ၵူၼ်းမိူင်းၼႂ်းၸႄႈဝဵင်းမိူင်းယႆ ၺႃးၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၼႂ်းပိုၼ်ႉတီႈ တီႉၺွပ်း မတ်ႉ ဢဝ်ၵွင်ႈငႃ ယဵတ်ႈသႂ်ႇၶွၵ်ႈၶင် လူၺ်ႈဢမ်ႇမီးတၢင်းၽိတ်းသင် ႁိုင်ၶၢဝ်းတၢင်း မွၵ်ႈ 3 ဝၼ်းယဝ်ႉ ၸင်ႇပွႆႇဢွၵ်ႇမႃးၶိုၼ်း ။

မိူဝ်ႈၵၢင်လိူၼ်မေႊၼႆႉ ၵူၼ်းမိူင်းယႆၵေႃႉၼိုင်ႈ ၵႂႃႇၸႂ်းၵေႃႉပဵၼ်ပေႃႈမၼ်းၸၢႆး ဢၼ်ၺႃးၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈ ၼႄးဝႃႈဢမ်ႇသႂ်ႇၶွၼ်ႇၼႆသေတီႉၺွပ်းၵုမ်းၶင်ၶွၵ်ႈဝႆႉ တီႈၼႂ်းဢိူင်ႇသႅၼ်တေႃ ။ ၽွင်းၼၼ်ႉ သိုၵ်း SSPP ႁၼ်မၼ်းၸၢႆးသေ ၼႄးဝႃႈမၼ်းၸၢႆးထၢႆႇႁၢင်ႈတပ်ႉပၢင်သဝ်းၶဝ်၊ ထၢမ်ၸိုဝ်ႈၵူၼ်းလူင်ၶဝ် ၼႆသေ တီႉၺွပ်းယဵတ်ႈၶွၵ်ႈ ဝႃႈၼႆ။

ၸၢႆးၼုမ်ႇ ၵူၼ်းၸမ်ၸႂ် 2 ပေႃႈလုၵ်ႈ ဢၼ်ၺႃးသိုၵ်း SSPP တီႉၺွပ်းၵုမ်းၶင်ၼၼ်ႉ လၢတ်ႈၼႄတီႈၽူႈတွႆႇႁွၵ်ႈဝႃႈ – “ၵွပ်ႈဝႃႈ ဢမ်ႇသႂ်ႇၶဝ်ႈသႂ်ႇငိုၼ်း သႂၢင်းၶွၼ်ႇပၼ်တဵမ်ၼႆႁႄ ဢူႈၶဝ်ၼႆႉၺႃးတီႉသႂ်ႇၶွၵ်ႈဝႆႉ မီးလိူၼ်ပၢႆယဝ်ႉ။ ၵွပ်ႈၼၼ် လုၵ်ႈၸၢႆးမၼ်းၵႂႃႇထၢမ်ႁႃ ။ ၽိူဝ်ႇၵႂႃႇထိုင်တီႈဢၼ်ပိူၼ်ႈၶင်ဝႆႉဢူႈၶဝ်ၼၼ်ႉ သိုၵ်းတီႈၼၼ်ႈ သမ်ႉဝႃႈ “ဢူႈသူဢမ်ႇမီးတီႈၼႆႈယဝ်ႉ ။ ထုၵ်ႇသူင်ႇတူဝ်ၵႂႃႇႁဵတ်းသိုၵ်းယဝ်ႉ” ၼႆ။ ၵမ်းၼႆႉလုၵ်ႈမၼ်းၶိုၼ်းဝႃႈ “ႁဵတ်းသင် ဢမ်ႇပွင်ႇပၼ်လုၵ်ႈလၢင်း ပီႈၼွင်ႉၸိူဝ်ႉၶိူဝ်းမၼ်းၵွၼ်ႇလႃႇ၊ ပဵၼ်ၽႂ်ၵေႃႉႁွင်ႉၵႂႃႇ ၵႂႃႇႁဵတ်းသိုၵ်း တီႈၸဝ်ႈလႂ်” ၼႆလႄႈ ၶဝ်ၵေႃႈလၢတ်ႈ ၸိုဝ်ႈၸဝ်ႈသိုၵ်းၵေႃႉဢၼ်ၵုမ်းတီႈပေႃႈၶဝ်ၵႂႃႇႁဵတ်းသိုၵ်းၼၼ်ႉ။ ၵူၺ်းၸိုဝ်ႈၸဝ်ႈသိုၵ်း ဢၼ်ၶဝ်လၢတ်ႈမႃးၼၼ်ႉသမ်ႉ မီး ၸိုဝ်ႈမိူၼ်ၵၼ် လၢႆၵေႃႉဝႆႉလႄႈ ၸူးထၢမ်ဝႃႈ “ပဵၼ်ၵေႃႉလႂ်” ၼႆၵူၺ်းၶႃႈ။ ၽိူဝ်ႇထၢမ်ၸိူင်ႉၼၼ် ၵွၼ်းမူႇတီႈတပ်ႉ SSPP သႅၼ်တေႃ ၸိုဝ်ႈႁွင်ႉ ၸၢႆးၼေႃႇတႆးၼၼ်ႉ သင်ႇလုၵ်ႈ ၼွင်ႉမၼ်း မတ်ႉၵေႃႉပဵၼ်လုၵ်ႈၸၢႆးၼၼ်ႉ ။ တပေးမၼ်းသမ်ႉ ဢမ်ႇမႃးမတ်ႉၵမ်းလဵဝ်လႄႈ မၼ်းၸူးမိူဝ်းဢဝ်ၵွင်ႈယၢဝ်းမၼ်း မႃးငႃသႂ်ႇသေ မတ်ႉၵမ်းလဵဝ်ၶႃႈဢေႃႈ” ဝႃႈၼႆ။

