သင်ဝႃႈ ၽူႈလႂ်လႆႈထွမ်ႇငိၼ်းၽဵင်းၵႂၢမ်းဢၼ်ဝႃႈ “ၶႂၼ်ႁၵ်ႉ” ၼႆ ၵူႈၵေႃႉတႄႉ တေႁူႉလႆႈၵမ်းလဵဝ်ဝႃႈပဵၼ် “ၼွင်ႉႁူၵ်း” ၵေႃႉႁွင်ႉဝႆႉ ၵမ်းလဵဝ်ယဝ်ႉ။ ယၢမ်းလဵဝ် ပေႃးမႃးတူၺ်း ၼိူဝ်ဢွၼ်ႊလၢႆႊ Social Media ၸိုင် မၼ်းၸၢႆးၼႆႉ ပဵၼ်ၵူၼ်းၼုမ်ႇဢၼ်ၸိုဝ်ႈသဵင်လိုဝ်းလင်မႃး ၼႂ်းတူင်ႇဝူင်းပၢႆးမွၼ်းတႆး ၵေႃႉၼိုင်ႈယဝ်ႉ။

ဢိင်ၼိူဝ် လွင်ႈမၼ်းၸၢႆး လႆႈပႆၶဝ်ႈမႃးၼႂ်းတူင်ႇဝူင်းပၢႆးမွၼ်းတႆးၼႆႉသေ လႆႈမီးလွင်ႈၶဵင်ႇတႃႉ ထူပ်းတၢင်းယၢပ်ႇၽိုတ်ႇ မႃးၸိူင်ႉႁိုဝ်ၽွင်ႈ တွၼ်ႈတႃႇတေၶၢမ်ႈပူၼ်ႉမႃးလႆႈၼၼ်ႉ ယူႇတီႈ ၼၢင်းငိုၼ်းႁွမ် ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆ။

ထၢမ် – ဢွၼ်တၢင်းသုတ်း ၵပ်းသိုပ်ႇၼႄႉၼမ်းပၼ် ၸိုဝ်ႈသဵင် ၸႃတိတီႈၵိူတ်ႇ ၽွင်ႈၶႃႈ?

တွပ်ႇ – မႂ်ႇသုင်ၶႃႈ ။ ၸိုဝ်ႈပၢႆးမွၼ်းၶႃႈတႄႉ ပဵၼ်ၼွင်ႉႁူၵ်းဢေႃႈ။ ၸႃတိတီႈယူႇပဵၼ် ဝဵင်းၵျွၵ်ႉမႄး၊ မိူင်းတႆးပွတ်းႁွင်ႇၶႃႈ။

ထၢမ် – ၼွင်းႁူၵ်းၼႆႉ ပဵၼ်ၸိုဝ်ႈတႄႉၶႃႈႁႃႉ? ယွၼ်ႉသင်လႄႈ လႆႈလိူၵ်ႈၸိုဝ်ႈ ဢၼ်ၼႆႉၶႃႈ?

တွပ်ႇ – ၼွင်ႉႁူၵ်းၼႆႉ ပဵၼ်ၸိုဝ်ႈပၢႆးမွၼ်းၶႃႈဢေႃႈ။ ၸိုဝ်ႈတႄႉႁွင်ႉဝႃႈ ၸၢႆးၼုမ်ႇလႅင်းၼႆၶႃႈ။ ယွၼ်ႉသင်  လႄႈ လႆႈလိူၵ်ႈသႂ်ႇၸိုဝ်ႈ ၼွင်ႉႁူၵ်းၼႆႉၶႃႈ ၶဝ်မီးဝႆႉပီႈၼွင်ႉ 6 ၵေႃႉ၊ ၶႃႈသမ်ႉပဵၼ် ၵေႃႉထီႉ 6 ၊ ႁႂ်ႈမၼ်းပဵၼ် ၸိုဝ်ႈဢၼ်ၵိုၵ်းၼႃႈႁိူၼ်း ႁဝ်းပီႈၼွင်ႉၼႆသေ ၸင်ႇလႆႈသႂ်ႇဝႆႉၼွင်ႉႁူၵ်း ၼႆၶႃႈဢေႃႈ။

ထၢမ် – လႆႈတႄႇယၢင်ႈၶဝ်ႈမႃး တီႈၼႂ်းၵၢၼ်ပၢႆးမွၼ်း မိူဝ်ႈလႂ်ၶႃႈ?

တွပ်ႇ – ဢၼ်ၶႃႈတႄႇယၢင်ႈၶဝ်ႈမႃး တီႈၼႂ်းၵၢၼ်ပၢႆးမွၼ်းၼႆႉ တေပဵၼ်ၼႂ်းပီ 2015 ၼႆႉၶႃႈ။

ထၢမ် – ႁဵတ်းႁိုဝ်သေ ပဵၼ်ယၢင်ႈၶဝ်ႈမႃး တီႈၼႂ်းတူင်ႇဝူင်းၵၢၼ်ပၢႆးမွၼ်း? ပဵၼ်ၽႂ်ၵေႃႉၸုင်ၸၼ်?

တွပ်ႇ – ၵၢၼ်ႁွင်ႉၽဵင်းၵႂၢမ်းၼႆႉ တိုၼ်းသူၼ်ၸႂ်မႃး ၸဵမ်မိူဝ်ႈၵေႃႉလဵၵ်ႉဢေႃႈ။ မိူဝ်ႈပဵၼ် ၸဝ်ႈသၢင်ႇဢွၼ်ႇ ၵႂႃႇယူႇတီႈမိူင်းမၢၼ်ႈၵေႃႈ လႆႈၸႂ်ထွမ်ႇၽဵင်းၵႂၢမ်းမၢၼ်ႈ ၸိူဝ်းၼႆႉၶႃႈ။ ႁဵတ်းၼၼ်သေ ပဵၼ်တႅမ်ႈၵႂၢမ်း၊ ႁွင်ႉၽဵင်းၵႂၢမ်းမႃး။ ၵူၺ်းၵႃႈ မိူဝ်ႈတႄႇႁွင်ႉၼၼ်ႉတႄႉ ဢမ်ႇမီးတူဝ်ထူပ်းၼမ်လႄႈ သဵင်ႁွင်ႉၽဵင်းၵႂၢမ်း မိူဝ်ႈၼၼ်ႉၵေႃႈ ဢမ်ႇပေႃးၶႅမ်ႉၶႃႈ။

ဢၼ်တႄႇၸုင်ၸၼ် ယၢင်ႈၶဝ်ႈမႃး တီႈၼႂ်းၵၢၼ်ပၢႆးမွၼ်းၼႆႉတႄႉ ပဵၼ်ပီႈၸၢႆးမၢႆ 3 ၶႃႈႁဝ်းဢေႃႈ။ ပီႈၸၢႆး ၶႃႈ ၸွႆႈထႅမ်ပၼ်ၵႃႈဢတ်းသဵင်၊ ၵႃႈထၢႆႇဝီႊတီႊယူဝ်ႊ ၸိူဝ်းၼႆႉၵူႈဢၼ်ၶႃႈ။ ယွၼ်ႉမီး ပီႈၸၢႆးၵမ်ႉၸွႆႈထႅမ် ပၼ်လႄႈ ၸင်ႇလႆႈပဵၼ်မႃးၶႃႈဢေႃႈ။

ထၢမ် – မိူဝ်ႈတႄႇၶဝ်ႈမႃး တီႈၼႂ်းတူင်ႇဝူင်းၵၢၼ်ပၢႆးမွၼ်းၼႆႉ မီးလွင်ႈယၢပ်ႇၽိုတ်ႇ ၸိူင်ႉႁိုဝ်ၽွင်ႈၶႃႈ?

