ပျီႇတူႉၸိတ်ႉPNO တီႉၺွပ်းၵူၼ်းသူႇသမ်းယႃႈ ၼႂ်းၸႄႈဝဵင်းပၢင်လွင်း ၊ ထုင်ႉပူင်း ၸိုင်ႈတႆးပွတ်းၸၢၼ်း ပေႃႉထုပ်ႉ မႂ်ငိုၼ်းယဝ်ႉ ပွႆႇပၼ်ၶိုၼ်း ။
ၵၢင်လိူၼ်မေႊၼႆႉမႃး ပျီႇတူႉၸိတ်ႉ PNO တီႉၺွပ်းၵူၼ်းၼုမ်ႇၼႂ်းဝၢၼ်ႈတၵူးမိုဝ်ႉ ( တကူးမွူး) သေပေႃႉထုပ်ႉ မႂ်ယွၼ်းငိုၼ်း ။
ၵူၼ်းၸၢႆးဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ ၸုမ်းPNOၶဝ်ၼႆႉယိပ်းၵွင်ႈသေ ပေႉၵိၼ်ၵူၼ်းမိူင်းၼႃႇ ၊ ၼႂ်းဝဵင်းပၢင်လွင်းတႄႉ ၶဝ်ဢမ်ႇပေႃးႁဵတ်းတႄႉတႄႉ ပေႃးပဵၼ်တၢင်းဝၢၼ်ႈ ၼႃႈတီႈၶဝ်ၵုမ်းၵမ်ၼႆႉ ၶွၼ်ႇၵေႃႈယွၼ်းၼမ် ၊ တႄႇၼႂ်းလိူၼ်ၼႆႉ ၶဝ်တေတီႉၵူၼ်းၵိၼ်ယႃႈ – ၵူၼ်းၵဵဝ်ႇၶွင်ႉတၢင်းယႃႈမဝ်းၵမ်သေ ပေႃႉထုပ်ႉ မႂ်ၵိၼ်ငိုၼ်း ယဝ်ႉပွႆပၼ်ၶိုၼ်း”-ဝႃႈၼႆ ။
ယၢမ်းလဵဝ် ပျီႇတူႉၸိတ်ႉPNO လႄႇလမ်းႁႃတီႉၺွပ်း ၵူၼ်းၵိၼ်လဝ်ႈၵိၼ်ယႃႈ တၢင်းဝၢၼ်ႈပိၼ်ႇလူး ၊ ထီႇယုၼ်း ၊ တၵူးမိုဝ်ႉ ၸိူဝ်းၼႆႉသေ သင်ဝႃႈ တီႉၺွပ်းလႆႈၼႆၸိုင် ပေႃႉထုပ်ႉ မႂ်ယွၼ်းငိုၼ်း ၼိုင်ႈၵေႃႉ 20- 30 သႅၼ်ပျႃး – ၵူၼ်းပိုၼ်တီႈလၢတ်ႈ ။
ၼႂ်းဝၼ်းတီႈ 16/5/2026 ၼၼ်ႉ ပျီႇတူႉၸိတ်ႉပဢူဝ်း မၢပ်ႇၼႄးဝႃႈ ၸႂ်ႉယႃႈမဝ်းၵမ်ၼႆသေ တီႉၺွပ်းပေႃႉထုပ်ႉ ၵူၼ်းဝၢၼ်ႈတၵူးမိုဝ်ႉ 4 ၵေႃႉယဝ်ႉ မႂ်ယွၼ်းငိုၼ်း ၼိုင်ႈၵေႃႉ 35 သႅၼ်ပျႃး ။
မိူၼ်ၼင်ႇၼႆ တီႈၼႂ်းထုင်ႉပူင်း ၸႄႈဝဵင်းသီႇသႅင်ႇ ပိုၼ်ႉတီႈပျီႇတူႉၸိတ်ႉပဢူဝ်း PNO ၵုမ်းၵမ်ၼၼ်ႉ ပျီႇတူႉၸိတ်ႉပဢူဝ်းလႄႇႁႃတီႉၺွပ်းၵူၼ်းၸႂ်ႉယႃႈမဝ်းၵမ်သေ မႂ်ယွၼ်းငိုၼ်းယဝ်ႉ ၸင်ႇပွႆပၼ်ၶိုၼ်း ၊ သင်ဝႃႈတီႉၺွပ်းႁၼ်မႅၼ်ႈၼႆၸိုင်ႇ ယႃႈမႃႉၼိုင်ႈမဵတ်ႉၼႆႉယွၼ်းငိုၼ်း 5 သႅၼ်ပျႃး – ၵူၼ်းပိုၼ်ႉတီႈလၢတ်ႈ ။
