မိူဝ်ႈၼႆႉ ဝၼ်းတီႈ 9/6/2026 ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်းၵိုတ်းတိုၵ်း NCA ဝႆႉ 7 ၸုမ်း ႁူပ်ႉထူပ်းဢုပ်ႇဢူဝ်းၸွမ်း ၵေႃႇမတီႇႁဵတ်းသၢင်ႈလွင်ႈငမ်းယဵၼ် လႄႈ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ သိုၵ်းမၢၼ်ႈယိုတ်းမိူင်း တီႈဝဵင်းလူင်ၼေႇပျီႇတေႃႇ ။

တူဝ်တႅၼ်းၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7 ၸုမ်း ၸိူဝ်းလူင်းလၢႆးမိုဝ်းၵိုတ်းတိုၵ်း NCA ဝႆႉၼၼ်ႉ ၸဝ်ႈသိုၵ်းလူင် ၸၢႆးငိုၼ်း ၵေႃႉၼမ်းၼႃႈသေ ဢွၼ်ႁူဝ် ၽူႈၶဝ်ႈၸုမ်း (NCA-S EAOs) တႃႇ 8 ၵေႃႉသေ ၵႂႃႇဢုပ်ႇဢူဝ်းၸွမ်း ႁူဝ်ပဝ်ႈ ၵေႃႇမတီႇႁဵတ်းသၢင်ႈလွင်ႈငမ်းယဵၼ် လႄႈ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ (NSPNC) ဢၼ် ၸွမ်သိုၵ်းယႃႇပျေႉ ဢွၼ်ႁူဝ်ဝႆႉ ၼၼ်ႉ ဝႃႈၼႆ။

ပိူဝ်ႈတႃႇၸတ်းႁဵတ်းလႆႈပၢင်ဢုပ်ႇဢူဝ်းလွင်ႈငမ်းယဵၼ် ၸုမ်းသိုၵ်းမၢၼ်ႈ တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႈဝဵင်းလူင်ၼေႇပျီႇတေႃႇၼႆႉ ၾၢႆႇၸုမ်းသိုၵ်းမၢၼ်ႈ လႆႈသူင်ႇလိၵ်ႈမွၵ်ႇ ၸူးတီႈ ၸုမ်းၸိူဝ်းၵဵဝ်ႇၶွင်ႈ မိူဝ်ႈလိူၼ်ဢေႊပရိူဝ်ႊလ် 21 ဝၼ်း ဝၢႆးလင် ၶွတ်ႇၽွတ်ႈလူင်ပွင်ၸိုင်ႈမႂ်ႇယဝ်ႉၼၼ်ႉ ။

ၸဝ်ႈသိုၵ်းလူင် ၸၢႆးငိုၼ်း (RCSS/SSA) တၢင်တူဝ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7 ၸုမ်းသေ မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ဢုပ်ႇဢူဝ်းလွင်ႈငမ်းယဵၼ်ၵႂႃႇဝႃႈ “ယိၼ်းလီ ၵၢၼ်မွၵ်ႇ ၶဝ်ႈႁူမ်ႈၸွမ်းပၢင်ဢုပ်ႇဢူဝ်းၵၢၼ်ငမ်းယဵၼ် ႁႂ်ႈပဵၼ်တၢင်းၵၢၼ်တေႉတေႉယူႇ။ ၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း လႆႈႁပ်ႉလိၵ်ႈၽိတ်ႈမွၵ်ႇ သုၼ်ႇၸုမ်းလူင်ၵူၺ်းဢမ်ႇၵႃး ၾၢႆႇၵေႃႇမတီႇၵၢၼ်ငမ်းယဵၼ် လႆႈပွႆႇတူဝ်တႅၼ်း လူင်းၵႂႃႇသပ်းလႅင်းၼႄထိုင်တီႈၸုမ်းလႂ်ၸုမ်းၼၼ်ႉ ၵဵဝ်ႇလူၺ်ႈၶၵ်ႉၵၢၼ်ငမ်းယဵၼ် ၶွင်လူင်ပွင်ၸိုင်ႈမႂ်ႇၼၼ်ႉပႃးၼႆႉ ပဵၼ်ၵၢၼ်သၢင်ႈလွင်ႈယုမ်ႇယမ်ၼိူဝ်ၵၼ်ပႃးထႅင်ႈ” ဝႃႈၼႆ။

ၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7 ၸုမ်း ယင်းသိုပ်ႇပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉထႅင်ႈဝႃႈ – ၸုမ်းၽႂ် မၼ်းလႆႈဢုပ်ႇဢူဝ်းၵၼ်မႃးၶႅမ်ႉလႅပ်ႈလီငၢမ်းယဝ်ႉသေ ၸင်ႇမီးၶေႃႈတႅပ်းတတ်းဝႃႈ တေဢုပ်ႇဢူဝ်း လွင်ႈငမ်းယဵၼ်ၸွမ်း လူင်ပွင်ၸိုင်ႈသေ မီးၵၢင်ၸႂ် ႁဵတ်းသၢင်ႈၵၢၼ်ငမ်းယဵၼ်ၵႂႃႇ ႁႂ်ႈၵိုင်ႇငၢမ်ႇတင်းငဝ်းလၢႆး၊ ၼင်ႇႁိုဝ်ၸုမ်းၸိူဝ်းဢမ်ႇပႆႇၶဝ်ႈမႃးလႆႈ ၼႂ်းသဵၼ်ႈတၢင်းၶၵ်ႉၵၢၼ်ငမ်းယဵၼ်ၼၼ်ႉၵေႃႈ ႁႂ်ႈပေႃးၶဝ်ႈမႃးဢုပ်ႇ ဢူဝ်းၸွမ်းလႆႈၼၼ်ႉ တေသိုပ်ႇၶတ်းၸႂ်ၵႂႃႇ လႄႈ ယိူင်းဢၢၼ်းတႃႇၵေႃႇသၢင်ႈလွင်ႈငမ်း ယဵၼ် ႁႂ်ႈမၼ်ႈၵိုမ်းၵႂႃႇၶၢဝ်း ႁိုင် ၸဵမ်ၸိူဝ်းၼႆႉ ဝႃႈၼႆ။

ၼင်ႇႁိုဝ် တင်းသွင်ၾၢႆႇ တေၸတ်းပၢင်ဢုပ်ႇဢူဝ်းၵႂႃႇႁႂ်ႈပေႃးၶႅမ်ႉလႅပ်ႈ လႆႈၶေႃႈတူၵ်းလူင်း ၶိုၵ်ႉၶႅမ်ႉၼၼ်ႉ တေႁူမ်ႈၵၼ်ၸတ်းပွင်ၵႂႃႇ ၸွမ်းၼင်ႇပွင်ပဵၼ်လႆႈ ဝႃႈၼႆပႃး။

ၵွၼ်ႇၼႃႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်းၵိုတ်းတိုၵ်းဝႆႉ 7 ၸုမ်း ပႆႇၵႂႃႇႁူပ်ႉထူပ်း ၸွမ်းၸုမ်းသိုၵ်းမၢၼ်ႈၼႆႉ ၸုမ်းၽွမ်ႉႁူမ်ႈၵၢၼ်ၸိူဝ်ႉၸၢတ်ႈတႆးလႅင် (SNA) ၵေႃႈ ၵႂႃႇႁူပ်ႉထူပ်းဢုပ်ႇဢူဝ်းၸွမ်း NSPNC တီႈဝဵင်းလူင်ၼေႇပျီႇတေႃႇ မိူဝ်ႈဝၼ်းတီႈ 5/6/2026 ယၢမ်းၵၢင်ၼႂ် တီႈႁူင်းႁႅမ်းသူၺ်ႇၸၢၼ်ႇဢဵင်ႇ ၼၼ်ႉၼင်ႇၵဝ်ႇ ။

