မိူဝ်ႈၼႆႉဝၼ်းတီႈ 28/4/2026 ယၢမ်းၵၢင်ၼႂ် ပျီႇတူႉၸိတ်ႉ PNO ၸတ်းပၢင်မွပ်ႈႁၢႆးသိုၵ်းပၼ်ၶိုၼ်း တီႈငဝ်ႈၸုမ်းဢၼ်ၵဵဝ်ႇၶွင်ႈ။
ပၢင်မွပ်ႈႁၢႆးသိုၵ်းပၼ်ၶိုၼ်းငဝ်းၸုမ်းၼႆႉ ၸတ်းႁဵတ်းတီႈ လုမ်းငဝ်ႈငုၼ်းၾၢႆႇၽွင်းငမ်း ၸၢဝ်းပဢူဝ်း ( ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးရုံး) ၼႂ်းဝဵင်းႁူဝ်ပူင်း ၸိုင်ႈတႆး ပွတ်းၸၢၼ်း ။ PNO လႆႈဢဝ် ႁၢႆးသိုၵ်းၶွင် ၸုမ်းသိုၵ်း ပဢူဝ်း PNLA တႃႇ 61 ၵေႃႉ မွပ်ႈပၼ်ၶိုၼ်းငဝ်ႈၸုမ်း ဝႃႈၼႆ။
ၽူႈမီးပုၼ်ႈၽွၼ်း ပျီႇတူႉၸိတ်ႉပဢူဝ်း PNO လၢတ်ႈတီႈၽူႈတွႆႇႁွၵ်ႈဝႃႈ – ၼႂ်းဝၼ်းတီႈ 25/04/2026 ယၢမ်းႁူဝ်ၶမ်ႈ ၵူၼ်းသိုၵ်းတႂ်ႈ တပ်ႉၵွင် 359 ဢၼ် ၶုၼ်ႇတၢၼ်ႇ ဢွၼ်ႁူဝ်ဝႆႉၼၼ်ႉ မႃးဝၢင်းၶိူင်ႈတီႈသိုၵ်းမၢၼ်ႈလႄႈပျီႇတူႉၸိတ်ႉ PNO တီႈထုင်ႉပၢင်မၢၵ်ႇ ဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း ။ ၸိူဝ်းၶဝ်မႃးဝၢင်းၶိူင်ႈ 61 ၵေႃႉ။
ထိုင်မႃးၼႂ်း ဝၼ်းတီႈ 26/4/2026 ယၢမ်းႁူဝ်ၶမ်ႈ 5 မူင်း သိုၵ်းမၢၼ်ႈႁူမ်ႈပျီႇတူႉၸိတ်ႉ PNO လႄႈ တပ်ႉသိုၵ်းPNLA ပဵၼ်ပၢင်တိုၵ်းၵၼ် တီႈဝၢၼ်ႈယေႇသပျေႇ ၾၢႆႇၸၢၼ်းဝၢၼ်ႈပၢင်မၢၵ်ႇ ။ ပၢင်တိုၵ်းႁိုင် ၶိုင်ႈၸူဝ်ႈမူင်းဝႃႈၼႆ ။
ၽူႈမီးပုၼ်ႈၽွၼ်းၼႂ်းၸုမ်းပျီႇတူႉၸိတ်ႉလၢတ်ႈၽူႈတွႆႇႁွၵ်ႈဝႃႈ -“ဝၢႆးၶဝ်ဝၢင်းၶိူင်ႈယဝ်ႉထႅင်ႈဝၼ်းၸင်ႇပဵၼ်ပၢင်တိုၵ်းၵၼ် ၊ ဢၼ်ဝၢင်းၶိူင်ႈမိူဝ်ႈလဵဝ်ၼႆႉ ႁူဝ်ၼႃႈၶဝ် ၶုၼ်ႇတၢၼ်ႇတႄႉဢမ်ႇပႃး ၊ ပဵၼ်ၽူႈၼမ်းၼႂ်းမၼ်း ၶုၼ်ႇၼႄႇလိၼ်းဢွၼ်မႃး ၊ မိူဝ်ႈၼႆႉ ယူႇတီႈ PNO ႁဝ်းၶႃႈ ၶိုၼ်းႁွင်ႉဢဝ်ပေႃႈမႄႈၵူၼ်းႁိူၼ်းႁၢႆးသိုၵ်းၸိူဝ်းၼၼ်ႉမႃးတီႈဝဵင်း ႁူဝ်ပူင်းသေ ၸႂ်ႉမႃးလူင်းလၢႆးမိုဝ်းႁပ်ႉဢဝ်လုၵ်ႈလၢင်းၶဝ်မိူဝ်းၶိုၼ်းယဝ်ႉ ”- ဝႃႈၼႆ ။
