မိူဝ်ႈဝၼ်းတီႈ 9/6/2026 ယၢမ်းၵၢင်ၼႂ် 11 မူင်းၶိုင်ႈ သိုၵ်းၶၢင် KIA တင်း သိုၵ်းတႆး SSPP/SSA ပဵၼ်ပၼ်ႁႃ ထဵင်မေႃးၵၼ် လွင်ႈၵဵပ်းငိုၼ်းၵႃႈၶွၼ်ႇ မေႃႇၶမ်း တီႈသူပ်းပွင်ႇ (ၼမ်ႉတီး-ၼမ်ႉပူဝ်ႈ) ႁိမ်းဝၢၼ်ႈၵဝ်ႇသၢႆးၶၢဝ် ဢိူင်ႇၼမ်ႉဢုမ် ၸႄႈဝဵင်းမူႇၸေႊ။
ၵူၼ်းပိုၼ်ႉတီႈဢၼ်ၸမ်ၸႂ်တင်းသိုၵ်းသွင်ၸုမ်းလၢတ်ႈဝႃႈ – ငဝ်ႈငႃႇပၼ်ႁႃ ပဵၼ်ယွၼ်ႉ ၸုမ်းသိုၵ်းၶၢင် KIA ၸိူဝ်းတူၵ်းပုၼ်ႈၽွၼ်း ယူႇၼႂ်းပိုၼ်ႉတီႈ ဢိူင်ႇၼမ်ႉဢုမ် ႁွင်ႉဢဝ်ႁႅင်း ၵူၼ်း မွၵ်ႈ 10 ၵေႃႉ ၵႂႃႇတီႉၺွပ်းဢဝ် ၵူၼ်းသိုၵ်း SSPP/SSA ၸိူဝ်းတူၵ်းပုၼ်ႈၽွၼ်း ပႂ်ႉယၢမ်းဝႆႉတီႈမေႃႇၶုတ်းၶမ်း ၵႂႃႇ 3 ၵေႃႉ – ဝႃႈၼႆ။
မၼ်းၸၢႆး လၢတ်ႈၼႄတီႈၽူႈတွႆႇႁွၵ်ႈဝႃႈ “ပၼ်ႁႃမၼ်းၼႆႉ တႄႇတီႈမိူဝ်ႈဝၼ်းတီႈ 6 ပူၼ်ႉမႃးၼႆႉ သိုၵ်းၶၢင်ၶဝ် ၵႂႃႇယွၼ်းၶွၼ်ႇတီႈဢွင်ႈၶုတ်းၶမ်း ၶွင်ၸုမ်းသိုၵ်းတႆး။ ဝၼ်းၼၼ်ႉ လႆႈငိၼ်းဝႃႈ ၾၢႆႇသိုၵ်းတႆး လၢတ်ႈၶဝ်ဝႃႈ ဢမ်ႇပၼ်ၶွၼ်ႇဢၼ်သိုၵ်းၶၢင်ယွၼ်း။ ၵွပ်ႈဝႃႈ ၶဝ်ၵေႃႈ ဢမ်ႇၵႂႃႇၵဝ်း ဢမ်ႇၵႂႃႇယွၼ်းသင် တၢင်းသိုၵ်းၶၢင်။ မေႃႇၶုတ်းၶမ်း ဢၼ်သိုၵ်းတႆးၵုမ်းယူႇၼႆႉၵေႃႈ ပဵၼ်ၵၢၼ်တႃႇႁႃငိုၼ်းၵွင်ၵၢင်မုၵ်ႉၸုမ်း ဢမ်ႇၸႂ်ႈႁင်းသုၼ်ႇတူဝ်ၽႂ်ၼႆႁႄ လႆႈၵႄႈလိတ်ႈတွပ်ႇၵၼ်ၵႂႃႇၸိူင်ႉၼၼ်။ ထိုင်မႃးမိူဝ်ႈဝႃး (9/6/2026) သိုၵ်းၶၢင်သမ်ႉ ႁွင်ႉ ၵူၼ်း ၶဝ်ႁႄ ၶဝ်ႈၵႂႃႇၺွပ်းဢဝ်ၵူၼ်းသိုၵ်းတႆးလႄႈ သိုၵ်းတႆးၵေႃႈ ၸွမ်းၵႂႃႇယွၼ်းဢဝ်ၵူၼ်းၶဝ်ၶိုၼ်း ထိုင်တီႈၼႃႈပၢၵ်ႇၽၵ်းတူ တၢင်းၶဝ်ႈတပ်ႉၶၢင်ၼၼ်ႉႁႄ လႆႈပဵၼ်သူပ်းပဵၼ်ၵႂၢမ်း ၾၢႆႇ သိုၵ်းၶၢင်ပႃးတိၼ်ပႃးမိုဝ်းၵူၺ်းဢမ်ႇၵႃး သႂၢင်းၵွင်ႈ ၼႄပႃးလႄႈ ၾၢႆႇတၢင်းသိုၵ်းတႆးၵေႃႈ လႆႈသႂၢင်းၵွင်ႈငႃ တေႃႇၶိုၼ်းယူႇ။ ၵူၺ်းၵႃႈ ဢမ်ႇတၼ်းထိုင်တီႈသဵင်ၵွင်ႈ တႅၵ်ႇၼင်ႇၵဝ်ႇ ၶႃႈ”- ဝႃႈၼႆ။