တွပ်ႇ – လွင်ႈယၢပ်ႇၽိုတ်ႇတႄႉ မီးဢေႃႈ။ ယၢပ်ႇတီႈလႂ်လႃႇၼႆ မိူဝ်ႈၶႃႈၶဝ်ႈၵႂႃႇဢတ်းၽဵင်းၵႂၢမ်းၼၼ်ႉ  ယွၼ်ႉမိူဝ်ႈဢွၼ်တၢင်း ဢမ်ႇယၢမ်ႈႁွင်ႉၽဵင်းၵႂၢမ်းသေပွၵ်ႈ ၊ တီႈၼိူဝ်ၶဵင်ႇ State Show ၸိူဝ်းၼႆႉၵေႃႈ ဢမ်ႇယၢမ်ႈႁွင်ႉၽဵင်းၵႂၢမ်းမႃး ႁဵတ်းၼၼ်သေ မိူဝ်ႈၵႂႃႇႁွင်ႉတီႈၼႂ်းႁွင်ႈဢတ်းသဵင် (Studio) ၼၼ်ႉ မီးပၼ် ႁႃၼမ်ဢေႃႈ။ မိူၼ်ၼင်ႇ ႁဝ်းသၼ်ႇ မိူဝ်ႈၵႂႃႇယူႇၾၢႆႇၼႃႈမႅၵ်ႉ(Microphone) ၊ သဵင်ၵေႃႈ ဢမ်ႇလႆႈၾိုၵ်း၊ ဢမ်ႇမီးတူဝ်ထူပ်းၼႂ်းၵၢၼ်ႁွင်ႉလႄႈ ယၢပ်ႇႁႅင်းဝႆႉဢေႃႈ။ တၢင်းယၢပ်ႇတႄႉ ၸဵမ်ဢဝ်ၵၢၼ်ႁွင်ႉ၊ ၼႂ်းၵၢၼ် ႁၢင်ႈႁႅၼ်း ၵူႈလွင်ႈလွင်ႈၾၢႆႇ Music ၽဵင်းၵႂၢမ်းၸိူဝ်းၼႆႉၶႃႈ။

ထၢမ် – မိူဝ်ႈတႄႇႁွင်ႉၽဵင်းၵႂၢမ်းၼၼ်ႉ ပဵၼ်ၽႂ်တႅမ်ႈပၼ်ၽဵင်းၵႂၢမ်းၶႃႈ ဢမ်ႇၼၼ် တႅမ်ႈႁင်းၵူၺ်းၶႃႈႁႃႉ?

တွပ်ႇ – ၽဵင်းၵႂၢမ်းၼႆႉ တႅမ်ႈႁင်းၵူၺ်းတၢင်းၶႅပ်းဢေႃႈ။ မီးမွၵ်ႈ 10 ႁူဝ်/ပုၵ်ႈၼႆႉၶႃႈ။ တႄႇၸဵမ်မိူဝ်ႈ ႁွင်ႉ ၽဵင်းၵႂၢမ်းမႃးၼႆႉ ပဵၼ်တူဝ်ၸဝ်ႈၵဝ်ႇတႅမ်ႈႁင်းၵူၺ်း၊ ႁွင်ႉႁင်းၵူၺ်း ၵမ်ႈၼမ်ဢေႃႈ။ ဢၼ်ၽူႈတႅမ်ႈၽဵင်း ၵႂၢမ်း တၢင်ႇၵေႃႉတႅမ်ႈပၼ်တႄႉ တေလႆႈဝႃႈဢမ်ႇမီးၶႃႈ။

ထၢမ် – ၽဵင်းၵႂၢမ်း ဢၼ်လႆႈႁွင်ႉသေ ပိုၼ်ၽႄႈဢွၵ်ႇၵႂႃႇၼႆႉ တင်းမူတ်းမီးလၢႆႁူဝ်ၶႃႈ?

တွပ်ႇ – ပေႃးမႃးႁူမ်ႈၵၼ်တင်းမူတ်း ၸဵမ်မိူဝ်ႈတႄႇႁွင်ႉမႃးတႄႉၵေႃႈ တေမီးယူႇမွၵ်ႈ 40 ပၢႆၼႆႉၶႃႈ။ မၢင် ဢၼ်ၵေႃႈ ၽူႈပၼ်ႁႅင်းၶဝ် တေဢမ်ႇလႆႈထွမ်ႇၺႃးၵေႃႈတေမီးၶႃႈ။

ထၢမ် – ၽဵင်းၵႂၢမ်း ဢၼ်လႆႈပိုၼ်ၽႄႈဢွၵ်ႇၵႂႃႇသေ ဝူၼ်ႉဝႃႈ မီးလွင်ႈႁၢၼ်ႉၸႂ်လိူဝ်သေပိူၼ်ႈ ၊ လႆႈၸႂ်လိူဝ်သေပိူၼ်ႈၼႆႉ တေပဵၼ်ဢၼ်လႂ်ၶႃႈ?

တွပ်ႇ – ဢၼ်လႆႈၸႂ်လိူဝ်သေပိူၼ်ႈ မိူဝ်ႈတႄႇႁဵတ်းဢွၵ်ႇၼၼ်ႉတႄႉ ပဵၼ်ၽဵင်းၵႂၢမ်း ၸိုဝ်ႈဝႃႈ “ၼုမ်ႇလၢဝ်” ဢၼ်ပီႈၼွင်ႉႁဝ်းၶဝ် ႁူႉၸၵ်းၼၼ်ႉၶႃႈ။ ၽဵင်းၵႂၢမ်းႁူဝ်ၼႆႉ မၼ်းၵိုင်ႇတၢင်းဢၼ် ႁဝ်းပဵၼ်ၽူႈတႅမ်ႈ/ ၽူႈ ႁွင်ႉ ၼိုင်ႈၵေႃႉ ၶတ်းၸႂ်မႃးသေ မၼ်းၵႂႃႇထိုင် တီႈၼႂ်းမၢၵ်ႇႁူဝ်ၸႂ် ပီႈၼွင်ႉႁဝ်းယူႇၼႆလႄႈ ပဵၼ်ဢၼ် ႁၢၼ်ႉၸႂ်တႄႉၶႃႈ။ မိူဝ်ႈလဵဝ်သမ်ႉ ပဵၼ်ၽဵင်းၵႂၢမ်း “ၶႂၼ်ႁၵ်ႉ”ဢေႃႈ။ ႁၼ်ပီႈၼွင်ႉႁဝ်းၶဝ်လႆႈၸႂ် ဢွၼ်ၵၼ် ထွမ်ႇၼမ်လႄႈ ႁၢၼ်ႉၸႂ်တႄႉတႄႉၶႃႈ။

ထၢမ် – ထုၵ်ႇၸႂ်ႁွင်ႉၽဵင်းၵႂၢမ်းၼႅဝ်းလႂ်ၽွင်ႈ။ မိူၼ်ၼင်ႇ Rock , Pop , Alternative ၸိူဝ်းၼႆႉ လႆႈၸႂ်ႁွင်ႉ သႅၼ်းလႂ်ၶႃႈ?

