ဝၼ်းတီႈ 30/03/2025 ယၢမ်းၵၢင်ၼႂ်ၸဝ်ႉ ၵေႃႁူမ်ႈသၢင်ႈၸိုင်ႈတႆး SSJAC ပိုၼ်ၽၢဝ်ႇဝႃႈ တေၸွႆႈထႅမ်ၵူၼ်းမိူင်းၸိူဝ်းထူပ်းၽေးၽႅၼ်ႇလိၼ်ဝႆ သေလူႉသုမ်းၶူဝ်းၶွင်ႁိူၼ်းယေး လုၵ်ႈလၢင်းၼၢင်းမေး ၵူၼ်းႁိူၼ်း ၸိူဝ်းၼၼ်ႉ – တႃႇငိုၼ်းမၢၼ်ႈ 1800 သႅၼ် ဝႃႈၼႆ။
ၵေႃႁူမ်ႈသၢင်ႈၸိုင်ႈတႆး ပိုၼ်ၽၢဝ်ႇတိုၵ်းသူၼ်းဝႆႉဝႃႈ မိူဝ်ႈႁဵတ်းသၢင်ႈ ၵၢၼ်ၵွပ်ႇၵူႈၸွႆႈထႅမ် ၵူၼ်းထူပ်းၽေးသၽႃႇဝ ၼၼ်ႉ ၶႂ်ႈတိုၵ်းသူၼ်းထိုင် ၵူႈမူႇၵူႈၸုမ်း ၼႂ်းမိူင်းဢိၵ်ႇ ၼွၵ်ႈမိူင်း ႁႂ်ႈၶတ်းၸႂ်ၶၢမ်ႈပူၼ်ႉ လွင်ႈၶၢတ်ႈၶွပ်ႇ ၵၢၼ်မိူင်း ၵၢၼ် သိုၵ်း၊ ၼႃႈလိၼ်ပိုၼ်ႉတီႈ ၸိူဝ်းၼၼ်ႉသေ ႁႂ်ႈႁူမ်ႈမိုဝ်း ႁဵတ်းသၢင်ႈၵႂႃႇ ဝႃႈၼႆ။
ၼင်ႇႁိူဝ် ငိုၼ်းၵမ်ႉၸွႆႈ တေထိုင်ၼႂ်းမိုဝ်း ၵူၼ်းမိူင်းၵမ်းသိုဝ်ႈၼၼ်ႉ ၸၢႆးလဵၵ်း ၽူႈၼမ်းၼႂ်းလူင် ၵေႃႁူမ်ႈသၢင်ႈၸိုင်ႈတႆး SSJAC လၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ – “ပိူင်ယႂ်ႇ တေၸွႆႈတႃႇၵူၼ်းမၢတ်ႇၸဵပ်း လႄႈ ၸိူဝ်းယၢပ်ႇၵိၼ်း တႃႇ ယူႇတႃႇယႃ ဢမ်ႇလိူၵ်ႈၼႃႈတီႈ၊ ၵူၼ်းႁဝ်းၵေႃႈ တေလူင်းထတ်းလူင်းၸွႆႈ ၵမ်းသိုဝ်ႈ။ ပေႃးမီးမူႇၸုမ်းပရႁိတ ၵပ်းထၢမ် မႃးၵေႃႈ တေၼပ်ႉၸင်ႈၸွႆႈထႅမ်ၵႂႃႇယူႇ” ၼႆယဝ်ႉ။
ၼႂ်းလိၵ်းပိုၼ်ၽၢဝ်ႇ SSJAC ၼၼ်ႉ မွၵ်ႇလၢတ်ႈပႃးဝႆႉဝႃႈ ယူႇတီႈၵေႃႁူမ်ႈသၢင်ႈၸိုင်ႈတႆးသေ ယိၼ်းမွင်ၸႂ်ၸွမ်း ၵူၼ်းမိူင်း ၸိူဝ်းလႆႈ ထူပ်းၽေး ၽႅၼ်ႇလိၼ်ဝႆ ၊ ယွၼ်းသူးၵၢဝ်ႇထိုင်ပႃးဝႃႈ ႁႂ်ႈၵူၼ်းမိူင်း ၼႂ်းမိူင်းႁူမ်ႈတုမ် တင်းသဵင်ႈ လွတ်ႈ ၽေးသၽႃႇဝ၊ ၽေးၵူၼ်းႁဵတ်း၊ ၽေးၶုၼ်မိူၵ်ႈမႂ်ႈသေၵမ်း ဝႃႈၼႆ။