ၵူၼ်းၸၢႆးၼႂ်းထုင်ႉပူင်းလၢတ်ႈၽူႈတွႆႇႁွၵ်ႈဝႃႈ -“ၸႂ်ႈယဝ်ႉ ၊ ၶဝ်ၵႆႉတီႉၵူၼ်းၵိၼ်ယႃႈၼႄယူႇ ၊ ပေႃးတီႉလႆႈၼႆႉ ၼိုင်ႈမဵတ်ႉၼႆႉ ၶဝ်ယွၼ်းငိုၼ်း 5 သႅၼ်ပျႃး ၊ တီႉလႆႈ 50 မဵတ်ႉၵေႃႈ 50 သႅၼ် ။ ၶဝ်တီႉ ၵူၼ်းသိုဝ်ႉၵိၼ်လႄႈၵူၼ်းၶၢႆယွႆႈ မၼ်းၵူၺ်း ၊ ၶဝ်ဢမ်ႇတီႉပႃးပေႃႈလဵင်ႉလူင်မၼ်း ၊ ယွၼ်ႉၼၼ်ယႃႈၵေႃႈၽႄႈတိၵ်းတိၵ်း ၊ ၵူၼ်းၼုမ်ႇၵေႃႈလူႉ”- ဝႃႈၼႆ ။
ယွၼ်ႉပလိၵ်ႈသိုၵ်းမၢၼ်ႈလႄႇလမ်းႁႃတီႉၺွပ်းၵူၼ်းၵိၼ်မၼ်း ၊ ဢမ်ႇတီႉၺွပ်းၵူၼ်းၶၢႆမၼ်းလႄႈ ယႃႈမဝ်းၵမ်ၸင်ႇလၢမ်းၽႄႈမႃးတိၵ်းတိၵ်း ၼႂ်းမိူင်းတႆး ။
ယႃႈမႃႉၼႆႉ ၵူၼ်းၼုမ်ႇ ၵမ်ႈၼမ် တေဢမ်ႇသွၼ်ႇဝႃႈ မၼ်းပဵၼ်ယႃႈမဝ်းၵမ်။ ၶဝ်တေႁၼ်ဝႃႈ မၼ်းပဵၼ်တၢင်းၵိၼ် ဢၼ်လႆႈၵိၼ်မိူဝ်ႈ လူဝ်ႇမူၼ်ႈလူဝ်ႇၵျေႃႇ – လူဝ်ႇႁဵတ်းၵၢၼ်ၼၵ်း လူဝ်ႇၸႂ်ႉႁႅင်းၸိူဝ်းၼႆႉ – ၵူၼ်းပိုၼ်ႉတီႈလၢတ်ႈ ။
ယၢမ်းလဵဝ် ယႃႈမဝ်းၵမ် ၼႂ်းပိုၼ်ႉတီႈ ၵႃႈၶၼ်ထုၵ်ႇ ၶၼ်ပေႃး ၊ ယႃႈမႃႉ ၵူႈပွၵ်ႈ သႅၼ်းသိုဝ်ႉ ၶၢႆ ၼိုင်ႈမဵတ့် 2000 ပျႃးၼၼ်ႉ ယၢမ်းလဵဝ်သိုဝ်ႉၶၢႆၵၼ် 300 ပျႃး ၵူၺ်းယဝ့်လႄႈ ၵူၼ်းၵူႈသႅၼ်းထၢၼ်ႈ သိုဝ်ႉၵိၼ်သူႇသမ်း ငၢႆႈ၊ သိုဝ်ႉလႆႈၵူႈတီႈ။ ၵူၼ်းၵိၼ်ယႃႈၼမ် ၽူႈလၵ်ႉၵူၼ်းၸူၼ်ၵေႃႈလိူင်ႇၼမ်လႄႈ ႁဵတ်းႁႂ်ႈ ၵူၼ်းၼုမ်ႇလူႉသုမ်းၸၢတ်ႈပၢၼ် ယွၼ်ႉယႃႈမဝ်းၵမ်ၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