မုၵ်ႉၸုမ်းငမ်းယဵၼ်ၸိုင်ႈတႆး (Shan State Peace Council – SSPC) လႄႈ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉ ၶိူဝ်းတႆး ႁူမ်ႈမိုဝ်းၵၼ်သေ ၶွတ်ႇၽွတ်ႈၵေႃႇတင်ႈမႃး ၵေႃႁူမ်ႈသၢင်ႈ ၸိုင်ႈတႆး (SSJAC) ၶွပ်ႈတဵမ် 30 ပီ ၽူႈၼမ်းတပ်ႉသိုၵ်းၸိုင်ႈတႆး လႄႈ မုၵ်ႉၸုမ်းၸိူဝ်းၵဵဝ်ႇၶွင်ႈ လႆႈၸတ်းပၢင်မၢႆတွင်း ၶွပ်ႈၶူပ်ႇၵႂႃႇၼိူဝ်ဢွၼ်ႊလၢႆႊ ၼႆယဝ်ႉ။

ဝၢႆးလင်ၸတ်းပၢင်ဢုပ်ႇဢူဝ်းၵၼ်ယဝ်ႉတူဝ်ႈလီငၢမ်းၵႂႃႇ မီးၶေႃႈတႅပ်းတတ်းလၢႆၶေႃႈ ၾၢႆႇၵေႃႇမတီႇ ၵေႃႁူမ်ႈသၢင်ႈၸိုင်ႈတႆး ဢွၵ်ႇမႃးပိုၼ်ၽၢဝ်ႇၼႄ လွၵ်းၸုၵ်း လႄႈ ၶေႃႈယၼ်ႇၸႂ် ၵႂႃႇ မိူဝ်ႈဝၼ်းတီႈ 6/6/2026 ဝႃႈ တေႁူမ်ႈမိုဝ်းၵၼ် ၵႄႈလိတ်ႈပၼ်ႁႃ ပတိၵ်ႈၶၢတ်ႈ ဢၼ်ပဵၼ်မႃးၼႂ်းမိူင်းႁူမ်ႈတုမ် ၼၼ်ႉ ၼႆယဝ်ႉ။

ၶေႃႈယၼ်ႇၸႂ် လႄႈ ၶေႃႈတိုဝ်းၵမ် ၼႂ်းၵၢၼ်ႁူမ်ႈမိုဝ်းၵၼ် တႃႇသိုပ်ႇႁဵတ်းသၢင်ႈ ၼႃႈၵၢၼ် ၾႅတ်ႊတရႄႊတီႊမူဝ်ႊၶရေႊၸီႊၵႂႃႇလႆႈၼၼ်ႉ ၵေႃႁူမ်ႈသၢင်ႈၸိုင်ႈတႆး တေသိုပ်ႇႁဵတ်း သၢင်ႈၼႃႈၵၢၼ် ၵႂႃႇၸွမ်းၼင်ႇ ယိူင်းဢၢၼ်း ဢၼ်ႁူမ်ႈၵၼ်တမ်းဝၢင်းဝႆႉ 4 ၶေႃႈ။