တွပ်ႇ – ဢၼ်လႆႈၸႂ်ႁွင်ႉတႄႉၵေႃႈ မိူၼ်ၼင်ႇ Rock ၸိူဝ်းၼႆႉၵေႃႈ လႆႈၸႂ်ယူႇၶႃႈ။ ၵူၺ်းၵႃႈ သဵင်ႁဝ်းဢမ်ႇ ပဵၼ်လႆႈလႄႈ လႆႈလိူၵ်ႈႁွင်ႉဢၼ်ႁဝ်းလႆႈၸႂ်(ၵျိူၵ်ႈ) တင်း ဢၼ်သဵင်ႁဝ်းၸွမ်းလႆႈဢေႃႈ။ ၵမ်ႈၼမ်ၵေႃႈ တေပဵၼ် Pop ၶႃႈ။

ထၢမ် – ဝၢႆးလင်မႃးၼႆႉ လွင်ႈဝႆႉဝၢင်းသဵင် ၸိူဝ်းၼႆႉ ၸင်ႇလႆႈၾိုၵ်းၽွၼ်ႉၶႃႈ?

တွပ်ႇ – လၢႆးၾိုၵ်းသဵင်ၼႆႉတႄႉ လႆႈလဵပ်ႈႁဵၼ်းၾိုၵ်းထွမ်ႇ သဵင်ဢၼ်ပိူၼ်ႈတၢင်ႇဝႆႉတီႈၼိူဝ်ဢွၼ်ႊလၢႆႊ ၊ ၵႆႉတွင်ႈထၢမ်တီႈ ၽူႈႁွင်ႉၽဵင်းၵႂၢမ်း ၸၢႆးသၢႆၾူၼ် ၶဝ်ၸိူဝ်းၼႆႉယူႇၶႃႈ။ ယဝ်ႉၵေႃႈ ထွမ်ႇၽဵင်းၵႂၢမ်းၼမ် ၼမ် ပေႃးႁၼ် ၽူႈႁွင်ႉၽဵင်းၵႂၢမ်း ဢၼ်ၶႃႈလႆႈၸႂ် ဢမ်ႇဝႃႈၼႂ်းမိူင်းၼွၵ်ႈမိူင်း ၶႃႈထွမ်ႇသဵင်ၶဝ်သေ ယိူင်ႈ ၸွမ်းဢေႃႈ။

ထၢမ် – ၽဵင်းၵႂၢမ်းၵၢၼ်မိူင်းလႄႈ ၵႂၢမ်းႁၵ်ႉၵႂၢမ်းပႅင်းၼႆႉ ဢၼ်လႂ်ႁွင်ႉငၢႆႈၶႃႈ?

တွပ်ႇ – ဢၼ်ႁွင်ႉငၢႆႈတႄႉ တေပဵၼ်ၽဵင်း တၢင်းႁၵ်ႉၶႃႈ ယွၼ်ႉႁဝ်းၶႃႈ ဢမ်ႇလႆႈဝူၼ်ႉၼမ်။ မိူၼ်ၼင်ႇ ႁဝ်းတေႁွင်ႉဝၢၵ်ႇလွင်ႈဢူၵ်းႁၵ်းႁႃႉ၊ တေႁွင်ႉလွင်ႈၵေႃႉႁၵ်ႉ တီႈလီႁႃႉၸိူဝ်းၼႆႉ ႁွင်ႉၵႂၢမ်းႁၵ်ႉၼႆႉ တိူဝ်း ငၢႆႈဢေႃႈ။ ပေႃးပဵၼ်ၵၢၼ်မိူင်းသမ်ႉ ႁဝ်းလႆႈဝူၼ်ႉၵႂၢင်ႈၵႂၢင်ႈပႃးဝႃႈ ဢၼ်ႁဝ်းတႅမ်ႈ ႁဝ်းႁွင်ႉၵႂႃႇၼႆႉ မၼ်း တေတုမ်ႉတိူဝ်ႉၾၢႆႇလႂ်၊ လႆႈဝူၼ်ႉပႃး ယႃႇႁႂ်ႈမၼ်းၵႂႃႇတုမ်ႉတိူဝ်ႉပိူၼ်ႈ။ ယဝ်ႉၵေႃႈ တိုၼ်းၶႂ်ႈႁွင်ႉ ၵဵဝ်ႇလူၺ်ႈ လွင်ႈသူၼ်း တုမ်ၵၢၼ်ၸိူဝ်ႉၶိူဝ်းႁဝ်း ယွၼ်ႉဝႃႈ ပေႃးႁဝ်းဢမ်ႇႁွင်ႉၵေႃႈဢမ်ႇပဵၼ်။ ၵမ်းၽွင်ႈၵေႃႈ လၢတ်ႈ ဝႃႈ မိူၼ်ၼင်ႇ ၽူႈႁွင်ႉၽဵင်းၵႂၢမ်း ၸိုဝ်ႈလိုဝ်းလင် ၸၢႆးမူးၶဝ် ႁွင်ႉသေလူႉသဵင်ႈၵႂႃႇလၢႆလၢႆ ဢမ်ႇလၢၵ်ႇလၢႆး သင်မႃးၼႆ ၸိူဝ်းၼႆႉ။ ၵူၺ်းၵႃႈ ပေႃးႁဝ်းတေၵႂႃႇဝူၼ်ႉၸိူင်ႉၼၼ်ၵေႃႈ ဢမ်ႇပႆႇယဝ်ႉ။ ႁဝ်းၵိူတ်ႇပဵၼ်တႆး ၵေႃႉၼိုင်ႈလႄႈ ႁဝ်းၵေႃႈ လူဝ်ႇဝူၼ်ႉဝႃႈ ၸွႆႈထႅမ်ၵၢၼ်သူၼ်းတုမ် ပီႈၼွင်ႉၸိူဝ်ႉၶိူဝ်းႁဝ်းၼႆၶႃႈ။ တေလႅၵ်ႈ လၢႆႈႁႃႉ ဢမ်ႇလႅၵ်ႈလၢႆႈၼၼ်ႉတႄႉ ယူႇတီႈၵူၼ်းထွမ်ႇမၼ်း။ တၢင်းမေႃႁဝ်းတႄႉ ႁဝ်းတိုၼ်းလူဝ်ႇၸွႆႈ ၸိူဝ်ႉၶိူဝ်း ၸိူင်ႉၼၼ်ၶႃႈ။

ထၢမ် – ၼႂ်းၽဵင်းၵႂၢမ်း ၼွင့်ႁူၵ်း ဢၼ်လႆႈပိုၼ်ၽႄႈၵႂႃႇၼၼ်ႉ ၽဵင်းၵႂၢမ်းၵၢၼ်မိူင်းၼမ်ၶႃႈႁႃ့ ဢမ်ႇၼၼ် ၽဵင်းၵႂၢမ်းတၢင်းႁၵ်ႉ တၢင်းပႅင်းၼမ်ၶႃႈ?

