တႃႇဢဝ်လွင်ႈႁူမ်ႇလူမ်ႈ ၼႂ်းဝၢၼ်ႈၼႆသေ တႄႇၵၢင်လိူၼ် မေႊၼႆႉမႃး သိုၵ်းမၢၼ်ႈႁူမ်ႈ ပျီႇတူႉ ၸိတ်ႉ PNO ထႅမ်ႁႅင်းသိုၵ်းၶဝ်ၼႂ်းဝၢၼ်ႈၼမ်ႉၼဵင်ႈ ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ၸႂ်ႉၵူၼ်းပိုၼ်ႉတီႈသူင်ႇပၼ်ႁေႃႇၶဝ်ႈႁေႃႇၽၵ်း ၼိုင်ႈဝၼ်းသၢမ်တႃႇ ။
လိူဝ်သေၵူၼ်းပိုၼ်ႉတီႈ လႆႈသူင်ႇႁေႃႇၶဝ်ႈႁေႃႇၽၵ်းၼိုင်ႈဝၼ်းသၢမ်တႃႇယဝ်ႉ ၸႂ်ႉၵူၼ်းၸၢႆးၼုမ်ႇ ဢၼ်မီးၼႂ်းဝၢၼ်ႈပၼ်ႇပုတ်ႈၵၼ် ဢဝ်ႁူမ်ႇလူမ်ႈၼႂ်းဝၢၼ်ႈပႃးထႅင်ႈ ဝႃႈၼႆ ။
ၵူၼ်းဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ ၵူၼ်းဝၢၼ်ႈလႆႈသူင်ႇႁေႃႇၶဝ်ႈႁေႃႇၽၵ်း ၊ လႆႈႁုင် ၶဝ်ႈလဵင်ႉ ၼိုင်ႈဝၼ်းသၢမ်တႃႇသေဢမ်ႇၵႃး လႆႈဢဝ်ႁူမ်ႇလူမ်ႈပၼ်ၶဝ်ထႅင်ႈ ၊ ၶဝ်လၢတ်ႈတႄႉ ၶဝ်မႃးဢဝ်ႁူမ်ႇလူမ်ႈပၼ်ၼႆ ၵူၺ်းၶဝ်ယူႇၼႂ်းႁိူၼ်းသေ ၶဝ်ပႂ်ႉလၢႆလၢႆၸိူင်ႉၼၼ်ႉၵူၺ်း ၊ ယိပ်းၵွင်ႈသေ ဢမ်ႇၵႂႃႇပႂ်ႉယၢမ်း ၊ ၵူၼ်းဝၢၼ်ႈဢမ်ႇမီးၵွင်ႈၼႆႉ လႆႈၵႂႃႇပႂ်ႉဢဝ်ႁူမ်ႇလူမ်ႈ ပၼ်ၶဝ်ၶိုၼ်း”- ဝႃႈၼႆ။
ၵူၼ်းဝၢၼ်ႈသွင်းပျွင်း ၊ လူင်ပႅၼ်ႈ ၊ ၵေႃမႆႉသၢင်း၊ ၼမ်ႉၼဵင်ႈ ၊ ၼမ်ႉတူၵ်း လႆႈ ႁုင်ၶဝ်ႈၽၵ်း သူင်ႇလဵင်ႉသေ ဢဝ်ႁူမ်ႇလူမ်ႈပၼ်ၸုမ်းပျီႇတူႉၸိတ်ႉၶဝ်ယူႇၼႆႉ တေမီးမွၵ်ႈ 1 ပီယဝ်ႉ ။ ၵူၼ်းၸၢႆးၼုမ်ႇ ၼႂ်းဝၢၼ်ႈ ၼိုင်ႈဝၼ်း 5 ၵေႃႉ လႆႈၵႂႃႇပႂ်ႉဢဝ်ႁူမ်ႇလူမ်ႈပၼ် ။ သင်ဝႃႈ ဢမ်ႇၵႂႃႇပႂ်ႉယၢမ်းပၼ်ၼႆ တေထုၵ်ႇယိုတ်းႁိူၼ်းယေးၼႆ ပျီႇတူႉၸိတ်ႉPNO လွၵ်ႇငိုတ်ႇ ဝႆႉပႃးၼင်ႇၼႆ ။
