ၵူၼ်းၸၢႆးသွင်ၵေႃႉ ပႃးၵွင်ႈပွတ်း လႄႈ ၽႃႉလႅဝ်းၼိုင်ႈမၢၵ်ႈသေ ၶဝ်ႈၸူၼ်ဢဝ်ငိုၼ်း တီႈယေးငိုၼ်း KBZ ၵိင်ႇၽႄ တိူင်းဝဵင်းလိူဝ်ႇ (မၢၼ်းတလေး) မၢႆ 42 (စက်မှုပန်းခြံဘဏ်ခွဲ) ဢၼ်မီးၼႂ်းၵႄႈသဵၼ်ႈတၢင်း 133 တင်း 134 ၊ သဵၼ်ႈတၢင်းလူင် 78 ၸႄႈဝဵင်းပျီႇၵျီးတၶုၼ်ႇ တိူင်းမၢၼ်း တလေး လႆႈငိုၼ်းမၢၼ်ႈၵႂႃႇ 2300 သႅၼ်ပျႃးပၢႆ ဝႃႈၼႆ။
ၵူၼ်းၸမ်ၸႂ်ၵၼ်တင်း ၸုမ်းပလိၵ်ႈ တီႈဝဵင်းလိူဝ်ႇလၢတ်ႈဝႃႈ “ၺႃးၸူၼ်ၵႂႃႇ မိူဝ်ႈဝႃးဝၢႆးဝၼ်း မွၵ်ႈ 3 မူင်းပၢႆၼၼ်ႉ။ တႃႇၵေႃႉၼိုင်ႈပႃးၵွင်ႈပွတ်းၼိုင်ႈလဝ်း၊ ထႅင်ႈၵေႃႉၼိုင်ႈသမ်ႉပႃးၽႃႉလႅဝ်းႁႄ ၶီႇရူတ်ႉၶိူင်ႈမႃးၸွမ်းၵၼ်။ တိုဝ်းမၢၵ်ႇႁူဝ်ရူတ်ႉၶိူင်ႈသီလမ် ၼုင်ႈသိူဝ်ႈၶႅၼ်ႁၢဝ်းႁႄ ၶဝ်ႈၵႂႃႇၼႂ်း ပၢၼ်ႇ ၵႂႃႇယွင်ႈဢဝ် ထူင်လူင် (သႃႇလႃႇဢဵၵ်ႉ) ဢၼ်သႂ်ႇငိုၼ်းဝႆႉၼၼ်ႉၵႂႃႇ 2 ထူင်” ဝႃႈၼႆ။
လႆႈႁူႉဝႃႈ ၵူၼ်းၸၢႆးသွင်ၵေႃႉ ဢၼ်ၶဝ်ႈၵႂႃႇၸူၼ်ဢဝ်ငိုၼ်းၼႂ်းယေးငိုၼ်းၼၼ်ႉ ႁေႃႈရူတ်ႉၶိူင်ႈပၢႆႈၵႂႃႇၼိူဝ်သဵၼ်ႈတၢင်းလူင် တႃႈၵုင်ႈ-ဝဵင်းလိူဝ်ႇ သဵၼ်ႈဢၼ်ၵဝ်ႇၼၼ်ႉသေ မုင်ႈ ၼႃႈၵႂႃႇၾၢႆႇတၢင်းႁွင်ႇ ၼႆယဝ်ႉ။
တီႈၼႂ်းယေးငိုၼ်း KBZ ဢၼ်ၺႃးၸူၼ်ငိုၼ်းၵႂႃႇၼၼ်ႉ မီးၵူၼ်းပႂ်ႉဢဝ်ႁူမ်ႇလူမ်ႈ 5 ၵေႃႉ၊ ၽူႈႁၢပ်ႇၵၢၼ် 38 ၵေႃႉ လွတ်ႈၽေးၵူႈၵေႃႉယူႇၼႆယဝ်ႉ။
ဝၢႆးလင်သိုၵ်းမၢၼ်ႈယိုတ်းမိူင်း ၶၢဝ်းတၢင်း 5 ပီၼႆႉ ယေးငိုၼ်းၵိင်ႇၽႄ မၢႆ 42 တီႈဝဵင်းလိူဝ်ႇ ၺႃးၵူၼ်းၶဝ်ႈၸူၼ်ဢဝ်ငိုၼ်းၵႂႃႇ သွင်ပွၵ်ႈ။ မိူဝ်ႈပူၼ်ႉမႃး ဝၼ်းတီႈ 15 လိူၼ်ၵျူႊလၢႆႊ ပီ 2022 ၼၼ်ႉပွၵ်ႈၵမ်းႁႅၵ်ႈ လူႉသုမ်းငိုၼ်းၵႂႃႇမွၵ်ႈ 1800 သႅၼ်ပျႃး ၵူၺ်းဢမ်ႇၵႃး ၽူႈႁၢပ်ႇၵၢၼ်ၵေႃႈ ၺႃးမၢတ်ႇၸဵပ်းၵႂႃႇၸွမ်းထႅင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