တွပ်ႇ – ဢၼ်ၼမ်ႁႅင်းတႄႉ ပဵၼ်ၽဵင်းၵႂၢမ်း တၢင်းႁၵ်ႉၶႃႈဢေႃႈ။ မၢႆၼိုင်ႈၼႆႉ ၽဵင်းၵႂၢမ်းတၢင်းႁၵ်ႉ၊ မၢႆသွင် သမ်ႉ ၵဵဝ်ႇလူၺ်ႈလွင်ႈပၼ်ႁႅင်းၸႂ်၊ မၢႆသၢမ်တႄႉ ပဵၼ်ၽဵင်းၵႂၢမ်းၵၢၼ်မိူင်း။ ၵၢၼ်မိူင်းတႄႉ ၶႃႈၶဝ် ဢမ်ႇ ပေႃးလႆႈႁွင်ႉဝႆႉၼမ်ၶႃႈ။

ထၢမ် – လွင်ႈယၢပ်ႇၽိုတ်ႇ ၊ လွင်ႈၶဵင်ႇတႃႉ တႃႇၽူႈႁဵတ်းၵၢၼ်ပၢႆးမွၼ်းတႆး ႁဝ်းၶႃႈယၢမ်ႈလဵဝ် ႁၼ်ထိုင်ဝႃႈ မီးၸိူင်ႉႁိုဝ်ၶႃႈ?

တွပ်ႇ – ဢၼ်ၼႆႉတႄႉၵေႃႈ မၼ်းမိူၼ်ၵၢၼ်ၵူႈဢၼ်ၵူၺ်းၶႃႈ မီးလွင်ႈယၢပ်ႇၽိုတ်ႇယူႇ ႁင်းၽႂ်မၼ်း။ ၵူၺ်း  ၵႃႈ ႁဵတ်းၵၢၼ်သင်သေဢမ်ႇဝႃႈ လူဝ်ႇဝႆႉၸႂ်ယႂ်ႇၸႂ်ယၢဝ်းသေႁဵတ်းဢေႃႈ။ ၵႆႉႁၼ်ၽူႈႁွင်ႉၽဵင်းၵႂၢမ်းမႂ်ႇၶဝ် ၵမ်ႈၽွင်ႈ ၸိူဝ်းတိုၵ်ႉၶိုၼ်ႈမႃးသေ မေႃၸႂ်တူၵ်း မိူၼ်ၼင်ႇ ႁဵတ်းၵၢၼ်ပၢႆးမွၼ်းၼႆႉ ႁဝ်းဢမ်ႇပဵၼ်လႆႈ၊ သဵင် ႁဝ်းဢမ်ႇၶႅမ်ႉ၊ ၵႂၢမ်းႁဝ်းဢမ်ႇၶႅမ်ႉ၊ ႁဝ်းဢမ်ႇမိူၼ်ၵေႃႉၼၼ်ႉၵေႃႉၼႆႉ  ဢၼ်လၢတ်ႈၸိူင်ႉၼႆ မီးၼမ်ၼႃႇ  ၶႃႈ။ ပိူၼ်ႈဢမ်ႇပႆႇလႆႈဝႃႈသင်သေ ထၢတ်ႈၸႂ်ၸဝ်ႈၵဝ်ႇတူၵ်းႁင်းၵူၺ်း ၸိူဝ်းၼႆႉ။ ၵွပ်ႈၼၼ် ၶႂ်ႈလၢတ်ႈဝႃႈ ယႃႇပေယွမ်းၵၢၼ်ႉငၢႆႈငၢႆႈ ၊ မိူၼ်ၼွင်ႉႁူၵ်းၵေႃႈ ယၢမ်ႈၸႂ်တူၵ်းမႃးယူႇ။ မိူဝ်ႈတႄႇမၼ်းတႄႉ တိုၼ်းမီးလွင်ႈ ၶဵင်ႇတႃႉ ၵူႈဢၼ်ယဝ်ႉၶႃႈ။ မိူၼ်ၼင်ႇၵႂႃႇႁွင်ႉၵႂၢမ်း ၺႃးမိူဝ်ႈၶိုၼ်းလိုၵ်းႁႅင်းသေ ဢမ်ႇမီးၽူႈပၼ်ႁႅင်း ၸိူဝ်း ၼႆႉ မၢင်ၵေႃႉၸႂ်တူၵ်း။ ၵူၺ်းၵႃႈ ၶႃႈတႄႉဢမ်ႇပဵၼ်ၸိူင်ႉၼၼ် တေလႆႈဝႃႈႁႅင်းၸႂ် ဢၼ်ယွင်ႇလွင်ႈၵၢၼ် ပၢႆးမွၼ်းႁႅင်းလႄႈ ထိုင်မႃးလႆႈမွၵ်ႈၼႆႉၶႃႈ။ ပေႃးဢမ်ႇယွင်ႇႁႅင်းတႄႉ ၶႃႈၵေႃႈလႅပ်ႈႁၢႆၵႂႃႇႁိုင်ယဝ်ႉၶႃႈ။ ၶၢဝ်း တၢင်း 10 ပီပၢႆယဝ်ႉၶႃႈလူးၼေႃႈ။

ထၢမ် – မိူဝ်ႈၽွင်းထၢတ်ႈၸႂ်တူၵ်းၼၼ်ႉ ႁဵတ်းႁိုဝ်ၶိုၼ်းပၼ်ႁႅင်းၸႂ် ၸဝ်ႈၵဝ်ႇၶႃႈ?

