တႄႇၵၢင်လိူၼ်ၵျႃၼ်ႊ မႃးသိုၵ်းမၢၼ်ႈၸီႉသင်ႇ ပူတ်းပႅတ်ႈၵဵတ်ႉလၢၼ်ႇ ၼႂ်းၸိုင်ႈတႆးပွတ်းၸၢၼ်း လၢႆလၢႆတီႈယူႇသေတႃႉ ၶၼ်ၵုၼ်ႇလႄႈ ၵႃႈၵႃး ဢမ်ႇယွမ်းလူင်း  ႁဵတ်းႁႂ်ႈ ၵူၼ်းၵႃႉၶၢႆၵုၼ်ႇ ယၢပ်ႇၽိုတ်ႇဝႆႉ   ။

ၵဵတ်ႉလၢၼ်ႇ ၼႂ်းၸိုင်ႈတႆးပွတ်းၸၢၼ်း ဢၼ်ပူတ်းပႅတ်ႈ ယၢမ်းလဵဝ်ၼၼ်ႉ ပဵၼ်ၵဵတ်ႉလၢၼ်ႇ ၼိူဝ်သဵၼ်ႈတၢင်း တူၼ်ႈတီး – ႁူဝ်ပူင်း ၊ တူၼ်ႈတီး -မိူင်းသူႈ ၊ မိူင်းၼွင် – လၢႆးၶႃႈ ၼႆယူႇသေတႃႉယွၼ်ႉ ၶၼ်ၼမ်ႉမၼ်းၸၢၵ်ႈ ဢမ်ႇယွမ်းလူင်း ၶၼ်ၵုၼ်ႇၵေႃႈသိုပ်ႇပုင်ႈၶိုၼ်ႈဝႆႉ လၢႆပုၼ်ႈ  ။

ၸဝ်ႈၵႃးၵူၼ်းမိူင်းဝဵင်းတူၼ်ႈတီး – မိူင်းသူႈလၢတ်ႈၽူႈတွႆႇႁွၵ်ႈဝႃႈ -“ ၵဵတ်ႉလၢၼ်ႇပူၵ်းပႅတ်ႈမူတ်းတႄႉ ဢမ်ႇၸႂ်ႈ ၊ တင်းလၢႆးၶႃႈ ၊ မိူင်းပွၼ်ႇလႄႈ ၵဵတ်ႉ4 လၵ်း တူၼ်ႈတီး ၼႆႉ ၵႃးပႆႇၵႂႃႇမႃးလႆႈလွတ်ႈလႅဝ်း ၊ ၶဝ်ၵႆႉၸႂ်ႉဢဝ်ၵုၼ်ႇဢၼ်တၢင်ႇမႃးၼၼ်ႉ လူင်းဝႆႉယူႇ ၊ ၶၼ်ၼမ်ႉမၼ်းၵေႃႈ ဢမ်ႇယွမ်းၼမ် ယွၼ်ႉၼၼ် ၵႃႈၵႃးၼႆႉပႆႇၸၢင်ႈယွမ်းၶႃႈ”- ဝႃႈၼႆ ။

ယၢမ်းလဵဝ် ၸဝ်ႈၵႃးသႂ်ႇၼမ်ႉမၼ်းတီႈပၢမ်ႉၼမ်ႉမၼ်းလႆႈ ၼိုင်ႈဝူင်ႈၼႆႉ 90 လီႊတႃႊ ၊ ယွၼ်ႉဢမ်ႇၵုမ်ႇထူၼ်ႈလႄႈ ၸဝ်ႈၵႃးလႆႈသိုဝ်ႉတၢင်းၼွၵ်ႈမႃးထႅမ်သႂ်ႇထႅင်ႈ ။ ၶၼ်ၼမ်ႉမၼ်းၸၢၵ်ႈ တီႈပၢမ်ႉ  ၼိုင်ႈလိတ်ႉ (လီႊတႃႊ ) 4800 ပျႃး ၊  ၶၼ်တင်းၼွၵ်ႈ   ၼိုင်ႈလိတ်ႉ (လီႊတႃႊ ) 8000 ပျႃး – ၸဝ်ႈၵႃးလၢတ်ႈၼင်ႇၼႆ။

ယွၼ်ႉၵႃးၶၼ်ၼမ်ႉမၼ်းဢမ်ႇယွမ်းလူင်း ၊ ၸဝ်ႈၵႃးဢမ်ႇလႆႈတေႃႉတၢင်ႇၵုၼ်ႇၵႂႃႇမႃးလႄႈ ၵႃႈၵႃးဢမ်ႇၸၢင်ႈ ယွမ်းလူင်း ။ မိူၼ်ၼင်ႇၼႆ ယွၼ်ႉၵႃႈၵႃးဢမ်ႇယွမ်းလူင်းလႄႈ ၶၼ်ၵုၼ်ႇၵေႃႈသိုပ်ႇပုင်ႈၶိုၼ်ႈဝႆႉၼႆ ၵူၼ်းၶၢႆၵုၼ် ဝဵင်းမိူင်းသူႈ လၢတ်ႈၼင်ႇၼႆ ။

“ၶဝ်လၢတ်ႈဝႃႈ ၵဵတ်ႉလၢၼ်ႇၸွမ်းတၢင်းပူတ်းပႅတ်ႈယဝ်ႉၼႆသေတႃႉဢမ်ႇပႆႇတုမ်ႉတိူဝ်ႉတႄႉတႄႉ ၊ ၵဵတ်ႉမၢင်ၸိူဝ်း တိုၵ်ႉၵူတ်ႇထတ်းႁၢဝ်ႈႁႅင်းယူႇ ၊ တလဵဝ်တႄႉ ၵႃႈၵႃးၵေႃႈ ဢမ်ႇယွမ်း ၊ ၶၼ်ၵုၼ်ႇၵေႃႈဢမ်ႇတူၵ်းၶႃႈ ၊ ပေႃးၶႂ်ႈၵႂႃႇႁူင်းယႃတီႈတူၼ်ႈတီးၸိူဝ်းၼႆႉၼႆ တိုၵ်ႉမီးတၢင်းယၢပ်ႇဝႆႉယူႇတင်းၼမ် ၊ မုင်ႈမွင်းဝႃႈ ႁႂ်ႈၵူၼ်းမိူင်း ၸၢင်ႈၵႃႈမႃးငၢႆႈလူမ်ႇၸႂ် မိူၼ်ၵူႈပွၵ်ႈဢေႃႈ”- ဝႃႈၼႆ ။

ယၢမ်းလဵဝ် ၵဵတ်ႉလၢၼ်ဢၼ်တိုၵ်ႉၵိုတ်းဝႆႉၼၼ်ႉ ပဵၼ်ၵဵတ်ႉလၢၼ်ႇ တၢင်းၶဝ်ႈမိူင်းပွၼ် ၊ ၵဵတ်ႉတၢင်းၶဝ်ႈဝဵင်းလွႆလႅမ် ၊ ၵဵတ်ႉတၢင်းၶဝ်ႈဢွၵ်ႇဝဵင်းလၢႆးၶႃႈ လႄႈ ၵဵတ်ႉလၢၼ်ႇဢၼ်သိုၵ်းPNO ပႂ်ႉၵူတ်ႇထတ်းတီႈၼွင်လႅင် ၸဵမ်ၸိူဝ်းၼႆႉ – ၵူၼ်းပိုၼ်ႉတီႈလၢတ်ႈ။