လုၵ်ႈၸုမ်း PNLA တပ်ႉၵွင် 359 ဢၼ်မႃးဝၢင်းၶိူင်ႈ ႁၢႆးတူဝ်တီႈၸုမ်း PNO ၼၼ်ႉ- ဝၢင်းပႃး ၵွင်ႈပွတ်း 27 လဝ်း၊ ၵွင်ႈယၢဝ်း 3 လဝ်းဢိၵ်ႇမၢၵ်ႇၵွင်ႈပႃးၽွင်ႈ ။ ၸိူဝ်းၶဝ်လၢတ်ႈဝႃႈ – ပဵၼ်ယွၼ်ႉ ၶဝ်ႈၼမ်ႉတၢင်းၵိၼ် ဢမ်ႇၵုမ်ႇထူမ်ႈလႄႈ ၸင်ႇလႆႈ မႃးဝၢင်းၶိူင်ႈ ဝႃႈၼႆ။
“တၢင်းၵိၼ်တၢင်းယမ်ႉတွၼ်ႈတႃႇၵူၼ်းသိုၵ်းဢမ်ႇၵုမ်ႇထူၼ်ႈ၊ ယူႇၼႂ်းထိူၼ်ႇၵေႃႈယၢပ်ႇၵိၼ်းၶၢၼ်ၸႂ် ၵွပ်ႈၼႆ ၶဝ်ၸင်ႇမႃးဝၢင်းၶိူင်ႈဢေႃႈ။ ပေႃးဝၢင်းၶိူင်ႈၼႆႉ လႆႈမိူဝ်းယူႇၶိုၼ်းႁိူၼ်းပေႃႈမႄႈၼၼ်ႉၶႃႈၼႃႇ။ တီႈတၢင်းထုင်ႉပၢင်မၢၵ်ႇၼႆႉတႄႉ ၸုမ်း PNO ႁဝ်း ၵုမ်းၵမ်ဝႆႉဢေႃႈ။ ပဵၼ်ၼႃႈတီႈႁဝ်းၸဵမ်လႂ်ယဝ်ႉ ၊ ၵူၼ်းပၢႆႈၽေးသိုၵ်းၵေႃႈ ဢမ်ႇမီးယဝ်ႉၶႃႈ ၊ ပၢင်တိုၵ်းၵေႃႈယဵၼ်ဝႆႉဢေႃႈမိူဝ်ႈလဵဝ် ”- ဝႃႈၼႆ ။
ၵဵဝ်ၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူး ၽူႈၶၢၼ်ပၢၵ်ႇ PNLA ယူႇသေတႃႉ ၵပ်းသိုပ်ႇဢမ်ႇပႆႇလႆႈ။
ၶုၼ်တၢၼ်ႇ(ၸၢတ်ႉလၢႆႉ) ၼႆႉ မိူဝ်ႈဢွၼ်တၢင်း ယၢမ်းႁူမ်ႈၵၼ်တၢင်း ပျီႇၸူႉၸိတ်ႉပဢူဝ်း PNO သေ ၶဝ်ႈႁူမ်ႈၼႂ်းပၢင်တိုၵ်းတၢင်း ထုင်ႉသွင်းပျွင်း ၼႂ်းၸႄႈဝဵင်းပၢင်လွင်း ၊ ဝၢႆးၼၼ်ႉ ယွၼ်ႉတၢင်းႁၼ်ထိုင်ဢမ်ႇမိူၼ်ၵၼ်လႄႈ ၶဝ်ႈၵႂႃႇႁူမ်ႈမိုဝ်းၸွမ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA ။
တႄႇဝၼ်းတီႈ 1 လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း PNO လုၵ်ႉတီႈဢိူင်ႇႁူဝ်ၼမ်ႉသေ ထူဝ်းသိုၵ်းလတ်းထိူၼ်ႇ မုင်ႈၼႃႈၸူး ငဝ်ႈငုၼ်း တပ်ႉသိုၵ်း PNLA တၢင်းဝၢၼ်ႈပၢင်မၢၵ်ႇ ဢိူင်ႇၵိူၼ်ႇတူလူင် သေ သွင်ၾၢႆႇပဵၼ်ပၢင်တိုၵ်းၵၼ် ႁၢဝ်ႈႁႅင်း ႁိုင်ၶၢဝ်းတၢင်းလိူၼ်ပၢႆယဝ်ႉ မိူဝ်ႈဝႃး ဝၼ်းတီႈ 17/ 2 / 2026 ပျီႇတူႉၸိတ်ႉPNO ယိုတ်းၵုမ်းလႆႈၶိုၼ်း ဝၢၼ်ႈပၢင်မၢၵ်ႇ ၼႆ PNO ပိုၼ်ၽၢဝ်ႇဝႆႉ ၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