တွပ်ႇ – ဢၼ်ၼႆႉတႄႉ ႁဝ်းလူဝ်ႇတူၺ်းၵူၼ်းလၢႆသႅၼ်းဢေႃႈ။ မိူၼ်ၼင်ႇ ၵူၼ်းဢၼ်ယၢပ်ႇလိူဝ် ႁဝ်းၵေႃႈ တေမီး၊ ႁဝ်းပဵၼ်မွၵ်ႈၼႆႉသေ တေၸႂ်တူၵ်း တေယွမ်းၵၢၼ်ႉပႅတ်ႈႁႃႉၼႆသေ ၶိုၼ်းပၼ်ႁႅင်းတူဝ်ၸဝ်ႈၵဝ်ႇ ဢေႃႈ။ ပေႃးယဝ်ႉၵေႃႈ ၶိုၼ်းဝူၼ်ႉတူၺ်း မိူဝ်ႈတႄႇႁွင်ႉၽဵင်းၵႂၢမ်း ဢၼ်ပီႈၸၢႆးၵေႃႉထီႉ 3 ၸွႆႈထႅမ်မႃး ၼၼ်ႉ တေႃႇၼင်ႇပီႈႁဝ်းၵေႃႈ ယင်းၸွႆႈထႅမ်ပၼ် ၊ မႄႈလႄႈတင်း ပီႈၼွင်ႉၸိူဝ်ႉၶိူဝ်းၸိူဝ်းၼႆႉၵေႃႈ ဢမ်ႇ ႁၢမ်ႈသင်လႄႈ ၼင်ႇဢၼ်ၶဝ်ဢမ်ႇႁၢမ်ႈသေ ပၼ်ႁဵတ်းယူႇသေ ဢဝ်လွင်ႈၼၼ်ႉပဵၼ်ႁႅင်းၸႂ်သေ သိုပ်ႇ ႁဵတ်းမႃးၶႃႈဢေႃႈ။

ထၢမ် – ၼႂ်းၽူႈႁွင်ႉၽဵင်းၵႂၢမ်းတႆးႁဝ်းမီးဝႆႉ လၢႆၵေႃႉၼႆႉ ယူႇတီႈၼွင်ႉႁူၵ်းသေ လႆႈၸႂ်ၽႂ်/ ၵေႃႉလႂ် လိူဝ်သေ ပိူၼ်ႈလႄႈ ယွၼ်ႉသင်ၶႃႈ?

တွပ်ႇ – ဢၼ်လႆႈၸႂ် လိူဝ်သေပိူၼ်ႈၼႆတႄႉ လိူၵ်ႈယၢပ်ႇဢေႃႈ ။ ဢၼ်လႆႈၸႂ်တႄႉ မိူၼ်ၼင်ႇ ၸၢႆးၸိူင်း ႁၢၼ် ၊ ၸၢႆးသႅင်ၸွမ်ၾႃႉ ၊ ၸၢႆးသၢႆမၢဝ်း ၊ ၸၢႆးႁၢၼ်လႅင်းၶႃႈ။ ၽူႈႁွင်ႉၽဵင်းၵႂၢမ်း ၼၢင်းယိင်းသမ်ႉ လႆႈၸႂ် ၼၢင်းၶမ်းၼွင်ႉဢေႃႈ။ ၸိူဝ်းၼႆႉ ပဵၼ်ဢၼ်လႆႈၸႂ်ႁႅင်းႁႅင်းၶႃႈ။ ယွၼ်ႉသင်လႄႈ လႆႈၸႂ်ၼႆတႄႉ ယွၼ်ႉ  ၽဵင်းၵႂၢမ်း ဢၼ်ၶဝ်ၸဝ်ႈႁွင်ႉၼႆႉ မၼ်းႁွင်ႉဝၢၵ်ႇၼမ်ႉလိၼ်ႁိၼ်ၽႃမိူင်းတႆးႁဝ်း။ ပေႃးလႆႈထွမ်ႇ ၽဵင်း ၵႂၢမ်းၶဝ်ၼႆ မိူၼ်ၼင်ႇ ထွမ်ႇမိူဝ်ႈလႂ်ၵေႃႈ ၵတ်းယဵၼ်ၸႂ်ယူႇတႃႇသေႇ။ မိူဝ်ႈႁဝ်းဢွၵ်ႇၶၢဝ်းတၢင်း ဢမ်ႇဝႃႈ ယူႇဝႆႉတီႈလႂ် ၵေႃႈယဝ်ႉ ပေႃးလႆႈထွမ်ႇၽဵင်းၵႂၢမ်းၶဝ်ၸိုင် မိူၼ်ႁဝ်းလႆႈၽႅဝ်ၵႂႃႇၼႂ်းမိူင်းတႆး ၸိူင်ႉၼၼ်ၶႃႈ။ မၼ်းၵေႃႈ ပႃးၵူႈဢၼ်ၵူႈလွင်ႈယူႇၶႃႈ မိူၼ်ၼင်ႇၽဵင်းၵႂၢမ်းပၼ်ႁႅင်းၸႂ်၊ ၽဵင်းၵႂၢမ်းဢူၵ်းႁၵ်း ၸိူဝ်းၼႆႉၶႃႈ။

ထၢမ် – ပေႃးပဵၼ်ၾၢႆႇ ၽူႈတႅမ်ႈၽဵင်းၵႂၢမ်းၶႃႈလူး လႆႈၸႂ်ၽႂ်/ ၵေႃႉလႂ်ၶႃႈ?

တွပ်ႇ – ၾၢႆႇၽူႈတႅမ်ႈၽဵင်းၵႂၢမ်းတႄႉ လႆႈၸႂ်ၸၢႆးလၢဝ်သႂ် ၊ ဢၼ်လႆႈၸႂ်ဝႆႉ တေႃႈလဵဝ်သမ့် ပဵၼ်ၽူႈတႅမ်ႈ ၽဵင်းၵႂၢမ်း ဢၼ်တိုၵ်ႉၶိုၼ်ႈမႃးမႂ်ႇ လိူၼ်ၽူး ၊ လႅင်းၶိူဝ်း ၊ ၾူၼ်လႅင်းႁိူင်း ၸိူဝ်းၼႆႉၶႃႈ။ ၾၢႆႇတႅမ်ႈၼႆႉတႄႉ လႆႈၸႂ်ၼမ်ဢေႃႈ။

ထၢမ် – ယူႇတီႈ ပဵၼ်ၽူႈႁွင်ႉၽဵင်းၵႂၢမ်း ၵေႃႉၼိုင်ႈသေ ၶႂ်ႈႁႂ်ႈၽဵင်းၵႂၢမ်းပၢၼ်မႂ်ႇတႆးႁဝ်း ပဵၼ်ၸိူင်ႉႁိုဝ်ၽွင်ႈၶႃႈ?

