တႄႇႁူဝ်ပီ 2026 ၼႆႉမႃး သိုၵ်းမၢၼ်ႈၸိူဝ်းပႂ်ႉၸွမ်းၵဵတ်ႉလၢၼ်ႇ ၼိူဝ်သဵၼ်ႈတၢင်း ၸႄႈဝဵင်းၵျွၵ်ႉမႄး ယွၼ်းငိုၼ်းၵူၼ်းမိူင်းၸိူဝ်းမႃးသိုဝ်ႉၶူဝ်းၵုၼ်ႇ ၼႂ်းဝဵင်းၵျွၵ်ႉမႄးသေ မိူဝ်းတၢင်းဝၢၼ်ႈၼၼ်ႉ ၼမ်ႁႅင်း မႃးလိူဝ်ၵဝ်ႇတေႉတေႉဝႃႈဝႃႈ ၼႆယဝ်ႉ။
ပဵၼ်ၶိင်ႇၶၢဝ်းၵူၼ်းမိူင်းဢဝ်မၢၵ်ႇၶဝ်ႈတဝ်ႈၼမ်ႉ ဢွၵ်ႇယဝ်ႉလႄႈ ၵူၼ်းဝၢၼ်ႈၸိူဝ်းယူႇသဝ်းၸွမ်းထုင်ႉဝၢၼ်ႈ ၼွင်ပိင်ဢွၼ်ႇ ဢွၼ်ၵၼ်တေႃႉဢဝ်ၶဝ်ႈၵၢပ်ႇမႃးၶၢႆၼႂ်းဝဵင်းသေ ၶိုၼ်းသိုဝ်ႉၶူဝ်းၵုၼ်ႇၵိၼ်ယႅမ်ႉ မိူဝ်းတၢင်းဝၢၼ်ႈ ၸွမ်းတၢင်းၺႃးသိုၵ်းမၢၼ်ႈၸိူဝ်းယူႇပႂ်ႉတီႈၵဵတ်ႉလၢၼ်ႇ ၼိူဝ်သဵၼ်ႈတၢင်းၵႂႃႇမႃး မိပ်ႇငႅၼ်းယွၼ်းၶွၼ်ႇၼမ်ႁႅင်း ၵူၼ်းမိူင်းႁူပ်ႉတၢင်းယၢပ်ႇလွင်ႈၵႂႃႇမႃးယူႇ ၼႆယဝ်ႉ။
ၼၢင်းယိင်းဢႃႇယု 40 ပၢႆ ၵေႃႉလႆႈပၼ်ၶွၼ်ႇတီႈသိုၵ်းမၢၼ်ႈဢၼ်ပႂ်ႉတီႈၵဵတ်ႉလၢၼ်ႇ ၸႄႈဝဵင်းၵျွၵ်ႉမႄး ၼၼ်ႉ လၢတ်ႈၼႄတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းမၢၼ်ႈဢၼ်ပႂ်ႉၵဵတ်ႉတီႈ ႁိမ်းဝၢၼ်ႈၼွင် ပိင်ဢွၼ်ႇၼၼ်ႉ ဢေႃႈယွၼ်း။ ႁဝ်းၵႂႃႇသိုဝ်ႉၵုၼ်ႇတၢင်းၼႂ်းဝဵင်းႁႄ ပွၵ်ႈမႃး။ သိုၵ်းမၢၼ်ႈၸိူဝ်းပႂ်ႉတီႈၵဵတ်ႉ ႁိမ်းဝၢၼ်ႈၼွင်ပိင် ဢွၼ်ႇၼၼ်ႉ ယွၼ်းငိုၼ်းႁဝ်း။ ၵူႈပွၵ်ႈႁဝ်းဢမ်ႇလႆႈပၼ်ၼမ်တၢၼ်ႇၼႆႉ။ ပွၵ်ႈၼႆႉ လႆႈပၼ်ငိုၼ်းၶဝ်ၵႂႃႇ 9 သႅၼ်ဢေႃႈ။ မိူဝ်ႈပူၼ်ႉမႃးၶဝ်ၵူၺ်းယွၼ်းၵႃႈၶဝ်ႈၵႃႈၽၵ်းၶဝ်ၼႆ လႆႈပၼ်ယူႇၼိုင်ႈႁဵင်၊ သွင်ႁဵင်ၵူၺ်း” ဝႃႈၼႆ။