ၼႂ်းပၢင်ဢုပ်ႇဢူဝ်းၼၼ်ႉ ၾၢႆႇၸုမ်းၽွမ်ႉႁူမ်ႈၵၢၼ်ၸိူဝ်ႉၸၢတ်ႈတႆးလႅင် (SNA) ပဵၼ် ၵႅမ်ႁူဝ်ပဝ်ႈ 1 ၸဝ်ႈၸၢႆးၵမ်ႇ၊ ၽူႈၶဝ်ႈၸုမ်းငဝ်ႈငုၼ်း ၸဝ်ႈသိူဝ်ၵွင်းသႅင်၊ ၽူႈၼမ်းၼႂ်း (တွဲဖက် အတွင်းရေးမှူး) ၸဝ်ႈသိူဝ်ဝၼ်းၾႃႉ၊ ၾၢႆႇၵိူဝ်းၵုမ် ၸဝ်ႈသိူဝ်ဢၢႆႈၸၢႆးႁၢၼ် ၸိူဝ်းၼႆႉ ၶဝ်ႈႁူမ်ႈဢုပ်ႇဢူဝ်းၵႂႃႇ။ တႃႇဢဝ်ၶိုၼ်းၼႃႈတီႈ ၸိူဝ်းမီးၵူၼ်းၸၢဝ်းၶိူဝ်းတႆးလႅင်ယူႇသဝ်း ၼႂ်း တိူင်းၸႄႈၵႅင်း မႃးပဵၼ်ပိုၼ်ႉတီႈ ၽွင်းငမ်းႁင်းၶေႃ ႁႂ်ႈထုၵ်ႇမႅၼ်ႈၸွမ်း ပၵ်းပိူင် ပဵၼ်တၢင်းၵၢၼ်၊ လွင်ႈၵၢၼ်ၼိမ်တဵင်ႈ ၸွမ်းလႅၼ်လိၼ် ၸႄႈမိူင်းၶၢင် လႄႈ တိူင်းၸႄႈၵဵင်း ၊ ပိူဝ်ႈတႃႇ ႁူမ်ႈမိုဝ်းၵၼ်တင်း လူင်ပွင်ၸိုင်ႈသေ ယူႇသဝ်းၵႂႃႇႁႂ်ႈၵတ်းယဵၼ် လႆႈဢုပ်ႇဢူဝ်းၵၼ်ၵႂႃႇၸဵမ်ၸိူဝ်းၼႆႉ ဝႃႈၼႆ။

လိူဝ်ၼၼ်ႉ ၾၢႆႇၵေႃႇမတီႇႁဵတ်းသၢင်ႈၵၢၼ်ငမ်းယဵၼ် လႄႈ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ (NSPNC) ၵေႃႈလႆႈသပ်းလႅင်းၼႄၵႂႃႇ လွင်ႈပိုၼ်းၸၢဝ်းၶိူဝ်းတႆးလႅင် လႆႈယူႇသဝ်းၸွတ်ႇၽႄႈ ၵႂႃႇၸွမ်းၼႂ်းပိုၼ်ႉတီႈ၊ ၵၢၼ်ၸႂ်ႉတိုဝ်းၸိုဝ်ႈသဵင် လႄႈ ၶိူဝ်းၵူၼ်း ၼႂ်းမၢႆၾၢင်ၼႂ်းမၢႆၾၢင်၊ လွင်ႈၶႂ်ႈမၵ်းမၼ်ႈပိုၼ်ႉတီႈ ပဵၼ်တၢင်းၵၢၼ်ၵႂႃႇ ႁႂ်ႈၵိုင်ႇမႅၼ်ႈတင်း လၵ်းမိူင်း 2008 ပဵၼ်တၢင်း ၵၢၼ် ၸဵမ်ၸိူဝ်းၼႆႉ ၼႆယဝ်ႉ။

လႆႈႁူႉဝႃႈ ပၢင်ၵုမ်ၵၢၼ်ဢုပ်ႇဢူဝ်း လွင်ႈငမ်းယဵၼ် ဢၼ်ၾၢႆႇလူင်ပွင်ၸိုင်ႈမႂ်ႇ တႂ်ႈဢႃႇၼႃႇ ၸွမ်ၸိုင်ႈ မိၼ်းဢွင်ႇလၢႆႇယိုတ်းမိူင်း ၸတ်းႁဵတ်းၵႂႃႇ ၸွမ်းၽႅၼ်ၵၢၼ် ၼႂ်းၶၢဝ်းတၢင်း 100 ဝၼ်းၼၼ်ႉ ဢမ်ႇၵွမ်ႉၵႃႈ ၸုမ်းလူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA 7 ၸုမ်း လႄႈ ၸုမ်းသိုၵ်းတႆးလႅင်ၵူၺ်း လႆႈႁပ်ႉလိၵ်ႈမွၵ်ႇ ၾၢႆႇပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်း ၸိုင်ႈတႆး (SSPP/SSA) လႄႈ တပ်ႉသိုၵ်းဝႃႉ (UWSA) တင်း တပ်ႉသိုၵ်းၶၢင် (KIA/KIO) ၸိူဝ်းၼႆႉၵေႃႈ လႆႈႁပ်ႉလိၵ်ႈမွၵ်ႇဝႆႉ ပဵၼ်တၢင်းၵၢၼ်ယူႇ ဝႃႈၼႆ။