မိူဝ်ႈဝၼ်းတီႈ 19/5/2026 “ယေးငိုၼ်းငဝ်ႈၸိုင်ႈ မိူင်းႁူမ်ႈတုမ်” တႂ်ႈသိုၵ်းမၢၼ်ႈ ပိုၼ်ၽၢဝ်ႇဢွၵ်ႇမႃး ပဵၼ်တၢင်းၵၢၼ်ဝႃႈ ယေးငိုၼ်းၸိူဝ်းဢမ်ႇတၢင်ႇမၢႆၾၢင်ဝႆႉပဵၼ်တၢင်းၵၢၼ် ၼၼ်ႉ ဢမ်ႇၶဝ်ႈၸွမ်း ပၵ်းပိူင်ၾိင်ႈမိူင်း လႄႈ ယႃႇၵပ်းသိုပ်ႇၶဝ်ႈႁႃ ၸႂ်ႉတိုဝ်းလႃးလႃး ဝႃႈၼႆ။

ၼႂ်းလိူၼ်မေႊၼႆႉ မီးၶၢဝ်ႇဢွၵ်ႇမႃးဝႃႈ တီႈဝဵင်းၼမ်ႉၶမ်း တေပိုတ်ႇယေးငိုၼ်း Digital Bank ဢၼ်တင်ႈၸိုဝ်ႈဝႆႉဝႃႈ The Mountain Bank (TMB) ၵႂႃႇပိုတ်ႇ ၼႂ်းၼႃႈတီႈၸုမ်းသိုၵ်းတဢၢင်း (TNLA) ၼႆသေ ပိုၼ်ၽၢဝ်ႇႁူၺ်းႁွင်ႉၵူၼ်းႁဵတ်းၵၢၼ်ဝႆႉယူႇ။

ၾၢႆႇယေးငိုၼ်းငဝ်ႈၸိုင်ႈ တႂ်ႈဢႃႇၼႃႇ သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇဝႆႉဝႃႈ “ယေးငိုၼ်း ၸိူဝ်းႁဵတ်း လၢႆး တၢင်း Digital Bank ဢၼ်ႁၢင်ႈႁႅၼ်းတေပိုတ်ႇၼႂ်းပိုၼ်ႉတီႈၼႆသေ ပိုၼ်ၽၢဝ်ႇဝႆႉယူႇၼႂ်း သိုဝ်ႇတူင်ႇ ဝူင်းၵူၼ်း Social Media ၼၼ်ႉ ဢမ်ႇတၢင်ႇမၢႆၾၢင်ဝႆႉ ပဵၼ်တၢင်းၵၢၼ်။ ၸွမ်းၼင်ႇပၵ်းပိူင်ၾိင်ႈမိူင်း ၵဵဝ်ႇၵပ်း ၵၢၼ်ယေး ငိုၼ်း မတ်ႉတႃ 158 ၼၼ်ႉသေ လွင်ႈၼႆႉ ၸၢင်ႈၺႃးဢဝ်လိူင်ႈ လူၺ်ႈမတ်ႉတႃ 171 ၵႂႃႇ။ ၼင်ႇႁိုဝ် ၵူၼ်းမိူင်း တေဢမ်ႇလႆႈသုမ်းငိုၼ်းတွင်းၼၼ်ႉ ၶႂ်ႈပၼ်ၾၢင်ႉဝႃႈ ယႃႇၵႂႃႇၵပ်းသိုပ်ႇၶဝ်ႈႁႃ ၸႂ်ႉယေး ငိုၼ်းၸိူဝ်းၼၼ်ႉ” ဝႃႈၼႆ။

