ၽွင်းၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ လိူင်ႇၼမ်မႃးၼႆႉ ၽႂ်ၵေႃႈဝႃႈ ႁႂ်ႈၾၢင်ႉၵၼ် ႁႂ်ႈဝႄႈၵၢၼ်ဢၼ် ၸၢင်ႈ မီးၽေးလွၵ်ႇၵၼ်လႅၼ်ငၢႆႈ ၼႆၸိူဝ်းၼႆႉ ။ ၵူၺ်းၵႃႈ ၸူဝ်ႈၽႅပ်ႉတႃၵူၺ်းၵေႃႈ ၸၢင်ႈသုမ်းငိုၼ်းတွင်းၵႂႃႇ ၼပ်ႉႁူဝ်ႁဵင် သႅၼ်မၼ်း ။ မိူဝ်ႈလဵဝ် ၵူၼ်းၸိူဝ်းႁဵတ်းၵၢၼ်ၼႂ်းမိူင်းထႆး ၺႃးပိၵ်ႉဢိုတ်းယေးငိုၼ်းတူဝ်ၵဝ်ႇ လူၺ်ႈဢမ်ႇတၼ်း ႁူႉတူဝ် မီးတင်းၼမ် ။

မၢႆယေးငိုၼ်းဢၼ်ထုၵ်ႇပိၵ်ႉၵႂႃႇၼႆႉ ၽူႈမီးပုၼ်ႈၽွၼ်း ယေးငိုၼ်းၵူတ်ႇထတ်းဝႃႈ ပဵၼ်မၢႆ ယေးငိုၼ်း ၵူၼ်းလွၵ်ႇလႅၼ်ၵိၼ်ငိုၼ်းၸႂ်ႉပဵၼ်ၶိူင်ႈမိုဝ်း ( บัญชีม้า ၿၼ်ႊသျီႊမႃႉ) ။ ငိုၼ်းဢၼ်ၶင်ႉၵိုတ်းဝႆႉ ၼႂ်းယေး ငိုၼ်းၵေႃႈ ဢမ်ႇၸၢင်ႈဢဝ်ၸႂ်ႉၸၢႆႇ ။ ၼုမ်ႇၸၢႆးၵူၼ်းမိူင်းတႆး ဢၼ်မႃးႁဵၼ်းလိၵ်ႈၼႂ်းမိူင်းထႆးၵေႃႉၼိုင်ႈ ၺႃးပိၵ်ႉ ဢိုတ်းမၢႆယေးငိုၼ်းလႄႈ ႁႃလၢႆးၵႄႈလိတ်ႈယၢပ်ႇယဵၼ်းဝႆႉ ။

ၼႂ်းလိူၼ်ၼႆႉ ၼုမ်ႇၸၢႆး ၵူၼ်းမိူင်းတႆးၵေႃႉၼိုင်ႈ ၸိုဝ်ႈၸၢႆးတိတ်ႉ ဢၼ်ၶဝ်ႈၾိုၵ်းၵၢၼ် လႄႈႁဵၼ်းလိၵ်ႈဝႆႉ ၼႂ်းမိူင်းထႆးသေ ၺႃးပိၵ်ႉ ဢိုတ်းယေးငိုၼ်း ဢမ်ႇယွမ်း 3 ဢၼ် ။ ငိုၼ်းဢၼ်ၶမ်ယူႇဝႆႉၼႂ်းယေးငိုၼ်းၸိူဝ်းၼၼ်ႉ ၼပ်ႉႁူဝ်သႅၼ် ငိုၼ်းထႆး ၵေႃႈ ဢမ်ႇၸၢင်ႈဢဝ်ဢွၵ်ႇဢဝ်ၸႂ်ႉလႄႈ ၵိၼ်းၸႂ်ဝႆႉ။

