ၼႂ်းလိူၼ်ၵျုၼ်ႊၼႆႉ ၶႃႈႁၢပ်ႇၵၢၼ်လူင်ပွင်ၸိုင်ႈသိုၵ်းမၢၼ်ႈ ၸီႉသင်ႇဢွၵ်ႇၶေႃႈပူင် ႁႂ်ႈၶတ်းလိူၵ်ႈၽူႈၵွၼ်းပွၵ်ႉဢိူင်ႇယဝ်ႉတူဝ်ႈလီငၢမ်း ၼႂ်းၶၢဝ်းတၢင်းၼိုင်ႈဝူင်ႈ ၵူၼ်းပိုၼ်ႉတီႈဢမ်ႇမီးၵေႃႉလႂ်တဵမ်ၸႂ်ၶႂ်ႈႁဵတ်းၼႆလႄႈ ၵေႃႇမတီႇၾၢႆႇၸတ်းၵၢၼ် ပွၵ်ႉဢိူင်ႇၼႂ်းဝဵင်းလႃႈသဵဝ်ႈ လႆႈႁဵတ်းလိၵ်ႈမွၵ်ႇထိုင်ၵူၼ်းမိူင်းသေ ၸတ်းပၢင်ၶတ်းလိူၵ်ႈၵႂႃႇ ဝႃႈၼႆ။

မိူဝ်ႈဝၼ်းတီႈ 22/6/2026 တႄႇယၢမ်းၵၢင်ၼႂ် တေႃႇဝၢႆးဝၼ်း ၵေႃႇမတီႇၾၢႆႇၸတ်းၵၢၼ် ပွၵ်ႉဢိူင်ႇၼႂ်းဝဵင်းလႃႈသဵဝ်ႈ ႁွင်ႉဢဝ်ၵူၼ်းမိူင်းၸိူဝ်းယူႇၼႂ်းပိုၼ်ႉတီႈတင်းသဵင်ႈၵႂႃႇပၼ်သဵင် ၵၢင်ၸႂ် လိူၵ်ႈတင်ႈ ၽူႈၵွၼ်းပွၵ်ႉ တီႈႁူင်းႁေႃၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းလႃႈသဵဝ်ႈ ဝႃႈၼႆ။

ၵူၼ်းမိူင်းၵေႃႉယူႇၼႂ်းဝဵင်းလႃႈသဵဝ်ႈၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၵူႈပွၵ်ႈၼႆႉၵျိူၵ်ႈၵေႃႉလႂ်ၵေႃႈ ပိူၼ်ႈဢဝ်ႁဵတ်းၵႂႃႇၸိူင်ႉၼၼ်ၵူၺ်း။ ဝၢႆးမႃးၸင်ႇ ပိူၼ်ႈႁဵတ်းလိၵ်ႈႁႄ ႁႃမွၵ်ႇၵူႈႁိူၼ်း ႁဵတ်းပၢင်လိူၵ်ႈ ပၼ်သဵင်ၵၢင်ၸႂ် ၸိူင်ႉၼင်ႇ ပၢင်လိူၵ်ႈတင်ႈၼၼ်ႉၵႂႃႇတိၵ်းတိၵ်း။ မိူဝ်ႈဝႃးၼႆႉ မီးၵူၼ်းၶဝ်ႈလိူၵ်ႈမၼ်း 17 ၵေႃႉ ၵူၺ်းလိုၼ်းသုတ်း ၵိုတ်း 2 ၵေႃႉၵူၺ်း လႆႈသဵင်ၼမ်လိူဝ်ပိူၼ်ႈ။ ပဵၼ်ဢူၵ်ႉၵထၵဝ်ႇ တင်း ထႅင်ႈၵေႃႉမႂ်ႇ။ လိုၼ်းသုတ်းၵေႃႈ ပဵၼ်ဢူၵ်ႉၵထၵေႃႉၵဝ်ႇၵူၺ်း လႆႈသဵင်ၼမ်ၵႂႃႇလိူဝ်ပိူၼ်ႈ။ ၶဝ်မွၵ်ႇၵူႈႁိူၼ်းယူႇသေတႃႉ ၵူၼ်းမႃးပၼ် သဵင်ၼႆႉဢေႇႁႅင်းၼႃႇ” ဝႃႈၼႆ။

