မိူဝ်ႈဝၼ်းတီႈ 11 လိူၼ်မၢတ်ႉၶျ် ယၢမ်းၵၢင်ၼႂ် ဝၢႆးလင်သိုၵ်းမၢၼ်ႈ တင်း ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်း ၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ်ယဝ်ႉၼၼ်ႉ သိုၵ်းမၢၼ်ႈ မၢပ်ႇၼေးထၢင်ႇထိူမ် ၼိူဝ်ၵူၼ်းမိူင်း ၸိူဝ်းယူႇၼႂ်းပိုၼ်ႉတီႈဝၢၼ်ႈပုင်ႇဝူဝ်းၵမ်ႈၽွင်ႈဝႃႈ ၵဵဝ်ႇၵွင်ႉတင်း SSPP/SSA ၼႆသေ တီႉၺွပ်းဢဝ်ၵႂႃႇ ၸႅတ်ႈထၢမ် ႁၢၼ်ႉထိုင်ယၢမ်းလဵဝ်ၵေႃႈ ပႆႇပွႆႇဢွၵ်ႇမႃးၶိုၼ်း ၼႆယဝ်ႉ။
ၵူၼ်းမိူင်းပိုၼ်ႉတီႈ ၵေႃႉယူႇဝႆႉတီႈဝၢၼ်ႈပုင်ႇဝူဝ်း လၢတ်ႈတီႈၽူႈတွႆႇႁွၵ်ႈဝႃႈ “သိုၵ်းမၢၼ်ႈၶဝ် ၶဝ်ႈမႃးၼႂ်း ဝၢၼ်ႈႁႄ ၶဝ်ႈသွၵ်ႈ ၶဝ်ႈတဝ်ၼႂ်းဝၢၼ်ႈ ႁႃပိုတ်ႇၽၵ်းတူႁိူၼ်းၵူၼ်းမိူင်း လင်ၼိုင်ႈယဝ်ႉလင်ၼိုင်ႈႁႄ တီႉၺွပ်းဢဝ် ၵူၼ်းၼႂ်းဝၢၼ်ႈၵႂႃႇမွၵ်ႈ 6 ၵေႃႉၼႆႉ။ ပဵၼ်ၵူၼ်းၸၢႆးလၢႆလၢႆ။ မိူဝ်ႈလဵဝ်ၼႆႉ ၵူၼ်းဝၢၼ်ႈၵေႃႈ ဢမ်ႇ ႁတ်းဢွၵ်ႇႁိူၼ်း။ ဢမ်ႇႁတ်းဢွၵ်ႇဝၢၼ်ႈၵႂႃႇတၢင်းလႂ်။ ၶဝ်ၵႂႃႇၶျႃႉ (ဝၢင်း) ၵူၼ်းၶဝ်ဝႆႉၸွမ်းၵျွင်းမုၼ်ၸဝ်ႈၸိူဝ်းၼႆႉပႃး။ ၶဝ်ၺွပ်းဢဝ်ၵူၼ်းႁဝ်းၵႂႃႇဝႆႉတီႈလႂ်ၵေႃႈဢမ်ႇႁူႉ။ ၶဝ်မၢပ်ႇဝႃႈ ၵူၼ်းၸိူဝ်းၼၼ်ႉ ၵမ်ႉထႅမ်ပၼ် သိုၵ်းတႆး ၼႆၼၼ်ႉၼႃႇ” ဝႃႈၼႆ။
ၵဵဝ်ႇလူၺ်ႈ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) တင်း သိုၵ်းမၢၼ်ႈ ယိုဝ်းၵၼ် ၼႂ်းဢိူင်ႇဝၢၼ်ႈပုင်ႇဝူဝ်း ၸႄႈဝဵင်းၵျွၵ်ႉမႄးၼၼ်ႉသေ SSPP/SSA တႄႉ ပိုၼ် ၽၢဝ်ႇဢွၵ်ႇပဵၼ်တၢင်းၵၢၼ် တီႈၼႃႈလိၵ်ႈသိုဝ်ႇတူင်ႇဝူင်းၵူၼ်း SSPP Info ဝႆႉဝႃႈ – သိုၵ်းမၢၼ်ႈ တပ်ႉတိၼ်ဝႆး ၶမရ 506 ဢၼ်ပၵ်းသဝ်းဝႆႉယူႇၼႂ်းထုင်ႉၼမ်ႉလၼ်ႈၼၼ်ႉ ႁွင်ႉ ဢဝ်ၵူၼ်းဝၢၼ်ႈပုင်ႇဝူဝ်း ဢဝ်ပႃးၵႃးသုၼ်ႇတူဝ်ၶဝ်ၵႂႃႇ ၸူႉတုမ်ၵၼ်ၼႂ်းဝၢင်းၵျွင်းမုၼ်ၸဝ်ႈယဝ်ႉ ၵူၼ်းသိုၵ်းမၢၼ်ႈ ၶဝ်ႈၵႂႃႇသွၵ်ႈတဝ်ႇ ၼႂ်းႁိူၼ်းၵူၼ်းမိူင်း ။ သိုၵ်းမၢၼ်ႈယင်းတီႉ ၺွပ်းဢဝ်ၵူၼ်းၸၢႆး ၼႂ်းဝၢၼ်ႈပုင်ႇဝူဝ်း ၵႂႃႇၸႅတ်ႈထၢမ်။ ၽွင်းၸႅတ်ႈထၢမ်ၼၼ်ႉ ၵူၼ်းဝၢၼ်ႈၺႃးပေႃႉထုပ်ႉ၊ ဢဝ်မိတ်ႈထႅၵ်ႇၸွမ်းၵွင်းလင်ၸဵမ်ၸိူဝ်းၼႆႉ ဝႃႈၼႆ။
လႆႈႁူႉဝႃႈ ယၢမ်းလဵဝ် ၼႂ်းဢိူင်ႇပုင်ႇဝူဝ်း ၸႄႈဝဵင်းၵျွၵ်ႉမႄး သဵင်ၵွင်ႈယဵၼ်ဝႆႉသေတႃႉ သိုၵ်းမၢၼ်ႈ တင်း ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) ယင်းတိုၵ်ႉၶဵင်ႈ ၶႅင်ၵၢၼ်သိုၵ်းတေႃႇၵၼ်ဝႆႉသေ ၵူၼ်းမိူင်းပိုၼ်ႉတီႈတႄႉ ၵူဝ်ပဵၼ်ပၢင်တိုၵ်း၊ ၵူဝ်သဵင်ၵွင်ႈတႅၵ်ႇၶိုၼ်းလႄႈ ပၢင်ပွႆးသၢင်ႇလွင်း ၊ ပွႆးယၢတ်ႇၼမ်ႉ ၵျွင်းၸိူဝ်းႁၢင်ႈႁႅၼ်းဝႆႉတေၸတ်းႁဵတ်း ၼၼ်ႉၵေႃႈ ဢမ်ႇပဵၼ်ၸတ်းႁဵတ်းယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