မိူဝ်ႈသၢမ်သိပ်းပီပူၼ်ႉမႃး ၼႂ်းၸိူဝ်ႉၸၢတ်ႈၸၢဝ်းၶိူဝ်းတႆး ပဵၼ်လီႁိုဝ်ႁၢႆႉၸႃႉမႃး ဢၼ်ဝႃႈၼႆႉ ​​ပေႃးယူႇၸဵင်ႇ ၵၢၼ်မိူင်းတူၺ်းတႄႉ ​​ၵႃႈတေလႆႈဝႃႈ မိူၼ်ၼၼ်မိူၼ်ၼၼ်ၵွႆးၵွၼ်ႇ​​ယဝ်ႉ။ ဝၼ်းတီႈ 6 လုၵ်ႈလိူၼ်ၵျုၼ်ႇ 1996 မိူဝ်ႈၼၼ်ႉ မုၵ်ႉၸုမ်းငမ်းယဵၼ်ၸိုင်ႈတႆး (Shan State Peace Council : SSPC) လႄႈ ငဝ်ႈငုၼ်းတီႇမူဝ်ႇၶ​​ရေႇ ၸီႇၸိူဝ်ႉၶိူဝ်းတႆး (SNLD) ႁူမ်ႈမိုဝ်းၵၼ် ​​ၵေႃႇတင်ႈမႃး ​​ၵေႃႁူမ်ႈသၢင်ႈၸိုင်ႈတႆး (Shan State Joint Action Committee : SSJAC)၊ ႁၢၼ်ႉ​​တေႃႇမိူဝ်ႈၼႆႉ တိုၵ်ႉၶွတ်ႇၽၼ်ႈပၼ်ႈၵႅၼ်ႇၵၼ်ယူႇ။ ၵူၺ်းၵႃႈ SSJAC ၼၼ်ႉ ၶိုပ်ႈၼႃႈၶိုၼ်ႈယႂ်ႇမႃး တၢၼ်ႇလႂ်၊ ၸွင်ႇယုၵ်ႉယၢင်ႈၶိုၼ်ႈၼႃႈၸမ်ထိုင် တႃႈယိူင်းတႃႈမုင်ႈမၼ်းယဝ်ႉႁိုဝ်ၼႆ ​​ပေႃးထၢမ်သိုဝ်ႈတိုဝ်ႉၸၼ်း ယူဝ်​​တေဢမ်ႇၶႂ်ႈတွပ်ႇၵၼ်ႁိုဝ်။ ယွၼ်ႉတွၼ်းဢၼ်ဝႃႈၼႆႉ ပဵၼ်မီးဝႆႉတႃႇၵူႈပိူင် လႄႈ လီႁိုဝ်ၸႃႉၼၼ်ႉ ၸီႉၸမ်ႈယိုၼ်ထဵင်​​တေႃႇၵၼ် ငၢႆႈငႅမ်ႈၼႃႇ၊ ၵူၺ်းၵႃႈ ​​ပေႃးဢမ်ႇဢဝ်ၼမ်ႉလၢႆးတႃးယႃမူၼ်ႇ​​သေ ထတ်းၶိုၼ်းတူဝ်ၵဝ်ႇတႄႉ ၸၢင်ႈႁႃႁၼ်လႆႈ ငဝ်ႈငိူၼ်ႈလီၸႃႉမၼ်း​​တေႉယူႇ​​။

ပီ 1996-97 မိူဝ်ႈၼၼ်ႉၼႆႉ ငဝ်းလၢႆးႁုၵ်းႁၢႆႉၼႃႇ တႃႇၸၢဝ်းတႆးမိူင်းတႆးလႄႈ ထိုင်တီႈ​​ပေႃးမီးၽဵင်းၵႂၢမ်း ႁွင်ႉမၢၵ်ႇဝႃႈ ပီငရၢႆးလူင်ၼႆယဝ်ႉ။

ၼႂ်းပီ 1996 ၼၼ်ႉ ပႃႇတီႇပၢႆးမိူင်းတႆး SNLD ၺႃးမိပ်ႇငႅၼ်း ႁႂ်ႈယွမ်းႁပ်ႉမူႇပိူင်104 ၶေႃႈ ဢၼ်ၸုမ်းသိုၵ်းၼဢၽ ယူႇၽၢႆႇလဵဝ်တမ်းဝၢင်းဝႆႉထႃႈ၊ ယွၼ်ႉပႃႇတီႇ SNLD ဢမ်ႇယွမ်းႁပ်ႉ​​သေ ထဵင်ၶိုၼ်းလႄႈ ၸုမ်းသိုၵ်းၸႃႉၸႂ်​​ၼႃႇ ​​ပေႃးၵိုတ်းယင်ႉပႅတ်ႈ ပၢင်တုမ်လူင်ၶိူဝ်းမိူင်း (ဢမဵဝ်းတႃး ၺီႇလႃႇၶၢမ်ႇ) ၶဝ်ယဝ်ႉ။