လႆႈႁူႉဝႃႈ ၵူၼ်းသိုၵ်းတႆး SSPP/SSA လႆႈဢုပ်ႇဢူဝ်း ငူပ်ႉငီႉၸွမ်း ၸဝ်ႈၼႃႈတီႈ သိုၵ်းၶၢင် ၵေႃႉႁပ်ႉပုၼ်ႈၽွၼ်း ယူႇဝႆႉၼႂ်းပိုၼ်ႉတီႈၼၼ်ႉသေ ဢဝ်ၵူၼ်းၸိူဝ်းၺႃးတီႉၺွပ်းၵႂႃႇ 3 ၵေႃႉၼၼ်ႉ ဢွၵ်ႇမႃးၶိုၼ်းလႆႈ လူၺ်ႈတီႈသဵင်ၵွင်ႈ ဢမ်ႇတႅၵ်ႇ ဝႃႈၼႆ။
ၵဵဝ်ႇၵပ်းလူၺ်ႈလွင်ႈၼႆႉ ၽူႈမီးပုၼ်ႈၽွၼ်း ၼႂ်းၸုမ်းသိုၵ်းတႆး SSPP/SSA ၸိူဝ်းတူင်ႉၼိုင်ယူႇၼႂ်းပိုၼ်ႉတီႈ လၢတ်ႈ ၼႄတီႈၽူႈတွႆႇႁွၵ်ႈဝႃႈ – “ၾၢႆႇမဵဝ်ႉၼႄႇမူးၶဝ် ၶိုၼ်းမႃးယွၼ်း တွင်းပၢၼ်ႇ တီႈၸုမ်းႁဝ်း ဢုပ်ႇၵၼ် ယဝ်ႉလီငၢမ်းႁႄ ၶဝ်ၵေႃႈပွႆႇပၼ်ၶိုၼ်းၵူၼ်းႁဝ်းမႃးတင်းသဵင်ႈယဝ်ႉ။ ပိူင်လူင်မၼ်းတႄႉ ၶဝ်ၶႂ်ႈဢၢၼ်းၵဵပ်းၶွၼ်ႇ ၼႂ်းမုၵ်ႉၸုမ်း။ ၼႆႉမၼ်း ၵဵဝ်ႇ ၸွမ်းမုၵ်ႉၸုမ်း ပဵၼ်ၵၢၼ်ၸုမ်းတေႃႇၸုမ်း ၶဝ်ၵေႃႈယႃႇမႃးၵဵပ်းႁဝ်း ႁဝ်းၵေႃႈဢမ်ႇၵႂႃႇ ၵဵပ်းၶဝ်ႁႄဢမ်ႇၵႃး ပေႃးဢဝ်ၸုမ်းဢူၺ်းလီဝႃႈ လွင်ႈမႃႇႁႅင်းၵေႃႈယဝ်ႉ ၶဝ်ႈၼမ်ႉတၢင်းၵိၼ် ၵေႃႈယႃႇ ၸွႆႈထႅမ်ၵၼ်မႃးတႃႇသေႇယူႇ။ လွင်ႈပိူင်ၶွၼ်ႇၼႆႉ ႁဝ်းၵေႃႈမီးယူႇၼႆ လႆႈဢုပ်ႇၵႄႈလိတ်ႈၵၼ်ယဝ်ႉတူဝ်ႈလီငၢမ်းၵႂႃႇယဝ်ႉ။ ဢၼ်လႆႈဢဝ်ငဝ်းႁၢင်ႈတူင်ႉ ၽႄႈၶိုၼ်ႈၼိူဝ်သိုဝ်ႇတူင်ႇဝူင်းၵူၼ်းၵႂႃႇၼၼ်ႉၵေႃႈ ၶႂ်ႈႁႂ်ႈၵူၼ်းၼုမ်ႇတႆးႁဝ်းဢဝ်တူဝ်ယၢင်ႇသေ မီးတၢင်း ႁတ်းႁၢၼ် ၼႆဢေႃႈ။ ႁဝ်းၵေႃႈ တေႃႇသူႈၸွမ်းလွင်ႈမၢၼ်ႇမႅၼ်ႈတြႃးမၼ်းၵူၺ်းၼင်ႇၵဝ်ႇၶႃႈ” ဝႃႈၼႆ။
လႆႈႁူႉဝႃႈပၼ်ႁႃၼႆႉ ၾၢႆႇသိုၵ်းၶၢင် KIA တႄႇမႃးဢွၼ်တၢင်း သိုၵ်းတႆး တင်း သိုၵ်းၶၢင် ၵႄႈလိတ်ႈပၼ်ႁႃၵၼ် ယဝ်ႉတူဝ်ႈလီငၢမ်းၵႂႃႇ ယၢမ်းတၢမ်းၶမ်ႈ 2 မူင်းပၢႆ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