ၵူၼ်းၸၢႆးယူႇဝၢၼ်ႈၼမ်ႉၼဵင်ႈလၢတ်ႈၽူႈတွႆႇႁွၵ်ႈဝႃႈ -“ ၼိုင်ႈဝၼ်းၼႆႉ တေလႆႈမီးၵူၼ်းၸၢႆး 5 ၵေႃႉတေလႆႈဢဝ်ႁူမ်ႇလူမ်ႈဝၢၼ်ႈ ၊ ပေႃးထိုင်ဝၼ်းမၼ်းမႃး မီးဝဵင်းလႂ် ၶႂ်ႈမီးၵႆၵႃႈႁိုဝ်ၵေႃႈ လႆႈပွၵ်ႈ မိူဝ်းပႂ်ႉဢေႃႈ ပေႃးဢမ်ႇမႃး တေယိုတ်းႁိူၼ်းၼႆ ၶဝ်လွၵ်ႇပႃးၼင်ႇၼႆဢေႃႈ ”- ဝႃႈၼႆ ။
လိူဝ်ၼၼ်ႉ ပျီႇတူႉၸိတ်ႉပဢူဝ်း ၼႄၶေႃႈဢၢင်ႈလၢႆလွင်ႈၵဵပ်းၶွၼ်ႇ ဢၢၼ်ႇႁူဝ်သႅၼ်ပျႃး ႁဵတ်းႁႂ်ႈၵူၼ်းပိုၼ်ႉတီႈယူႇယၢပ်ႇၵိၼ်းၸႂ် ။
ၸၢႆးၼုမ်ႇ ၵူၼ်းဝၢၼ်ႈၼမ်ႉၼဵင်ႈ သိုပ်ႇလၢတ်ႈထႅင်ႈဝႃႈ – “ ၼိုင်ႈပွၵ်ႈၼႆႉ 2-3 မိုၼ်ႇ ၼိုင်ႈလိူၼ်ၼႆႉၶႂ်ႈတူၵ်း 2-3 သႅၼ်ယဝ်ႉ ၊ ၵူၼ်းမိူင်းတလဵဝ်ၼႆႉတႃႇႁႃၵိၼ်လဵင်ႉတွင်ႉၵေႃႈလႆႈႁႃ ၊ ၵၢၼ်ၵေႃႈႁႃယၢပ်ႇ ၊ သမ်ႉလႆႈ ဢဝ်ႁူမ်ႇလူမ်ႈသေဢမ်ႇၵႃး ၶွၼ်ႇၵေႃႈလႆႈပၼ်ၼမ်ထႅင်ႈ ၵူၼ်းမိူင်းတုၵ်ႉၶႁႅင်းၼႃႇဢေႃႈ”- ဝႃႈၼႆ ။
ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈႁဝ်းၶႃႈ ၶတ်းၸႂ်ၵပ်းသိုပ်ႇၸူး ၽူႈၶၢၼ်ပၢၵ်ႇ ပျီႇတူႉ ၸိတ်ႉ (PNO) ယူႇသေတႃႉ ၵပ်းသိုပ်ႇဢမ်ႇပႆႇလႆႈ။
မိူဝ်ႈၽွင်းႁၢင်ပီ 2024 ၼၼ်ႉ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ႁူမ်ႈၵၼ်သေ ယၢမ်ႈ ယိုဝ်းၵၼ်တင်း တပ်ႉသိုၵ်းၽွမ်ႉႁူမ်ႈယၢင်းလႅင် ႁိမ်းႁွမ်းဝၢၼ်ႈၼွၵ်ႇဝူဝ်း၊ လွႆၵဵင်ႈ၊ ဝၢၼ်ႈၼမ်ႉ ၽႃမူ၊ ၾၢႆၶုၼ်၊ ဝၢၼ်ႈသွင်းပျွင်း ၸိူဝ်းမီးဝႆႉ ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း သေ ၵူၼ်း မိူင်း မွၵ်ႈ 2000 ၵေႃႉပၢႆ လႆႈငိူင်ႉပၢႆႈၽေးသိုၵ်း ၼႂ်းႁူဝ်ပီ 2026 ၼႆႉၸင်ႇဢွၼ်ၵၼ်ပွၵ်ႈမိူဝ်းႁိူၼ်းၽႂ်မၼ်းၶိုၼ်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