ႈမႂ်ႇၼၼ်ႉ ၼႂ်းမၼ်းတေသႂ်ႇဝႆႉပၼ်ပႃး Chip ဢၼ်ပႃးဝႆႉ ၶေႃႈမုၼ်း သုၼ်ႇတူဝ်ၵူၼ်းၵေႃႉယိပ်းပပ်ႉၼၼ်ႉတင်းသဵင်ႈ (တူဝ်ယၢင်ႇ- လၢႆးၼိဝ်ႉမိုဝ်း၊ သၢႆတႃ) ၸိူဝ်းၼႆႉ တေဢဝ်ၶိူင်ႈၸၢၵ်ႈသၵႅၼ်ႊ ၸႂ်ႉလၢႆး Digital သေသႂ်ႇဝႆႉပၼ်ႁႂ်ႈၸေးၸေး။ ပေႃးႁဵတ်းၼၼ်ၸင်ႇ ပိူၼ်ႈတေဢမ်ႇၸၢင်ႈႁဵတ်းပပ်ႉၶၢမ်ႈမိူင်းဢၼ်ပွမ်- ၼႆယဝ်ႉ။
ဢိင်ၼိူဝ်ငဝ်းလၢႆးၵၢၼ်မိူင်းလႅၵ်ႈလၢႆႈသေ ၾၢႆႇၼိုင်ႈၵေႃႈ ႁွင်ႈၵၢၼ်ၽွင်းလူင်ပၵ်းပိူင်ၾိင်ႈမိူင်း တႂ်ႈဢႃႇၼႃႇ ၽွင်းငမ်းသိုၵ်းမၢၼ်ႈ ၶတ်းၸႂ်ပိၼ်ႇလႅၵ်ႈၶဵၼ်ႇတႅမ်ႈမူႇပိူင်မႂ်ႇ ၵဵဝ်ႇၵပ်း ပပ်ႉၶၢမ်ႈမိူင်း မိူင်းႁူမ်ႈတုမ်ႁႂ်ႈပဵၼ်တၢင်းၵၢၼ်ယူႇ။
မိူဝ်ႈဝၼ်းတီႈ 11/02/2026 ၼၼ်ႉ ႁွင်ႈၵၢၼ်ၽွင်းလူင်ၼႂ်းမိူင်း လႄႈ ၶႃႈႁၢပ်ႇၵၢၼ်ၶုၼ် ၸိူဝ်းယူႇ တႂ်ႈဢၢမ်းၼၢတ်ႈသိုၵ်းမၢၼ်ႈၼၼ်ႉ ၸတ်းႁဵတ်းပၢင်ၵုမ် ၵဵဝ်ႇၵပ်းလွင်ႈပပ်ႉၶၢမ်ႈ မိူင်း မိူင်းႁူမ်ႈတုမ်သေ လၢတ်ႈၵႂႃႇဝႃႈ- မူႇပိူင်ပပ်ႉၶၢမ်ႈမိူင်း မိူင်းႁူမ်ႈတုမ် ဢၼ်ၸႂ်ႉတိုဝ်း ယူႇယၢမ်းလဵဝ်ၼႆႉ ဢမ်ႇငမ်ႇမႅၼ်ႈၵၼ်တင်း ငဝ်းလၢႆးယၢမ်းလဵဝ်လႄႈ ၸင်ႇလႆႈႁၢင်ႈႁႅၼ်း ၸတ်းၽႅၼ် တႃႇၶဵၼ်ႇတႅမ်ႈ ၸတ်းႁဵတ်း ပိူင်မႂ်ႇ – ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