လွင်ႈၼႆႉ မၼ်းၸၢႆးလၢတ်ႈၼႄဝႃႈ – ငိုၼ်းဢၼ် ဢမ်ႇထၢင်ႇဢမ်ႇထိူမ်သေ ဢူၼ်းၶဝ်ႈမႃးၼႂ်းယေးငိုၼ်းမၼ်းၸၢႆးၼႆႉ 20000 (သွင်မိုၼ်ႇ)ၿၢတ်ႇ ။ၵူၺ်းၵႃႈ ဢၼ်ၺႃးပိၵ်ႉဢိုတ်းသမ်ႉ ပဵၼ်ယေးငိုၼ်းမၼ်းတင်းမူတ်း ။ ငိုၼ်းဢၼ်မီးဝႆႉ ၼႂ်းယေးငိုၼ်းၸိူဝ်းၼႆႉသမ်ႉ ပဵၼ်ငိုၼ်းလူဝ်ႇၸႂ်ႉလူဝ်ႇၸၢႆႇ တႃႇၼႃႈၵၢၼ်တႃငၢၼ်းၵူႈလွင်ႈလွင်ႈ ။ မိူဝ်ႈလဵဝ် ၵူၼ်း ၸိူဝ်း လူဝ်ႇလႆႈငိုၼ်းတီႈမၼ်းၸၢႆးၵေႃႈ ၼမ်ဝႆႉလႄႈ ယၢပ်ႇၽိုတ်ႇဝႆႉတင်းသွင်ၾၢႆႇ ။ တႃႇႁႂ်ႈၽူႈႁူမ်ႈၽၢၵ်ႈ ၼႃႈၵၢၼ် ၸွမ်းၵၼ်ပွင်ႇၸႂ်ၵေႃႈ လႆႈၶတ်းၸႂ်သပ်းလႅင်းၼႄတႄႉတႄႉဝႃႈဝႃႈ ၼႆယူႇ။

ပိူင်ပဵၼ်ၸိူဝ်းၼႆႉ ဢမ်ႇၵွမ်ႉဝႃႈ မီးၸၢႆးတိတ်ႉၼႆႉ ၵူၺ်း ဢၼ်လႆႈထူပ်း။ ၵူၼ်းၼႂ်းမိူင်းထႆး ၼပ်ႉႁူဝ်ပၢၵ်ႇ ၺႃးပိၵ်ႉ ဢိုတ်းယေးငိုၼ်းဝႆႉမိူၼ်ၵၼ် ။ ၾၢႆႇယေးငိုၼ်းတႄႉ မၢပ်ႇၼႄးဝႃႈ မၢႆယေးငိုၼ်းၸိူဝ်းၼႆႉ ပဵၼ်မၢႆယေးငိုၼ်း ဢၼ် ၽိတ်းမၢႆမီႈ ( ၿၼ်ႊသျီႊမႃႉ) ၼႆသေ တိုၼ်းဝႃႈ ဢမ်ႇပၼ်ၸႂ်ႉငိုၼ်းၶဝ်ႈငိုၼ်းဢွၵ်ႇ ဝႃႈၼႆ ။