ပီ 1996 လိူၼ်မၢတ်ႉ 15 ဝၼ်း တၢမ်တူဝ်ၶုၼ်ထုၼ်းဢူး ယူႇတီႈၸုမ်းၽူႈတၢင်တူဝ် ဢၼ်ထုၵ်ႇလိူၵ်ႈတင်ႈ​​သေ တႅမ်ႈတၢင်ႇထိုင်တီႈ ႁူဝ်ပဝ်ႈ​​ၵေႃႇမတီႇပွင်ၵၢၼ် ဢမဵဝ်းတႃးၺီႇလႃႇၶၢၼ်ႇၼၼ်ႉဝႃႈ “ လုၵ်ႈတပ်ႉဢၼ်လုၵ်ႉတီႈ ၸွမ်ပွင်ၵၢၼ်သိုၵ်း ယိုၼ်ႈသူင်ႇၸိုဝ်ႈသဵင်မႃးၼၼ်ႉ မီးသုၼ်ႇလူင်းလိူၵ်ႈတင်ႈ မိူၼ်ပိူၼ်ႈ တင်းလၢႆယူႇ၊ 1- ​​ပေႃးလႆႈထုၵ်ႇလိူၵ်ႈတင်ႈၸိုင် ​​တေလႆႈႁဵတ်းၽူႈတႅၼ်းၽွင်း၊ 2- ​​ပေႃးဢမ်ႇလႆႈထုၵ်ႇလိူၵ်ႈတင်ႈၸိုင် မီးသုၼ်ႇႁၢပ်ႇၵၢၼ်ၶိုၼ်းတီႈတပ်ႉ လူၺ်ႈတၼ်းႁဵင်းပိူင်ၵဝ်ႇၼၼ်ႉယူႇ၊ 3- လုမ်းတႅၼ်းၽွင်းၼႆႉ ​​တေလႆႈၶွတ်ႇၽွတ်ႈလူၺ်ႈ ၽူႈတႅၼ်းၽွင်းၵူၼ်းမိူင်း ဢၼ်လႆႈထုၵ်ႇလိူၵ်ႈတင်ႈၼၼ်ႉၵွႆး” ၼႆယဝ်ႉ။

လၢတ်ႈသိုဝ်ႈ​​ၵေႃႈ SNLD ဢမ်ႇယွမ်းႁပ်ႉ လုၵ်ႈသိုၵ်းၶဝ် ဢၼ်ဢမ်ႇလူင်းလိူၵ်ႈတင်ႈ​​သေ ၵျွၵ်းၶဝ်ႈမႃးပဵၼ်ၽူႈတႅၼ်းၽွင်း တႃႇ 25% ၼၼ်ႉယဝ်ႉ။ လိူဝ်ၼၼ်ႉၸမ်ႉ ၵဵဝ်ႇၵပ်းလွင်ႈၶဝ် မၵ်းမၼ်ႈဝႃႈ ပလွင်ႈ၊ ထၼု၊ ဝႃႉ၊ ၶႄႇၵဝ်ႈၵၢင်ႉ၊ တွင်ႇသူႇပဢူဝ်းၸိူဝ်းၼႆႉ ပဵၼ်ၸိူဝ်ႉၸၢဝ်းတႆးၼႆ ၸွင်ႇၸႂ်ႈဢမ်ႇၸႂ်ႈၼႆ ထၢမ်ထိုင်ၶဝ်၊ ၶဝ်တွပ်ႇဝႃႈ ၸႂ်ႈယူႇ။ ၸၢဝ်းၶိူဝ်းဢၼ်မီးမိူင်းယဝ်ႉ ​​တေဢမ်ႇပၼ်ၼႃႈတီႈၽွင်းငမ်းႁင်း​​ၶေႃၼႆ ၸွင်ႇမၵ်းတတ်းဝႆႉ၊ ၶဝ်တွပ်ႇဝႃႈ မၵ်းတတ်းဝႆႉယူႇ။ ​​ပေႃးၼႆ ပလွင်ႈ၊ ထၼု၊ ဝႃႉ၊ ၶႄႇၵဝ်ႈၵၢင်ႉ၊ တွင်ႇသူႇပဢူဝ်း ၶဝ်ပဵၼ်ၸၢဝ်းတႆးလႄႈ ၶဝ်မီးမိူင်းယဝ်ႉလူး ၵွပ်ႈသင် လႆႈပၼ်ၶဝ် ၼႃႈတီႈၽွင်းငမ်းႁင်း​​ၶေႃ၊ ၵွပ်ႈသင် တႆးလႅင်သမ်ႉ သူၶဝ်ဢမ်ႇပၼ် ၽိူဝ်ႇထၢမ်ၸိူင်ႉၼႆ ဢမ်ႇၸၢင်ႈတွပ်ႇ​​ၵေႈလႄႈ ထိုင်တီႈလႆႈၵိုတ်းယင်ႉပၢင်ၵုမ်ပႅတ်ႈ မိူဝ်ႈလိူၼ်မၢတ်ႉ 30 ဝၼ်းၼၼ်ႉယူႇ ယဝ်ႉ။ ၸဵမ်မိူဝ်ႈၼၼ်ႉ ၸုမ်းသိုၵ်းၼဢၽ မူမ်ႇၸႂ်မၢႆၸႂ်​​တေႃႇ SNLD မႃးၼႆ ၸိူဝ်းပၵ်းၸႂ်ၼိူဝ်ပိုၼ်းၵၢၼ်မိူင်း ​​တေပွင်ႇၸႂ်ၵၼ်ယူႇ။