သိုၵ်းမၢၼ်ႈၼႆႉ ဢမ်ႇၵွမ်ႉဝႃႈၵဵပ်းဢဝ်ငိုၼ်းတီႈ ၵူၼ်းၵႃႉၶူဝ်းၵုၼ်ႇၵူၺ်း တီႈၵူၼ်းဝၢၼ်ႈၸိူဝ်းတေႃႉၶဝ်ႈၵၢပ်ႇ ၵႂႃႇၶၢႆၼႂ်းဝဵင်းသေ သိုဝ်ႉၶဝ်ႈၼမ်ႉတၢင်းၵိၼ် လႄႈ ၼမ်ႉမၼ်း ၼႂ်းဝဵင်းပွၵ်ႈမႃးၶိုၼ်းတီႈဝၢၼ်ႈၼၼ်ႉၵေႃႈ ယွၼ်းငိုၼ်းပႃး ၼႆယဝ်ႉ။
ၼၢင်းယိင်းဢႃႇယု 50 ပၢႆၵေႃႉလုၵ်ႉတၢင်းဝၢၼ်ႈၾၢႆႇၼႂ်းဝၢၼ်ႈၼွင်ပိင်ဢွၼ်ႇ တေႃႉၶဝ်ႈၵၢပ်ႇၵႂႃႇၶၢႆ ၼႂ်းဝဵင်း ၵျွၵ်ႉမႄးလၢတ်ႈၼႄတီႈၽူႈတွႆႇႁွၵ်ႈဝႃႈ “ပေႃးႁဝ်းတၢင်ႇၶဝ်ႈၵၢပ်ႇၵႂႃႇၶၢႆ ၼႂ်းဝဵင်းၼႆၶဝ်ယွၼ်းၶွၼ်ႇ ႁဝ်းၼမ် တေႉဢေႃႈ ၸူဝ်ႈဝူင်ႈဝၢင်ႈၼႆ။ ဢမ်ႇၸႂ်ႈဝႃႈႁဝ်းၵူၼ်းတေႃႉၶဝ်ႈၵၢပ်ႇၵႂႃႇၶၢႆၸိူင်ႉႁဝ်းၵူၺ်းၶဝ်ယွၼ်း ၵူၼ်း ဢၼ်ဢဝ်သႅင်ႇၵႄႇ (ရူတ်ႉၶိူင်ႈ) မႃးတေႃႉမိူဝ်းၼၼ်ႉၵေႃႈ ၶဝ်ယွၼ်းယဝ်ႉ။ ပေႃးတၢင်ႇၼမ်ႉမၼ်းမိူဝ်း ၼိုင်ႈ ပုင်းၼႆႉ လႆႈပၼ်ၶဝ် 1 မိုၼ်ႇဢေႃႈ။ မိူဝ်ႈလဵဝ်ၶဝ်လီလႃႈႁဵတ်းၼႃႇလႄႈ ႁဝ်းၵူၼ်းဝၢၼ်ႈတႄႉယၢပ်ႇၸႂ်ဝႆႉ ဢေႃႈ” ဝႃႈၼႆ။
ၵဵတ်ႉလၢၼ်ႇသိုၵ်းမၢၼ်ႈဢၼ်ပႂ်ႉယွၼ်းငိုၼ်းၵူၼ်းမိူင်းၼႂ်းၸႄႈဝဵင်းၵျွၵ်ႉမႄးယူႇၼၼ်ႉ ပဵၼ်တီႈႁိမ်းတၢင်း ၽႄၵႂႃႇဝၢၼ်ႈၵျွႆးၵုင်း၊ ဝၢၼ်ႈၼွင်ပိင်ဢွၼ်ႇ ၸႄႈဝဵင်းၵျွၵ်ႉမႄး ၼႆယဝ်ႉ။
တႄႇဝၼ်းတီႈ 1 လိူၼ်ဢွၵ်ႉထူဝ်ႊပိူဝ်ႊ 2025 မႃး သိုၵ်းမၢၼ်ႈ ၶဝ်ႈယိုဝ်းသိုၵ်းတဢၢင်း TNLA ၼႂ်းဝဵင်းၵျွၵ်ႉ မႄးသေ တႄႇယိုတ်းဢဝ်ဝဵင်းၵျွၵ်ႉမႄးယဝ်ႉ ပၼ်ႇၵၢၼ်ၽွင်းငမ်းဝႆႉ ႁၢၼ်ႉတေႃႇထိုင်ယၢမ်းလဵဝ်။ ၼႂ်းဝၼ်းတီႈ 25/1/2026 ၼႆႉၵေႃႈ သိုၵ်းမၢၼ်ႈႁၢင်ႈႁႅၼ်းၸတ်းပၢင်လိူၵ်ႈတင်ႈ တီႈဝဵင်းၵျွၵ်ႉမႄးလႄႈသီႇပေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