ၸိူဝ်းၺႃး ပိၵ်ႉဢိုတ်းမၢႆယေးငိုၼ်းတႄႉ ဢွၼ်ၵၼ်ဢွၵ်ႇသဵင်လဵဝ်ၵၼ်ဝႃႈ – “ ၽူႈမီးၸၼ်ႉယေးငိုၼ်း ၵိုင်ႇလီ တတ်း ပႅတ်ႈငိုၼ်းဢၼ်ၶဝ်ႈလူၺ်ႈၽိတ်းမၢႆမီႈၼၼ်ႉၵူၺ်း ဢမ်ႇၶႂ်ႈႁႂ်ႈပိၵ်ႉပႅတ်ႉတင်းမူတ်း ။ တူဝ်ယၢင်ႇမၼ်း ပေႃးဝႃႈ ငိုၼ်းဢၼ်လုၵ်ႉ တီႈၿၼ်ႊသျီႊမႃႉမႃး 2 မိုၼ်ႇဝၢတ်ႇၼႆၵေႃႈ ႁႂ်ႈတတ်းပႅတ်ႈ 2 မိုၼ်ႇၼၼ်ႉၵူၺ်း ။ ယွၼ်ႉဝႃႈ ငိုၼ်း ဢၼ်မီးယူႇၼႂ်းယေးငိုၼ်းၸိူဝ်းၼၼ်ႉ ဢမ်ႇလႆႈၽိတ်းသင်ၸွမ်း ၊ ႁႂ်ႈမီးသုၼ်ႇဢဝ်ၸႂ်ႉဢဝ်ၸၢႆႇၽွင်ႈ ။ ၼႆႉသမ်ႉ ပိၵ်ႉဢိုတ်းပႅတ်ႈတင်းမူတ်းလႄႈ ဢမ်ႇၸၢင်ႈဢဝ်ငိုၼ်းတီႈလႂ်မႃးပၼ်ႇၵၢၼ်။ ၵႂႃႇၵႄႈလိတ်ႈယိုၼ်ႈတၢင်ႇတီႈလုမ်းၵေႃႈ ဢမ်ႇယဝ်ႉဢမ်ႇဝၢႆးလႆႈ ။ ၶၢဝ်းယၢမ်းၵေႃႈသဵင်ႈ ႁိူဝ်ႉတူဝ်ႁိူဝ်ႉၸႂ်ၼႃႇ ” – ဝႃႈၼႆ။

မိူဝ်ႈတေပိၵ်ႉဢိုတ်းယေးငိုၼ်းၼၼ်ႉ တီႈဢေႇသုတ်းႁႂ်ႈၸဝ်ႈၼႃႈတီႈၸႅင်ႈပၼ်ဝႃႈ ပိၵ်ႉယွၼ်ႉသင် ၊ သင်ဝႃႈ ပိၵ်ႉယဝ်ႉၵေႃႈ မိူဝ်ႈၸဝ်ႈၶွင်မၢႆယေးငိုၼ်းၵႂႃႇယိုၼ်ယၼ်တူဝ်ယဝ်ႉၼၼ်ႉ ႁႂ်ႈပိုတ်ႇပၼ်ၶိုၼ်းၼႂ်းၶၢဝ်းတၢင်း24 ၸူဝ်ႈမူင်းလႄႈသင် ၼႂ်းဝူင်ႈၼိုင်ႈလႄႈသင်ၸိူဝ်းၼႆႉ ။ မၢင်ၵေႃႉ ၵႂႃႇယိုၼ်တူဝ်ယဝ်ႉၵေႃႈ ငိုၼ်းၵေႃႈ ဢမ်ႇလႆႈၶိုၼ်း ၊ တိူၵ်ႈတီႈသၢႆႈတႅၼ်းၵႃႈလူႉသုမ်းၼၼ်ႉယဝ်ႉၵေႃႈ ပႆႇလႆႈၶိုၼ်းငိုၼ်းတူဝ်ၵဝ်ႇ။ သမ်ႉပၢႆ တေလႆႈၶိုၼ်ႈလုမ်းတြႃးသေ တေႃႇသူႈဢမူႉၶၻီးထႅင်ႈ – ၼႆ ၵူၼ်းၸိူဝ်းၺႃးပိၵ်ႉယေးငိုၼ်းဢွၼ်ၵၼ်လၢတ်ႈၼင်ႇၼႆ။