လိူဝ်ၼၼ်ႉ ၾၢႆႇၵေႃႁူမ်ႈသၢင်ႈၸိုင်ႈတႆး ယိၼ်းၸူမ်းၶွပ်ႈၸႂ်ထိုင်ပႃး မိူင်းၶႄႇ၊ မိူင်းဢိၼ်ႊတီႊယႃႊ ဢိၵ်ႇပႃး တူင်ႇဝူင်းၵူႈ မိူင်းမိူင်း ဢွၼ်ၵၼ်ၶတ်းၸႂ်သႂ်ႇႁႅင်းၸွႆႈထႅမ် တွၼ်ႈတႃႇၵူၼ်းမိူင်းႁူမ်ႈတုမ် တေႉတေႉ ၼႆယဝ်ႉ။
ၵေႃႁူမ်ႈသၢင်ႈၸိုင်ႈတႆးၼႆႉ မိူဝ်ႈၵူၼ်းမိူင်းႁူမ်ႈတုမ် ၺႃးၽေးတၢင်းပဵၼ်ၶူဝ်းဝိတ်ႈ၊ ၽေးၼမ်ႉ၊ ၽေးသိုၵ်း ၸိူဝ်းၼၼ်ႉ ၵေႃႈ ၵမ်ႉၸွႆႈပၼ်မႃး ၸွမ်းၼင်ႇပွင်ပဵၼ်လႆႈ။ ယၢမ်းလဵဝ်ၵေႃႈ ၸင်ႇၶတ်းၸႂ်သႂ်ႇႁႅင်းသေ ၸွႆႈထႅမ်ပၼ် ၵူၼ်းမိူင်း ၸိူဝ်းထူပ်းၽေး ၽႅၼ်ႇလိၼ်ဝႆ (ဢိင်ႇသၼ်ႇ) ၼႂ်းၼႃႈလိၼ် ဢၼ်ယိုၼ်ႈမိုဝ်းတၢႆးၶိုတ်းထိုင်လႆႈၼၼ်ႉယူႇ ဝႃႈၼႆ။
ၼႂ်းၵေႃႁူမ်ႈသၢင်ႈၸိုင်ႈတႆး SSJAC ၼႆႉ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA၊ တပ်ႉသိုၵ်းၵူၼ်းမိူင်း ၸိုင်ႈတႆး သႅင်ၵႅဝ်ႉ လႄႈ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး SNLD ၸိူဝ်းၼႆႉ ၶဝ်ႈပႃးဝႆႉပဵၼ်လုၵ်ႈၸုမ်း။ ယိူင်း ဢၢၼ်းတႃႇၵေႃႇသၢင်ႈလွင်ႈယုမ်ႇယမ် ၼႂ်းၸၢဝ်းၶိူဝ်းတႆး လႄႈ တၢင်ႇၸၢဝ်းၶိူဝ်း ၼႂ်းၸိုင်ႈတႆးသေ ႁူမ်ႈၵၼ် ၵေႃႇတင်ႈ မႃး ၸဵမ်မိူဝ်ႈပီ 2013 ။ ယၢမ်းလဵဝ် မီးၸုမ်းၵူၼ်းၼုမ်ႇတႆး ဢိၵ်ႇ ၸုမ်းတူင်ႉၼိုင်တူင်ႇဝူင်းၵူၼ်း လၢႆလၢႆၸုမ်း ၼႂ်းၸိုင်ႈ တႆး ၶဝ်ႈႁူမ်ႈပွင်ၵၢၼ်တူင်ႉၼိုင်ဝႆႉပႃး ၼႆယဝ်ႉ။
တႅမ်ႈ- ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