တွပ်ႇ – ၶႂ်ႈႁႂ်ႈပၢႆးမွၼ်း ဢၼ်မီးယူႇမိူဝ်ႈလဵဝ်လႄႈ ဢၼ်ႁူၼ်ႈမႂ်ႇႁဝ်း ထႅမ်ပၼ်ႁႂ်ႈပႃး လွင်ႈၵၢၼ်တၢင်း ႁူႉၼမ်ၼမ်။ မိူၼ်ၼင်ႇ ၽဵင်းၵႂၢမ်းၶၢင်၊ ၵႂၢမ်းမၢၼ်ႈ ၸိူဝ်းၼႆႉ မၢင်ၸိူဝ်းၶဝ်ႁွင်ႉၵဵဝ်ႇလူၺ်ႈပၼ် တၢင်း ႁူႉတၢင်းႁၼ် ၊ လၢႆးဝႆႉဝၢင်းၸႂ် ၊ ယႃႇႁႂ်ႈၸႂ်တူၵ်း ၸဵမ်ၸိူဝ်းၼႆႉ မီးၸေးလီၼႃႇၶႃႈ။ ၽဵင်းၵႂၢမ်းတႆးႁဝ်းၶႃႈ သမ်ႉ ဢၼ်ၼမ်လိူဝ်သေပိူၼ်ႈ ပဵၼ်ၽဵင်းၵႂၢမ်းဢူၵ်းႁၵ်း။ ပေႃးမႃးထွမ်ႇၵေႃႈ ၼမ်ႉတႃပေႃးယိုင်ႈႁုၺ်ႇ။ ၵွပ်ႈၼၼ်လႄႈ ႁႂ်ႈထႅမ်ႁွင်ႉပၼ် လၢႆမဵဝ်းလၢႆဢၼ် ၊ လဵပ်ႈႁဵၼ်းၸွမ်း ၊ ယႃႇပေထွမ်ႇၽဵင်းၵႂၢမ်းတႆး ဢၼ် လဵဝ်ၵူၺ်း ႁႂ်ႈလဵပ်ႈႁဵၼ်းပႃး ၽဵင်းၵႂၢမ်းၼွၵ်ႈမိူင်း။ ထွမ်ႇတူၺ်းၽဵင်ႈၵႂၢမ်းလၢႆၾၢႆႇလၢႆၸၢဝ်းၶိူဝ်း ပဵၼ်ႁိုဝ်မီး ႁိုဝ်။ မိူၼ်ၼင်ႇ ၽဵင်းၵႂၢမ်းပၼ်ႁႅင်းၸႂ်၊ ဢၼ်ၵဵဝ်ႇလူၺ်ႈတၢင်းႁူႉတၢင်းႁၼ် ၸိူဝ်းၼႆႉၼမ်ၼမ်ၶႃႈဢေႃႈ။ ၶႂ်ႈႁၼ်ၸိူင်ႉၼၼ်ၶႃႈ။

ထၢမ် – ပေႃးတူၺ်းမိူင်းတႆးႁဝ်းဝၼ်းမိူဝ်ႈၼႆႉ လွင်ႈၽွမ်ႉႁူမ်ႈၵေႃႈ ဢမ်ႇႁၼ်တိုဝ်ႉတၢင်း၊ တပ်ႉသိုၵ်းၵေႃႈ ဢမ်ႇၽွမ်ႉၵၼ်၊ ၵၢၼ်မိူင်းၵေႃႈ ဢမ်ႇၸၢင်ႈၶိုတ်းပိူၼ်ႈ။ ၾၢႆႇၼိုင်ႈ – ၸဝ်ႈပၢႆးမွၼ်းၼႆႉ ၼင်ႇဝႃႈ ပဵၼ်တူဝ် ယၢင်ႇလီတႃႇၵူၼ်းၼုမ်ႇၼႆလႄႈ ၼွင်ႉႁူၵ်းႁၼ်ထိုင်ဝႃႈ ပၢႆးမွၼ်းတႆးၼႆႉထုၵ်ႇလီ ႁဵတ်းႁိုဝ်ႁႂ်ႈပေႃးပဵၼ် လွင်ႈၵမ်ႉၸွႆႈၵၢၼ်ၽွမ်ႉႁူမ်ႈတႆး?

တွပ်ႇ – ၵၢၼ်ပၢႆးမွၼ်းတႄႉ ႁႂ်ႈမၼ်းပဵၼ်ၵၢၼ်ၸွႆႈႁႅင်းတႄႉတႄႉ တီႈတႄႉဢမ်ႇပဵၼ်ၶႃႈ။ မၼ်းတေပဵၼ် လႆႈမွၵ်ႈ ပဵၼ်ၵေႃႇပဵၼ်ယၢင် ၼိုင်ႈဢၼ်သေသႂ်ႇပၼ်ၼႂ်းၵႄႈမၼ်း ႁႂ်ႈမၼ်းလႆႈတိူဝ်းၸမ်ၵၼ်။ လွင်ႈ ဢၼ် တႅၵ်ႇငၢၵ်ႈၵၼ်ၸိူဝ်းၼၼ်ႉ ႁႂ်ႈမၼ်းမႄးလီၵၼ်၊ တိူဝ်းၶဝ်ႈဢွၵ်ႇၵၼ်၊ မၼ်းပဵၼ်လႆႈမွၵ်ႈပၼ်တၢင်း ႁၼ်ထိုင် ၸိူင်ႉၼၼ်ႉၵူၺ်းၶႃႈ။ မိူၼ်ၼင်ႇ ႁႂ်ႈႁွင်ႉၵႂၢမ်းသေ တေၸၼ်ၸႂ်ႁဝ်းၽွမ်ႉႁူမ်ႈၵၼ်တႄႉတႄႉ ၼႆၵေႃႈ ဢမ်ႇလၢတ်ႈလႆႈႁူဝ်ပၢၵ်ႇတဵမ်။ ၵၢၼ်ပၢႆးမွၼ်းၼႆႉ မၼ်းမိူၼ်ၼင်ႇဝႃႈ ၼႂ်းၸႂ်ႁဝ်းၶုၺ်ႉႁၼ်ၸိူင်ႉႁိုဝ် ၊ ၶႂ်ႈႁႂ်ႈမၼ်းပဵၼ်ၸိူင်ႉႁိုဝ် ၼႆသေႁဝ်းတႅမ်ႈႁွင်ႉၵႂႃႇ ပဵၼ်မွၵ်ႈၼၼ်ႉၵူၺ်း။ သင်ဝႃႈ မၼ်းၵႂႃႇထိုင်ၸႂ် ၽူႈဢွၼ်ႁူဝ်တႆး ႁဝ်းၶဝ်လႆႈလီလီ ယိင်ႈၶႅၼ်းၶႅမ်ႉၶႃႈဢေႃႈ။ ၵူၺ်းၵႃႈ ၶႃႈထၢင်ႇတႄႉ ၵမ်ႈ ၼမ်ၵေႃႈ ၶဝ် ၸဝ်ႈလႅပ်ႈ တေဢမ်ႇပေႃးပဵၼ်ထွမ်ႇ ပၢႆးမွၼ်းႁဝ်းၶႃႈ။ ယွၼ်ႉဝႃႈ ၵၢၼ်ၶဝ်ၵေႃႈ တေသုၵ်ႉၼၼ်ႉၼႃႇၼေႃ။