လႆႈႁူႉဝႃႈ ဢၼ်ၸတ်းပၢင်လိူၵ်ႈ ၽူႈၵွၼ်းပွၵ်ႉ ၼႂ်းဝဵင်းလႃႈသဵဝ်ႈၼႆႉ ပွၵ်ႉ 5 ၊ ပွၵ်ႉ 7 ၸိူဝ်းၼႆႉၵေႃႈ ႁဵတ်းၼႂ်းဝၼ်းလဵဝ်ၵၼ်။ ၵူၼ်းမီးသုၼ်ႇၵႂႃႇလိူၵ်ႈၽူႈပွၼ်းပွၵ်ႉၵေႃႈ ၾၢႆႇၸဝ်ႈၼႃႈတီႈၶဝ် မၵ်းမၼ်ႈဝႆႉ ႁႂ်ႈပဵၼ်ၵူၼ်းဢႃႇယုတဵမ် 18 ပီ ၼိုင်ႈႁိူၼ်းလႂ် 1 ၵေႃႉၵူၺ်း ဝႃႈၼႆ။

တႃႇၶတ်းလိူၵ်ႈၽူႈၵွၼ်းပွၵ်ႉၼႂ်းဝဵင်းလႃႈသဵဝ်ႈၼၼ်ႉ ၵေႃႇမတီႇၾၢႆႇၸတ်းၵၢၼ်ၽွင်းငမ်းဝဵင်းၶဝ် ႁဵတ်းပၵ်းပိူင်ဢွၵ်ႇမႃးဝႆႉ မီးယူႇ 5 ၶေႃႈ။ ၵူၼ်းၸိူဝ်းၵႂႃႇပၼ်သဵင်ၵၢင်ၸႂ် တေလႆႈငမ်ႇမႅၼ်ႈတင်းပၵ်းပိူင်၊ တေလႆႈဢဝ်ဝႂ်မုင်ႉႁေႃႁိူၼ်း ဢၼ်မီးမၢႆ (66/6) လႄႈ မၢႆၾၢင် ဢၼ်တေႉမၼ်းၵႂႃႇပႃးၵမ်းသိုဝ်ႈ ဝႃႈၼႆ။

တႄႇလိူၼ်မေႊမႃး ၽူႈမီးပုၼ်ႈၽွၼ်း ၼႂ်းဝဵင်းမူႇၸေႊ လႄႈ ဝဵင်းၼမ်ႉၸၢင် ၵေႃႈလႆႈၶတ်းလိူၵ်ႈ ၽူႈၵွၼ်းပွၵ်ႉမႂ်ႇ ယဝ်ႉတူဝ်ႈလီငၢမ်းၵႂႃႇၼႂ်းႁူဝ်လိူၼ်ၵျုၼ်ႊၼႆႉမိူၼ်ၵၼ်ၼႆ ၵူၼ်းမိူင်းပိုၼ်ႉတီႈလၢတ်ႈၼင်ႇၼႆ။

ၵူၼ်းမိူင်းၵေႃႉယူႇၼႂ်းဝဵင်းမူႇၸေႊၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ “ၵၢၼ်လိူၵ်ႈၽူႈၵွၼ်းပွၵ်ႉၼႆႉ ၾၢႆႇၼိုင်ႈတင်းၾၢႆႇၼိုင်ႈတေဢမ်ႇမိူၼ်ၵၼ်။ မၢင်ၸိူဝ်းႁဵတ်းၼႂ်းလိူၼ်ၵျုၼ်ႊ ၼႆႉ မၢင်ၸိူဝ်းႁဵတ်းၼႂ်းလိူၼ်မေႊ ဝူင်ႈလိုၼ်းသုတ်း။ ၼႂ်းလိူၼ်ၵျုၼ်ႊဝူင်ႈတီႈၼိုင်ႈၼႆႉ လႆႈဝႃႈယဝ်ႉတူဝ်ႈၵၼ်ၵႂႃႇ တင်းသဵင်ႈယဝ်ႉ။ ပေႃးလိူၼ်ၼႆႉသဵင်ႈယဝ်ႉတႄႉ တေၶိုၼ်းဢၢပ်ႈပုၼ်ႈၽွၼ်းပၼ်ၵၼ် ပဵၼ်တၢင်းၵၢၼ်ၼႆ လႆႈငိၼ်းဝႃႈၼႆဢေႃႈ” ၼႆယဝ်ႉ။

ဝၢႆးသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းသေ တဵၵ်းႁဵတ်းပၢင်လိူၵ်ႈတင်ႈႁႂ်ႈယဝ်ႉတူဝ်ႈၵႂႃႇယဝ်ႉ ၶိၼ်ၶွတ်ႇ ၽွတ်ႈၸုမ်းလူင်ပွင်ၸိုင်ႈ ဢၼ်ပႃးၽူႈၼမ်းသိုၵ်းလႄႈ ၵူၼ်းပၼ်ႁႅင်းသိုၵ်းမၢၼ်ႈယိုတ်းမိူင်းၼမ်ၼၼ်ႉ ၵၢင်ႉၵႄႇၼႂ်းပွၵ်ႉၼႂ်းဢိူင်ႇ လႆႈႁဵတ်းၸွမ်းပိူင်သိုၵ်းမၢၼ်ႈၽွင်းငမ်းဝဵင်း၊ ၸုမ်းယိပ်းၵွင်ႈၵၢင်ႇၸိူဝ်းတူင်ႉၼိုင်ယူႇသဝ်းၼႂ်းပိုၼ်ႉတီႈၵေႃႈ ၼမ်လႄႈ ႁဵတ်းႁႂ်ႈၵူၼ်းၸိူဝ်းလႆႈႁပ်ႉပုၼ်ႈၽွၼ်းၵၢင်ႉၵႄႇ ဢမ်ႇမီးလွင်ႈႁူမ်ႇလူမ်ႈလႄႈ ဢမ်ႇမီးၽႂ်တဵမ်ၸႂ်ၶႂ်ႈႁပ်ႉတၼ်းႁဵင်း ၵၢင်ႉၵႄႇ – ၼႆ ၵူၼ်းပိုၼ်ႉတီႈလၢတ်ႈ။

ၵွၼ်ႇသိုၵ်းမၢၼ်ႈပႆႇယိုတ်းဢဝ်ဢႃႇၼႃႇၸိုင်ႈမိူင်းၼႆႉ ၼႂ်းပိူင်သၽႃးမိူင်းႁူမ်ႈတုမ်မၢၼ်ႈ လႆႈဢုပ်ႇၵုမ်တူၵ်းလူင်းၵၼ်ဝႆႉဝႃႈ – ၸိူဝ်းပဵၼ်ၽူႈၵွၼ်းပွၵ်ႉ ၵွၼ်းဢိူင်ႇ လီဝႆႉၼမ်ႉၼၵ်း မီးယူႇ 3 ၶေႃႈ။ ၼႂ်းတွၼ်ႈၵၼ် 5 မၢႆ 11 (ၶ) ၼၼ်ႉပႃးဝႆႉဝႃႈ တေဢမ်ႇလႆႈၸႂ်ႉသုၼ်ႇတိုဝ်ႉတၢင်း ဢၼ်လႆႈပဵၼ်ၽူႈၵွၼ်းပွၵ်ႉဢိူင်ႇၼၼ်ႉသေ ႁဵတ်းၵိၼ်ၼႂ်းၵႄႈမၼ်း။ ၼႂ်းမၢႆ 11 (ၵ) ၼၼ်ႉသမ်ႉဝႃႈ တေလႆႈႁပ်ႉႁဵတ်းပုၼ်ႈၽွၼ်း ႁႂ်ႈမႅၼ်ႈၸွမ်းပၵ်းပိူင်မၢႆမီႈ။

ၽူႈၵွၼ်းပွၵ်ႉ ၵွၼ်းဢိူင်ႇၼႆႉ တေလႆႈတူၺ်းထိုင်ပၼ် လွင်ႈယူႇသဝ်းၵိၼ်သၢင်ႈၵူၼ်းမိူင်း ႁႂ်ႈမေႃၶိုင်ပွင်ပၼ် ၾၢႆႇၽႃသႃ သႃသၼႃ ၼႂ်းပိုၼ်ႉတီႈ၊ ႁႂ်ႈပူၵ်းပွင်ပၼ် လိၵ်ႈလၢႆးၾိင်ႈငႄႈၾိင်ႈထုင်း လႄႈ ပၢႆးပၺ်ႇၺႃႇ ပၢႆးယူႇလီ လွင်ႈၶိုၼ်ႈယႂ်ႇ ၵူၼ်းမိူင်းပိုၼ်ႉတီႈ ၸဵမ်ၸိူဝ်းၼႆႉ ၼႆယဝ်ႉ။