1) တႃႇၽဵဝ်ႈတိုၵ်း လွၵ်းပိူင်ၸဝ်ႈဢႃႇၼႃႇ ႁႂ်ႈပေႃးႁၢႆလၢႆ

2) တႃႇႁပ်ႉပၢၵ်ႇတိုဝ်းၵမ် ဝႃႇတ ဢဝ်ၵူၼ်းမိူင်းပဵၼ်ယႂ်ႇ

3) တႃႇၵေႃႇသၢင်ႈမိူင်းႁူမ်ႈတုမ် ၾႅတ်ႊတရႄႊတီႊမူဝ်ႊၶရေႊၸီႊ

4) တႃႇတေၽုတ်းဢွၵ်ႇမႃး လူင်ပွင်ၸိုင်ႈၵူၼ်းမိူင်း ၸဵမ်ၸိူဝ်းၼႆႉ ဝႃႈၼႆ။

ၼႂ်းၶေႃႈပိုၼ်ၽၢဝ်ႇ ဢၼ် SSJAC ႁၢႆးငၢၼ်းဢွၵ်ႇမႃးၼၼ်ႉ ပႃးဝႆႉထႅင်ႈဝႃႈ – ၵေႃႁူမ်ႈသၢင်ႈၸိုင်ႈတႆး ၶတ်းၸႂ် တေႃႇသူႈ လတ်းၽၢၼ်ႇမႃး ၼႂ်းတွၼ်ႈၵၢၼ်မိူင်း၊ ၵၢၼ်သိုၵ်း၊ ၵၢၼ်ၵပ်းသိုပ်ႇဢူၺ်းလီ ၸိူဝ်းၼႆႉမႃး ၼႂ်းၶၢဝ်းတၢင်း 30 ပီၼႆႉ မီးလွင်ႈၶိုၼ်ႈ လွင်ႈလူင်းတင်းၼမ်သေတႃႉ ႁပ်ႉပၢၵ်ႇဝႃႈ တေၶတ်းၸႂ်ႁဵတ်းသၢင်ႈ သုၼ်ႇလႆႈသုၼ်ႇပဵၼ် တီႇမူဝ်ႇၶရေႇၸီႇ ပိူဝ်ႈတႃႇၵႅတ်ႇၶႄယုၵ်ႉမုၼ်းပၼ်လႆႈ ၸူဝ်ႈပၢၼ် လႄႈ ၽွၼ်းလီၵူၼ်းမိူင်း ၵႃႈၼင်ႇပွင်ပဵၼ်လႆႈ ၶတ်းၸႂ်ႁဵတ်းမႃးယူႇ – ၼႆယဝ်ႉ။

ပိူဝ်ႈတႃႇတေယုၵ်ႉမုၼ်းပၼ်လႆႈ ၽွၼ်းလီၵူၼ်းမိူင်းၼႆႉ တေသိုပ်ႇၶတ်းႁဵတ်းသၢင်ႈလိူဝ်ၵဝ်ႇ ႁႂ်ႈၵၢၼ်ဢုပ်ႉပိူင်ႇ၊ ၵၢၼ်တတ်းသိၼ်၊ ၵၢၼ်ပၢႆးပၺ်ႇၺႃႇ၊ ၵၢၼ်ပၢႆးယူႇလီ ၵိုင်ႇငမ်ၸွမ်း ၵၢပ်ႈဝၢၼ်ႈပၢၼ်မိူင်းၵႂႃႇယူႇ ၼႆယဝ်ႉ။

ၵေႃႁူမ်ႈသၢင်ႈၸိုင်ႈတႆးၼႆႉ ၵေႃႇတင်ႈမႃးမိူဝ်ႈဝၼ်းတီႈ 6/6/1996 ပဵၼ်ဝၼ်းႁႅၵ်ႈ ငဝ်ႈငႃႇ SNLD လႄႈ SSPC ႁူမ်ႈၵၼ်ၶွတ်ႇၽွတ်ႈပဵၼ်မႃး ၵေႃႁူမ်ႈသၢင်ႈၸိုင်ႈတႆး SSJAC ၼႆသေတႃႉ မိူဝ်ႈၼၼ်ႉ တိုၵ်ႉၸႂ်ႉၸိုဝ်ႈပဵၼ် ၵေႃၵပ်းသၢၼ်ၸိုင်ႈတႆး (Shan State Coordination Committee: SSCC) ဝႆႉယူႇ။ ထိုင်မႃး ပီ 1998 ၸင်ႇ လၢႆႈၸိုဝ်ႈပဵၼ်မႃး ၵေႃႁူမ်ႈသၢင်ႈၸိုင်ႈတႆး (SSJAC) ဝႃႈၼႆ။