ယေးငိုၼ်းၸၢႆးတိတ်ႉ ဢၼ်ၺႃးပိၵ်ႉဢိုတ်းငိုၼ်းၶဝ်ႈငိုၼ်းဢွၵ်ႇၵမ်းသိုဝ်ႈၼႆႉ ပဵၼ် ယေးငိုၼ်း Bangkok Bank ယွၼ်ႉဝႃႈ မီးငိုၼ်းၶဝ်ႈမႃး 2 မိုၼ်ႇၿၢတ်ႇ (ၸဝ်ႈၼႃႈတီႈဝႃႈ ပဵၼ်ၿၼ်ႊသျီႊမႃႉ) ။ ဝၢႆးၺႃးပိၵ်ႉဢိုတ်းယဝ်ႉ မၼ်းၸၢႆးၸင်ႇၵႂႃႇၸႅင်ႈတီႈႁူင်းပလိၵ်ႈထႆး ။ ၸင်ႇႁူႉဝႃႈ မီးၼၢင်းယိင်းၵူၼ်းထႆး ဢႃယု 50 ပၢႆ ၵေႃႉၼိုင်ႈမႃးတၢင်ႇဢဝ်လိူင်ႈဝႆႉလႄႈ ၺႃးပိၵ်ႉ ။ ၼၢင်းယိင်းၵေႃႉဢၼ်မႃးတၢင်ႇဢဝ်လိူင်ႈဝႆႉၼၼ်ႉ လၢတ်ႈဝႃႈ ဝၢႆးဢူၼ်းငိုၼ်းယဝ်ႉ ၸင်ႇႁူႉဝႃႈ မီးၵူၼ်းလွၵ်ႇဢဝ်ငိုၼ်း ။ ၸင်ႇၼၼ်လႄႈ ၼႅတ်ႈၸႅင်ႈၸဝ်ႈၼႃႈတီႈ ႁႂ်ႈ ပိၵ်ႉဢိုတ်းပႅတ်ႈယေးငိုၼ်းဢၼ်ၵဵဝ်ႇၶွင်ႈတင်းမူတ်း – ဝႃႈၼႆ။

ဝၼ်းတီႈ 09/03/2026 ၼႆႉ တႃႇႁႂ်ႈၸဵဝ်းပူၼ်ႉပိူင်ၸိူဝ်းၼႆႉၼႆသေ ၸၢႆးတိတ်ႉ ၵေႃႉဢၼ်ၺႃးပိၵ်ႉဢိုတ်းယေးငိုၼ်းၼႆႉ ၵႂႃႇသၢႆႈတႅၼ်းပၼ်ငိုၼ်းၼၢင်းယိင်းၵူၼ်းထႆးၼၼ်ႉၶိုၼ်းယဝ်ႉသေတႃႉ မၢႆယေးငိုၼ်းၸိူဝ်းဢၼ်ၺႃးပိၵ်ႉဢိုတ်းၼၼ်ႉ ဢမ်ႇပႆႇပိုတ်ႇၸႂ်ႉလႆႈၶိုၼ်း ။

လွင်ႈဝႃႈ ထွၼ်တၢင်းၽိတ်းယဝ်ႉ ၼႆၼၼ်ႉၵေႃႈ ပလိၵ်ႈထႆးဢွၵ်ႇဝႂ်ပၼ်ယဝ်ႉ ။ လိူဝ်ၼၼ်ႉ ဝႂ် ဢၼ်ယွၼ်းထွၼ်တၢင်းၽိတ်းယေးငိုၼ်း ၼၼ်ႉၵေႃႈ ၸဝ်ႈၼႃႈတီႈထႆးဢွၵ်ႇပၼ်။
ဝၢႆးၼၼ်ႉ ၸၢႆးတိတ်ႉ ၸင်ႇဢဝ်ၽိုၼ်လိၵ်ႈၸိူဝ်းၼႆႉ ၵႂႃႇတၢင်ႇယိုၼ်ႈထႅင်ႈတီႈယေးငိုၼ်း ။ ၽူႈမီးပုၼ်ႈၽွၼ်းၼႂ်းယေးငိုၼ်းတႄႉ ႁပ်ႉဢဝ်ဝႂ်ယိုၼ်ယၼ်ၸိူဝ်းၼႆႉယူႇသေတႃႉ ဢမ်ႇႁပ်ႉပၢၵ်ႇပၼ်ဝႃႈ ယေးငိုၼ်းတေပိုတ်ႇဢမ်ႇပိုတ်ႇပၼ်ၶိုၼ်း ။

