တပ်ႉသိုၵ်းမိူင်းလႃး (NDAA) ယႃႉၶူဝ်းၶွင်ၸႂ်ႉတိုဝ်းၶွင်ၸုမ်းၵျႃႊၽျႅၼ်ႉ ဢၼ်ၶဝ်တီႉၺွပ်းလႆႈဝႆႉ တီႈဢၼ်မီးၵႃႈၶၼ်ၵိုင်ႇငိုၼ်း 1 လၢၼ်ႉယႂၼ်ႊ ၸတ်းႁဵတ်းတီႈ ၼႂ်းဝဵင်းမိူင်းလႃး ၸိုင်ႈတႆးပွတ်းဢွၵ်ႇ။
မိူဝ်ႈဝၼ်းတီႈ 4/11/2025 တပ်ႉသိုၵ်းမိူင်းလႃး NDAA ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ – ၸုမ်းပလိၵ်ႈၼႂ်းၼႃႈလိၼ်ၶိုၵ်ႉတွၼ်းမၢႆ (4) ဢဝ်ၶိူင်ႈၸၢၵ်ႈလူင် ဢိတ်ႇ ၶိူင်ႈၶူဝ်းၸႂ်ႉတိုဝ်း ၶွင်ၸုမ်းၵျႃႊၽျႅၼ်ႉယဝ်ႉ ၽဝ်ပႅတ်ႈယဝ်ႉတူဝ်ႈလီငၢမ်းၵႂႃႇ ၼႂ်းႁၢင်လိူၼ်ဢွၵ်ႉထူဝ်ႊပိူဝ်ႊ ဝႃႈၼႆ ။
ၶိူင်ႈၶူဝ်းၸႂ်ႉတိုဝ်းၸုမ်းၵျႃႊၽျႅၼ်ႉ ၸိူဝ်းၺႃးဢိတ်ႇၵွႆၵႂႃႇၼၼ်ႉ ပဵၼ်ၾူၼ်း၊ ၶွမ်း၊ Router ၶိူင်ႈၸႅၵ်ႈၸၢႆႇဢိၼ်ႊထိူဝ်ႊၼႅတ်ႊ ၸိူဝ်းတီႉၺွပ်းဢဝ်လႆႈဝႆႉ ၸွမ်းႁူင်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းၼၼ်ႉသေ တၢင်းၼမ်ၶိူင်ႈမီးယူႇမွၵ်ႈ ၼိုင်ႈမိုၼ်ႇဢၼ်ပၢႆလႄႈ ပေႃးၼပ်ႉၶၼ်ငိုၼ်းမိူင်းမၢၼ်ႈၸိုင် ၵိုင်ႇငိုၼ်းယူႇ 456 လၢၼ်ႉပျႃး ၼႆယဝ်ႉ။
ၼႂ်းပီ 2025 ၼႆႉ ၾၢႆႇတပ်ႉသိုၵ်းမိူင်းလႃး ႁူမ်ႈတင်းႁွင်ႈၵၢၼ်ၾၢႆႇတႅပ်းတတ်းတြႃး (ၵၢၼ်ထတ်းသိၼ်) မိူင်းၶႄႇသေ ႁဵတ်းသၢင်ႈၶူင်းၵၢၼ်တီႉၺွပ်းၵူၼ်း လႄႈ ၸုမ်းႁဵတ်းၵၢၼ်ၵျႃႊ ၽျႅၼ်ႉ ၼႂ်းၼႃႈတီႈၶဝ်ၵုမ်းၵမ်ၼမ်ၶိုၼ်ႈမႃးလိူဝ်ၵဝ်ႇ။ မိူဝ်ႈဝၼ်းတီႈ 17 လိူၼ်ဢေႃးၵၢတ်ႉသ်ၼၼ်ႉၵေႃႈ တပ်ႉသိုၵ်းမိူင်းလႃး လႆႈတီႉၺွပ်းဢဝ်ၵူၼ်းမိူင်းၶႄႇ ၸိူဝ်းႁဵတ်းၵၢၼ်ၵျႃႊ ၽျႅၼ်ႉ တႃႇ 71 ၵေႃႉ သူင်ႇပၼ်တီႈလူင်ပွင်ၸိုင်ႈမိူင်းၶႄႇၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