ၵေႃႉပဵၼ် လုၵ်ႈၸၢႆး သိုဝ်ႉၶဝ်ႈၽၵ်းၵႂႃႇထၢမ်ႁႃဢူႈၶဝ် ယူႇယူႇမၼ်းၸၢႆးၵေႃႈသမ်ႉၺႃးမတ်ႉထႅင်ႈ ။ ၵူၺ်းၵႃႈ မၼ်းၸၢႆး ယုမ်ႇယမ်ဝႃႈ မၼ်းၸၢႆးဢမ်ႇလႆႈႁဵတ်းၽိတ်းသင် ၼႆသေ ၶိုၼ်းထၢမ်တီႈ ၵွၼ်းမူႇ ဢိူင်ႇသႅၼ်တေႃ ၼၼ်ႉဝႃႈ – “ႁဵတ်းသင်လႄႈမတ်ႉႁဝ်း ႁဝ်းမီးတၢင်းၽိတ်းသင်” ၵွၼ်းမူႇတပ်ႉ သႅၼ်တေႃ ၸၢႆးၼေႃႇတႆးၵေႃႈ လႆႈတွပ်ႇၵႂႃႇဝႃႈ “ၵွပ်ႈပိူဝ်ႈသူထၢမ်ႁႃၵူၼ်းလူင် ႁဝ်းၼႃႇ” ဝႃႈၼႆ။

လွင်ႈၼႆႉလႆႈႁူႉဝႃႈ ယွၼ်ႉၽူႈမီးပုၼ်ႈၽွၼ်း ၼႂ်းပႃႇတီႇၵၢၼ်မိူင်းၸုမ်းၼိုင်ႈ ၼႂ်းဝဵင်းမိူင်းယႆ ၸွႆႈၶဝ်ႈၵႄႈၵၢင် လၢတ်ႈ ပၼ်သေ ၵူၼ်းမိူင်းသၢမ်ၵေႃႉ ၸိူဝ်းၺႃးတီႉလူၺ်ႈဢမ်ႇမီး တၢင်းၽိတ်းသင်ၼၼ်ႉ ၸင်ႇလႆႈပူၼ်ႉဢွၵ်ႇၶွၵ်ႈမႃးၶိုၼ်း လီငၢမ်း ၼႆယဝ်ႉ။