​​ပေႃးဝႃႈ ပၢင်ၵုမ်ၶိူဝ်းမိူင်းၶဝ် ၵိုတ်းယင်ႉၵႂႃႇ​​ၵေႃႈ ၶႅၼ်ႈ​​ႁေသွင်လိူၼ် SNLD လႄႈ SSPC မုၵ်ႉၸုမ်းငမ်းယဵၼ် ၸိုင်ႈတႆး ထူပ်းၵၼ်တီႈမၢၼ်းတ​​လေး​​သေ ၶွတ်ႇၽွတ်ႈ ​​ၵေႃၵပ်းသၢၼ်ၸိုင်ႈတႆး (Shan State Coordination Committee: SSCC) မိူဝ်ႈ ၵျုၼ်ႇ 6 ဝၼ်း။ ပီ 1998 ၸင်ႇၶိုၼ်းလၢႆႈပဵၼ် ​​ၵေႃႁူမ်ႈသၢင်ႈၸိုင်ႈတႆး (SSJAC)။

SSPC ၼႆႉ လုၵ်ႉတီႈ တပ်ႉသိုၵ်းၸိုင်ႈတႆး (Shan State Army: SSA) လႄႈ တပ်ႉသိုၵ်းၸိူဝ်ႉၸၢတ်ႈၸိုင်ႈတႆး (Shan State National Army: SSNA) ႁူမ်ႈတင်ႈမႃး မိူဝ်ႈ 1996 ၸၼ်ႇဝႃႇရီႇ 23 ဝၼ်း။ မိူဝ်ႈတႄႇဝႃႈ မုၵ်ႉၸုမ်း​​ၵေႃႇသၢင်ႈငမ်းယဵၼ်ၸိုင်ႈတႆး (Shan State Peace-Keeping Committee)၊ ဝၢႆးလင် ၸင်ႇလၢႆႈပဵၼ် SSPC မုၵ်ႉၸုမ်းငမ်းယဵၼ်ၸိုင်ႈတႆး။