လွင်ႈၼႆႉ မၼ်းၸၢႆးလၢတ်ႈဝႃႈ – “ ပေႃးၵူၼ်းထႆးၶဝ် ၺႃးပိၵ်ႉဢိုတ်းယေးငိုၼ်းၼၼ်ႉ ၶဝ်ၵႄႈလိတ်ႈပၼ်ၸိူင်ႉႁိုဝ် ဢမ်ႇႁူႉ ။ ပေႃးပဵၼ်ၵူၼ်းဢၼ်ယိပ်းဝႂ်ၽၢတ်ႉသပွတ်ႇၼႆ မိူၼ်ဢမ်ႇပေႃးဝႆႉၼမ်ႉၼၵ်းၵႃႈႁိုဝ်။ တီႈႁူင်းပလိၵ်ႈၵေႃႈ ပၢႆဝႃႈ ၵူၼ်းယိပ်းၽၢတ်ႉသပွတ်ႇၼႆႉ ယၢပ်ႇၼႃႇ ၊ ပေႃးဢမ်ႇတဵမ် 3 ပီတႄႉ ယေးငိုၼ်းၸိူဝ်းၼႆႉ ဢမ်ႇပိုတ်ႇပၼ်ၶိုၼ်းၼႆၵေႃႈဝႃႈ။ ၽိူဝ်ႇၵႂႃႇတီႈယေးငိုၼ်းၵေႃႈဝႃႈ ဢမ်ႇလၢတ်ႈလႆႈဝႃႈ ယေးငိုၼ်း တေၶိုၼ်း ပိုတ်ႇပၼ်ဝၼ်းလႂ် ၊ လူဝ်ႇပႂ်ႉၵႂၢမ်းသင်ႇၸၼ်ႉပႃႈၼိူဝ်ၵွၼ်ႇ ၼႆ ထႅင်ႈ ”- ဝႃႈၼႆ။

ပေႃးတူၺ်းပိူင်ပဵၼ် ၸၢႆးတိတ်ႉၼႆႉၼႆၸိုင် ဢမ်ႇထၢင်ႇဢမ်ႇထိူမ်သင်ၵေႃႈ ယေးငိုၼ်းဢၼ်ၸဝ်ႈၵဝ်ႇ ၸႂ်ႉယူႇၵူႈဝၼ်းၼၼ်ႉ ပဵၼ်ၽေးတေႃႇတူဝ်ၵဝ်ႇၶိုၼ်း ။ ယွၼ်ႉဝႃႈ ငိုၼ်းဢၼ် ႁိူဝ်ႇလႆၶႆးယွႆႉသေႁႃလႆႈမႃးၼၼ်ႉ ၶမ်ယူႇၼႂ်းယေးငိုၼ်းၼၼ်ႉမူတ်း။ ဢမ်ႇႁူႉဝႃႈ တေလႆႈၶိုၼ်းမိူဝ်ႈလႂ် ။

ၼွၵ်ႈလိူဝ်ၼၼ်ႉ ဢၼ်ၵိုင်ႇလီၾၢင်ႉၵေႃႈ ႁဝ်းယိပ်းမၢႆယေးငိုၼ်းဢၼ်လႂ်ၵေႃႈယဝ်ႉ ဢမ်ႇဝႃႈ ၼႂ်းမိူင်းထႆးမိူင်းမၢၼ်ႈလႄႈ တၢင်ႇၸိုင်ႈမိူင်းၵေႃႈလီ ႁႂ်ႈပၵ်းႁူပၵ်းတႃ ထွမ်ႇတူၺ်းၶေႃႈမုလ်းၶၢဝ်ႇသၢၼ်ၵဵဝ်ႇၵပ်းလွင်ႈယေးငိုၼ်းယူႇသေႇသေႇ ။ မီးလွင်ႈသင်ၵေႃႈ တေၸၢင်ႈႁႄႉၵင်ႈလူင်ႈၼႃႈ ။

