မိူဝ်ႈၼႆႉ ဝၼ်းတီႈ 21 လိူၼ်ၵျူႊလၢႆႊ လုမ်းသၽႃးမိူင်းႁူမ်ႈတုမ်တႅပ်းတတ်းမၵ်းမၼ်ႈ ၸႄႈဝဵင်း 58 ဝဵင်း ပဵၼ်ငဝ်းလၢႆးၶိုၵ်ႉၶၵ်ႉ ၶၢဝ်းတၢင်း 90 ဝၼ်းသေ ဢဝ်ၸႄႈဝဵင်း ၼႂ်းမိူင်းၶျၢင်း 2 တီႈထွၼ်ဢွၵ်ႇၼႂ်းသဵၼ်ႈမၢႆ ဢၼ်သုၵ်ႉယုင်ႈဢူၼ်မေႃးဝႆႉၶိုၼ်း – ၼႆယဝ်ႉ။

ၼႂ်းပၢင်ၵုမ်လူင်လုမ်းသၽႃးမိူင်းႁူမ်ႈတုမ် ပွၵ်ႈၵမ်းသၢမ် ဢၼ်ၸတ်းႁဵတ်းၵမ်းထီႉသွင် ဝၼ်းထူၼ်ႈ 9 ၼၼ်ႉ မီး တႅၼ်းၽွင်း 5 ၵေႃႉ ၵမ်ႉထႅမ်ႁၼ်လီၸွမ်းပိူင်ယႂ်ႇသေ ဢုပ်ႇဢူဝ်း ၵၼ်ၵႂႃႇ ၽွင်းလုမ်းသၽႃးတေတႅပ်းတတ်း မၵ်းမၼ်ႈၵႂႃႇၼၼ်ႉ ဢမ်ႇမီးတႅၼ်းၽွင်းၵေႃႉလႂ် သၢၼ်ၶတ်းလႄႈ ၸင်ႇလႆႈပူင်ဢႃႇၼႃႇ မၵ်းမၼ်ႈၵႂႃႇ ပဵၼ်တၢင်းၵၢၼ် – ၼႆယဝ်ႉ။

လႆႈႁူႉဝႃႈ ဢူးဢွင်ႇလိၼ်းတူၺ်း ၼႃႇယၵလူင်လုမ်းသၽႃးမိူင်းႁူမ်ႈတုမ် လႆႈဢဝ် မၢႆၶေႃႈပူင် 1/2026 သေ မၵ်းမၼ်ႈၵႂႃႇ 58 ၸႄႈဝဵင်း တႃႇ 9 ၸႄႈမိူင်း ၼႂ်းမိူင်းႁူမ်ႈတုမ် ပဵၼ်ဝႆႉငဝ်းလၢႆးၶိုၵ်ႉၶၵ်ႉ ႁိုင်ၶၢဝ်းတၢင်း 90 ဝၼ်း ၼႆယဝ်ႉ။

ၸႄႈဝဵင်း ၼႂ်းမိူင်းၶျၢင်း ဢၼ်လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇပူတ်းဢွၵ်ႇၼႂ်းသဵၼ်ႈမၢႆ ငဝ်းလၢႆးၶိုၵ်ႉၶၵ်ႉၼႆႉ ပဵၼ်ၸႄႈဝဵင်းၽလၢမ်း လႄႈ ၸႄႈဝဵင်းတုၼ်းသၢၼ်ႊ။ သွင်တီႈၼႆႉ မီးလွင်ႈၼိမ်တဵင်ႈ ၵတ်းယဵၼ်မႃးၶိုၼ်းမိူၼ်ၵဝ်ႇယဝ်ႉလႄႈ ၸင်ႇလႆႈပူတ်းပႅတ်ႈသဵၼ်ႈမၢႆ – ဝႃႈၼႆ။

တႃႇသိုပ်ႇမၵ်းမၼ်ႈႁႂ်ႈ 58 ၸႄႈဝဵင်း တူၵ်းယူႇၼႂ်းငဝ်းလၢႆးၶိုၵ်ႉၶၵ်ႉထႅင်ႈ 90 ဝၼ်းၼၼ်ႉ ပဵၼ်ႁွင်ႈၵၢၼ်ၽွင်းလူင်ပၵ်းပိူင်မၢႆမီႈ ယိုၼ်ႈတၢင်ႇလိၵ်ႈ ပဵၼ်တၢင်းၵၢၼ်ဝႆႉ ၼႂ်းလုမ်းသၽႃး မိူင်းႁူမ်ႈတုမ်။

ဝဵင်းၸိူဝ်းလႆႈတေႃႇဢႃႇယု ငဝ်းလၢႆးၶိုၵ်ႉၶၵ်ႉ ဢဝ်ပိူင်သိုၵ်းသိုပ်ႇၽွင်းငမ်းၵႂႃႇထႅင်ႈ 58 ဝဵင်းၼၼ်ႉ ပဵၼ်ၼႂ်းၸႄႈမိူင်းၶၢင် 5 ဝဵင်း၊ ၸႄႈမိူင်းယၢင်းလႅင် 3 ဝဵင်း၊ ၸႄႈမိူင်းယၢင်းၽိူၵ်ႇ 2 ဝဵင်း၊ ၸႄႈမိူင်းၶျၢင်း 5 ဝဵင်း၊ တိူင်းၸႄႈၵႅင်း 8 ဝဵင်း၊ တိူင်းမၵူၺ်း 5 ဝဵင်း၊ တိူင်းမၢၼ်းတလေး 1 ဝဵင်း ၊ ၸႄႈမိူင်းရၶႅင်ႇ 14 ဝဵင်း ၊ မိူင်းတႆးပတ်းပိုၼ်ႉ 15 ၸႄႈဝဵင်း ၼႆယဝ်ႉ။

ၼႂ်းမိူင်းတႆးပတ်းပိုၼ်ႉ 15 ၸႄႈဝဵင်းၼႆႉ ပဵၼ်ၸႄႈဝဵင်းၼမ်ႉတူႈ၊ မၢၼ်ႈပဵင်း၊ ၵူတ်ႉၶၢႆ၊ ၼမ်ႉၶမ်း၊ သႅၼ်ဝီ၊ ၵုၼ်လူင်၊ ၼမ်ႉသၼ်ႇ၊ မၢၼ်ႈတူင်ႈ၊ ႁူဝ်ပၢင်ႇ၊ ၵၢတ်ႇၵဝ်ႇ (လၢဝ်ႇၵၢႆး) ၊ ၵွင်း ၸၢင်ႉ (ၵူင်းၵျၢမ်း)၊ မိူင်းမိတ်ႈ၊ ၵျွၵ်ႉမႄး၊ သီႇပေႃႉ၊ မိူင်းလႃး ၸဵမ်ၸိူဝ်းၼႆႉ – ဝႃႈၼႆ။