ၵူၺ်းၵႃႈ ဢၼ်ၶႂ်ႈၾၢၵ်ႇတွၼ်ႈပၼ် ၵူၼ်းၼုမ်ႇႁဝ်းတႄႉၵေႃႈ ပေႃးႁဝ်းတူၺ်းၸွမ်းလွင်ႈၽိတ်းၵၼ်တႄႉ  မၼ်းဢမ်ႇယဝ်ႉလႆႈသေပွၵ်ႈ ၊ ၼင်ႇၵႃႈႁဝ်းၸွႆႈထႅမ်လႆႈ သူၼ်းတုမ်လႆႈၼၼ်ႉတႄႉ ႁဝ်းၵေႃႈ လူဝ်ႇလႆႈ သူၼ်းတုမ်ဢေႃႈ။ ၵူၺ်းၵႃႈ ႁႂ်ႈဢဝ်ၸႂ်သႂ်ႇႁႅင်းႁႅင်းသေ ၵႂႃႇၸူမ်ၼႂ်းမၼ်းၵေႃႈ ယႃႇႁႂ်ႈပဵၼ်။ ႁဝ်းၶႃႈလူဝ်ႇ ပၼ်ၶၢဝ်းယၢမ်း တူဝ်ၸဝ်ႈၵဝ်ႇ ၼမ်ၼမ်ဢေႃႈ။ လွင်ႈသုၵ်ႉယုင်ႈမၢင်ဢၼ်ၼႆႉ မၼ်းယူႇတီႈ တၢင်းဝူၼ်ႉ၊ တၢင်းဝူၼ်ႉၵေႃႈ လွင်ႈယႂ်ႇ။ ၵွပ်ႈၼၼ် ၼင်ႇႁိုဝ်ႁဝ်းတေဢမ်ႇတႅၵ်ႇၵၼ် မိူၼ်ၼင်ႇၽူႈယႂ်ႇၵူၼ်းလူင် ႁဝ်း ၶဝ် ပဵၼ်ယူႇတေႃႈလဵဝ်ၼႆႉ ယူႇတီႈတူဝ်ၸဝ်ႈၵဝ်ႇၵေႃႈ ယႃႇပေတႅၵ်ႇပိူၼ်ႈ ၊ မၼ်းလူဝ်ႇလႆႈတႄႇတီႈတူဝ် ၸဝ်ႈၵဝ်ႇ ၊ ၸဝ်ႈၵဝ်ႇလူဝ်ႇလႆႈလီဢွၼ်တၢင်း။ ၵွပ်ႈၼၼ် ဝႆႉဝၢင်းၸႂ်လီလီ ၊ ၽိူမ်ႉၼမ်ႉၵတ်ႉ ၸဝ်ႈၵဝ်ႇလီ လီ ယႃႇပေဢဝ်ၸႂ်ၸူမ်ဝႆႉ တီႈၼႂ်းလွင်ႈသုၵ်ႉသၵ်ႉ၊ လဵပ်ႈႁဵၼ်းတၢင်းႁူႉၼမ်ၼမ်ၼႆ မၼ်းတေၸွႆႈႁႂ်ႈၵူႈ လွႆႈလီ မႃးလႆႈယူႇၶႃႈ။

ထၢမ် – ၽဵင်းၵႂၢမ်းမႂ်ႇ ဢၼ်လႆႈႁၢင်ႈႁႅၼ်းဝႆႉ တႃႇတေပိုၼ်ၽႄႈဢွၵ်ႇထႅင်ႈ ၸွင်ႇမီးၶႃႈ?  ပဵၼ်ၵႂၢမ်းၼႅဝ်း ၸိူင်ႉႁိုဝ်ၶႃႈ?

တွပ်ႇ – မီးၶႃႈဢေႃႈ။ ႁၢင်ႈႁႅၼ်းတေပိုၼ်ၽႄႈဢွၵ်ႇ ၼႂ်းလိူၼ်ၾႅပ်ႊပိဝ်ႊရီႊ ပီၼႆႉၶႃႈ။ ပဵၼ်ၽဵင်းၵႂၢမ်း လွင်ႈတၢင်းႁၵ်ႉၶႃႈဢေႃႈ။ လွင်ႈတၢင်းဢၼ်ပႃးတီႈၼႂ်းၽဵင်းၵႂၢမ်းတႄႉ မိူၼ်ၼင်ႇဝႃႈ ၵူၼ်းၸၢႆးၵေႃႉၼိုင်ႈ ဢွၼ်တၢင်းယၢမ်ႈပဵၼ်ၵူၼ်းႁၢႆႉ၊ ၵူၼ်းတိုဝ်ၵူၼ်းဝႃႈယၢပ်ႇ ၽႂ်လၢတ်ႈၵေႃႈဢမ်ႇထွမ်ႇ၊ ၵႆႉၺႃး ပိူၼ်ႈသႄႉ ၼႄး၊ ႁဵတ်းၵၢၼ်သင်ၵေႃႈတူၵ်းသုမ်းၼမ် ၸိူင်ႉၼၼ်ၶႃႈ။ ၵူၺ်းၵႃႈ ၽိူဝ်ႇမႃးၺႃးၼၢင်းယိင်း ၵေႃႉၼိုင်ႈ ဢဝ်မၼ်းၸၢႆး လႅၵ်ႈလၢႆႈၵႂႃႇ ယွၼ်ႉၼၢင်းယိင်း ၵေႃႉၼိုင်ႈ။ ယွၼ်ႉၼၢင်းယိင်း ဢၼ်မၼ်းႁၵ်ႉမႅၼ်ႈသေ လွင်ႈႁၢႆႉတိုဝ် မိူဝ်ႈဝၼ်းၼၼ်ႉၵေႃႈ ၽႃႈဝၢင်းပႅတ်ႈလႆႈတင်းသဵင်ႈ၊ မီးလွင်ႈယၢပ်ႇၸိူင်ႉႁိုဝ်ၵေႃႈ မီးၸႂ်ၶႂ်ႈ တေႃႇသူႈ ပဵၼ်ၽဵင်းၵႂၢမ်းၸိူင်ႉၼၼ်ၶႃႈ။

ထၢမ် – ၶႂ်ႈမွၵ်ႇလၢတ်ႈၶေႃႈၵႂၢမ်း တူင်ႉတၵ်ႉသူင်ႇသင်ထိုင် ပီႈၼွင်ႉၽူႈပၼ်ႁႅင်း ၸိူင်ႉႁိုဝ်ၽွင်ႈၶႃႈ?