ဢၼ်ၵမ်ႈၼမ် ၺႃးပိၵ်ႉဢိုတ်းယေးငိုၼ်းၼႆႉ ပဵၼ်ယွၼ်ႉ ၿၼ်ႊသျီႊမႃႉ ( บัญชีม้า ) ပွင်ႇဝႃႈ မၢႆယေးငိုၼ်းမႃႉ လၢတ်ႈငၢႆႈငၢႆႈၵေႃႈ ပဵၼ်မၢႆယေးငိုၼ်းဢၼ်ၵွင်ႉၸွမ်းၵူၼ်းလွၵ်ႇၵိၼ်ငိုၼ်း ။ မၢႆယေးငိုၼ်း ဢၼ်ၽိတ်းမၢႆမီႈတင်းမူတ်းၼႆႉ ၶဝ်ႈၼႂ်းသဵၼ်ႈမၢႆ ၿၼ်ႊသျီႊမႃႉ။ ပႃးၸဵမ် ပပ်ႉယေးငိုၼ်းဢၼ်ၵိၼ်ၸၢင်ႈပိုတ်ႇပၼ်ပိူၼ်ႈၸႂ်ႉ – ပပ်ႉယေးငိုၼ်း ဢၼ်ပဵၼ်ၸိုဝ်ႈၸဝ်ႈၵဝ်ႇယူႇသေတႃႉ ဢမ်ႇၸႂ်ႈတူဝ်ၸဝ်ႈၵဝ်ႇၸႂ်ႉ – ပပ်ႉယေးငိုၼ်းၸႂ်ႉတႃႇၵၢၼ်ၵႃႉၶၢႆၽိတ်းမၢႆမီႈ – ပပ်ႉယေးငိုၼ်းဢၼ်ဢူၼ်းၶဝ်ႈဢူၼ်းဢွၵ်ႇၼမ်(လူၺ်ႈဢမ်ႇလႆႈယိုၼ်ႈတၢင်ႇမၢႆၾၢင်ဝႆႉၼႂ်းၵၢၼ်ၵႃႉၶၢႆ) ၸဵမ်ၸိူဝ်းၼႆႉၶဝ်ႈၼႂ်း ၿၼ်ႊသျီႊမႃႉ မူတ်း။ ဢၼ်ၼိူင်းၵၼ်တင်းမႃႉၼႆႉ ၸဝ်ႈၼႃႈတီႈထႆး သပ်းၸႅင်ႈဝႆႉဝႃႈ မႃႉၼႆႉ ပဵၼ်သတ်းသႅၼ်းဢၼ်ၽႂ်းၶၼ် ၊ ဢႅၼ်ႇလႅၼ်ႈၽႂ်း ၸဵဝ်းထိုင်တီႈထိုင်လႅၼ်လႄႈ ၸင်ႇဢဝ် တႅၵ်ႈၵၼ်တင်းမႃႉသေလၢတ်ႈ ၼႆယဝ်ႉ။

ၿၼ်ႊသျီႊမႃႉ ( บัญชีม้า ) ၼႆႉ ၵမ်ႈၼမ် ငိုၼ်းၶဝ်ႈၽႂ်းဢွၵ်ႇၽႂ်း ၊ ဢူၼ်းၶဝ်ႈယဝ်ႉၼႅတ်ႈဢူၼ်းဢွၵ်ႇၶိုၼ်းၵမ်းလဵဝ် ဢမ်ႇၼၼ်ၵေႃႈ ထွၼ်ငိုၼ်းဢွၵ်ႇၵမ်းလဵဝ် ။ တႃႇႁႂ်ႈၽူႈမီးပုၼ်ႈၽွၼ်းၶဝ် တီႉၺွပ်းလႆႈ ၸဝ်ႈၶွင်ငိုၼ်းၼၼ်ႉၵမ်းသိုဝ်ႈၼၼ်ႉဢမ်ႇငၢႆႈ။ ၸင်ႇၼၼ်ႁွင်ႉဝႃႈ ၿၼ်ႊသျီႊမႃႉ – ဝႃႈၼႆ။
ၿၼ်ႊသျီႊမႃႉၼႆႉ ႁွင်ႈၵၢၼ်ၾၢႆႇၽဵဝ်ႈမူၺ်ႉၵၢၼ်လၢင်ႉငိုၼ်း မိူင်းထႆး สำนักงานป้องกันและปราบปรามการฟอกเงิน (Anti-Money Laundering Office ၸႅၵ်ႇဝႆႉ 5 သီ ။ မႃႉ သီလမ် ၊ မႃႉ သီမူၼ်ႇၵႄႇ ၊ မႃႉ သီမူၼ်ႇၼုမ်ႇ ၊ မႃႉ သီၶွၼ်ႇၵႄႇ ၊ မႃႉ သီၶွၼ်ႇၼုမ်ႇ ၼႆၸိူဝ်းၼႆႉ ။