ၵမ်းၼႆႉ ၵွၼ်ႇပႆႇပဵၼ်မႃး SSNA ၼၼ်ႉ ငဝ်းလၢႆးပဵၼ်ၸိူင်ႉႁိုဝ်ၼႆ မိူဝ်ႈၵျုၼ်ႇ 6 ဝၼ်း ပီ 1995 ၸဝ်ႈၵၢၼ်းယွတ်ႈ ဢွၼ်ဢဝ်လုၵ်ႈတပ်ႉသွင်ႁဵင်ပၢႆ ၽၢတ်ႇဢွၵ်ႇတပ်ႉသိုၵ်းမိူင်းတႆး ဢၼ်ၸဝ်ႈၶုၼ်သႃႇ ဢွၼ်ႁူဝ်ၼၼ်ႉ​​သေ ၸင်ႇမႃးတင်ႈပဵၼ်တပ်ႉႁင်း​​ၶေႃ မိူဝ်ႈၵျုၼ်ႇ 11ဝၼ်း။ ၽိူဝ်ႇယဵပ်ႇၶဝ်ႈမႃး ပီ 1996 ၸၼ်ႇဝႃႇရီႇ 5 ဝၼ်း တပ်ႉသိုၵ်းမိူင်းတႆး MTA တႄႇဝၢင်းၶိူင်ႈတီႈလွႆလၢင်း၊ ၸၼ်ဝႃႇရီႇ 7 ဝၼ်း ဝၢင်းတီႈႁူဝ်မိူင်း။ ၸၼ်ဝႃႇရီႇ 27 ဝၼ်း ၸဝ်ႈယွတ်ႈသိုၵ်း ဢွၼ်ဢဝ်လုၵ်ႈတပ်ႉ ၸိူဝ်းဢမ်ႇယွမ်းဝၢင်းၶိူင်ႈၼၼ်ႉ ၶၢမ်ႈၶူင်းမႃးတၢင်းမိူင်းတႆး ပွတ်းၵၢင်၊ မႃးတင်ႈပဵၼ် တပ်ႉသိုၵ်းၽွမ်ႉႁူမ်ႈလုၵ်ႉၽိုၼ်ႉ-ၸိုင်ႈတႆး (SURA) မိူဝ်ႈ​​ဢေႇပရႄႇ 25 ပီ 1996။

ဝၢႆးၼၼ်ႉ ၸဝ်ႈယွတ်ႈသိုၵ်း ၶိုၼ်ႈၵႂႃႇထိုင် သႅင်ၵႅဝ်ႉ ငဝ်ႈငုၼ်းတပ်ႉသိုၵ်းၸိုင်ႈတႆး ဢၼ်ၵိုတ်းတိုၵ်းၵၼ်တင်း တပ်ႉသိုၵ်းမၢၼ်ႈ​​ မိူဝ်ႈ 1989 ၼၼ်ႉ​​​​သေ၊ တပ်ႉသိုၵ်းတႆးသၢမ်ၸုမ်း SSA, SSNA လႄႈ SURA ၶိုင်ႁူမ်ႈမိုဝ်း ပဵၼ်မုၵ်ႉလဵဝ်ၸုမ်းလဵဝ်ယူႇယဝ်ႉ။ ပီ 1996 သႅပ်ႇထႅမ်ႇပႃႇ 13 ဝၼ်း ၸွမ်ႁၢၼ်ၸၢႆးၼွင်ႉ ႁူဝ်ပဝ်ႈလူင် SSA၊

ၸဝ်ႈသိုၵ်းလူင်ၸၢႆးၵၢၼ်းယွတ်ႈ ၽူႈပွင်ၵၢၼ်ၵူႈလွင်ႈလွင်ႈ SSNA၊ ၸဝ်ႈသိုၵ်းလူင် ယွတ်ႈသိုၵ်း ႁူဝ်ပဝ်ႈ SURA တူၵ်းလူင်းၵၼ် ၽွမ်ႉႁူမ်ႈပဵၼ်မုၵ်ႉၸုမ်းဢၼ်လဵဝ် ႁွင်ႉၸိုဝ်ႈဝႃႈ Shan State National Organization

SSNO လႄႈ တပ်ႉသိုၵ်းၸိုင်ႈတႆး SSA ၼႆယဝ်ႉ။ ၵူၺ်းၵႃႈ လွင်ႈၽွမ်ႉႁူမ်ႈတႆးသၢမ်တပ်ႉ ၶွၼ်ႈပဵၼ်ဢၼ်လဵဝ်ၼႆႉ ဢမ်ႇတၼ်းမၼ်ႈၸႄႇယိုၼ်းႁိုင်၊ ယွၼ်ႉပိူဝ်ႈၽၢႆႇသိုၵ်းမၢၼ်ႊ ဢမ်ႇယွမ်းႁပ်ႉလႃးလႃး​​သေ ၵႅတ်ႇဝႅတ်ႉလွမ်ႉတိုၵ်း​​ ၸုမ်းၸဝ်ႈယွတ်ႈသိုၵ်းၵွႆးဢမ်ႇၵႃး  ၸႂ်ႉပႃးလၢႆႈတၢင်း တႅပ်းသီႇတႅပ်းလႄႈ ထိုင်တီႈၵူၼ်းမိူင်းတႆးပွတ်းၵၢင် ပႃးၸဵမ်ပွတ်းၸၢၼ်း လႆႈၽူင်ႉၽၢတ်ႇပၢႆႈၼီ၊ လႆႈပွႆႇဝၢၼ်ႈသူၼ်ႁိူၼ်း​​ယေး လုၵွႆလႅဝ်ႁၢမ်းမႃးယဝ်ႉ။

