ၵေႃႁူမ်ႈသၢင်ႈၸိုင်ႈတႆး Shan State Joint Action Committee (SSJAC) ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸိုင်ႈတႆးပွတ်းႁွင်ႇ ယွၼ်ႉပၢင်တိုၵ်း သိုၵ်းမၢၼ်ႈ ယိုတ်းမိူင်းလႄႈ ၸုမ်းဢူၺ်းလီပွတ်းႁွင်ႇ။

တႄႇဢဝ် ပၢင်ယၼ်ႇသိုၵ်း 1027 ၼၼ်ႉမႃးသေ ႁဵတ်းႁႂ်ႈၵူၼ်းမိူင်းတႆး ပွတ်းႁွင်ႇ ဢွၼ်ၵၼ်ပၢႆႈၽေးသိုၵ်း ၼပ်ႉႁူဝ်သႅၼ် ယူႇတီႈ ၵေႃႁူမ်ႈသၢင်ႈၸိုင်ႈတႆး (SSJAC) လႆႈၸွႆႈထႅမ် မိူၼ်ၼင်ႇ ၸႄႈဝဵင်းလႃႈသဵဝ်ႈ၊ သီႇပေႃႉ၊ ၵျွၵ်ႉမႄး၊ ၼွင်ၶဵဝ်၊ မိူင်းယႆ၊ မိူင်းၶိူဝ်း၊ ၼမ်ႉလၼ်ႈ။ ယဝ်ႉၵေႃႈ ၵူၼ်းမိူင်းတႆးပွတ်းႁွင်ႇ ၸိူဝ်းပၢႆႈႁွတ်ႈထိုင် ၸႄႈဝဵင်းၵေးသီး၊ လၢႆးၶႃႈလႄႈ တူၼ်ႈတီး ၸိူဝ်းၼႆႉထႅင်ႈ။

ၸၢႆးသီႇႁႃႉၵျေႃႇ ၽူႈတႅၼ်းသၽႃး ၵေႃႉၵဝ်ႇ ၸႄႈဝဵင်းမိူင်းယႆ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ယူႇတီႈ ၼႂ်း SSJAC ႁဝ်းၶႃႈ ႁူမ်ႈမိုဝ်းၵၼ်သေ ၸွႆႈထႅမ်ၵူၼ်းပၢႆႈၽေးသိုၵ်းမႃးၼႆႉ ယူႇတီႈ SSPP ၵမ်ႉၸွႆႈဝႆႉငိုၼ်း 3 ႁဵင်သႅၼ်ပျႃး၊ တပ်ႉသိုၵ်းၵူၼ်းမိူင်းသႅင်ၵႅဝ်ႉ – ၵႃလီႉ 1 ႁဵင်သႅၼ်ပျႃး၊ ပႃႇတီႇႁူဝ်သိူဝ် SNLD 500 သႅၼ်ပျႃးလႄႈ ပီႈၼွင်ႉတီႈၸမ်ၵႆ ၵမ်ႉထႅမ်ၸွႆႈမႃး ၸိူဝ်းၼႆႉထႅင်ႈ”- ဝႃႈၼႆ။

သိုပ်ႇလၢတ်ႈဝႃႈ – “ယၢမ်းလဵဝ်တႄႉ ႁဝ်းၶႃႈ လႆႈၸွႆႈထႅမ်ၵႂႃႇ တင်းၼမ်ယဝ်ႉ။ တေႃႈလဵဝ် ငိုၼ်းတီႈဢၼ် ၵိုတ်းလိူဝ်ဝႆႉ ၼႆႉ ႁဝ်းၶႃႈ တေတူၺ်း ဢွင်ႈတီႈၵူၼ်းပၢႆႈၽေးသိုၵ်းႁဝ်း ဢၼ်ယၢပ်ႇၽိုတ်ႇလိူဝ်ႁႅင်းသေ ၸွႆႈထႅမ်ၵႂႃႇ ယွၼ်ႉဝႃႈငိုၼ်း ၵွင်ၵၢင်ႁဝ်းၶႃႈ ၵိုတ်းဝႆႉမွၵ်ႈ 400-500 သႅၼ်ပျႃး မွၵ်ႈၼႆႉၵူၺ်းလႄႈ တေတူၺ်းငဝ်းလၢႆးသေ ၸွႆႈထႅမ်ၵႂႃႇ ၸိူဝ်းဢွင်ႈတီႈ လူဝ်ႇတၢင်းၸွႆႈထႅမ် ႁႅင်းႁႅင်းၼၼ်ႉၶႃႈဢေႃႈ”- ဝႃႈၼႆ။