သိုၵ်းမၢၼ်ႈပိုၼ်ၽၢဝ်ႇဝႃႈ ၼႂ်းမိူင်းမၢၼ်ႈၼႆႉ ယေးငိုၼ်း (ပၢၼ်ႇ) ၸိူဝ်းတၢင်ႇမၢႆၾၢင်ဝႆႉပဵၼ်တၢင်းၵၢၼ် မီး 4 ဢၼ်၊ ယေးငိုၼ်းသုၼ်ႇလဵဝ် မီး 27 ဢၼ်၊ ယေးငိုၼ်းၽႄၼွၵ်ႈမိူင်းမီး 16 ဢၼ်လႄႈ ၸုမ်းလူင်းပိုၼ်ႉတီႈၸွႆႈလွင်ႈၵၢၼ်ငိုၼ်းတွင်း (မိုဘိုင်းလ် ငွေကြေး ဝန်ဆောင်မှု) မီး 5 ဢၼ်ၵူၺ်း။ ၵွပ်ႈၼႆလႄႈၼွၵ်ႈလိူဝ်ဢၼ်လၢတ်ႈမႃးၸိူဝ်းၼႆႉ ပဵၼ်ယေးငိုၼ်း ဢၼ်ဢမ်ႇလႆႈတၢင်ႇမၢႆၾၢင်ဝႆႉပဵၼ်တၢင်းၵၢၼ်သေဢၼ် ဝႃႈၼႆ။

ယေးငိုၼ်း The Mountain Bank (TMB) ဢၼ်ႁၢင်ႈႁႅၼ်း တေပိုတ်ႇမႂ်ႇတီႈၼႂ်းဝဵင်းၼမ်ႉၶမ်းၼႆႉ ငဝ်ႈတိုၼ်းပိုတ်ႇဝႆႉၼႂ်းၼႃႈတီႈၸုမ်းသိုၵ်းဝႃႉၵုမ်းၵမ် ဝဵင်းပၢင်သၢင်းသေ ႁဵတ်း ၵၢၼ်ႁပ်ႉသူင်ႇငိုၼ်းဝႆႉယူႇ – ၼႆ ၵူၼ်းမိူင်းဝဵင်းၼမ်ႉၶမ်းလၢတ်ႈၼင်ႇၼႆ။

လႆႈႁူႉဝႃႈ ၾၢႆႇၸုမ်းသိုၵ်းတဢၢင်းၶဝ် ပၼ်သုၼ်ႇလႆႈ ႁႂ်ႈယေးငိုၼ်း The Mountain Bank (TMB) ပိုတ်ႇပႃး ၼႂ်းၸႄႈဝဵင်းၼမ်ႉတူႈ ၊ ဝဵင်းၼမ်ႉသၼ်ႇ ၸိူဝ်းၼႆႉထႅင်ႈၼႆ လႆႈႁၼ် ပိုၼ်ၽၢဝ်ႇ ႁႃၵူၼ်းႁဵတ်းၵၢၼ်ဝႆႉ ၼႂ်းသိုဝ်ႇတူင်ႇဝူင်းၵူၼ်း (Social Media) ၼင်ႇၼႆ။

ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 မႃး ၸွမ်းပိုၼ်ႉတီႈ ၸုမ်းသိုၵ်းၸၢဝ်းၶိူဝ်းၵုမ်းၵမ် ၼႂ်းမိူင်းတႆးပွတ်းႁွင်ႇ မိူၼ်ၼင်ႇ ၸႄႈဝဵင်းသႅၼ်ဝီ၊ ၸႄႈဝဵင်းၵူတ်ႉၶၢႆ၊ ၸႄႈဝဵင်းၼမ်ႉၶမ်း ၸိူဝ်းၼႆႉ ယေးငိုၼ်းၸိူဝ်းတၢင်ႇမၢႆၾၢင် တီႈယေးငိုၼ်းငဝ်ႈၸိုင်ႈ မိူင်းႁူမ်ႈတုမ်ဝႆႉပဵၼ်တၢင်းၵၢၼ်ၼၼ်ႉ လႆႈၵိုတ်းယင်ႉၵၢၼ်ငၢၼ်းၵႂႃႇ ။ ၵူၼ်းမိူင်းပိုၼ်ႉတီႈ ယၢပ်ႇၽိုတ်ႇ ၵၢၼ် ဢူၼ်းငိုၼ်း လႄႈ ၵၢၼ်ထွၼ်ငိုၼ်း ။