ဝၼ်းတီႈ 10/6/2026 ယၢမ်းၵၢင်ၼႂ် ယေးငိုၼ်း KBZ (ၵိင်ႇၽႄ) မႃးပိုတ်ႇၼႂ်းထုင်ႉပၢင်လႅင်းသႂ် ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း ၊ ၽူႈႁပ်ႉပုၼ်ႈၽွၼ်းယႂ်ႇလူင် လၢႆၾၢႆႇလၢႆတၢင်း မႃးၶဝ်ႈႁူမ်ႈ ပျီႇတူႉၸိတ်ႉမၢၵ်ႇၵႅင်းဢဝ်ႁူမ်ႇလူမ်ႈပၼ် ။
တၢမ်တူဝ် ၼႃႇယၵလူင်ယေးငိုၼ်း KBZ Bank ဢူးဢွင်ႇၵူဝ်ႇဝိၼ်း လႄႈ ၽူႈၼမ်း ၸုမ်းပျီႇတူႉၸိတ်ႉမၢၵ်ႇၵႅင်း (ပၢင်ႇလႅင်းသႂ်) ၸဝ်ႈလႅင်းသႂ် ၵေႃႈၶဝ်ႈႁူမ်ႈပိုတ်ႇပၢင်ၵႂႃႇ ။
ၵူၼ်းဝဵင်းၼမ်ႉၸၢင်ၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ပၢင်ႇလႅင်းသႂ်ၼႆႉ မိူဝ်ႈဢွၼ်တၢင်း ပဵၼ်ဝၢၼ်ႈ ၵူၺ်း။ ၵမ်းၼႆႉတႄႉ မႃးပိုတ်ႇယေးငိုၼ်းယဝ်ႉ ၊ ၵူၼ်းၵေႃႈၵိုၼ်းၼႃႇယဝ်ႉ ၊ ၵူၼ်းပၢႆႈၽေးသိုၵ်း ဢၼ်လုၵ်ႉတၢင်းမိူင်းတႆးပွတ်းႁွင်ၼၼ်ႉၵေႃႈ မႃးယူႇၼမ်ၼႃႇ ၊ ဝၼ်းပိုတ်ႇယေးငိုၼ်းၼၼ်ႉတႄႉ ၸဝ်ႈၶွင်ပၢၼ်ႇၵေႃႉမႃးပိုတ်ႇပၢင်ပွႆး ၊ ၸုမ်းပျီႇတူႉၸိတ်ႉမၢၵ်ႇၵႅင်း ဢဝ်ႁူမ်ႇလူမ်ႈပၼ်ၼႂ်းဝဵင်း”- ဝႃႈၼႆ ။
ၼႂ်းပၢင်ပွႆးၼၼ်ႉ တွၼ်ႈတႃႇ ပၢႆးပၺ်ႇၺႃႇ လႄႈ ၵၢၼ်သႃႇသၼႃႇ ၼႂ်းပိုၼ်ႉတီႈ ၼႆသေ ယူႇတီႈ KBZ Bank လူႇတၢၼ်းပၼ်ငိုၼ်း 720 သႅၼ်ပျႃး – လႆႈႁူႉၼင်ႇၼႆ။
ထုင်ႉပၢင်ႇလႅင်းသႂ်ၼႆႉ ပဵၼ်ပိုၼ်ႉတီႈ ၸုမ်းယိပ်းၵွင်ႈၵၢင် ၊ ပျီႇတူႉၸိတ်ႉယူႇသဝ်း ။ ယၢမ်းလဵဝ်တႄႉ ပႃးၸဵမ်ၸဝ်ႈပၢႆးမၢၵ်ႈမီး ဢိၵ်ႇၵူၼ်းမိူင်းလၢႆတီႈလၢႆတၢင်းၶဝ်ႈမႃးယူႇသဝ်း ၵိုၼ်းၶွၼ်ႈဝႆႉ။
ၵူၼ်းၸၢႆးဝဵင်းၼမ်ႉၸၢင် လၢတ်ႈၽူႈတွႆႇႁွၵ်ႈဝႃႈ- “ ၶဝ်ၶႂ်ႈၼႄလွင်ႈၵၢၼ်ပူၵ်းပွင်ၼႂ်းပိုၼ်ႉတီႈၵေႃႈပႃး ပေႃးဢမ်ႇမီးလွင်ႈတၢင်းမၼ်းတႄႉ ဢမ်ႇပိုတ်ႇလေႃႇ ၊ ပၢၼ်ႇၶဝ်ၵေႃႈ ပေႃးပျီႇတူႉၸိတ်ႉၼႂ်းပိုၼ်ႉတီႈဢမ်ႇႁွင်ႉၶဝ်တေဢမ်ႇမႃး ။ ၶိုၼ်ႈယႂ်ၶိုတ်းၵၢပ်ႈတႄႉလီယူႇၵူၺ်း ၼႂ်းၸႄႈဝဵင်းၼမ်ႉၸၢင်ၼႆႉ ၵျႃးၽျႅၼ်ႉၵေႃႈၼမ်မႃးၼႃႇယဝ်ႉ ၊ လွင်ႈ ထုၵ်ႈငိုၼ်း ဢူၼ်းငိုၼ်း လၢင်ႉငိုၼ်းၸိူဝ်းၼႆႉ တၵ်းလႆႈၾၢင်ႉတူၺ်း ”- ဝႃႈၼႆ ။
ၸုမ်းပျီႇတူႉၸိတ်ႉမၢၵ်ႇၵႅင်း (ပၢင်ႇလႅင်းသႂ်) ၼႆႉ ပဵၼ် ၸဝ်ႈလႅင်းသႂ် (ၸဝ်ႈၸၢႆးလူႇ) ဢွၼ်ႁူဝ်။ ပျီႇတူႉၸိတ်ႉ ၼႃးယႆးသမ်ႉ ပဵၼ်ၵျဵဝ်းသၢင်း ဢွၼ်ႁူဝ်။ မိူဝ်ႈပီ 1996 ဝၢႆးတပ်ႉသိုၵ်းမိူင်းတႆး MTA ဝၢင်းၶိူင်ႈၼၼ်ႉ သွင်ၸုမ်းၼႆႉၵေႃႈမႃးၸွမ်း။ ဝၢႆးၼၼ်ႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပၼ်ပုၼ်ႈၽွၼ်းသေႁပ်ႉႁဵတ်းပျီႇတူႉၸိတ်ႉသေယူႇထုင်ႉၼႆႉမႃး ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