ၵူၼ်းမိူင်းၵေႃႉထုၵ်ႇပူၼ်ႉပႅၼ် ၺႃးၸဝ်ႈၼႃႈတီႈ SSPP/SSA ၼႂ်းပိုၼ်ႉတီႈ ဢိူင်ႇသႅၼ်တေႃ တီႉၺွပ်းၼၼ်ႉ လၢတ်ႈ ၼႄတီႈၽူႈတွႆႇႁွၵ်ႈဝႃႈ “ မိူဝ်ႈလဵဝ်ၼႆႉ ႁဝ်းမႃးၽႅဝ်ႁိူၼ်း ၶိုၼ်းယဝ်ႉၵေႃႈ တိုၵ်ႉၵူဝ်ယူႇၶႃႈဢေႃႈ။ ၵူဝ်ၵူၼ်းလူင်ၶဝ် ႁူမဝ်သေ ထွမ်ႇၵႂၢမ်းလုၵ်ႈၼွင်ႉတပေးတင်းပိုၵ်းယဝ်ႉ ၶိုၼ်းမႃးႁဵတ်းတီႈႁဝ်းၶိုၼ်း။ လိူင်ႈပၼ်ႁႃႁဝ်းၼႆႉ ၽူႈယႂ်ႇ ၵူၼ်းလူင် တၢင်းငဝ်ႈငုၼ်းၵေႃႈလႅပ်ႈတေဢမ်ႇလႆႈႁူႉၸွမ်း။ ၶဝ်ၵေႃႈ ဢမ်ႇပၼ်ႁဝ်းတိူင်ႇ ပေႃးတိူင်ႇၼႆဢမ်ႇလႆႈၼႆ လွၵ်ႇငိုတ်ႈႁင်းႁဝ်းဝႆႉၼၼ်ႉၶႃႈၼႃႇ။ ၵွပ်ႈၼၼ် ၵူဝ်ၶႃႈဢေႃႈ။ ၵၢင်ၸႂ်ႁဝ်းတႄႉ ၶႂ်ႈႁႂ်ႈၾၢႆႇငဝ်ႈငုၼ်း ၸတ်းမႃးပၼ်ႁဝ်း ၵူၼ်းဢၼ်ႁဵတ်းၸွမ်းပၵ်းပိူင် ပေႃးမီးပၼ်ႁႃႁင်မႃးၵေႃႈ ၶႂ်ႈႁႂ်ႈၵႄႈလိတ်ႈၵၼ်ၼႂ်းလုမ်းဢဝ်ၵူၺ်း ပေႃးမီးတၢင်းၽိတ်း လူဝ်ႇလႆႈတူၵ်း ၶွၵ်ႈၼႆၵေႃႈ ၶႂ်ႈႁႂ်ႈတႅပ်းတတ်း ဢမူႉၵၼ်ၼႂ်းလုမ်းႁႄ ၸတ်းၵႂႃႇပဵၼ်တၢင်းၵၢၼ်ၵူၺ်း။ ၼႆႉႁဝ်းဢမ်ႇပႆႇ မီးတၢင်း ၽိတ်းသင်ႁႄ တီႉၵၼ် မတ်ႉၵၼ် ဢမ်ႇၶႂ်ႈပၼ်ၵၼ်လၢတ်ႈၵႂၢမ်း ၶႃႈၼႃႇ။ ၶႃႈၵႂႃႇလၢတ်ႈၾူၼ်းၵူၺ်းၵေႃႈ ၶဝ်တင်းၽိတ်းၸႂ်ႁႄ ဢဝ်ၵွင်ႈမႃးငႃၶႃႈ ၸမ်ႈသႂ်ႇၶႃႈ မတ်ႉၶႃႈ သႂ်ႇၶွၵ်ႈ။ ၵွပ်ႈၼၼ် ၶႂ်ႈယွၼ်းႁႂ်ႈ ၵူၼ်းလူင်တၢင်းငဝ်ႈငုၼ်းၶဝ် ပွႆႇမႃးပၼ် ၸတ်းမႃးပၼ်ၵူၼ်းလူင် ဢၼ်ႁဵတ်းၸွမ်းပၵ်းပိူင်ၼၼ်ႉ ၼႂ်းၼႃႈတီႈႁဝ်းၶႃႈဢေႃႈ” ဝႃႈၼႆ။

ၵဵဝ်ႇလူၺ်ႈလွင်ႈပၼ်ႁႃၼႆႉသေ ႁဝ်းၶႃႈ ၶတ်းၸႂ်ၵပ်းသိုပ်ႇ ၽူႈၶၢၼ်ပၢၵ်ႇ လႄႈ ၽူႈယႂ်ႇၵူၼ်းလူင် ၼႂ်းငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးၵေႃႈ ဢမ်ႇလႆႈ။