တွပ်ႇ – ၶွပ်ႈၸႂ်ထိုင် ၽူႈပၼ်ႁႅင်းၶဝ်ၼမ်ၼမ် သမ်ႉပေႃးဢမ်ႇမီးတီႈလၢတ်ႈယဝ်ႉၶႃႈ။ ၵၢၼ်ပၢႆးမွၼ်းၼႆႉ  ယွၼ်ႉလႆႈပိုင်ႈဢိင် ၽူႈပၼ်ႁႅင်းလႄႈ သင်ဢမ်ႇမီးၽူႈပၼ်ႁႅင်း၊ ၽူႈထွမ်ႇငိၼ်းၸိုင် ႁဝ်းၶႃႈႁဵတ်းၵၢၼ်ပၢႆး  မွၼ်း ပဵၼ်ၽူႈႁွင်ႉၵႂၢမ်းၵေႃႈ တေဢမ်ႇၵႂႃႇလႆႈၶၢဝ်းယၢဝ်းၶႃႈ။ ဢၼ်လွင်ႈယႂ်ႇတႄႉ ယူႇတီႈၽူႈပၼ်ႁႅင်း  ဢေႃႈ။ ပၼ်ႁႅင်းၵႃႈႁိုဝ်ၵေႃႈ ႁဝ်းၶႃႈမီးႁႅင်းၸႂ် ၵႃႈၼၼ်ႉယဝ်ႉၶႃႈ။ ယူႇတီႈၼွင်ႉႁူၵ်းသေ ယိၼ်းၸူမ်းၶွပ်ႈ ၸႂ်ထိုင် ၵူႈၵေႃႉ တီႈပၼ်ႁႅင်းမႃး ၵူႈၾၢႆႇၾၢႆ၊ ၸဵမ်ဢဝ်တၢင်းႁၼ်ထိုင် ၸိူဝ်းၼႆႉၶႃႈ။ မၵ်းမၼ်ႈဝႃႈ ၽူႈပၼ် ႁႅင်းတင်း ၶႃႈႁဝ်းၼႆႉ ပဵၼ်ၵူၼ်းႁိူၼ်းလဵဝ်ၵၼ်၊ ဢမ်ႇမီးၽႂ်ယူႇသုင် ယူႇတႅမ်ႇၶႃႈ။ ႁဝ်းၶႃႈဢမ်ႇ ၸႅၵ်ႇ ၸၼ်ႉထၢၼ်ႈဝႃႈ ၽူႈႁွင်ႉၵႂၢမ်း၊ ၽူႈပၼ်ႁႅင်း ၸိူင်ႉၼၼ်ၶႃႈ။ ဢၼ်ပဵၼ်မႃး ၽူႈႁွင်ႉၵႂၢမ်းၼႆႉၵေႃႈ ဝူၼ်ႉဝႃႈ ပဵၼ်ၵၢၼ်ၼိုင်ႈဢၼ်သေ ၸွႆႈထႅမ်ၵၢၼ်ၸိူဝ်ႉၶိူဝ်းႁဝ်း ၸိူဝ်းၼႆႉၵူၺ်းၶႃႈ။

ထၢမ် – သင်ဝႃႈၶႂ်ႈပၼ်ႁႅင်းၼွင်ႉႁူၵ်းၼႆၸိုင် တေပၼ်ႁႅင်းလႆႈတီႈလႂ်ၽွင်ႈၶႃႈ?

တွပ်ႇ – ပၼ်ႁႅင်းလႆႈတီႈ Facebook ၸိုဝ်ႈ N-Six Zaai ၊ YouTube – Nong Hook  ၊ တီႈ Tik Tok ၵေႃႈသႂ်ႇ ဝႆႉ Nong Hook ၼႆၵူၺ်းၶႃႈ။

ထၢမ် – ၶေႃႈၵႂၢမ်း ဢၼ်ဢမ်ႇလႆႈထၢမ်မႅၼ်ႈလႄႈ ဢၼ်ၶႂ်ႈလၢတ်ႈ ၸွင်ႇမီးၶႃႈ?

တွပ်ႇ – မီးၶႃႈဢေႃႈ။ မၢင်ၸိူဝ်းၵႆႉထၢမ်မႃးတီႈ ၼွင်ႉႁူၵ်းဝႃႈ ၼင်ႇႁိုဝ် ၵႂၢမ်းတေၶႅမ်ႉ တေလႆႈႁဵတ်းႁိုဝ်၊ ၸဵမ် ၵၢၼ်ႁွင်ႉ ၸိူဝ်းၼႆႉ။ ၶႃႈတႄႉ ၶႂ်ႈၾၢၵ်ႇထိုင် ၽူႈႁွင်ႉၵႂၢမ်း သႅၼ်းႁုၼ်ႈမႂ်ႇႁဝ်းၶဝ် ဢၼ်တေၶိုၼ်ႈမႃး တၢင်း လင်လႄႈ ဢၼ်ႁဵတ်းဝႆႉယူႇတေႃႈလဵဝ်ၼႆႉဝႃႈ ယႃႇပေယိူင်ႈပိူၼ်ႈ၊ ပေႃးႁဝ်းယိူင်ႈပိူၼ်ႈၼႆ ႁဝ်းပဵၼ်လႆႈမၢႆ (2) ၵူၺ်း။ ၵွပ်ႈၼၼ် ႁဝ်းၶႃႈၶတ်း ၸႂ် ႁႂ်ႈပဵၼ်မၢႆ (1)။ ၸဵမ်ဢဝ်ၵၢၼ်တႅမ်ႈ၊ ၵၢၼ်ႁွင်ႉၸိူဝ်းၼႆႉ ၶႃႈတႄႉ တိူဝ်းပၼ်ႁႅင်း ၾၢႆႇဢၼ်ၶူင်သၢင်ႈဢၼ်မႂ်ႇ ၸိူင်ႉၼၼ်ဢေႃႈ။ ႁဝ်းတေလႆႈႁူႉဝႃႈ ၼမ်ႉၵတ်ႉႁဝ်းမီး ၵႃႈ ႁိုဝ်၊ ႁဵတ်းလႆႈမွၵ်ႈၵႃႈႁိုဝ် ၸိူဝ်းၼႆႉ။ သဵင်ႁွင်ႉၵႂၢမ်းတႆးၼႆႉ လီၸႂ်ႁႂ်ႈမၼ်းမီးၸေးၵူႈမဵဝ်း ဢၼ်ဢမ်ႇယိူင်ႈ ၵၼ်၊ မိူၼ်ၵၼ်ၼၼ်ႉဢေႃႈ။ ဢၼ်ႁဝ်းလဵပ်ႈႁဵၼ်း သဵင်ပိူၼ်ႈ၊ လၢႆးႁွင်ႉ ပိူၼ်ႈ ၼၼ်ႉတႄႉ ႁဝ်းလဵပ်ႈႁဵၼ်း ၵူၺ်း ဢမ်ႇၸႂ်ႈဝႃႈယိူင်ႈႁႂ်ႈမိူၼ်ပိူၼ်ႈ။ ႁဝ်းလူဝ်ႇလႆႈ ႁွင်ႉဢွၵ်ႇမႃးႁတ်းႁတ်း၊ ၽူႈပၼ်ႁႅင်းဢၼ်ဝႃႈၼၼ်ႉ မၼ်းတေမီးမႃးၵူၺ်း။ ၵမ်ႈၽွင်ႈတိုၵ်ႉတႄႇ ႁွင်ႉ သမ်ႉဢမ်ႇၶဝ်ႈႁူၵူၼ်းပၼ်ႁႅင်းသေ ဢဝ်ၸႂ်တူၵ်းၸိူဝ်း ၼႆႉၵေႃႈမီး။ တီႈတႄႉမၼ်း ဢမ်ႇထုၵ်ႇလီၸႂ်တူၵ်း ၼႅဝ်းလႂ်တေလႅပ်ႈၵၼ်တင်းသဵင်ႁဝ်းၵေႃႈ ႁွင်ႉဢွၵ်ႇမႃး ၼမ်ၼမ် ႁႂ်ႈမီးဝႆႉသဵင်ၶွင်တူဝ်ႁင်းၵူၺ်း ၶႂ်ႈပၼ်ႁႅင်းၸိူင်ႉၼၼ်ၶႃႈ။