မိူဝ်ႈဝႃး ဝၼ်းတီႈ 18/06/2025 ယၢမ်းၵၢင်ၼႂ် 6 မူင်းပၢႆ ၸၢႆးၸိူင်းႁၢၼ် ၽူႈတႅမ်ႈ/ ႁွင်ႉၽဵင်းၵႂၢမ်းတႆး ၸိုဝ်ႈသဵင်ယႂ်ႇ ၵိုင်ႉၵၢင်ႉဢမ်ႇယူႇလီသေ လႆႈသူင်ႇယူတ်းယႃတူဝ် တီႈႁူင်းယႃသျေႉသွင်ႇ (ရှေ့ဆောင်) ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး။

ၼၢင်းမွၼ်းႁွမ် ၵေႃႉပဵၼ်ၼွင်ႉယိင်း ၸၢႆးၸိူင်းႁၢၼ် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပီႈဢၢႆႈၶႃႈႁဝ်း ၵိုင်ႉၵၢင်ႉဢမ်ႇယူႇလီသေ လႆႈသူင်ႇႁူင်းယႃသျေႉသွင်ႇဢေႃႈ။ မေႃယႃၶဝ်ဝႃႈ ပဵၼ်သၢႆလိူတ်ႈတႅၵ်ႇ ၼႂ်းဢွၵ်းဢေႃၼႆၶႃႈဢေႃႈ။ မိူဝ်ႈဝႃး ၵၢင်ၼႂ်မွၵ်ႈ 6 မူင်း ႁဝ်းၶႃႈ ၼႅတ်ႈၵႂႃႇဢဝ်မၼ်းလုၵ်ႉသေ မိူဝ်ႈၽွင်းၼၼ်ႉ မၼ်းၸၢႆးဢမ်ႇလၢတ်ႈၵႂၢမ်းသင်ယဝ်ႉ ႁဵတ်းၼၼ်သေ ၼႅတ်ႈဢဝ်သူင်ႇႁူင်းယႃၵမ်းလဵဝ်ဢေႃႈ”- ဝႃႈၼႆ။

ၸၢႆးၸိူင်းႁၢၼ်ၼႆႉ ဢမ်ႇယူႇလီမႃး ၸဵမ်မိူဝ်ႈပီ 2018 ယွၼ်ႉတၢင်းပဵၼ်လၢႆလွင်ႈ မိူၼ်ၼင်ႇ ၼမ်ႉထူမ်ႈပွတ်ႇ၊ တၢႆၽၢၵ်ႇ၊ လိူတ်ႈၶိုၼ်ႈ ၸိူဝ်းၼႆႉမႃးသေ လႆႈၶဝ်ႈႁူင်းယႃမႃး လၢႆပွၵ်ႈယဝ်ႉ။

“ပီႈဢၢႆႈၶႃႈၼႆႉ ပဵၼ်ဝႆႉတၢင်းပဵၼ် လၢႆလၢႆလွင်ႈၶႃႈဢေႃႈ။ ဢွၼ်တၢင်းသုတ်းတၢႆၽၢၵ်ႇ၊ ယဝ်ႉၵေႃႈ ၼမ်ႉထူမ်ႈပွတ်ႇ၊ လိူတ်ႈၶိုၼ်ႈ ၸိူဝ်းၼႆႉမႃး။ လိူတ်ႈၶိုၼ်ႈသေ သၢႆလိူတ်ႈတႅၵ်ႇ ၼႂ်းဢွၵ်းဢေႃၼႆႉ ပွၵ်ႈၼႆႉ ပဵၼ်ပွၵ်ႈၵမ်းသွင်ယဝ်ႉ။ မိူဝ်ႈပွၵ်ႈဢွၼ်တၢင်းၼၼ်ႉ သၢႆလိူတ်ႈတႅၵ်ႇၼႂ်းဢွၵ်းဢေႃ တင်းၾၢႆႇသၢႆႉ။ ၵမ်းၼႆႉ ပဵၼ်တင်းၾၢႆႇၶႂႃဢေႃႈ။ ယၢမ်းလဵဝ်တႄႉ ယၢပ်ႇၽိုတ်ႇဝႆႉလွင်ႈငိုၼ်းတွင်း ၵႃႈၸႂ်ႉၸၢႆႇၶႃႈယဝ်ႉ”- ၼၢင်းမွၼ်းႁွမ် သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ယွၼ်းႁူမ်ႈမိုဝ်းထိုင် ၽူႈပၼ်ႁႅင်း မေႃၵႂၢမ်း ၸၢႆးၸိူဝ်းႁၢၼ် တီႈၸမ်ၵႆၵူႈၵေႃႉၵူႈၵူၼ်း သင်ဝႃႈ ၶႂ်ႈၵမ်ႉၸွႆႈ ၵႃႈယူတ်းယႃ ၵူႈလွင်ႈလွင်ႈၼႆၸိုင် ၵပ်းသိုပ်ႇၸူးမၢႆၾူၼ်းထႆး 0616874613 (ၼၢင်းမွၼ်းႁွမ် ၵေႃႉပဵၼ်ၼွင်ႉယိင်း) ဢမ်ႇၼၼ် မၢႆၾူၼ်းထႆး 0856155951 (ၼၢင်းၶမ်းယူင်း ပီႈၼွင်ႉၸမ်ၸႂ်) ၼႆယဝ်ႉ။

ၸၢႆးၸိူင်းႁၢၼ်ၼႆႉ ပဵၼ်ၸဝ်ႈပၢႆးမွၼ်းတႆး ၵတ်ႉၶႅၼ်ႇၵေႃႉၼိုင်ႈ ၵမ်ႈၼမ် ၽဵင်းၵႂၢမ်းမၼ်းၸၢႆးၼႆႉ တေတႅမ်ႈႁွင်ႉဢွၵ်ႇမႃးႁင်းၵူၺ်း။ မၼ်းၸၢႆးၼႆႉ ပဵၼ်လုၵ်ႈၸၢႆး လုင်းသၢင်ႇ ၺုၼ်ႉလႄႈ ပႃႈၸိင်ႇၺုၼ်ႉ (ႁွင်ႉ) မႄႈသႅင်ၸိုၼ်ႈ ၸႃႇတိ ဝၢၼ်ႈၼႃးပၢင်ႇ ဢိူင်ႇႁႃႈဝၢၼ်ႈ ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။ မီးပီႈ ၼွင်ႉႁူမ်ႈတွင်ႉၵၼ် 3 ၵေႃႉ မၼ်းၸၢႆး ပဵၼ်ၵေႃႉထီႉၼိုင်ႈ လိူဝ်ၼၼ်ႉ ၼွင်ႉယိင်းၸိုဝ်ႈႁွင်ႉ ၼၢင်းမွၼ်းႁွမ်လႄႈ ၼွင်ႉၸၢႆး – ၸၢႆးၼေႃႇၶိူဝ်း ၼႆယဝ်ႉ။