ဝၢႆးလင် သိုၵ်းမၢၼ်ႈ ယိုတ်းမိူင်း ၶၢဝ်းတၢင်း 4 ပီမႃးၼႆႉ ၵူၼ်းမိူင်း ၼႂ်းၸိူင်းၸႄႈၵႅင်း မၢတ်ႇၸဵပ်းလူႉတၢႆ ၼႂ်းၵႄႈပၢင်တိုၵ်း ၸမ်မိုၼ်ႇၵေႃႉ ဝႃႈၼႆ။

ၼႂ်းၼၼ်ႉ လူႉတၢႆ 5,000 ပၢႆ မၢတ်ႇၸဵပ်း မွၵ်ႈ 4,000 ၵေႃႉ၊ မၢင်ၸိူဝ်းလူႉတၢႆ ယွၼ်ႉသိုၵ်းမၢၼ်ႈ ႁဵတ်းႁၢႆႉၶႃႈတၢႆ ၊ မၢင်ၸိူဝ်းသမ်ႉ ၺႃးၸုမ်းလုၵ်ႉၽိုၼ်ႉ ႁဵတ်းႁၢႆႉၶႃႈတၢႆၼႆ ၸုမ်း ၶူၼ်ႉၶႂႃႉလွတ်ႈလႅဝ်း Data For Myanmar ၵဵပ်းၶေႃႈမုလ်းႁၢႆးငၢၼ်းဝႆႉ ၼႂ်းဝၼ်းတီႈ 12/03/2025 ၼႆႉၼင်ႇၼႆ။

ၼႂ်းတိူင်းၸႄႈၵႅင်း ၵူၼ်းလူႉတၢႆ 5,000 ပၢႆၼၼ်ႉ ယွၼ်ႉသိုၵ်းမၢၼ်ႈၶႃႈတၢႆသေ တၢႆ 2,800 ပၢႆ ၊ ယွၼ်ႉၸုမ်းလုၵ်ႉၽိုၼ်ႉသေ ၵူၼ်းမိူင်းၺႃးၶႃႈတၢႆ 1,200 ပၢႆ ၊ ၽွင်းပၢင်တိုၵ်း ၵူၼ်းမိူင်းလူႉတၢႆ 900 ပၢႆ ဝႃႈၼႆ။

ယွၼ်ႉပတိၵ်ႈၶၢတ်ႈသိုၵ်းသိူဝ်သေ ၵူၼ်းမိူင်းလူႉတၢႆၼမ်သုတ်းၼႆႉ ပဵၼ်ၼႂ်းၸႄႈတွၼ်ႈသူၺ်ႇပူဝ်ႇ တင်း ၸႄႈဝဵင်းၵၢၼ်ႉပလူႇ။ ၼႂ်းၼၼ်ႉပႃး ၵူၼ်းမိူင်း ဢႃယု 18 လူင်းတႂ်ႈ 300 ပၢႆသေ ဢၼ်ဢမ်ႇယႅၵ်ႈလႆႈဝႃႈ ပဵၼ်ယိင်းႁိုဝ် ပဵၼ်ၸၢႆး ၼႆၼၼ်ႉ မီးဝႆႉ 300 ပၢႆ ဝႃႈၼႆ။

ဢိင်ၼိူဝ်လွင်ႈၼႆႉ ၾၢႆႇသိုၵ်းမၢၼ်ႈတင်း ၸုမ်းလုၵ်ႉၽိုၼ်ႉၼႂ်းပိုၼ်ႉတီႈတႄႉ ဢမ်ႇႁၼ်ပိုၼ်ၽၢဝ်ႇ ဢွၵ်ႇပဵၼ်တၢင်းၵၢၼ်သင် – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။