ပၢင်ပွႆးႁပ်ႉတွၼ်ႈ လၵ်းၼီႈပီတႆး 2120 ၼီႈ လိူၼ်ၼူဝ်ႊဝႅမ်ႊပိူဝ်ႊ 2025 ၼႆႉ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး၊ တပ်ႉသိုၵ်းၸိုင်ႈတႆး (RCSS/SSA) ဢွၵ်ႇၶၢဝ်းတၢင်းၵႂႃႇၶဝ်ႈႁူမ်ႈ ပၢင်ပွႆးပီမႂ်ႇတႆး ႁပ်ႉၸဵင် တီႈဝၢၼ်ႈၼႃးၵူင်း ဢိူင်ႇၼႃးၵူင်း ၸႄႈဝဵင်းလၢင်းၶိူဝ်း မိူင်းတႆးပွတ်းၸၢၼ်း။
မိူဝ်ႈဝႃး ဝၼ်းတီႈ 19/11/2025 ယၢမ်းၵၢင်ၶမ်ႈ ၵွၼ်ႇၼႃႈပီတႆး 2119 ၼီႈ တေသုတ်းသဵင်ႈ ယၢင်ႈၶၢႆႉၸူး လၵ်းၼီႈပီတႆး 2120 ၼီႈၼၼ်ႉ ၸွမ်သိုၵ်းလူင်ယွတ်ႈသိုၵ်း မွၵ်ႇလၢတ်ႈ ၶေႃႈၵႂၢမ်းၵႂႃႇ ၼႂ်းပၢင်ပွႆးပီမႂ်ႇတႆး တီႈဝၢၼ်ႈၼႃးၵူင်း ၼင်ႇၼႆ။
“တႆးႁဝ်းၵေႃႈ မီးၵူၼ်းၵတ်ႉၵူၼ်းၶႅၼ်ႇ၊ မီးပၺ်ႇၺႃႇယူႇလႄႈ ယႃႇပေၵႂႃႇထၢင်ႇယႂ်ႇၶိူဝ်းပိူၼ်ႈယႂ်ႇသေ ၶိူဝ်းၸဝ်ႈၵဝ်ႇ၊ ပွႆးပီမႂ်ႇၼႆႉ ပဵၼ်လွင်ႈႁၵ်ႉသႃၾိင်ႈငႄႈ ၾိင်ႈထုင်းႁဝ်း ႁၵ်ႉသႃလိၵ်ႈလၢႆးႁဝ်း။ ဢၼ်ၶႂ်ႈၾၢၵ်ႇထိုင်ၵူၼ်းမိူင်းႁဝ်း ၼႂ်းဝၼ်းပီမႂ်ႇၼႆႉ မီးယူႇ 4 ၶေႃႈ (1) ၶႂ်ႈႁႂ်ႈမေႃႁၵ်ႉၵၼ် (2) ႁႂ်ႈမေႃၽွမ်ႉၵၼ် (3) ပေႃးၽိတ်းမႃးႁႂ်ႈမေႃမူၼ်ႉမႄးၵၼ် ဢမ်ႇၸႂ်ႈသႄႉၼႄးၵၼ် (4) ႁႂ်ႈမေႃၸွႆႈၵၼ်” ။
လိူဝ်ၼၼ်ႉ ၼႂ်းဝၼ်းတီႈ 20/11/2025 တူၵ်းမႅၼ်ႈပီမႂ်ႇ 1 ၶမ်ႈၼၼ်ႉ ၶွင်ႇသီႇဢဝ်ၶိုၼ်းၸိုင်ႈတႆး ႁဵတ်းလိၵ်ႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ ႁႂ်ႈႁၵ်ႉၽႅၼ်ႇလိၼ်ဝၢၼ်ႈမိူင်းၸဝ်ႈ ၵဝ်ႇ သိုပ်ႇၵႅတ်ႇၶႄတိူၵ်ႇႁႆႈ၊ သူၼ်၊ လွၵ်းၼႃးၵႂႃႇမိူဝ်းၼႃႈၼႆ တိုၵ်းသူၼ်းထိုင် ၵူၼ်းမိူင်းတႆးတင်းသဵင်ႈဝႆႉၼင်ႇၼႆ။
“ပေႃးၵူၼ်းမိူင်းတႆး ၸိူဝ်ႉၸၢတ်ႈတႆးႁဝ်းၶႃႈ ဢမ်ႇႁၵ်ႉၽႅၼ်ႇလိၼ်ဝၢၼ်ႈမိူင်း ဢမ်ႇၵႅတ်ႇၶႄၽႅၼ်ႇလိၼ် ဝၢၼ်ႈမိူင်းဝႆႉပၼ်လုၵ်ႈလၢၼ်လႆႈၸိုင် ပေႃးထိုင်ပၢၼ်လုၵ်ႈလၢၼ်ႁဝ်းၶႃႈမႃးၼႆႉ ၵူၼ်းတၢင်ႇၶိူဝ်းတေမႃးယူႇ သဝ်း ပူၵ်းပွင်သေဢဝ်ၽႅၼ်ႇလိၼ်မိူင်းႁဝ်း ပဵၼ်ၶွင်ၶဝ်ၵႂႃႇ လႄႈ ပုၼ်ႈတႃႇၽဝၸၢတ်ႈပၢၼ် ၵူၼ်းမိူင်းတႆး ႁဝ်း တေဢမ်ႇၸၢင်ႈၶိုၼ်ႈယႂ်ႇၵူၺ်းဢမ်ႇၵႃး ၵႃႈတေပဵၼ်ၽဝၸၢတ်ႈပၢၼ် ၼႃႈလဵၵ်ႉသေ တေလႆႈၵႂႃႇႁႃ သေႃႉပိုင်ႈႁူမ်ႈၽူၺ်းတၢင်ႇတီႈတၢင်ႇမိူင်းၵူၺ်းၼၼ်ႉၶႃႈယဝ်ႉ။”
သူင်ႇသင်ႇပီၵဝ်ႇ ႁပ်ႉတွၼ်ႈပီမႂ်ႇ 2120 ၼီႈ ပီ 2025 ၼႆႉ ၼႂ်းမိူင်းတႆး ၸတ်းႁဵတ်းၵႂႃႇပတ်းပိုၼ်ႉ။ မၢင်ၸိူဝ်း ၵေႃႈ ၸတ်းႁဵတ်းပွႆးယႂ်ႇၵိုၼ်းလူင်၊ မၢင်ၸႄႈဝဵင်းၵေႃႈ ဢိင်ၼိူဝ်ငဝ်းလၢႆးၼႂ်းပိုၼ်ႉတီႈဢမ်ႇၼိမ်သဝ်းသေ လႆႈၸတ်းႁဵတ်းၵႂႃႇ တီႈၵႅပ်းမၼ်းၵူၺ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