ပၢင်ယၼ်ႇသိုၵ်း 1027 ၼႆႉ တႄႇပဵၼ်မႃး မိူဝ်ႈဝၼ်းတီႈ 27/10/2023 ၼၼ်ႉမႃး ယူႇတီႈ ၸုမ်းဢူၺ်းလီပွတ်းႁွင်ႇ 3 ၸုမ်း မိူၼ်ၼင်ႇ တပ်ႉသိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းရၶႅင်ႇ AA ႁူမ်ႈၵၼ် လေႃႇတိုၵ်းတပ်ႉသိုၵ်းမၢၼ်ႈ ယိုတ်းမိူင်းမႃး ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ တီႈၸႄႈဝဵင်းလၢဝ်ႇၵၢႆး၊ ဝဵင်းၼမ်ႉၽႃႈ (သျိၼ်းသူၺ်ႇ ႁေႃႇ)၊ ၵုၼ်လူင်၊ သႅၼ်ဝီ၊ လႃႈသဵဝ်ႈ၊ ၵူတ်ႉၶၢႆ၊ ၼမ်ႉၶမ်း၊ မူႇၸေႊ ၸိူဝ်းၼႆႉမႃး။

ထိုင်မႃး ဝၼ်းတီႈ 25/06/2024 သိုၵ်းတဢၢင်း TNLA ႁူမ်ႈတင်း ၸုမ်း PDF သေ လေႃႇတိုၵ်း တပ်ႉသိုၵ်းမၢၼ်ႈ မႃးႁၢဝ်ႈႁႅင်းထႅင်ႈ ၼႂ်းၸႄႈဝဵင်းၵျွၵ်ႉမႄး၊ သီႇပေႃႉ၊ မိူင်းမိတ်ႈ၊ ၼွင်ၶဵဝ်၊ မိူင်းၵုတ်ႈ ၸိူဝ်းၼႆႉ။

လိူဝ်ၼၼ်ႉ တႄႇဢဝ် ဝၼ်းတီႈ 02/07/2024 ၼၼ်ႉမႃးသမ်ႉ သိုၵ်းၵဝ်ႈၵၢင်ႉ MNDAA ႁႅၼ်းသိုၵ်း လေႃႇတိုၵ်း တပ်ႉသိုၵ်းမၢၼ်ႈ မႃးႁၢဝ်ႈႁႅင်း ၼႂ်းၸႄႈဝဵင်းလႃႈသဵဝ်ႈ လၢမ်းထိုင် မိူင်းယႆလႄႈ သီႇပေႃႉ ၸိူဝ်းၼႆႉထႅင်ႈ ႁၢၼ်ႉတေႃႇထိုင်ယၢမ်းလဵဝ် သဵင်ၵွင်ႈယင်းပႆႇယဵၼ်။

ယွၼ်ႉပၢင်တိုၵ်း ၸိူဝ်းၼႆႉသေ ႁဵတ်းႁႂ်ႈၵူၼ်းမိူင်းတႆး ပွတ်းႁွင်ႇ လႆႈပၢႆႈၽေးသိုၵ်း ၼပ်ႉႁူဝ်သႅၼ် ယဝ်ႉၵေႃႈ လူႉတၢႆ ၼပ်ႉႁူဝ်ပၢၵ်ႇ၊ မၢတ်ႇၸဵပ်း ဢမ်ႇယွမ်း 1,000 လႄႈ ႁိူၼ်းယေး၊ ဝတ်ႉဝႃးၽႃသိူဝ်ႇ ၸိူဝ်းၼႆႉ လူႉၵွႆၸွမ်းတင်းၼမ် ၼႆယဝ်ႉ။

ၵွပ်ႈၼႆလႄႈ ယူႇတီႈ ၵေႃႁူမ်ႈသၢင်ႈၸိုင်ႈတႆး SSJAC သေ ၸင်ႇႁူမ်ႈၵၼ် ၸွႆႈထႅမ် ၵူၼ်းပၢႆႈၽေးသိုၵ်းမႃး။ ၼႂ်းလုၵ်ႈ ၸုမ်း SSJAC ၼႆႉသမ်ႉ ပႃးဝႆႉ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA  ၊ ပႃႇတီႇႁူဝ်သိူဝ် SNLD လႄႈ တပ်ႉသိုၵ်းၵူၼ်းမိူင်း သႅင်ၵႅဝ်ႉ ၸိူဝ်းၼႆႉ ႁူမ်ႈၵၼ်ၵေႃႇတင်ႈ ဝႆႉၸဵမ်မိူဝ်ႈ ပီ 2013 ။ ယိူင်းဢၢၼ်းတႃႇၵေႃႇသၢင်ႈလွင်ႈယုမ်ႇယမ်ၼႂ်းတႆးလႄႈ တင်းၸၢဝ်းၶိူဝ်းၼႂ်းၸိုင်ႈတႆး။ ယၢမ်းလဵဝ် မီးၸုမ်းၵူၼ်းၼုမ်ႇတႆး၊ ၸုမ်းၼၢင်းယိင်းတႆး ဢိၵ်ႇၸုမ်းတူင်ႉၼိုင်တူင်ႇဝူင်းၵူၼ်း ၼႂ်းၸိုင်ႈတႆး ၶဝ်ႈႁူမ်ႈ ပွင်ၵၢၼ်ဝႆႉပႃး။