မၢႆယေးငိုၼ်း မႃႉသီလမ်ၼၼ်ႉ လႆႈဝႃႈ မီးတၢင်းၽိတ်းသုင် ၊ ပဵၼ်မၢႆယေးငိုၼ်းဢၼ်ၸႂ်ႉၼႂ်းၵၢၼ်လွၵ်ႇလႅၼ်ၵမ်းသိုဝ်ႈ ။ မႃႉ သီမူၼ်ႇၵႄႇ သမ်ႉ ပွင်ႇဝႃႈ မီးၵူၼ်းလူႉသုမ်းၸွမ်းဝႆႉယဝ်ႉ ၊ မီးၵူၼ်းမႃးတၢင်ႇဢဝ်လိူင်ႈဝႆႉယဝ်ႉ။
မႃႉ သီမူၼ်ႇၼုမ်ႇ သမ်ႉ ပွင်ႇဝႃႈ မီးၵူၼ်းလူႉသုမ်းငိုၼ်းၸွမ်းယဝ်ႉ ၵူၺ်းပႆႇလႆႈၸႅင်ႈၸဝ်ႈၼႃႈတီႈ ၊ ပႆႇလႆႈယိုၼ်ႈဢဝ်တၢင်းၽိတ်း တိုၵ်ႉယူႇၼႂ်းငဝ်းလၢႆးဢၼ်ၸဝ်ႈၼႃႈတီႈထတ်းထွင် ။

မႃႉသီၶွၼ်ႇၵႄႇ သမ်ႉ ပွင်ႇဝႃႈ ႁၼ်လွင်ႈလၢၵ်ႇလၢႆးမၢႆယေးငိုၼ်းယဝ်ႉ ၊ ႁၼ်ငိုၼ်းၶဝ်ႈငိုၼ်းဢွၵ်ႇၼမ်လိူဝ်သေ ဢၼ်တတ်းမၵ်းဝႆႉယဝ်ႉ ။ၵူၺ်းၵႃႈ ပႆႇလႆႈလူင်းမိုဝ်းထတ်းထွင်ဢဝ်လိူင်ႈ ၊ ပႆႇမီးၵူၼ်းယိုၼ်ႈဢဝ်လိူင်ႈ ။ ၵူၺ်းၵႃႈ ၸၢင်ႈၺႃး ၸဝ်ႈၼႃႈတီႈ ပိၵ်ႉဢိုတ်းငိုၼ်းၶဝ်ႈငိုၼ်းဢွၵ်ႇၸူဝ်ႈၶၢဝ်းယူႇ။
မႃႉသီၶွၼ်ႇၼုမ်ႇ သမ်ႉ ပဵၼ်မၢႆၿၼ်ႊသျီႊ ဢၼ်ၸဝ်ႈၼႃႈတီႈၾၢႆႇၵဵဝ်ႇၶွင်ႈယေးငိုၼ်း ပၵ်းတႃပႂ်ႉတူၺ်းဝႆႉယဝ်ႉ ၊ ထၢင်ႇထိူမ်ငမ်းငဝ်းဝႃႈ ပဵၼ်မၢႆယေးငိုၼ်းဢၼ်ၽိတ်းပၵ်းပိူင် ၵူၺ်းၵႃႈ ပႆႇယိုၼ်ယၼ်လႆႈ။

