တႃႇၵမ်ႉထႅမ်ၵူၼ်းၵႂႃႇႁၢပ်ႇၵၢၼ်သိုၵ်း လႄႈ ၵႃႈၸႂ်ႉၸၢႆႇတႃႇမူၼ်ႈသိူဝ်းတႃႇ ၸုမ်းပျီႇတူႉၸိတ်ႉ ၼႆသေ PNO ၵဵပ်းငိုၼ်း တီႈၵူၼ်းမိူင်းဝဵင်းၵျွၵ်ႉတလူင်း ၸႄႈဝဵင်းတူၼ်ႈတီး ဢၢၼ်ႇႁူဝ်သိပ်းသႅၼ်ပျႃး ။
တႄႇႁူဝ်လိူၼ် ၵျႅၼ်ႊၼိဝ်ႊရီႊ ပီ 2026 ၼႆႉမႃး ၼႂ်းၶၢဝ်းတၢင်း 4 လိူၼ် ၸုမ်းပျီႇတူႉၸိတ်ႉ PNO ဢဝ်ၶေႃႈဢၢင်ႈလွင်ႈၼိုင်ႈယဝ်ႉလွင်ႈၼိုင်ႈ ၵဵပ်းငိုၼ်းတီႈၵူၼ်းဝဵင်းၵျွၵ်ႉတလူင်းႁၢဝ်ႈႁႅင်း ။ ၼႂ်းၼၼ်ႉ တေပႃးၶွၼ်ႇၵႃး ၊ ၶွၼ်ႇႁိူၼ်း လႄႈ ငိုၼ်းတႃႇၵမ်ႉထႅမ် ၵူၼ်းၵႂႃႇႁၢပ်ႇၵၢၼ်သိုၵ်း ဢိၵ်ႇပႃးတႃႇ ၵိၼ်ၵျေႃႇလေႃႇၵွၵ်းၼႂ်း ၸုမ်းၶဝ်ပႃး ဝႃႈၼႆ ။
ၵူၼ်းၸၢႆးဝဵင်းၵျွၵ်ႉတလူင်းလၢတ်ႈၽူႈတွႆႇႁွၵ်ႈဝႃႈ -“မိူဝ်ႈလဵဝ် ငိုၼ်းၵေႃႈႁႃယၢပ်ႇ ၊ ၵၢၼ်ၵေႃႈဢမ်ႇမီး ၊ ၶွၼ်ႇသမ်ႉလႆႈပၼ်ၼမ် ၊ ၵူၼ်းမိူင်းလႆႈႁဵတ်းၵိၼ် ဝၼ်းလႂ်ဝၼ်းၼၼ်ႉၵူၺ်းဢေႃႈ ။ တလဵဝ်ၼႆႉ ပႄႉၵိၼ်ၵူၼ်းမိူင်းယွၼ်းၶွၼ်ႇၵႃႈဢမ်ႇလႆႈဢမ်ႇၸူး ၊ ၸုမ်းဢၼ်ႁဵတ်းၵၢၼ်ပၼ်တွၼ်ႈတႃႇၵူၼ်းမိူင်း ၵႅတ်ႇၶႄႇပၼ် ပိုၼ်ႉတီႈၵူၼ်းမိူင်းၼႆႉ ဢမ်ႇမီးယဝ်ႉၶႃႈ ”– ဝႃႈၼႆ ။
တီႈဝၢၼ်ႈၵျွၵ်ႉတလူင်းၼႆႉ ၽွင်းပီ 2025 ၼၼ်ႉ လႆႈပၼ်ၶွၼ်ႇ ၼိုင်ႈပီ 1 သႅၼ်ၵူၺ်းဝႃႈၼႆသေတႃႉ ၽွင်းႁူဝ်ပီ 2026 ၼႆႉၵူၺ်း လႆႈပၼ်ထိုင် 8 သႅၼ်ပျႃးလႄႈ ႁဵတ်းႁႂ်ႈၵူၼ်းပိုၼ်ႉတီႈယူႇယၢပ်ႇၵိၼ်းၸႂ်ဝႆႉ ဝႃႈၼႆ ။