ပိူင်ပဵၼ်ၸိူဝ်းလၢတ်ႈမႃးၼႆႉ ႁူမ်ႈဝႃႈမီးမႃးသၢမ်သိပ်းပီႊ မိုဝ်ႉၼႆႉဝၼ်းၼႆႉယဝ်ႉ​​ၵေႃႈယႃႇ တႃႇတပ်ႉသိုၵ်းတႆး ​​တေၶွၼ်ႈ​​တေႁူမ်ႈၵၼ်၊ တႃႇၸုမ်းၸၢဝ်းၽၢႆႇမိူင်း ၽၢႆႇသိုၵ်း ​​တေၶွၼ်ႈ​​တေတုမ်ၵၼ်၊ တႃႇဢွၼ်ဢဝ် ၸုမ်းတူင်ႇဝူင်းၵူၼ်းလၢႆလၢႆယၢင်ႇ ​တေၶွၼ်ႈ​​တေႁူမ်ႈၵၼ်ၸိူဝ်းၼႆႉ ​​တေႃႇဝၼ်းမိူဝ်ႈလဵဝ် ပႆႇပႃႈႁၼ်တူဝ်ႁၼ်ႁၢင်ႈ တႅၵ်ႇလႅင်းၸိုၼ်ႈၸၢင်ႇ ​​ပေႃးဝႃႈၼႆ​​တေဢမ်ႇၽိတ်း။ ​​တေႃႇထိုင်မိူဝ်ႈၼႆႉဝၼ်းၼႆႉ ၸုမ်းလႂ်​​ၵေႃႈဝႃႈ ​​တေတင်ႈမိူင်းႁူမ်ႈတုမ်ၾႅတ်ႇတရႄႇယူႇမႅၵ်းမႅၵ်း၊ ၵူၺ်းၵႃႈ ၸိူင်ႉၼင်ႇရၶႅင်ႇ လႄႈ ဝႃႉၶဝ်ၼၼ်ႉ ၸွမ်းၼင်ႇၶဝ်​​ပေႉတူဝ်၊ ၸွမ်းၼင်ႇၶဝ်တိုၵ်း​​ပေႉဝႆႉလႄႈ ​​ၶေႃႈၵႂၢမ်းၾႅတ်ႇတရႄႇၼၼ်ႉ ဢမ်ႇဢွၵ်ႇၵူင်သူပ်းလႃးလႃး။ ယႃႇၽူမ်ႈဝႃႈ ၸုမ်းၸၢဝ်းၶိူဝ်းလုၵ်ႉၽိုၼ်ႉတၢင်ႇ​​ၸေႊတၢင်ႇမိူင်းၵွၼ်ႇ ​​တေႃႈၼင်ႇၸၢဝ်းၶိူဝ်းဢွၼ်ႇဢိတ်း ဢၼ်ယူႇၵႂ်ႈၵိၼ် ၸမ်ႁဝ်းမႃး ၸိူင်ႉၼင်ႇ ပလွင်ႈ၊ ပဢူဝ်း၊ ၶႄႇၵဝ်ႈၵၢင်ႉ ၸွင်ႇၶဝ်တူၵ်ႇထိုင် လွၵ်းပိူင်ၾႅတ်ႇတရႄႇယဝ်ႉႁိုဝ်၊ ၽႂ်ဢမ်ႇၽႂ်​​ၵေႃႈ ဢၢၼ်းသၢင်ႈမိူင်းလွတ်ႈလႅဝ်းသဝ်း​​ၶေႃယူႇၼႆ ဢမ်ႇတူၺ်း​​ၵေႃႈ​​တေႁၼ်၊ ဢမ်ႇထွမ်ႇ​​ၵေႃႈ ​​တေငိၼ်းၵၼ်ယူႇလႄႈ ယူႇတီႈၸိူဝ်ႉၸၢတ်ႈတႆးၶိူဝ်းလူင်ႁဝ်း ​​တေႁဵတ်းႁိုဝ်ၶိုင်ႁႃၶဝ်ႈၸူးၵၼ် ႁူမ်ႈပွင်သၢင်ႈ ႁႂ်ႈၶိုတ်းတၼ်းငဝ်းလၢႆးဢၼ်ဝႃႈၼၼ်ႉ လုၵ်ႉတီႈဝၼ်းပီငရၢႆး ၶွပ်ႈတဵမ် 30 ၶူပ်ႇ​​သေ ယွၼ်းတၵ်ႉတိူၼ်ၵၼ်မႃး ၼင်ႇၼႆယူႇ​​ဢေႃႈ။