သင်ဝႃႈ ၼႂ်းမိုဝ်းၽႂ် မီးဝႆႉ မၢႆယေးငိုၼ်းဢၼ်လၢတ်ႈမႃး ၸိူဝ်းၼႆႉၸိုင် ၸၢင်ႈၺႃး ၸဝ်ႈၼႃႈတီႈၾၢႆႇၵဵဝ်ႇၶွင်ႈ တတ်း ယိုတ်း ပိၵ်ႉ ဢိုတ်းဝႆႉ ယေးငိုၼ်းၸူဝ်ႈၶၢဝ်း ႁိုဝ် ဢမ်ႇတတ်းမၵ်းၶၢဝ်းယၢမ်းဝႆႉ ။ သင်ဝႃႈ ပဵၼ်မႃႉသီလမ်လႄႈသီမူၼ်ႇၵႄႇတႄႉ ၸၢင်ႈၺႃး တီႉၺွပ်း ဢဝ်လိူင်ႈဝႆႉၵမ်းလဵဝ်သေ သင်ပဵၼ်တၢင်ႇသီ တေၺႃးႁွင်ႉထၢမ်တွပ်ႇထတ်းထွင်လၢႆးယွႆႈသပ်းသေး ။

ၸင်ႇၼၼ် ၵွၼ်ႇၸဝ်ႈၼႃႈတီႈ ပႆႇၵူတ်ႇထတ်းထဵတ်ႈထၢမ်ၼၼ်ႉ ႁႂ်ႈဢွၼ်ၵၼ် ထတ်းထွင်တူၺ်း ယေးငိုၼ်းၸဝ်ႈၵဝ်ႇလီလီငၢမ်းငၢမ်း ။ သင်ဝႃႈ မီးလွင်ႈငမ်းငဝ်းထၢင်ႇထိူမ် မီးလွင်ႈပႅၵ်ႇလၢၵ်ႇၶဝ်ႈမႃးၼႂ်းမၢႆယေးငိုၼ်းၸဝ်ႈၵဝ်ႇၸိုင် ၼႅတ်ႈၵႂႃႇၸႅင်ႈယေးငိုၼ်းႁင်းၵူၺ်း ။ၸင်ႇႁႄႉၵင်ႈလႆႈၵမ်းသိုဝ်ႈ။
သင်ဝႃႈ မီးငိုၼ်းဢူၼ်းၶဝ်ႈမႃးၼႂ်းမၢႆယေးငိုၼ်းၸဝ်ႈၵဝ်ႇ ဢမ်ႇဝႃႈ ယေးငိုၼ်း ၶၼ်ငိုၼ်းၵႃႈႁိုဝ်ၵေႃႈယဝ်ႉ ယႃႇၼႅတ်ႈၸူမ်းသေ ႁပ်ႉဢဝ် ။ ငိုၼ်းဢမ်ႇႁူႉငဝ်ႈႁူႉႁၢၵ်ႈသေ ၶဝ်ႈမႃးၼႂ်းယေးငိုၼ်းၸဝ်ႈၵဝ်ႇ ၸၢင်ႈႁဵတ်းႁႂ်ႈ တုမ်ႉတိူဝ်ႉ ငိုၼ်းၶဝ်ႈငိုၼ်းဢွၵ်ႇၸဝ်ႈၵဝ်ႇတင်းပိုၵ်း ၸၢင်ႈတုၵ်ႉယၢပ်ႇၸွမ်းၼႆၼၼ်ႉ ယႃႇလူင်လိုမ်းလႃးလႃး -ၼႆ ၸၢႆးတိတ်ႉ ဢၼ်ၺႃးပိၵ်ႉယေးငိုၼ်းၼႆႉ လၢတ်ႈသင်ႇပၼ်ၾၢင်ႉဝႆႉၼင်ႇၼႆ။