မိူၼ်ၼင်ႇၼႆ တီႈဝၢၼ်ႈၼွင်ထဝ် ဝဵင်းသီႇသႅင်ႇၵေႃႈ ပျီႇတူႉၸိတ်ႉPNO ၵဵပ်းငိုၼ်း တႃႇၵမ်ႉၸွႆႈၵူၼ်းၵႂႃႇႁၢပ်ႇၵၢၼ်သိုၵ်း 6 လိူၼ်ၼိုင်ႈပွၵ်ႈ ၊ ၼိုင်ႈပွၵ်ႈၼႆႉ 3 သႅၼ်ပျႃး ။ လိူဝ်ၼၼ်ႉ ၼႄၶေႃႈဢၢင်ႈလွင်ႈၼိုင်ႈယဝ်ႉလွင်ႈၼိုင်ႈသေ ၵဵပ်းၶွၼ်ႇလႄႈ ၼိုင်ႈပွၵ်ႈၼႆႉ ၵူၼ်းပိုၼ်ႉတီႈလႆႈပၼ် ၸမ် 8 သႅၼ်ပျႃးၸိူဝ်းၼႆႉဝႃႈၼႆ ။
ၼၢင်းယိင်းၵူၼ်းပိုၼ်ႉတီႈသိုပ်ႇလၢတ်ႈထႅင်ႈဝႃႈ –“တီႈၼွင်ထဝ်ၵေႃႈ လႆႈပၼ်ၵႃႈၵူၼ်း ၵႂႃႇႁၢပ်ႇၵၢၼ်သိုၵ်းၼႆႉ ၼိုင်ႈပွၵ်ႈသၢမ်သႅၼ် ၊ ၼႆႉပႆႇပႃးၵႃႈၶွၼ်ႇမဵဝ်ႈၼိုင်ႈယဝ်ႉမဵဝ်းၼိုင်ႈ ။ 6 လိူၼ်ၼိုင်ႈပွၵ်ႈၼႆႉ သဵင်ႈမွၵ်ႈ 7-8 သႅၼ် ၊ လႆႈႁႃပၼ်ၶဝ်လုမ်းလုမ်းၵူၺ်းယဝ်ႉ”– ဝႃႈၼႆ ။
ၶွၼ်ႇဢၼ်ပျီႇတူႉၸိတ်ႉပဢူဝ်း (PNO) ၵဵပ်းတီႈၵူၼ်းမိူင်း ၼႂ်းၸႄႈဝဵင်းဢၼ်ၶဝ်ၵုမ်းၵမ် ၵူႈလိူၼ်ၼႆႉ ပဵၼ်ၶွၼ်ႇၵႃး ၊ ၶွၼ်ႇႁၢပ်ႇၵၢၼ်သိုၵ်း ၊ ၵႃႈမၢၵ်ႇၵွင်ႈ ၊ ၵႃႈတၢင်းၵိၼ်တၢင်းယႅမ်ႉ ၸိူဝ်း ၼႆႉ။
လိူဝ်သေၵဵပ်းၶွၼ်ႇၼမ်ယဝ်ႉ ၵဵပ်းပႃးၵူၼ်းၼုမ်ႇ ၼႂ်းဝၢၼ်ႈ သူင်ႇၵႂႃႇၼႃႈသိုၵ်းၵမ်းသိုဝ်ႈ လႄႈ ႁဵတ်းႁႂ်ႈၵူၼ်းၼုမ်ႇၸၢႆး ပၢႆႈဢွၵ်ႇဝၢၼ်ႈဢိူင်ႇထႅင်ႈတင်းၼမ် – ၵူၼ်းပိုၼ်ႉတီႈလၢတ်ႈ။
ဝၢႆးပၢင်တိုၵ်းယဵၼ် ပျီႇတူႉၸိတ်ႉပဢူဝ်း တဵၵ်းၸႂ်ႉၵူၼ်းပၢႆႈၽေးသိုၵ်း ပွၵ်ႈယူႇၶိုၼ်းႁိူၼ်းယေး ၽႂ်မၼ်းသေ ၵဵပ်းၶွၼ်ႇတီႈၵူၼ်းဝၢၼ်ႈယူႇဢမ်ႇထၢတ်ႇဢမ်ႇဝၢႆးလႄႈ ၵူၼ်းပိုၼ်ႉတီႈ ယူႇယၢပ်ႇၵိၼ်းၸႂ်ဝႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