မိူဝ်ႈၼႆႉ ဝၼ်းတီႈ 24/4/2026 တူၵ်းမႅၼ်ႈဝၼ်းၵေႃႇတင်ႈ တပ်ႉသိုၵ်းၸိုင်ႈတႆး SSA ၶွပ်ႈတဵမ် 62 ပီတဵမ် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး (SSPP/SSA) ၸတ်းပၢင်ၵႅဝ်ႈ တီႈတပ်ႉငဝ်ႈသိုၵ်း (989)၊ တပ်ႉငဝ်ႈသိုၵ်း 748 ၊ တပ်ႉငဝ်ႈသိုၵ်း 969 ယူႇလၢႆတီႈ မီးၵူၼ်းၶဝ်ႈႁူမ်ႈ 1700 ၵေႃႉ ၼႆယဝ်ႉ။
“တပ်ႉသိုၵ်းၸိုင်ႈတႆး ၼႆႉ တိုၼ်းဢမ်ႇၸႂ်ႈၸုမ်း သုၵ်ႉယုင်ႈဢူၼ်ၵဝ်း တိုၼ်းဢမ်ႇၸႂ်ႈၸုမ်း ႁၼ်ၵၢၼ်ၸိူဝ်ႉ ၸၢတ်ႈတိုၼ်ႈၵႅပ်ႈ၊ တိုၼ်းဢမ်ႇၸႂ်ႈၸုမ်းမိူၵ်ႈမႂ်ႈႁၢႆႉလိူင်း ၶႂ်ႈယိပ်းၵွင်ႈ ၵၢင်ႇသေ တဵၵ်းတဵင်လူလၢႆပေႉၵိၼ်ၵၼ် ၼၼ်ႉလႃးလႃး” ၼႆ SSPP/SSA ပိုၼ်ပၢၵ်ႇလၢတ်ႈဢွၵ်ႇဝႆႉၼင်ႇၼႆ။
ပၢင်ၵႅဝ်ႈဝၼ်းၵိူတ်ႇတပ်ႉသိုၵ်းၸိုင်ႈတႆးၼႆႉ မိူဝ်ႈပီ 2024 ၸတ်းႁဵတ်းတီႈငဝ်ႈငုၼ်းဝၢၼ်ႈႁႆး မီးပႃးၸွမ်သိုၵ်းလူင် ပၢင်ၾႃႉ ႁူဝ်ပဝ်ႈလူင် ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး ၶဝ်ႈႁူမ်ႈမွၵ်ႇလၢတ်ႈၶေႃႈၵႂၢမ်းပႃး၊ ပီ 2025 ၵေႃႈ ၸတ်းပၢင်ၵႅဝ်ႈတီႈငဝ်ႈငုၼ်းသေတႃႉ ဢမ်ႇလႆႈႁၼ် ႁူဝ်ပဝ်ႈလူင် SSPP/SSA ၶဝ်ႈႁူမ်ႈပႃးၸွမ်း။
ထိုင်မႃးပီ 2026 ဝၼ်းၵိူတ်ႇတပ်ႉသိုၵ်းၸိုင်ႈတႆး ၶွပ်ႈတဵမ် 62 ပီတႄႉ တီႈငဝ်ႈငုၼ်းဝၢၼ်ႈႁႆး ဢမ်ႇလႆႈၸတ်းႁဵတ်း ပၢင်ၵႅဝ်ယႂ်ႇလူင်သေ ၸတ်းႁဵတ်းပၢင်လူႇတၢၼ်း ၵၢပ်ႈသွမ်းၼႂ် သွမ်းဝၼ်း တီႈၸဝ်ႈသင်ႇၶ ၼႂ်းပိုၼ်ႉတီႈ ႁႂ်ႈပဵၼ်တီႈမၢႆတွင်းၵႂႃႇၵူၺ်း ၼႆယဝ်ႉ။
တပ်ႉသိုၵ်းၸိုင်ႈတႆး SSA ၼႆႉ ၸဝ်ႈၼွႆႉ သေႃးယၼ်ႇတ ဢွၼ်ႁူဝ် တႄႇၵေႃႇတင်ႈမႃး မိူဝ်ႈပီ 1958 လိူၼ် မေႊ ဝၼ်းတီႈ 21 ၼၼ်ႉ တင်ႈမႃးၸုမ်းလုၵ်ႉၽိုၼ်ႉ တပ်ႉသိုၵ်းၸိုင်ႈတႆး။ ဝၢႆးၼၼ်ႉ ပဵၼ်ဝႆႉလၢႆမူႇလၢႆ ၸုမ်းလႄႈ ထိုင်မႃး မိူဝ်ႈပီ 1964 လိူၼ်ဢေႊပရိူဝ်ႊ ဝၼ်းတီႈ 24 ၸဝ်ႈမႄႈ ၼၢင်းႁိူၼ်းၶမ်း ၵေႃႉပဵၼ် ၼၢင်းၶၢင်းႁူဝ် မႁႃႇတေႇဝီႇ ၸဝ်ႈၾႃႉလူင် ၸဝ်ႈသူၺ်ႇတႅၵ်ႈ ၸွမ်ၸိုင်ႈၵေႃႉႁႅၵ်ႈ မိူင်းႁူမ်ႈတုမ် ဢွၼ် ႁူဝ်သေ ၶွတ်ႇၽွတ်ႈပဵၼ်မႃး တပ်ႉသိုၵ်းၸိုင်ႈတႆး SSA (Shan State Army) ပဵၼ်ဢၼ်လဵဝ်ၵၼ်။
ယၢမ်းလဵဝ်တႄႉ ၶိုၼ်းပဵၼ်ၵႂႃႇ သွင်မူႇသွင်ၸုမ်း မိူၼ်ၼင်ႇ – ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA လႄႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA ယင်းပႆႇႁူမ်ႈႁွမ်းၵၼ် ၶိုၼ်းလႆႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